ياترى اشتريت تويوتا ليه !! ؟؟

[Ahmod]

السلام عليكم ورحمة الله وبركاته

نظرا لحالة الهدوء اللى موجودة في القسم اليومين دول

ونتمنى انه يكون الهدوء اللى بيسبق العاصفة - اقصد نزول الكورولا 2013 والياريس الجديدة اللى ان شاء الله هيحرك القسم بشكل كبير -

حبيت اعمل موضوع بسيط من جانب هيفيد بعض الناس المقبلة على الشراء عن طريق مقارنات فعلية تمت قبل كدة

وفي نفس الوقت فيه جانب فكاهي وترفيهي

هدف الموضوع كل واحد يحكيلنا ايه سبب اختياره لتويوتا ؟ وياترى كان بيقارنها بايه ؟ واشتراها من انهي معرض وبكام .. والخ من تفاصيل

اانا عن نفسي هبدا طبعا الكلام ده كان من حوالي 6 سنين

كنت وقتها في اولى جامعة تقريبا وكنت سعتها خبرتي في العربيات زي خبرتي في الطبيخ حاليا

الوالد قرر يشتري عربية المهم من هنا لهنا لاقيناه بيقولنا انا حجزت بيجو 405

طب يا حج هي دي شكلها عاملة ازاي ؟؟ المهم بقى يشاورلنا على ال 307 ويقولنا هي شبها كدة بس فيها شنطة <<< طبعا اتبسطنا على الاخر

بعد كدة اكشتفت ان الحج بيحور !! وده اكتشفناه لما عدت من قدمانا مرة 405 وقالنا اهي هي دي !! انا بصلتها كدة وقلتله دي شبه ال 307 ؟؟؟ انت بتشتغلني ولا ايه ؟

دي شبه الشاهين ياعم الحج

المهم من هنا لهنا خناقات وحروب !! بس الوالد مصر ومقتنع بال 405 وحاولت معاه مرارا وتكرارا وهو رافض

فضل بعد كدة مستني انه يستلمها من التوكيل اكتر من 7 شهور دافع الفلوس ولسه ماستلمش العربية !! كل يوم بكرة بعدو بكرة بعدو

لحد مازهق وقام راح سحب الفلوس وطبعا كان يوم عيد بالنسبة للاسرة كلها لاننا كنا كلنا رافضين العربية دي شكلا وموضوعا

سعتها افتكر كنا في اواخر 2006 وكانت الياريس لسه نازلة وشكلها كان عاجبني جدا جدا

اصريت عليها وقعدت اقنعه بيها لان شكلها كان عاجبني بس هو مش عايز يقتنع عمال يقولي دي 1300 والماتور ضعيف ومش هتبقى حلوة والبيجو كانت 1600

وانا طبعا مش فاهم يعني ايه 1300 فكنت بقوله ال 1300 حلو ماتقلقش هههههههههه

المهم بعدها

راح معرض هوندا وقال يتفرج شاف هناك الهوندا سيتي عجبته وقرر يجبها

قام عمي الله يكرمه متصل عليه !! قاله هوندا لالالالالالالالالالا

قطع غيار هتبهدلك وصيانات وتوكيل ابعد عنها نهائي دي مش كويسة

اقتنع بكلامه وصرف نظر عنها

بعد كدة قرر انه يقتنع بكلامي ويروح يشوف الياريس

توجه هو والوالدة لمعرض تويوتا ايجبت في الخلفاوي

الحاجة بقى الله يكرمها اول ماشافت الياريس عجبتها اوي قالتله بس هي دي

وانتو عارفين بقى الستات لما بتحط راسها في حاجة !! قام الحج مخلص فيها في ساعتها

حتى كان سعتها وصلنا لاواخر 2007 وكانت اخر عربية موجودة 2007 في التوكيل ومافيش غيرها

لكن تاثير الستات بقى الله يكرمها سيطرت عليه وخلته يجبها حتى ماخترش لا لون ولا اي كماليات !! اللى كانت موجودة جابها او يمكن بقى هو كان زهق فقال يخلص

كانت واقتها عاملة بالظبط 88 الاف جنيه اول فئة اتوماتيك

بس الغريب انه كان جايبها مافيهاش كاسيت !! افتكر في المعرض قالو سعتها الكاسيت هيركبلك مع صيانة ال 1000 وتدفع 2000 جنيه بس طبعا بعد ماجبناها اشترينا كاسيت تاني بدل ماتدفع 2000 جنيه في كاسيت التوكيل الحمضان

فضلت العربية مع الحج اول سنة تقريبا وهو كان استخدامه ليها خفيف جدا !! اعتقد عمل اول 1000 كم بعد حوالي اربع شهور او يمكن اكتر

