تقرير عن تطعيم تابلوه الياريس بالكاربون !

[Ahmod]

السلام عليكم ورحمة الله وبركاته



الفكرة في دماغي من زمان من ساعت ماشفت موضوع ياسر وشرحه لما عمل كاربون في تبلوه عربيته بحيث تبقى لونين زي السيراتو الكوب !

ولما شفته على الواقع وازاي عامل شكل حلو للتبلوه قلت لازم اعمله في الياريس

عملته وحبيت اعملكم تقرير مبسط كدة عن طريقة فك التبلوه وعمل الكاربون عليه عشان لو حد حب يعملها مايواجهش اي مشاكل !

فك تبلوه الياريس سهل جدا لان التبلوه كله عبارة عن كبس !

اول حاجة بتفكه من الجزء اللى تحت بتطلع من الكلبس بتاعها اما في اليمين او في الشمال ! وبتطلع بعدها بشكل عادي زي في الصورة بالظبط





بعدين تبدا تفك الجزء الايمن او الايسر برضوا من الكلبس بتاعها في الاسفل !





بعد ماتفك الجزء اليمين بعدين الشمال تبدا تفك الجزء اللى ماسك عند العدادات !



وكدة شكل التبلوه بعد مافكينا كل حاجة شكله يخوف


بعد كدة هتبقى محتاج انك تعمل عليهم كاربون ! وده ياما تشتريه من التوفيقية وتعمله بنفسك ! هتبقى بس محتاج سخان او حاجة تسخنلك الكاربون عشان يتفرد بشكل مناسب



او تريح دماغك وتروح لواحد بتاع اكسسوارات يعملك عليهم كاربون وده اللى انا عملته

ده اول جزء بعد ماعملنا عليه الكاربون



وده بعد ماخلصنا خالص !



نيجي بقى للتركيب

احنا فكينا من تحت لفوق ! هنركب بقى العكس من فوق لتحت

بس تاخد بالك ان الحتة بتاعة العداد دي مجرى ! يعني لازم تاكد ان الكلبسات دخلت عشان تمسك معاك صح


بعدين تركب الجزء الايمين والايسر وفي الاخر الحتة اللى شابكة بينهم

وكدة خلصنا الحمد لله



الفك والتركيب مش هياخد منك اكتر من خمس دقائق !

طبعا لو واحد عربيته حمراء وحب يعمله احمر اكيد هيبقى اروع الكاربون ليه الوان كتير تختار اللى يعجبك وتعمله

ودي شوية صور للتبلوه بعد ماخلصنا يارب يعجبكم

[تامر.محمد]

فكرة جامدة جداااااااااااااااااااااا :)

[ahmedeihab]

nice one ya ahmed
^_^

[mahmoud_afifi]

ماشاء الله شكلها جامد جدا.

[Mo3taz Selim]

ماشاء الله جميله

أخبار التكلفه إيه

[me_medoo]

مية مية يابوحميد ... لا انا أنشاء الله لازم أعاينها بنفسي في المقابلة بتاعت يوم الخميس ... بسم الله مشاء الله حاجة حلوة .
بس صحيح يابوحميد ... مقلتلناش ... ياترى محدش أشتكى من موضوع الكربون مع الشمس انو يعني يلزق وميطلعش ... أصل انا كمان كنت عاوز أعمل على الكبوت والعتب كربون أبيض كأن ألعربية زيرو بس خايف يلزق الكربوووون ويقلي طلعلني بأه ياحلو لو كنت شاطر ... وتحياتي ... وألف مبرووووك ياباشا ... دايماً مبدع يا بوحميد وذواق .

[osama.m]

ما شاء الله غير شكل التابلوة خالص

[ahmed_su]

جميل .. مبروك

بس شوية تفاصيل .. السعر ... المكان ... الالوان المتاحة

مبروك مرة تانية

[BLOODY_STONE]

رائع مبروك عليك

[minicooper20]

اصلى يا كببببببببببببببببببببببير شكلو اصلى اصلى
مشاء الله

[hany63]

الظاهر يابو حميد حكاية منسق القسم دي هاتخلص على جيوبك بس الصراحه شغل عالي

[Ahmod]

فكرة جامدة جداااااااااااااااااااااا :)

ربنا يخليك من ذوقك

nice one ya ahmed
^_^

حبيبي يا معلم

ماشاء الله شكلها جامد جدا.

