ملحوظة علي الكورولا المستعمل ...!!!

[hero]

بعد قراية تقريبا كل اعلانات البيع عن الكورولا المستعمل حتي كسر الزيرو.....
لاحظت ان اغلب العربيات 90% علي الاقل...اوتوماتيك فول اوبشن و 1300 CC....
المعروض من المانيوال يكاد يكون منعدم او قديم قوي ...او علي الاقل فوق الـ 100 الف كيلو...يعني تقريبا نص عمر...

السؤال ايلي محيرني :

لية ممكن واحد يبيع عربية تويوتا اصلا ....!!؟ العربية ما شاء الله في رأيي احسن سيارة في فئتها رغم ارتفاع سعرها في مصر الا انها برضة ما زالت افضل سيارة ركوب في فئتها علي مستوي العالم ...

متهيالي حكاية الاتوماتيك علي موتور 1300 دي مش مظبوطة وعلي هذا الاساس اغلب المعروض للبيع من النوع دة... :roll:

ياريت لو حد عندة خبرة في الكورولا الـ 1300 الاوتوماتيك يفيدنا في الموضوع دة...

[fahd_628]

انا عمى عندة كورولا 1300 اوتوماتيك موديل 2003

العربية ما شاء الله كويسة جدا و سحبتها كويسة و مفيهاش مشاكل الحمد لله

يمكن بيغيرو لمجرد التغيير بس :)

بس انت لما تشترى هات حاجة نضيفة و كيلومترات قليلة و اكشف عليها كويس

[أبوسيف]

مع واحد صاحبى 1300 أوتوماتيك موديل 2005 ، العربية سحبها حلو جدا والتكييف ما بيأثرش على سحب العربية ، وعفشة ناعمة جدا وبرستيج جامد جدا ، بس لو تويوتا تنزل بسعر العربية دى شوية والله ما هاتشوف فى الشارع غير الكورولا ، لكن للأسف سعرها مرتفع زيادة عن اللزوم ودة مخلى الناس تتجه للانسر أكتر فى الفترة اللى فاتت.

[hero]

يا جماعه الف شكر علي الاجوبة الجميلة دي ...
بس برضة عندي ملحوظة تانية ....

ازاي اقدر احدد سعر العربية اذا كان معقول يعني مناسب لحالتها ولا مغالي فية ....
انا حاليا ...باعتمد علي الكيلومتر وسنة الموديل ....بس للاسف بحساباتي ...كل المستعمل فية من 8 ~ 10 آلاف زيادة...

انا باحسبها علي اساس ان مثلا عمر السيارة الافتراضي من غير مشاكل كبيرة (زي مثلا احتياج الموتور لعمرة شاملة ) حوالي 200 الف كيلو...وان متوسط الاستهلاك المعقول ...من 12 ~ 15 الف كيلو في السنة ...وباخد نسبة استهلاك السيارة واخصم نسبة مقابلة من سعر الزيرو....دة غير ان ممكن اخصم كمان من 8~ 10 آلاف جنية ....علشان خاطر ان السيارة اترخصت فعلا وما بقتش زيرو .... (الحكاية دي انا عارفها من مواقع بيع المستعمل برة بس ساعات ما تمشيش مع سوق الكانتو ايلي عندنا )...

ياتري انا مغالي في حساباتي ....يعني جاي قوي علي سعر المستعمل ....ولا كدة يعتبر معقول...

[Karim_Monir]

شوف يا سيدي
انا نزلت الف علي كل معارض الكرولا قبل ما اشتري الزيرو
كل اللي بيتباع او 90 % علي الاقل اتوماتيك بقيت مستغرب
لحد مالقيتها مع زميل ليا في الشغل
خدتها منة اجربها
وحشة قوي قوي
هيا حلوة انك تقارنها باي حاجة تانية اتوماتيك
لكن وحشة فعلا في السحب خاصة اللي بيجري ويسحب جامد
اتوماتيك الكرولا معمر بس مش 1300
ولقيت زي ما بتقول كل المستعمل فوق ال 70 او 80 الف كيلو
ومبالغ جامدة
عشان كدة لميت حالي وجبت الفاضية المانيوال اللي ب 99500
وركبتلها زجاج اصلي بتاع كرولا 2006 وسنتر والدنيا بقيت بيس والحمد لله
سوق الكرولا عاللي ومش هاتعرف تقيمة بالحوار ده ونسبة الاستهلاك
لانها مطلوبة وبشدة واللي بيبعها عارف كدة
وبعدين ممتوسط الاستهلاك من 15 ال 20 الف في السنة
عشان كدة في ناس بتعمل الضمان 3 سنين او 60 الف
وكرولا من الشركات القليلة اللي رافعاه الي 100 الف وعاهم حق

