نويت اجنط الياريس واغير الكاوتش ! نصائحكم

[Ahmod]

السلام عليكم ورحمة الله وبركاته

طبعا لان ثبات العربية عندي مش ماشي مع طريقة سواقتي خالص

اي غرزة او مناورة على سرعة العربية بتبقى مراجيح

وفي الملفات الثبات في الضياع ( طبعا على سرعات )

فمحتاج اثبت العربية اكتر من كدة شوية وفكرت في اني اركب جنط 16

معايا ميزانية حوالي 6 الاف جنيه

المطلوب

1 - هغير زيت الماتور والفلاتر وطقم تيل واعملها الصيانة بتاعتها (صيانة 30 الف)

2 - اغير الكاوتش (لان العربية معايا بقالها داخل في خمس سنين موديل 2007 )

3 - اركب جنط 16

فهل كدة الميزانية دي هتكفي ؟ ؟

علما اني ان شاء الله ناوي اجيب الكاتوش بيرجيسدون بوتينزا نفس النوع الموجود عندي في العربية حاليا بس مقاس اعرض

فحضراتكم شايفين ايه احسن مقاس للكاوتش مع الجنط 16 انا عايز اعرضه شوية عن اللي موجود بحيث يعزز الثبات وفي نفس الوقت ماتبقاش العفشة ناشفة اوي وتفضل العربية محتفظة بالنعومة بتاعتها

وبالنسبة للجنط لو افترضت ان ال 4 فرد كاوتش هيبقو في حدود 2500 مع قول 1000 صيانة وتغيير زيوت وغيره

هل 2500 تكفي انها تجيب جنط كويس مايتعبش العفشة ؟ واحسن نوع ايه ؟ ؟

ياريت نصائحكم عشان معنديش خلفية كويسة بصراحة ومش عايز يتعمل عليا شغل او اجيب حاجة وتطلع مش قد كدة او تتعبلي العفشة

ومشكورين مقدما

[mohammadrashee]

متغيرش تيل لسه كمان 50000 كيلو

[Ahmod]

متغيرش تيل لسه كمان 50000 كيلو

اصل العربية بقالها سنتين ماعملتش فيها اي حاجة غير تغيير زيت الماتور

واخر صيانة عملتها اعتقد صيانة ال 10 الاف او ال 15 الف مش متذكر بالظبط

فحاسس ان فيه حجات عمرها الافتراضي خلص

صحيح مش بمشي بالعربية كتير يمكن مشوار كل تلت اربع ايام وباقي الاسبوع مركونة

بس برضوا ماتنساش ان العربية بقالها داخل في خمس سنين وعوامل الرطوبة والجو والتاكل والكلام ده اكيد بياثر

[KiNgMaX]

ياريس يعنى انسى
ولا يهمك عوامل ولا غيره
التيل طالما شغال سيبه والكاوتش هات زى الى فيها ولو انى شايف انه لسه بدرى عليه انا غيرته على 75000 كم
بالأمانه انا كعيت دم قلبى فى صيانات العربية فى التوكيل وطلع كله هجص العربية حاجتها معمرة فوق ماتتصور ماتقلقش انت بس عليها
غير الزيت والفلتر واى حاجة فعلا محتاجة تتغير ووفر فلوسك فى الباقى

[asemx1]

هههههههههه اولا لو هتغير تيل سيبه عندك علشان هاخده منك احطه فى عربيتى ( بتكلم جد )
ثانيا الكاوتش برضو سيبه عندك ممكن ابقى احطه برضو فى عربيتى
ثالثا لو لقيت حد بيبيع الكاوتش الاصلى ( بوتنزا يابانى ) مقاس العربيه قولى فين بالظبط وبكام
رابعا تجنيط فقط بدون تهبيط ( مش هتحس بفرق اوى ) وهيبقى شكل العربيه وحش ( عالى )

تحياتى لك

[mohammadrashee]

