طريقة تنظيف الصالون البيج

[me_medoo]

بسم الله الرحمن الرحيم

السلام عليكم يا شباب ، كتير من الناس عندها في عربيتها فرش بيج وممكن يكون التابلوة مطعم ببيج ، والبيج وما أدراك مالبيج ،يعني كل واحد داخل لازم يسيبلك بصمتو في العربية ... وحتى لو رحت لسمكري او كهربائي ولا حتى ميكانيكي لازم بأيدو المشحمة يسيبلك بصمتو جو الصالون ... انا جربت مواد تنظيف كتيرة أشي ألماني وأشي أيطالي على أمريكي على صيني بس كلو كلام فاضي ، مفيش أحسن من طريقة سهله ورخيصة متكلفكش أكتر من عشرة جنية .

1- هتجيب قزازة بريل بلسم زي كده :

لازم يكون بلسم الابيض ... ومحدش يسئلني هنجيبو منين هههههههههههههههه في اي بقال تحت بيتكم .

2- نفضيه في أي حته ونخلي بس ربع القزازة مليانة .
3- ثم نجيب قزازة نفط من عند أي موان ب 2 جنيه ومحدش يجيب بانزين ولا جاز لازم نفض .

4- نفضي قزازة النفض كلها جوا عبوة قزازة البريل البلسم ألي هيا خلينا ربعها ثم نرجها كويس .

5- نحضر أسفنجت مواعين ونجيب حتت نظيفة ولازم تكون قطن ( زي فنيلات قديمة بيضة طلعت على المعاش ) .دي أحسن حاجة للعربيات أحتفظ بيها للعربية لأن مفيش أحسن من القطن المصري في العالم .

6- المهم أبتدي أحط شوية من الخلطة بتاعتنا على اسفنجت المواعين وياريت من الجنب الناعم مش الخشن ونبدء ندعك براحة جزء جزء والجزء الي ندعكو نمسحو على طول بجزء من الحته النظيفة وهكذا ... هتلاقي الأجزاء البيج في العربية الجلد رجعت جديدة تماماً .

ومتخفوش على الجلد او الفيبر مش بيتأثر ولا بيتشقق ولا بيحصلو حاجة أهم حاجة متعملش الحكاية دي في الشمس أو في عز الحر وأمسح ونشف كويس ... وممكن بحته مبللولة بعد كده تديها كمان مسحها زيادة أمان .

ودي صورة للتابلوة مثلا وهو وسخ وكل الناس سيبه ليا بصمتها فيه

ودي صورة البدء في التنضيف

ودي صورة بعد ما رجعت التابلوة زي الفل (الجزء البيج منو )

ودي صورة صالون عربيتي التانية بس الفرش جلد بيج
بس لسه منضفتهوش لأن الصحة معدتش زي الأول بكره بأه
على العصرية كده هنضفو ...


وممكن أستخدام الخلطة دي على الدوسات الجلد بتنظفها قوي وبتخلي ريحة العربية جميلة وجمده جداً

إنشاء الله يكون الموضوع عجبكم وأنشاء الله هوريكم طريقه سهله كمان وحلوة لتنضيف السقف والفرش القماش .

بأقل التكاليف ومتخليش حد جاهل ينضفلك عربيتك حتى لو كان في محطة بانزين للنضافه أصول مش غسلة وأقلب وأي خدمة يابيه وكل سنة وانتا طيب يا بيه ... ويمدلك أيدو ، أعتمد على نفسك لأن العربية بتحس بصاحبها وهو بيعتني بيها .

[BLOODY_STONE]

متاااااابع و مستني طريقة تنضيف السقف

[Ahmod]

انا اخر مرة رحت غسلت الصالون من الداخل بالبخار وعربيتي نفس لون عربيتك من الداخل

وبصراحة البخار ده ممتاز رجع كل حاجة زي ماكنت والعربية بقالها كدة داخل في 10 ايام من سعت ماغسلتها وزي الفل بعكس الغسيل العادي يومين تلاتة وتلاقي العربية رجعت زي ماكانت

وهجرب موضوع البيرل ده وهقولك النتيجة

الف شكر ليك

[OmaR_FekrY]

مجهود ممتاز ... بس لازم قريب جدا الفرش القماش لانه بقى رصاصى :(

[me_medoo]

تسلم أيديكوو يا شباب على مشاركتكم وتفاعلكم مع الموضوع ... بالنسبة يا أحمد الغسيل بالبخار ... ده أجمل أختراع في الدنيا ، وهو رائع جداً ، وانا كنت ناوي لمن تتحسن الدنيا أفتح مغسله للعربيات مخصوصة بغسيل البدي حتى بالبخار لأن أثبت كفائتوو وحتى الشاسيه بالبخار ، بس كنت مستني لمن الموضوع يتنشر عندنا هنا في مصر والناس تبقى واعية يعني ايه غسيل بخار وانشاء الله هجبلكم كام فيديدو للغسيل بالبخار ... لكن في ناس بتخلي الوساخة تتراكم في عربياتهم ويقولك هبقى اروح المغسله بعدين ويقعد بالشهر والشهرين ويخلي الوساخة تتراكم لحد مافرشو يقيح ... علشان كده دي طريقة أمنة ورخيصة نسبياً للي عاوز يوفر .

