راحت المرايه

[محمد ابراهيم 1]

عليه العوض ومنه العوض فى المرايا
أثناء سيرى فى أمان الله بس بعد العين المتينه
دخل عليا واحد راكب لانسر ورغم إنى إديته نور لكن كان مصمم
وكسر لى المرايا
قزازها دخل عليا العربيه ودخل فى هدومى وربنا ستر والكفر بتاعها طار لكن بقيتها سليمه والحمد لله
وسوف أواليكم بالأخبار تباعا

[Sharky]

الحمد لله
قدر الله و ما شاء فعل

ربنا يصبرك يا محمد و مستنين تقولنا عملت إيه ؟

[amr bahaa el din]

معلش يا محمد اسة حصلالى الوش بالكفر الى ورا 300 ولو هترش هتزيد 70 من عند عرفة الجابر الى فشارع دمشق

[soundoffear]

الحمد لله قدر الله وما شاء فعل
الحمد لله انها جت علي قد المرايه

[محمد ابراهيم 1]

الحمد لله على كل شىء
لكن اللى يغيظ سلوك الناس لأنه بعد اللى حصل نزل وبيقول لى هات تمن المرايا بتاعتى على الرغم من إنى مش غلطان نهائيا ورغم إنه كان حادف عليا وإديتله نور عشان يوسع لكن هو كان مشغول بحاجه الله أعلم هى إيه
المهم كان مصصم يخبطنى وبعد كده بيقول لى هات حق المرايا
المهم كلمت التوكيل وسألتهم على المرايا قال القزازه ب 145 جنيه والكفر ب 155
لكن مش موجودين وحنبعت نجيبهم لك من القاهره من العباسيه وحييجوا على يوم الأحد
نزلت أدور عليهم فى صلاح الدين وللأسف العربيه قطع غيارها مش منتشره على الرغم من إنتشارها فى الشارع ورغم إنها موجوده من 3 سنين
المهم لقيت القزازه الأصليه ب 135 جنيه وإشتريتها وعنده الكفر ب 145 لكن إسود فى حين إن الكفر بتاع التوكيل بيبقى بلون العربيه
ونظرا لأن الكفر مش مهم للدرجه فحجيبه من التوكيل براحته
لكن القزازه مكنش ينفع إنى أسيبها لأنى مش عارف أسوق العربيه من غيرها

[hero]

قدر الله وما شاء فعل....
معلش يا محمد باشا....ربنا يعوض عليك ويجازي البني آدم ايلي افسد مرايتك الجزاء المناسب كفاية تقول حسبي الله ونعم الوكيل ....
البلد بقت مليانة من الاشكال دي.....ربنا يعافينا منهم ....ويبعدهم عننا...

[goodwave]

لا حول ولا قوة إلا بالله
معلش يا محمد قدر الله وما شاء فعل
ياعم ما تنساش دعاء الركوب والأدعية الأخري علشان ربنا يحفظك من شر حاسد إذا حسد.

[Karim_Monir]

قدر الله وما شاء فعل يا محمد
اللي عينة دول لازم اسمعهوملوة فعلا

[محمد ابراهيم 1]

شكرا لكل من شارك والحمد لله رب العالمين
النهارده التوكيل إتصل بيا وقالوا لى الكفر جه من القاهره وسعره 141 بدل 155
ورحت استلمته لقيتهم عملوا خصم 15 % وأضافوا 12% فبقى السعر 138,60 وإستلمته والجميل إنه بلون العربيه (فضى )
فيبقى السعر الإجمالى 135 القزازه + 138,60 الكفر قول 140 يبقى كله 275 جنيه بالتمام والكمال

[hazem_khidr]

طب الحممد لله انك صلحتها
بجد اضيقت اوي يا محمد باشا لانه موقف مستفز فعلا
و الحمد لله انها جات في مرايه ماجاتش في جسم العربيه