البوتينزا الأصلي الياباني موجود في بريدجيستون انا سالت عليه الفرده600 جنيه وكمان خصم المنتدى
يا جماعة الخير اللي معاه ياريسي واللي معهوش الياريس متعملش فيها حاجه الا لما تكون محتاجاها فقط ومحدش يسمع كلام التوكيل
من الآخر
صيانة الياريس = زيوت وفلاتر - لغاية 100 الف كيلو
بعد كده ممكن تفكر




شكرا

[أبو عبدالله]

البوتينزا الأصلي الياباني موجود في بريدجيستون انا سالت عليه الفرده600 جنيه وكمان خصم المنتدى
يا جماعة الخير اللي معاه ياريسي واللي معهوش الياريس متعملش فيها حاجه الا لما تكون محتاجاها فقط ومحدش يسمع كلام التوكيل
من الآخر
صيانة الياريس = زيوت وفلاتر - لغاية 100 الف كيلو
بعد كده ممكن تفكر




شكرا

مع كامل احترامي للأراء
ولكن مش كل حاجه التوكيل بيقول عليها تبقى وحشه
لو انت معاك فلوس الصيانة اللي مكتوبه في الكتالوج بتاع العربيه ...... اعملها
لو انت عاوز تحافظ على عمر عربيتك وتخليها مريحاك لأطول فترة ممكنه في عمرها

لو مش فارقة معاك وهتبيعها في اقرب فرصه ومش فارق معاك عمرها فمفيش مشكلة اعمل اللي انت عاوزه

العربيه موديل 2007
يعني عدى عليها حوالي ما يقرب من 5 سنين
حضرتك كل الزيت اللي موجوده في العربيه عمرها الأفتراضي كيلوهات وايضا زمن
وكل الزيوت لا يتعدى عمرها الأفتراضي عن 3 سنوات
ايوه العربيه شغاله ماشيه ولكن مش في كامل كفائتها وايضا الزيت موجود وشغال ولكن مش قايم بشغله كويس وده كله على حساب الأهلاك الذاتي لكل القطع اللي فيها احتكاك وزيت
يعني عندك زيت الفتيس وزيت الفرامل
الأتنين دول مهمين جدا وفي الكتالوج هتلاقيه عمرهم مش اكتر من 3سنوات
فأنا رايي انك مادام معاك الفلوس وومهتم بالحفاظ على العربية وعمرها الأفتراضي فاتبع كتالوج العربيه وتأكد انه هو الأصلح مهما حدث
وايضا التيل
التيل بعد فتره زمينة بيمتص الرطوبة من الجو وبيحجر يعني بينشف
ايوه هيضرب فرامل مفيش مشلكة بس اكيد مش في كامل كفائتها وايضا كله على حساب الطنابير
يعني هياكل في الطنابير اكتر من العادي وبالتالي عمرها الافتراضي هيقل على حساب عدم تغيير التيل

ياريت تراجع الكتالوج بتاع الصيانة وتشوف كل حاجه مدتها اد ايه وعمرها الأفتراضي اد ايه وتشوف حالة عربيتك ايه

[mohammadrashee]

مع كامل احترامي للأراء
ولكن مش كل حاجه التوكيل بيقول عليها تبقى وحشه
لو انت معاك فلوس الصيانة اللي مكتوبه في الكتالوج بتاع العربيه ...... اعملها
لو انت عاوز تحافظ على عمر عربيتك وتخليها مريحاك لأطول فترة ممكنه في عمرها

لو مش فارقة معاك وهتبيعها في اقرب فرصه ومش فارق معاك عمرها فمفيش مشكلة اعمل اللي انت عاوزه

العربيه موديل 2007
يعني عدى عليها حوالي ما يقرب من 5 سنين
حضرتك كل الزيت اللي موجوده في العربيه عمرها الأفتراضي كيلوهات وايضا زمن
وكل الزيوت لا يتعدى عمرها الأفتراضي عن 3 سنوات
ايوه العربيه شغاله ماشيه ولكن مش في كامل كفائتها وايضا الزيت موجود وشغال ولكن مش قايم بشغله كويس وده كله على حساب الأهلاك الذاتي لكل القطع اللي فيها احتكاك وزيت
يعني عندك زيت الفتيس وزيت الفرامل
الأتنين دول مهمين جدا وفي الكتالوج هتلاقيه عمرهم مش اكتر من 3سنوات
فأنا رايي انك مادام معاك الفلوس وومهتم بالحفاظ على العربية وعمرها الأفتراضي فاتبع كتالوج العربيه وتأكد انه هو الأصلح مهما حدث
وايضا التيل
التيل بعد فتره زمينة بيمتص الرطوبة من الجو وبيحجر يعني بينشف
ايوه هيضرب فرامل مفيش مشلكة بس اكيد مش في كامل كفائتها وايضا كله على حساب الطنابير
يعني هياكل في الطنابير اكتر من العادي وبالتالي عمرها الافتراضي هيقل على حساب عدم تغيير التيل