من ذوقك يا كبير

ماشاء الله جميله

أخبار التكلفه إيه

والله هي التكلفة بتعتمد من محل اكسسوارات للتاني

انا المحل اللى بتعامل معاه عملهالي ب 60 جنيه ! اعتقد انه غالي وانا عارف ان المحل ده غالي بس انا بتعامل معاه عشان شغله نضيف مش اكتر

ممكن محل اكسسوارات تاني يعملها باقل من كدة

مية مية يابوحميد ... لا انا إن شاء الله لازم أعاينها بنفسي في المقابلة بتاعت يوم الخميس ... بسم الله مشاء الله حاجة حلوة .
بس صحيح يابوحميد ... مقلتلناش ... ياترى محدش أشتكى من موضوع الكربون مع الشمس انو يعني يلزق وميطلعش ... أصل انا كمان كنت عاوز أعمل على الكبوت والعتب كربون أبيض كأن ألعربية زيرو بس خايف يلزق الكربوووون ويقلي طلعلني بأه ياحلو لو كنت شاطر ... وتحياتي ... وألف مبرووووك ياباشا ... دايماً مبدع يا بوحميد وذواق .

ربنا يخليك يا كبير وطبعا هوريهالك وعلى الحقيقة خاصا بليل هتلاقي شكلها احلى كتير من الصور

ممكن تعمل ورق ابيض على الكبوت والعتب بس خلي بالك من نوعية الورق اللى انت بتستخدمه او هتعمله لان ده هو اللى هيحدد اذا كان هيطلع بسهولة ولا هيسيب اثار

روح لصنايعي شاطر هيعملهالك ووقت لما تيجي تشيله برضوا لنفس الصنايعي هيطلعهولك من غير مشاكل -خاصا لو البوية فبريكة-

[Ahmod]

ما شاء الله غير شكل التابلوة خالص

فعلا عمل شكل جميل خاصا بليل مع انوار العربية الفسفوري الخفيفة بيبقى روعة

رائع مبروك عليك

حبيبي يا باشا الرائع مرورك

اصلى يا كببببببببببببببببببببببير شكلو اصلى اصلى
مشاء الله

ربنا يخليك انت اللى اصلي والله

جميل .. مبروك

بس شوية تفاصيل .. السعر ... المكان ... الالوان المتاحة

مبروك مرة تانية

السعر زي ماقلت في المشاركة اللى قبلها هو بيختلف من محل اكسسوارات للتاني

في محل الصنايعي اللى فيه شاطر بالتالي اليومية بتاعته اغلى فطبيعي هتلاقيه اغلى شوية من محل تاني بس بيديلك شغل نضيف !

انا عملته ب 60 جنيه وانا متاكد انه ممكن الاقي محلات كتييير تعمله باقل من كدة ! بس ماتضمنش هيطلع الشغل بنفس المستوى ولا لاء ؟

الالوان المتاحة في الكاربون كتير "اسود - احمر - كحلي" كمان فيه ورق وده بيبقى لونه على حسب زي مانت عايز وده لو انت عايزه يكون لونه سادة

الظاهر يابو حميد حكاية منسق القسم دي هاتخلص على جيوبك بس الصراحه شغل عالي

ههههههههههههه

والله يا باشا الياريس مخلصة على جيبي من غير حاجة !

اصل زي مانت عارف انا حاليا في اخر سنة بكارليوس ! فتقريبا مافيش مسؤليات

فالمرتب كله بصرفه على العربية بدل مايتصرف على حجات مالهاش لازمة

وكدة كدة الشركة اللى شغال فيها حاليا شغل مؤقت غالبا ماهسيبه لما اتخرج وسعتها الواحد هيبقى فيه مسؤليات هتبقى اهم من انه يصرف الفلوس على العربية ! ففرصة دلوقتي تعمل كل اللى نفسك فيه

[yasser_ds]

ما شاء الله تبارك الله ربنا يباركلك فيها

[corsair]

الله عليك يا ابو حميد ما شاء الله شغل زي الفل يسلام بقا لو الاقي لون ازرق سماوي غامق شوية يبقي امي دعيالي نفسي اغير التابلوه كله للون الازرق علشان يمشي مع شكل العدادت عندي