بتعمل صيانة عربيتك التويوتا فين...!!

[hero]

سؤال استطلاعي للتويوتاوية.....
ياتري اغلب التويوتاوية بيعملوا صيانتهم فين...وياريت برضة نعرف هل الاختيار دة مبني علي اساس اختبار باقي المراكز ولا علشان المركز قريب ولا علشان الزحام اقل ورايق..وهكذا....يعني عرفونا السبب...

[hn_kamal]

العباسية علشان هو الاقرب

[hero]

انا هابتدي بنفسي:
عملت صيانة الالف كيلو في النصر.....وكان للاسباب الآتية:
1- العربية كانت لسة يا دوب الف كم بس ...وما حبتش اسافر بيها للقاهرة ...لاني اكيد هاعدي الـ100 كم ...
2-الصيانة كانت مجانية وقلت اجرب المركز فيها ...
3-سالت ناس كتير من مالكي الكورولا ايلي اعرفهم من المنصورة وشكروا في المركز...
4-لاقيت ان تويوتا العبور ....مركز معتمد من تويوتا زي النصر بالظبط ...يعني شركة خاصة ومعتمدة....غير ابو رواش والعباسية ....لان دول تويوتا ايجيبت....

رأيي في المركز من خلال صيانة الالف الاولي:
1-المركز مبني ومفتتح حديثا فبالتالي كل المعدات هناك جديدة...
2-الناس هناك واخدين تدريب في تويوتا ابو رواش ودة واضح من الشهادات المعلقة في صالة الاستقبال ..ومن معرفتهم بالعربية (فك وتركيب بسرعه وبمهارة)
3-الزحام يكاد يكون منعدم...يعني حجزت قبليها بيومين ولاقيت الناس منتظرين ....وكان في عربية قبلي وقبل ماستلم عربيتي ...كان في عربية مستنية تدخل بعدي..
4-العربية الحمد لله استلمتها نظيفة ومغسولة...كان ليا ملحوظة بس علي غسيل الموتور بالمية ...بس عرفت بعد كدة ان كل المراكز بما فيها ابو رواش بيعملوا كدة....والفوم دة بيبقي علي حسابك لو حبيت...ومش مطلوب قوي ..خصوصا ان العربية لسة جديدة..

هل تنوي الذهاب الي نفس المركز تاني:
ليا ملاحظة علي اسعار الصيانات ايلي استلمت بيها ورقة من هناك وهي اعلي من الاسعار ايلي كان مثبتها شاركي....بحوالي 150 جنية تقريبا ....ومش عارف دي زيادة في كل المراكز ولا لا....
كنت بافكر في العبور...بس لاقيت شكوي متكررة من الاعضاء هنا عن سؤ الخدمة هناك...واستهتار الفنيين بالعربيات لدرجة تصل الي حك السيارة او خبطها....
باكفر جديا اروح ابو رواش....بس المشوار المهيب من المنصورة لحد هناك ...مكسلني جدااا..

في انتظار ارائكم وافكاركم عن مراكز الصيانة.....

[Melmahy]

شكراً يا هيرو علي الموضوع القيم ده ... و اعتقد ان كل الأعضاء لو شاركو هتبقي فيها فيادة عظيمة لينا كلنا ... عن تجربتي مع مركز صيانة العبور ... انا كنت استلمت العربية و الكاسيت مش راكب فيها ... قولت أروح العبور لأسباب أنه الأقرب و كمان الزحام معقول جداً ... المهم قولتلهم عايز أركب الكاسيت ... خدو مني العربيه و بعد شويه ادوهالي و هيه مغسوله و الكاسيت راكب ... أخدت العربية و مشيت و انا في الطريق كانت الصدمه ... الريش إللي فوق زرار الإنتظار و زرار الإنتظار نفسه ... و الفريم إللي فوق الكاسيت كل ده مش راكب في مكانه صح ... الصراحه اتنرفزت جدا و رجعتلهم و انا ناوي علي خناقه ... المهندس هناك هداني و جيه واحد فني ... ركبلي كل حاجه في مكانها مظبوط و انا واقف ... المهم من كل الحكاية ديه ايه ... اننا كمصريين بجد ما عندناش ضمير في اي حاجه ... بنحب الكروته ... علي كل حال انا شايف انا في كل الأماكن هتكون فيه ايد مصرية بتتمد في عربيتك ... فلازم تشيك علي العربية كويس جداً قبل ما تتحرك بيها ... و حسبي الله و نعم الوكيل في ديه بلد ...
======
مواطن مصري قرفان