ياريت تراجع الكتالوج بتاع الصيانة وتشوف كل حاجه مدتها اد ايه وعمرها الأفتراضي اد ايه وتشوف حالة عربيتك ايه

بارك الله فيك أبو عبد الله
كلامك هو كلامي بالظبط لو تلاحظ انا قولت تغيير زيوت وفلاتر
يعني قطع الغيار لأ
زي تيل الفرامل ميتغيرش عشان السنين انما الزيوت طبعا


شكرا

[Ahmod]

والله يا جماعة انتو حيروتني

انا الحمد لله العربية مافيهاش مشاكل معايا خالص

كل الموضوع اني عايز اوديها صيانة ال 30 الف من باب اني ابقى مطمن على العربية بحكم انها بقالها اكتر من سنتين معملتلهاش اي نوع من انواع الصيانة فانا حاسس ان فيه حجات محتاجة تتغير كفلاتر وتربيط عفشة وغيره خاصا اني ركبت الرصيف مرة وكذا بلاعة عالية قبل كدة ومن كم يوم خدت بلاعة وسمعت اكن صوت حاجة اتقطمت فعايز اشيك على العفشة لان مرة واحد عفشجي قالي المقص الشمال عندك محتاج يتغير فعايز اطمن

اخر صيانة عملتها كانت صيانة ال 10 الاف تقريبا مش متذكر كان فيه صيانة في ال 15 الف ولا لاء

والكلام ده كان من حوالي سنتين ونص

هو صحيح انا مش بمشي بالعربية كتير يعني اخري مشوار ولا اتنين في الاسبوع عشان كدة هي عاملة كيلو متر قليل بس اكيد بحكم ان العربية بقالها خمس سنين فاكيد في حجات عايزة تتغير وفي حجات عمرها الافتراضي خلص

يمكن فعلا حجات العربية معمرة بس الصيانة والتجديد هتطول من العمر الافتراضي للعربية ولا ايه ؟

انا كل اللى بفكر فيه اني اوديها صيانة ال 30 الف مش اكتر من كدة واشيك على تيل الفرامل لان سعات بحس الفرامل بتهيس مني

واما فكرة الكاوتش فانا مش عارف ان كان سليم ومش محتاج تغيير ولا محتاج تغيير

الناس بتقول بيتغير عند 50 الاف او خمس سنين ايهما اقرب فعشان كدة فكرت اغير الكاوتش

والجنوط عشان الثبات واذا كان الجنط بيفرق مع الفيرنا وبيثبتها نوعا ما فاكيد هيفرق مع الياريس

اكيد مش هيزود الثبات بنسبة كبيرة بس على الاقل هيحسنه ولا انتو شايفين ايه ؟ ؟

[mohammadrashee]

تصدق زعلت منك
بنتكلم على الياريس تقولي فيرنا
عيييييييييييب
بالنسبه للزيوت والفلاتر تتغير في ميعادها سواء كيلومتر او وقت
بالنسبه للكاوتش يشتغل معاك بس مش امان بعد انتهاء تاريخ الصلاحيه
بالنسبه للخبطه لازم تكشف وتشوف فيه ايه بالظبط عشان مفيش حاجه تانيه تبوظ
بالنسبه للمقص متغيرش إلا لما واحد ثقه يقولك انه فعلا عايز يتغير وممكن كمان كدا واحد محترمين يشوفوا العربيه غير كده متغيرش لأن فيه كتير بتوع زوايا مبيفهموش
عربيتك زي الفل ما شاء الله