وانشاء الله طريقة فرش العربية قريباً اسهل واسهل بس متظحكوش لو قلتلكم هنغسل بشامبو او بلسم رخيص ... انا بس بدور على نوع شامبو رخيص وأمن على الفرش مينشفهوش .

المهم ان في نضافة دورية بسبب الغبار الي في بلدنا يعني بعد كده اتعلم أنك تحط رغوة صابون بريل بلسم على التبلوه وبعدين أمسح بحته مبلولة مش تمسح التابلوة بحته مبلولة ووسخه وتحول طبقة الغبار الخفيفة الي طينة بتبان مسحة ورى مسحة على البيج بالذات وشكراً لمشاركتكم وفي القريب شرح بقيت الحجات حتى الغسيل بالبخار المنزلي .

[loayegypt]

حل رائع

مشكور جدا على مجهودك الرائع وفى إنتظار طريقة تنظيف السقف والالأقمشة ومعلش متنساش فيديو غسيل البدى بالبخار

[minicooper20]

والله فكره جمدا اوى

[mohamedbook]

ان شاء الله اجرب الطريقة دي
ومنتظرين تنظيف الفرش
ممكن اعرف تكلفة التنظيف بالبخار تتكلف كام ولكم جزيل الشكر

[Veroman]

حلوة الفكرة دى

[medo_sirion]

مجهود اكثر من رائع ويستحق الاشادة بية

[SaberMan]

أستااااذ جزاك الله خيرا .. شجعتنى أجرب لأنى مبرضاش أسيب العربيه لحد ينضفها عشان فعلا بتتوسخ زياده (:

[BLOODY_STONE]

معلش هو يعني ايه ازازة نفض؟!

[SaberMan]

معلش هو يعني ايه ازازة نفض؟!

حاجه زى التنر كده بتتباع عند الموان بس مش متأكد بصراحه درجة تنضيفها بقوة التنر ولا لا كل الأعرفو عنها أنها بتضاف على علبة البويه عشان تخفف قوام اللون و تقبى أسهل فى الدهان بس أكيد فيها مركب تنظيف .

[me_medoo]

أعزائي الغالين على قلبي ... المشكلة انا مش عارف أزاي أضيف فيديو محمل على اليوتيوب لأن عندي بعض الطرق فيدو أتفرج وطبق على طول ... بس مش عارف ازاي أضيف فيديو هنا في المنتدى .

ده غير بعد كل التعب الي تعبتو جيت أركب فوانيس شبورة للعربية قام الكهربائي بأيدو المشحمه مسبش حته في العربية الا وعملي فيش وتشبيه فيها ببصامتو ... على التبلوة والكنب بجد بجد أحبطنييييييييي .

مع أني قايلو أغسل أيدك قبل ما تخش العربية قام بصلي كده ودحك وقالي هاهاهاها ليه هو انا هكول ههههههههههههههه ... قلتلو ياعم علشان الفرش بيج قام قالي أيدي نضيفة يابيه حتى بص بص ووراني أيد أجاركم الله على منظر الايدين .

وعلشان تكمل ماسافت مرحت جبت علبة السجاير من أجر الشارع كان في ميكانيكي صحبو قاعد في الكرسي الي جمب السواق هههههههههه
فحد يعلمني أزاي أضع فيديو هنا في المونتدى وأبقى شاكر لكم

[me_medoo]

حاجه زى التنر كده بتتباع عند الموان بس مش متأكد بصراحه درجة تنضيفها بقوة التنر ولا لا كل الأعرفو عنها أنها بتضاف على علبة البويه عشان تخفف قوام اللون و تقبى أسهل فى الدهان بس أكيد فيها مركب تنظيف .

الله ينور عليك ... ونقدر كمان نقول هو جاز نقي جداً ... وعلى فكرة ستات البيوت بيستخدموه على السيراميك بتاع المطابخ الحوائط الي بيتجمع عليها دهون وشحوم من قلي الزيت ويرجع السيراميك بيلمع (الحوائط ) أما بالنسبة لسيراميك الحمامات (الارضية ) مع شوية مية دافية + ملح الليمون من عند العطر ودعكة بسيطة ونقع نص ساعه وأشطف تلاقي السيراميك كأنو لسه راكب جديد ... بيلمع . جربو وأدعولي .

أما الي عندو جنوط أسبور ألمنيوم ممكن تضيف معلقة خل + عصرة ليمونة مع البريل ودعكة بسيطة تلاقي الجنوط الالمنيوم بتبرق .

ولو عندك جنوط العربية الاصلية السودة ومش راكب عليها طاسات ... ممكن شوية سولر أو حتى نفط بقطنة وبعد ما تغسلها أمسحها مسحه بسيطة بالقطنة ديا هتلاقي الجنط الاسود أسود كأنو لسه مدهون ويبقى جديد لحد ما يرجع يتعفر من غبار الشوارع .

أما الكوتش علشان يبقى مفحم كده ولونو أسود ... وبيلمع ... (كوتش العربية الاربع فرد ) بعد الغسيل هات قزازة سفن أو أسبورايت صاروخ وأدعك الكوتشات بعد الغسيل بيهم هتلاقي الكوتشات بتلمع لمع وكأنها جديدة ... وتحياتي .