[معاذ الشرباصى]

محمد ابن خالتى بيروح العبور

سواء كانت صيانة او سمكرة و دهان

هما مستواهم متوسط,, مش محترفين يعنى, و وساعات كتير بيكروتوا

الفرامل عنده بتصفر, و مش لاقى لها حل, و هما معرفوش يحلوا الموضوع بعد اكثر من مرة زيارة

ده فى الصيانة

اما السمكرة و الدهان, فأوقات كتير يبقى ناقص عندهم حاجات, و مرة خدوا شهر و نص علشان يجيبوا باب العربية الخلفى, ده غير بعد كده يرشوه و الكلام ده. هل ده عيب ان تويوتا ايجيبت بتودى كميات قليلة لهم, و لا هو لكاعة من ناحيتهم معرفش

العمال هناك مش امناء: يعنى محمد فقد كل شرايط الكاسيت اللى فى العربية, و لقى شريط خاص بأحد العمال, فى الزيارة التانية, العامل اخد الشريط الخاص به

العربية لما كانت هناك, الفرش اتشحم, كان فيه اثار لسجاير على الكنبة الخلفية و كرسى السائق + بقعة على الكرسى الامامى التانى

المشكلة ان محمد لما بيتسلم العربية, بيبقى مستعجل, فبيروح ياخدها, و لما نتقابل نفضل نفلى فى العربية, لحد ما اكتشفت الحاجات دى

السبب انه بيروح هناك : الحجز فى ابورواش او العباسية محتاج يكون قبلها ب 3 اسابيع تقريبا, حاجة سيئة جدا

هو مستنى افتتاح مركز تويوتا فى التجمع الخامس, اللى جنب مركز الهوندا الجديد, لعل و عسى يكون احسن

[معاذ الشرباصى]

بالمناسبة فى مركز معتمد فى القطامية, لكنه اسعاره اغلى من التوكيل

هو مستغل موضوع انك لازم تحجز هناك قبلها بفترة كبيرة, علشان كده مغلى السعر عنده

ربنا يهديهم

[hero]

شكرا يا معاذ علي المداخلة الجميلة ...
والف شكر علي توضيح مستوي الخدمة في العبور...

انا دايما باقول ان الزبون هو ايلي بيفرض علي مقدم الخدمة انة يرفع مستوي الخدمة او يقللها ....

يعني لما ناس كتير تعرف ان في مركز صيانة بمستوي منخفض....يبقي اكيد هايوصل اخر قائمة المراكز المحترمة...وفي نفس الوقت الناس ايلي شغالة كويس....تاخد حقها ...

-------------------------------------

يا جماعة ايلي يشترك معانا في الاستطلاع ياريت يدينا دقيقة او اتنين من وقتة ويكتب اية ايلي عجبة في المركز ايلي بيتعامل معاة...واية ايلي مش عجبة...
الحكاية دي هاتخلينا كلنا نستفيد من خبرات بعض مع المراكز....حتي لو واحد اضطرتة الظروف انة يتعامل مع مركز سئ يبقي واخد بالة وهو بيستلم عربيتة ...واكثر حرصا في التعامل معاهم..