شكرا

[Ahmod]

تصدق زعلت منك
بنتكلم على الياريس تقولي فيرنا
عيييييييييييب
بالنسبه للزيوت والفلاتر تتغير في ميعادها سواء كيلومتر او وقت
بالنسبه للكاوتش يشتغل معاك بس مش امان بعد انتهاء تاريخ الصلاحيه
بالنسبه للخبطه لازم تكشف وتشوف فيه ايه بالظبط عشان مفيش حاجه تانيه تبوظ
بالنسبه للمقص متغيرش إلا لما واحد ثقه يقولك انه فعلا عايز يتغير وممكن كمان كدا واحد محترمين يشوفوا العربيه غير كده متغيرش لأن فيه كتير بتوع زوايا مبيفهموش
عربيتك زي الفل ما شاء الله



شكرا

مش القصد طبعا يا باشا اني اقارن الياريس بالفيرنا ابدا

كل القصد ان الجنوط بتفرق في الثبات حتى مع الفيرنا فتوقعي انها ان شاء الله تزودلي الثبات عندي

لان البشمهندس عاصم واكتر من واحد تاني قالي الجنوط مش هتزود الثبات زي مانت متخيل فده اللى انا خايف منه

اصل ان شاء الله هجيب حاجة كويسة وغالية فاكيد مش هركبهم للمنظر والشكل اهم حاجة عندي الثبات قبل اي حاجة

فلو ركبت الجنوط وطلعت مش بتزود الثبات هتبقى مشكلة

طيب الكاوتش فترة انتهاء صلاحيته بعد قد ايه ؟

[asemx1]

ايه علاقة ارتفاع العربية عن الارض بالثبات عالسرعات العالية ؟
ايه علاقة السبويلر والعتب بالثبات في المنحنيات مع السرعه ؟
ليه دايما لما تقابلنا عربية ثباتها ضعيف مع السرعات بنفكر اول حاجه في تغيير الكاوتش؟


والكثير من الاسئلة المتعلقة بالايرو ديناميكيه والثبات تجد اجابتها بقرائتك لهذه المقال؟

اعتقد كلنا فكرنا في النقطتين دول ... انسيابيه العربيه و ثباتها ... انا عن نفسي ...الموضوع ده كان دايما شاغلني جدا من وانا صغير ...

وكنت دايما اقعد افكر مع نفسي .... اكتر شكل انسيابي هو نقطه المياه ... طيب ليه بنفكر نركب اسبويلر للعربيه علشان نحسن انسيابيتها !!! وليه عربيات السباقات بتكون ليها شكل صاروخي مميز زي الفورميلا مثلا مش شبه البيتلز

المهم مع الوقت عرفت شويه حاجات قلت احكيلكم عنها

بس الاول احب اوضح 3 نقاط :-
الموضوع لو تعمقنا فيه ...كبير اوي وليه مهندسين متخصصين بيشوفوه وهما بيصممو العربيه .... علوم فضاء و طيران و قواعد ميكانيكيه و فيزيائيه ... يعني حتوه وممكن اتوه الناس معايا


مقدمه
العربيه منظومه متكامله و بالتالي انسيابيه العربيه و ثباتها من العوامل المترابطه في المنظومه دي ...

بس الاول محتاجين نحدد بعض التعريفات المهمه ... التعريفات دي مش تعريفات علميه و لكنها مجرد وصف او تبسيط للمصطلحات


ايه المقصود بالانسيابيه (Aerodynamics):-
انسيابيه الشكل مقصود بيها درجه مقاومه الهواء للشكل ..
وبيتم التعبير عنها بمعامل مقاومه الجر او Drag Coefficient
وبالتالي الجسم كل ما كان انسيابي الشكل كل ما قلت درجه مقاومه الهوا ليه كل ما يزيد الثبات

Down Force
مصطلح يعبر عن قوه الضغط اللي بتعملها العربيه على الطريق نتيجه وزنها اوشكلها او استخدامها اجنحه او سبويلرز او اعتاب ... ومع السرعه الكبيره للعربيه الهوا بيضغط على الاجنحه و بالتالي يشكل قوه ضغط اضافيه لاسفل يزيد من تماسك العربيه بالطريق او ما يطلق عليه GRIP