[hazem_khidr]

العربيه مع خالي موديل 2004 و عامله فوق ال100 الف كيلو و ما شاء الله حالتها ممتازه و سحبها بالنسبه ليه كويس .بس لما بسوقها مش بحس انها شديده بالمقارنه ب 2004 يعني.
بالنسبه لسعر اعاده البيع و المعادله يا هيرو ما تتحسبش كده خالص.
العمر الافتراضي للعربيه مش هو العمر الافتراضي للموتور وكمان اي موتور بالاستعمال المعقول بيقعد ؤ250 الف كيلو و ما شوفناش حد بيرمي عربيه علشان الموتور محتاج عمره مثلا!! ف بالتالي حسابات مش منطقيه و غير كده ان اي آله ليها معدل اهلاك فعلا سنوي بس في اخر الفتره بيبقي ليها تمن برضه ماهو مش منطقي ان العربيه مثلا عمرها الافتراضي عشر سنين بعد العشر سنين برميها و بجيب غيرها!!صح ولا انا غلطان؟؟

[hero]

شكرا يا كريم باشا ..وشكرا برضة يا حازم باشا...

انا عارف ان العربية بعد حتي النص مليون كيلو هايكون ليها سعر وايلي بيسموة ساعتها سعر الخردة ...بس هي الفكرة....هلي من المنطقي انك مثلا تشتري عربية فارقة عن الزيرو..10 الاف جنية وتكون عاملة 80 الف كيلو...متهيألي صعب قوي...

سؤال لكريم ...

لما ركبت الزجاج اكهرباء والسنتر في العربية ...هلي تم تعديل اي دواير كهربية او تغيير في الابواب ولا العربية مجهزة لان يركب عليها الزجاج دة في اي وقت ...

وشكرا ليكوا تاني

[جندى مجند]

هلي من المنطقي انك مثلا تشتري عربية فارقة عن الزيرو..10 الاف جنية وتكون عاملة 80 الف كيلو

لأ طبعاً مش منطقى ... سوق الكورولا المستعمل الاستهبال فيه عالى عشان عليها طلب جامد ... بالـ 10 آلاف الفرق دول هات زيرو و اشترى راحة بالك لكن لو لقيت حاجة كسر زيرو (10 أو 12 ألف كيلو) و فارقة 5 ولا 6 آلاف عن الزيرو تبقى حلوة

[loay]

انا لسه مشترى كورولا 2006 كاملة اتوماتيك على 94 الف
بحالة الزيرو تقريبا - سحبها مش بطال ولكن اخر سرعة ليها 150 160

[hero]

ممكن اعرف حضرتك شاريها من معرض ولا من صاحبها ....ولو من صاحبها فدة تم عن طريق وسيط (سمسار) ولا من اعلانات الجرايد...وازاي كشفت علي العربية واتأكدة انها مش عاملة اي حوادث او مشاكل...

علي فكرة انا مش فارق معايا السرعه اطلاقا ....انا يمكن ايلي احتاجة انا العربية لما احتاج انها تجمع سرعه ...تجمع بسرعه يعني علشان تجاوز او كدة ...لكن غير كدة ...متهيألي مصر اخرها 120 كيلو ويبقي كتير عليها ...

[Karim_Monir]

ممكن اعرف حضرتك شاريها من معرض ولا من صاحبها ....ولو من صاحبها فدة تم عن طريق وسيط (سمسار) ولا من اعلانات الجرايد...وازاي كشفت علي العربية واتأكدة انها مش عاملة اي حوادث او مشاكل...