[waleed24ag]

انا بحكم ان معاي ياريس 2008 اول صيانه كانت ال 1000 و اتصلت بتويوتا ايجيبت العباسيه علشان اشوف الامكانيه خاصه اني مسافر فقلولي اجرب العبور لان دلوقتي العباسيه عليها ضغط جامد و موش قبل 15 يوم قولت اروح اجرب اتصلت بالناس و بصراحه الديسك اوفيس معملتهم كويسه اوي و بعدين اديتهم العربيه و اتفرجت عليها من بعيد و لقيت قمه في الاهمال من فني سايق ياريس تانيه بيرجع ورا و صندوق العده وراه و عادي جدا و خبط صندوق العده و استمر عادي جدا برده طبعا صندوق العده ليه عجل لكن اكيد العربيه اتجرحت المهم العربيه طلعت قمه في عدم النضافه لدرجه ان المهندس الي طلع يجربها معاي مكنش شايف قدامه و كمان حتي المهندس الي بيجرب موش عارف يجرب العربيه هو كل الي بيعملو انه بيذود البنزين علي اخر الدواسه و خلاص المهم بعد التجربه رجعنا المركز تاني و غسلوا العربيه تاني و طلعت بردو زي ما هيا و كمان لقيتهم مشغلين التكييف و سيبينه
انا تقيمي للمركز انه قمه السوء و المهندسين معرفتهم قليله جدا بالعربيه و في تجارب كتير جدا من ناس اعرفها بنفس المستوي
عموما انا قررت اروح تويوتا العباسيه في صيانه ال 5000 او ابو رواش و انا الحمد لله حجزت يوم الاربعاء

[tamohsen]

بتعامل مع العباسيه
مركز جيد جدا وكفائه العمال معقوله
قطع الغيار بالطبع متوفره لأنه المركز الرئيسي
ملتزميين جدا بوقت التسلييم المحدد

العيب الرهيب انك لازم تحجز قبلها بشهر علي الاقل
وبسبب الضغط ده ممكن تطلب منهم حاجه زياده اثناء الصيانه فينسوها
فلازم تتأكد بنفسك

واضح من التعليقات ان مركز العبور ده مزبله
اقترح إعلان مقاطعه عامه له لغايه مايحترموا نفسهم

[ayman_elkholy]

فى صيانة الألف كم رحت العباسية بصراحة كانت معاملتهم ممتازة بس المهندس اللى استلمت منة العربية بسألة الصيانة اللى جاية امتة قالى صيانة الخمسة الاف سألتة انا مش بمشى كتير بالعربية اغير زيت امتى قالى قدامك سنة ( وطبعا عرفت بعد كدة الزيت المفروض ما يقعدش اكثر من شهور )
رحت ابو رواش بعد كدة اسلمت العربية مخبوطة وطبعا ما شوفتهاش غير بعد ما روحت
وبعد كدة استغنيت عن التوكيل نهائيا مش عارف صح ولا اية

[معاذ الشرباصى]

فى صيانة الألف كم رحت العباسية بصراحة كانت معاملتهم ممتازة بس المهندس اللى استلمت منة العربية بسألة الصيانة اللى جاية امتة قالى صيانة الخمسة الاف سألتة انا مش بمشى كتير بالعربية اغير زيت امتى قالى قدامك سنة ( وطبعا عرفت بعد كدة الزيت المفروض ما يقعدش اكثر من شهور )
رحت ابو رواش بعد كدة اسلمت العربية مخبوطة وطبعا ما شوفتهاش غير بعد ما روحت
وبعد كدة استغنيت عن التوكيل نهائيا مش عارف صح ولا اية

استاذ ايمن

اهم حاجة انك تعمل check كامل على العربية قبل الاستلام و دفع الفلوس

اما بالنسبة لأستغنائك عن التوكيل, فدى حاجة لا اؤيدها, على الاقل لحد اما ضمان العربية يخلص

------------------------------------------------

بالنسبة للعبور نسيت اضيف حاجة

المهندسين هناك معتقدين ان خروجه لتجربة عربية, هو انه يفضل يجرى بيها, و يحرق على الاخر, و خلاص

لكن ان فى صوت العميل بيشتكى منه, او ملاحظة على اداء العربية تستلزم انه يسوق العربية, هما فى الموضوع ده ميييييييح تماما, ملهمش فيه

محمد ابن خالتى تجربته فى الفرامل, ان المهندس قعد يجرى بالعربية و يفرمل, و خلاص من غير اى تجربة بطريقة سليمة

[محمدايهاب]

أنا مع معاذ فعلا كل ده حصل معايا و قررت إن ماروحش المركز ده تاني حتى لو العربية هتتحول لخردة

[El Prince]

أولاً : ان أشكر بصفة شخصية كل الاخوة الاعضاء اللى شاركوا فى الموضوع ..