Ground Effect
مصطلح بيعبر عن مدى التصاق العربيه بالطريق نتيجه لعدم وجود ارتفاع بينها وبين الطريق او بمعنى ان الخلوص صغير جدا لدرجه تمنع مرور الهوا من تحت العربيه وبالتالي ممكن ندعي ان العربيه دي ملصوقه بالارض .. زي كده الشماعات و الشماسات اللي بتتثبت بحته كاوتشه بالضغط ... وبالتالي تفريغ الهوا بيلزقها بالازاز او السيراميك
وبالتالي ال Ground Effectمقصود بيه التصاق العربيه بالارض نتيجه عدم وجود هوا تحتها يعمل عمليه رفع او Lift

LIFT
او قوه الرفع لاعلى زي جناح الطياره بيقابل الهوا وبيعمل فرق ضغط فوق و تحت الجناح فيرفع الجسم لفوق

نبتدي الكلام

هل الشكل بس هو اللي بيحدد الانسيابيه
في عوامل تانيه منها ملمس السطح ( السطح الناعم انسيابي عن السطح الخشن )
السرعه ... كلما زادت السرعه زادت مقاومه الهواء
التفاصيل ... مرايات – مقابض الابواب – مساحات – فتحات الهواء للراياتير - ...

مثلا البيتلز اول ما ظهرت في الثلاثينات كان معامل الجر ( 0.38 ) في حين انها بعد كده زاد معدل الجر ( 0.48)
والسبب كان في رفع الفوانيس ( فوانيس رأسيه ) و استخدام كاوتش اعرض وفوانيس اشارات فوق الرفارف ... بالرغم من ان الشكل متغيرش .. لكن التفاصيل اختلفت



بيتلز الثلاثينات و الاربعينات

بيتلز من الستينات
وده بيوضح ان اي تفاصيل صغيره جدا ممكن تفرق في معامل الانسيابيه

ايه الهدف من الشكل الانسيابي :-
1- توفير الوقود نتيجة قله الاحتكاك بالهواء ... وبالتالي الوصول الي السرعه المطلوبه باقل معدل استهلاك للوقود
2- تحقيق اعلا سرعه قصوى ممكنه


Aptera Typ-1 .. محاوله الوصول لاقل معامل جر = 0.15 للمساعده على تحقيق اقل معدل استهلاك للوقود ... هي شبه الطياره وسرعتها يقال حتعدي 137 كم/ساعه ... متهيألي لو زادت عن كده ممكن تطير فعلا



مع العلم انه مع السرعه القصوى للعربيه بتكون اعلا مقاومه من الهوا و بالتالي بيزيد جدا معدل استهلاك الوقود
كمان معامل مقاومه الهوا بيزداد بمعادله تربيعيه مع زياده السرعه ... وده سبب ان السرعه الاقتصاديه غالبا بتكون 90 ... اعلا غيار – اقل عدد دورات للموتور – مع انسب معادله مقاومه للهوا

ليه بنقول ان نقطه المياه هي افضل شكل انسيابي
لسبب بسيط جدا ... المياه ملهاش شكل محدد و بالتالي اللي بيديها الشكل ده هو الهوا نفسه ... بمعنى ان الشكل ده هو محصله توازن القوى الطبيعيه الناتجه عن مقاومه الهوا لشكل النقطه ...او بمعنى ابسط ده اسهل شكل ينساب بيه الهوا على نقطه الميه ( اللي كان ممكن تبقى كوره مثلا او اي شكل مجعلص لولا وجود الهوا )


بريوس .. عربيه تويوتا الهجين ... ومحاوله الوصول لافضل شكل انسيابي لعربيه تجاريه ... معامل الجر = 0.26

طيب ايه افضل شكل انسيابي في المجال الصناعي
الصاروخ ....او طياره بدون اجنحه ... لان دور الاجنحه المناوره و الاتزان في الجو
وبالتالي اسرع عربيه في العالم حنلاقي شكلها شبه الصاروخ علشان تقدر توصل لأقصى سرعه ممكنه



و نوصل لنقطه تانيه ....
لما الشكل الانسيابي هو نقطه المياه او الصاروخ ... ليه العربيات السريعه و الرياضيه عليها سبويلرز
نقطه مهمه جدا ....
العربيات الرياضيه اشهرهم واسرعهم الفورميلا وان ....