بعد كدة طلعت رخصة وبقت الياريس تحت تصرفي واكتشفت انه فعلا كان اختيار موفق وربنا كرمنا فيه

وحتى الان الحمد لله الوالد مبسوط من العربية وكل فترة الاقيه بيسالني العربية عاملة معاك ايه

دي كانت الحكاية مع الياريس

ربنا يباركلنا فيها ويحفظها من العين لان اليومين دول العربية بقت بتتسمكر اكتر مابيتغيرلها زيت

وربنا يعلم معزتها عندي ففكرة اني ابيعها دي مش موجودة في نيتي خالص !! ربنا يسترها بس

ياريت كل واحد يحكلنا هو جاب عربيته منين وبكام وياترى كان بيقارنها بايه ؟؟ وايه اللى خلاه يقرر يجيب تويوتا بالذات ؟؟؟

[hany63]

انا بقى جبت لانسر كريستاله مو ٩٨ و كانت ايامها مكسره الدنيا بسبب شكلها الملفت و اللي باعتبره اول شكل يطرقع بالشكل ده ايامها و كانت اول ركوبه زيرو ليا بعد ركوبات الفيات المستعمل و كنت طاير بيها طير و طبعا كان نزلت الكورولا العيون و الشكل ده فشل بالثلث و الناس كلها راحت لللانسر عشان شكل و قوه موتور و اوسع المهم جوز اختي راح شاري كورولا رغم اننا اختلفنا معاه و هو ركب دماغه
المهم سنه في التانيه ابتدت مشاكل اللانسر تبان حسيتها مش ممكن تكون ياباني و علبة الدركسيون باظت و ده كان عيب صناعه على الكل و العربيه كان ايامها ضمانها ٦ شهور ده غير صاجها الزباله اللي لو حد عطس جنبها تتطبق
وفي يوم اختي خبطت الكورولا و قصدتني اعملها المهم العربيه قعدت معايا كذا يوم المهم اتصدمت عشان لقيتها بعد ٣ سنين كانها لسه زيرو عفشه و متانه و موتور قلت فعلا التيوتا تيوتا قمت بايع اللانسر و جبت اخر ٢٠٠١ كورولا الشكل اللي بعد العيون مانيوال و طبعا العربيه غنيه عن التعريف
المهم جيت على سبعين الف بعد الضمان ما خلص اسطوانة الدبرياج باظت و عملتها بره للاسف و كانت الطامه الكبرى العربيه ما رجعتش زي الزيرو و الدبرياج تقل و محدشعرف يظبطه لدرجة رحت لميكانيكي فك الطقم و بدلته ببلاش من عرفه على اساس ان فيه عيب و ركب واحد اصلي جديد برضه ما عجبتنيش رحت بايعها و جبت برضه نفس الشكل ٢٠٠٦ و معانا من ساعتها و هي حاليا بتاعة المدام و باركبها لما اروح حتت زحمه و ساعات بنسافر بيها و هيا عامله ٩٢ الف و ما عملتش غير الصيانات الدوريه

[omaroof]

انا بقى ماكونتش بحب الكورولا لان فى البلد اللى انا مقيم فيها الكورولا زى الادا عندنا ومعظم اللى سايقنها تحس انهم بتوع مشاكل وكنت ايامها متيم باللنسر الى ان ركبت مع صديق ليا موديل 2006 عجبتنى وبعدها ب3 سنين بعت اللنسر واشتريت كامرى ودى غيرت فكرتى خالص عن التيوتا وبعد سنه بعتها وقررت اشترى عربية 0 كم وروحت الهوندا وشوفت سيتى 2010 شكلها عجبنى اوى لكن بعد ماعملت تست دريف صرفت نظر خااااااااااالص
وكان امامى لانسر 1500 او كورولا 1600 وبعد الفحص والتدقيق لقيت فرق كبير فى كل حاجه من اول الثبات والقوه والتعليق والفرش الخ الخ الخ
فتوكلت على الله وقررت كورولا 2010 والحمد لله لانها بصراحه بسم الله ما شاء الله فيها كل ماتتمناه
ملحوظه ان العربيه يابانى وليست تيوانى او جنوب افريقى حسيت كدا انها اخر الرجال المحترمين هههههههههههههههههههه

[BLOODY_STONE]

احنا العيلىة عندنا مغرمة بتويوتا و الموضوع متوارث جيل بعد جيل كلنا عشاق تويوتا و انا لما رحت المعرض كانت اخر 2009 موجودة في اسكندرية كان واحد واقف حيشتريها هو كمان و حجزها و بعد كده على حظي قام لاغي الحجز فقمت انا شاري عالطول ...

وقتها انا معلوماتي كانت ضعيفة في موضوع العربيات .. بس بعد كده فهمت يعني ايه تويوتا لما ركبتها فترة و ركبت عربيات تانية ...