ثانياً : بعد تفكير كتير و مطالعة و مشاركة فى المنتدى من اول ما فتح تقريباً استقريت بنسبة 90 % على العربية الياريس الكاملة اتوماتيك بس منتظر أكمل الثمن بقرض بنكى شخصى ...

ثالثاُ : و دى المصيبة أن أكتر من حوالى 30 % من استقرارى على هذه السيارة كان بسبب ان جميع الاعضاء شكروا جداً فى توكيل و صيانة تويوتا ايجبت ...

رابعاً : جالى انهارده حاله اكتئاب من الشكاوى المتعددة من التوكيل لدرجة انى بفكر الغى موضوع العربية الزيرو ده نهائى واشوف اى عربية مستعملة نضيفة و خلاص ولما يكون فيها حاجة اروح لميكانيكى نضيف عمره ما هيكلف زى التوكيل و كل حاجه بتتعمل اصاد الواحد

انا خلاص زهقت و تعبت , يعنى الواحد يفضل يدور و يشوف و يسأل ويدبر فلوس بالعبيط
و فى الاخر ما يلاقيش خدمة كويسة اصادها

اسف على الاطالة يا جماعه بس الواحد مش لاقى غيركم يفضفض معاكم على اساس ان المنتدى كله اخوة و اصحاب

[original]

أحسن حاجه فى التويوتا إن كل قطع غيارها الأصليه موجوده فى محلات قطع غيار تويوتا الأصلية
معايا تويوتا كوروللا 2006 1300سى سى عامله 120 ألف كيلو
عربية عملية جدا واقتصادية فى البنزين
بسافر بيها على طول
غيرتلها تيل الفرامل أمامى على 80ألف
فلتر البنزين على 110ألف
سير التكييف والدينامو 70ألف
فلتر الهواء على 95ألف
زيت موبيل1 كل 10000كيلو
الكاوتش الأصلى على 115ألف
البوجيهات على 95ألف
بس بركب قطع الغيار الأصلية
عملت صيانه لحد 20ألف كيلو بالتوكيل لحد ما إتأكدت إن العربية مافيهاش عيب تصنيع
غيرت الزيت 12 مرة
بس أكيد فيه ناس مش بتعمل كل الكيلوات دى فى الفتره دى

[medomada]

أنا عربيتى كورولا 2005, عامل لحد النهارده حوالى 44000 , الصيانه دايما فى العباسيه لأنهم افضل حتى من أبو رواش و ده بنصيحه من واحد فنى شغال هناك أعرفه من زمان. العباسيه فى الحقيقه ممتازين و محترمين جدا لكن المشكله فى المواعيد البعيده و التليفون المشغول , لكن موضوع الميعاد بقيت أحجز قبلها بشهر مثلا و أريح دماغى خصوصا أن كل واحد عارف تقريبا إستهلاكه ماشى إزاى و ساعات كنت باربط ميعاد الحجز بتاريخ أكون مسافر فيه سفريه بعيده و محتاج أطمن على العربيه , أما موضوع التليفون فهم حلوا المشكله دى بإنك تبعتلهم e-mail فيه إنك عايز تعمل صيانه و رقم تليفونك و بالتجربه لقينهم بيكلمونى بالكتير تانى يوم. المشكله ان فيه مره من المرات البنت اللى بتحجز غالبان سابت الشركه و الميل بتاعها إتقفل ,ساعتها طلع عينيه لحد ما عرفت أحجز و طبعا ما نسيتش أخد الميل الجديد من اللى ماسك الحجز دلوقتى.