طيب لو قلنا ان عربيات الفورميلا وان من اقل العربيات في الانسيبابيه .... ومعامل الجر بيختلف من سباق للتاني حسب نوع السباق و اعداد العربيه.... وبيتراوح بين 0.7 و 1.1 ... يعني اعلا من العربيات العاديه و بيوصل لمعامل الجر للشاحنات !!!!!

ومعنى كده ان العربيه مش حتحقق اقصى سرعه ممكنه ليها ...
لسبب بسيط جدا .... ايه معنى انسيابيه العربيه اذا ماكانتش ثابته و متزنه على الطريق .... بقى عندك صاروخ و اول ملف حيكون راشق في اقرب حيطه ...
فبيضحو بالانسيابيه المفرطه للوصول لاقصى ثبات .. وبالتالي يقدرو يلفو في المنحنيات بأقصى سرعه ممكنه

وده يخلينا نوصل لفايده الاجنحه الموجوده في الفورميلا وان


الاجنجه دي عامله زي اجنحه الطيارات ... بس معكوسه ... بمعنى ان جناح الطياره مصمم بحيث يعمل فرق ضغط فوق و اسفل الجناح و بالتالي تتولد قوه رفع ترفع الطياره في الجو .... لكن في عربيه الفورميلا وان ... الجناح ده معكوس ... علشان يحقق قوه ضغط سفليه (Down Force) تؤدي الي تماسك وثبات العربيه بالارض

وبتوصل قوه ال Down Force او قوه الضغط لاسفل دي 3 مرات وزن العربيه ... يعني ايه

يعني لو الطريق اتقلب و العربيه ماشيه عليه بسرعه كبيره ... قوه الdown force حتبقى اكتر من قوه الجاذبيه و العربيه مش حتقع ... وعلشان كده في مقوله بتقول ان العربيات دي تقدر تمشي على السقف... وفعلا الكلام ده في جانب كبير من الصحه طالما بتجري بسرعه كبيره وفي هوا .... قوه ضغط الهوا حتبقى اكبر من قوه الجاذبيه و تثبتها على الطريق حتى لو كان رأسي او مقلوب !!!!!

واسعه شويه ...
طيب فاكرين في الالعاب البهلوانيه لما يجيبو موتوسيكل جوه كوره و يقعد يلف في جميع الاتجاهات نتيجه قوه الطرد المركزي ... او في حلبات الناس كار في الملفات بيكون الطريق مايل اوي شبه رأسي لمقاومه الطرد المركزي .... تخيلو بقى لو قوه الضغط السفلي او ال(Down Force) بقت اكبر من قوه الطرد المركزي .... يبقى ساعتها العربيه ممكن تمشي بالشقلوب

لسه واسعه ...
يبقى لازم اجيب اقتباس بالعربي واضح و صريح

من مقال عن سيارات الفورميلا وان من موقع فورميلاواحد :-
على السيارة أن تحافظ على المعادلة الديناميكية الهوائية لتسير كما يجب. هذه المعادلة تعتمد على الإستفادة من ضغط الهواء لتضغط السيارة على المسار 3 مرات أكثر من الشكل الطبيعي. وبالتالي حتى ولو قلب المسار رأساً على عقب فإن سيارة الفورميلا-1 ستبقى معلقة بالمسار طالما هي محافظة على السرعة المناسبة.
المصدر :- FormulaWahad.com

وبالتالي الهدف الاول من السبويلرز و الاجنحه هو تحقيق الثبات عن طريق الضغط الناتج من قوه حركه الهوا على الاجنحه وبتزداد مع السرعه