علي فكرة انا مش فارق معايا السرعه اطلاقا ....انا يمكن ايلي احتاجة انا العربية لما احتاج انها تجمع سرعه ...تجمع بسرعه يعني علشان تجاوز او كدة ...لكن غير كدة ...متهيألي مصر اخرها 120 كيلو ويبقي كتير عليها ...

بالنسبة للتجميع مش هاتجمع بسرعة خالص
صعب قوي علي 1300 اتوماتيك عشان كماان جسمها كبير

بالنسبة للزجاج الكهرباء كلة فيش مفيش تعديل
غير بس مكان وحدة التحكم اتنقلت من اليمين للشمال
عشان كل العربيات دي بتنزل برة دريكسيون يمين

[loay]

انا اشتريت العربية من اعلان فى الوسيط - سيبك من السماسرة والتجار - دول نصابين
خليك فى الوسيط واعلانات النت والجرائد - واول سؤال تساله - رخصة باسم صاحبها وللا فيها توكيل
لو فيها توكيل اعرف انها بتاعة تجار وملعوب فيها للصبح
ومن خلال تجريتى اقدر اقولك مميزات وعيوب الكرولا 1300 اتوماتيك وقد حاولت ان اكون موضوعى بشكل كبير – اقول ال للعربية وال عليها بدون مجاملة ولا ظلم

المميزات:
-اقتصادية جدا فى استهلاك البنزين
-تكيفها تلاجة - تشغله على سرعة مروحة 1 فقط والا هتتجمد - ولا يؤثر على سحب العربية ولا يكلبش الموتور عكس الانسر
-مرتفعة عن الارض يعنى متخافش من المطبات الصناعية العالية خصوصا لو معاك ناس كتير فى العربية وايضا تعرف تنزل منها براحتك لو ركنت جنب رصيف عالى (الباب هيفتح بسهولة علشان عالى عن الرصيف ومش هيخبط فى الرصيف كما فى العربيات المخفضة) ومش تقعد تنط جوا الصالون من كرسى لكرسى علشان تنزل من الباب التانى (عندى تجربة اليمة مع ارصفة الشوارع الداخلية والانسر القديمة المنخفضة على الارض)
-عفشة وباور ومساعدين ودواسات ناعمين جدا عكس الانسر
-كاوتش للخدمة الشاقة لزوم مطبات ونقر شوارع مصر
-الثبات والهدوء (ترمى الابرة ترن فى الصالون) حتى فى السرعات العالية تحس انك ماشى على سرعة 20 كم
-تابلوه ابانوس وصالون فخم
-واسعة من الداخل والكراسى واسعة و مريحة
-ميزة ضم المريات بالكهرباء دى مش موجودة فى اغلب العربيات ودى تنفعك اوى لو ماشى فى شارع داخلى زنقة وفى عربية داخلة عكسك – تضم المريات فى السريع بدوسة زرار
-اضائة شديدة فى الفوانيس الامامية تخليك تشوف الطريق بوضوح فى الليل وايضا نور الصالون جامد اوى
-ميزة الشريحة الالكترونية فى المفتاح - لازم المفتاح الاصلى هو ال يدور الموتور فقط - يعنى لايمكن تدور الموتور بأى طريقة اخرى (يعنى مفيش حرامى يسرقها - بس اوعى تضيع المفتاح الاصلى)
-معزولة بلكك وفلتو كويس وخصوصا فى الخلف - يعنى مفيش صدا ولا برومة
-ممكن تسوجر الشنطة الخلفية لو هتضع فيها اشياء ثمينة وتلغى خاصية فتح الشنطة من الداخل – وكمان عاملين مفتاح مخصوص احتياطى لا يفتح الشنطة علشان تسيب المفتاح ده ما سايس الجراج وتبقى مطمن انه مش هيعرف يفتح الشنطة ولا من جوه ولا بالمفتاح ال معه
-احزمة الامان ناعمة اوى ومش خنيقة ولاتقفش على صدرك كما فى السيارات الاخرى – تحس انك مش لابسها
-شكلها شيك وبرستيج عالى جدا
-سعرها ثابت ومش هتخسر فيها لو حبيت تبيعها بعد كده لانها مطلوبة ومعروف سعر سوقها كام
-بيعها سهل اوى ومطلوبة دائما وخصوصا الاتوماتيك (اغلب الستات مبيعرفوش يسوقوا المانيوال والستات هى صاحبة القرار فى الاغلب) يعنى الكورولا مش هتقعد فى ارابيزك زى عربيات تانية تقيلة فى بيعها و ملهاش سوق فى مصر زى الالفا روميو والاودى
-عربية متدوالة بكثرة يعنى الصانيعية اشتغلوا فيها كتير وشافوها كتير وعارفين بيفكوا كل قطعة فيها ازاى ومش هيعكوا ولا يستكشفوا فيها ولا يلعبوا فيها البخت عكس العربيات القلة ال تلاقى الصنايعى يقف يبلم ادامها ومتعرفش تركب ليها انذار ولا سنتر ولا كاسيت لان محدش عارف اولها من اخرها ولا فيوزاتها واسلاكها مشاية ازاى (زى المازدا 3 الجديدة مثلا)
-قطع غيارها متوافرة بكثرة وفى منها استعمال الخارج والتايوانى واخيرا الصينى (مثلا ممكن تجيب فانوس تايوانى او صينى رخيص – مش لازم تجيب الاصلى فى الفوانيس مش قضية)
-اسعار قطع غيارها متوسطة يعنى مش غالية اوى زى العربيات الاوربية (الفيكترا والاوكتافيا) ولا رخيصة زى الكورى (الهونداى والدايو)
-تعتبر السيارة الاكثر مبيعا فى العالم العربى
-ضمان 3 سنوات او 100 الف كيلو ايهما اقرب