وفي عربيات السباقات السياحيه .. اللي بتبقى عربيات عاديه و عليها سبويلرز كتيره بيكون الهدف من السبويلرز السفليه تقليل الهوا تحت العربيه وبالتالي تقليل عمليه الرفع او ال (LIFT) .. وبالتالي زياده ال Down Force أو Ground Effect

والسبويلرز العلويه ( الاجنحه ) تحقيق الضغط لاسفل او ال (Down Force)



ولو مفيش سبويلر ايه اللي بيحصل ...
العربيه لو بيعدي من تحتها هوا جامد ممكن يعمل عمليه رفع و مع السرعه يقل وزنها النسبي ( الوزن غير الكتله ) او بمعنى اصح يخف ضغطها على الطريق

البيجو ال 504 كان الناس بيقولو انها خفيفه جدا مع السرعه لسببين :
1- شكل العربيه شنطتها مايله اوي لتحت و بالتالي الهوا بينساب عليها بسهوله و مفيش قوه ضغط سفلي تذكر
2- ارتفاع العربيه عن الارض مع السرعه بيبقى فيه هوا فوق و تحت العربيه و بالتالي بتبقى عامله زي جناح الطياره ( اكيد مش حتطير ) لكن الهوا اللي بيعدي من تحت العربيه بيعمل عمليه الرفع النسبي ويبقى وزن العربيه خفيف على الطريق لدرجه ان اي مطب صغير يرفعها في الهوا



ليه دايما لما تقابلنا عربيه ثباتها ضعيف مع السرعات بنفكر اول حاجه في تغيير الكاوتش الاصلي بكاوتش عريض ..
مع ان لو استخدمنا سبويلر مناسب ممكن يدي ثبات كويس للعربيه ...
لأن اغلب السبويلرز الموجوده لعربيات الانتاج التجاري بتكون شكل اكتر منها وظيفه او بتساعد بنسبه بسيطه على تحسين الثبات او مقاومه الجر حسب شكل الاسبويلر و مكانه ... وبالتالي فتأثير الجنوط العريضه افضل ..

[asemx1]

ويبقى الخلاصه هى
1- تهبيط العربيه وتركيب مساعدين مشوارهم قصير وناشفين
2- تركيب اسبويلر
3- تركيب جنط كبير وكاوتش كت ( واهم حاجه الكت دا ) علشان مايكونش فى نسبه حيود فى الكاوتش اثناء الدوران او الطرد المركزى
4-تركيب الزوايد ( اعتاب واكصدامات )


نصائح

1- ركب جنط 17 وكاوتش كت وعرض براحتك بس بشررررررررررط
هتقدر تمشى فى المطبات والنقر براحه اوى يبقى اشطه وهقولك ميه ميه

هتمشى فى النقر والمطبات بسرعه واستهتار اقولك ان الكاوتش والعفشه مع السلامه بشررررررط برضو
هتركب مساعدين اصلى رياضيه وسوست رياضيه هقولك براحتك يا سيدى فى المطبات بس الكاوتش بس هوا الى هيبوظ

( تركيب ستانت بار على المساعدين يبقى ميه ميه ) وياسلام لو تركب استانت بار برضو فى الخلف

ونصيحه كل حاجه قولتها هاتها اصليه ومخصصه رياضيه
يعنى الجنوط momo
المساعدين k&n بالسوست ودى بتتجاب من بورسعيد

تحياتى لك وبالتوفيق

مهندس / عاصم جاد

[asemx1]

ودى بعض صور للحاجات الى تعملها هتحس بفرق فى الثبات فعلا وهعملها فى موضوع للافاده بازن الله

http://carphotos.cardomain.com/ride_images/3/2843/981/32105490024_large.jpg

دى صور للاسواى بار من تحت والسوست الحمرا

http://carphotos.cardomain.com/ride_images/3/2843/981/32105490038_large.jpg

ودا الاسواى بار من فوق

http://carphotos.cardomain.com/ride_images/3/2843/981/32105490041_large.jpg

ودا صوره لجنط وكاوتش كت

ناقص بقى الاسبويلر واقولك مبروك عربيتك بقت طوبه على الطريق :D :D

[samirsaid1]

والبار اللى فى الحوض دة بيجى منين
وبكام ؟؟