عيوبها:
-الاوتوماتيك بتاعها مش بيجمع بسرعة علشان توصل لسرعة 150 مثلا يدينى ويديك طولة العمر (الاوتوماتيك مريح جدا فى الزحمة وخصوصا وقفة كوبرى 6 اكتوبر - بس لعنة وسئ جدا على طرق السفر السريعة) لو بتسافر كتير هات مانيوال احسن –انما لو بتتزنق فوق كوبرى 6 اكتوبر او بتمشى فى شوارع زحمة وما اكثرها فى مصر خليك فى الاوتوماتيك وريح رجلك الشمال من دوسة الدبرياج ال تجيب دوالى
-اخر سرعة ليها 160 كم فى الاتوماتيك ولو جبت اخر الدواسة بتنزل للترس التالت وتلاقى صوت الموتور علَى جدا و عملك فضيحة على الطريق
-بسبب علوها عن الارض (ميزة وعيب فى نفس الوقت) تخليها ساعات تعوَم من الخلف لو دخلت على ملف بسرعة و كان فى كات ايز فى الارض (خلى بالك من منازل ومطالع الانفاق مثل الازهر وصلاح سالم وغيره)
-وبسبب العلو ايضا بيقولوا انها ممكن تتقلب على السرعات العالية (الحمد لله لم اجرب هذا واكيد مفيش حد عايز يجرب – ربنا يكفينا ويكفيكم شر الطريق)
-كل العربيات الكورولا فى مصر XLI يعنى مفيهاش عداد RPM والموديل GLI هو الوحيد ال فيه RPM ومش موجود فى مصر بينزل لدول الخليج فقط علشان 1800cc واحنا يدوبك لسه شايفين ال 1600 بالعافية
-صوت الموتور عالى مقارنة بباقى السيارات (يمكن علشان مفيش RPM قالوا نسمعك صوت الموتور احسن)
-الابواب ناشفة - لازم تشد و ترزع الباب جامد علشان يقفل وخصوصا لو الزجاج مقفول (يمكن وضعوا جوانات وكاوتش ابواب جامد لتوفير عزل صوت وهواء وهدوء اكثر داخل الصالون)
-صوت الزنان (صفارة التنيبه داخل التابلوه) مزعج جدا لو عديت سرعة 120 كم يحسسك انك فى العد التنازلى لاخر لحظات حياتك ويخليك تنزل عن سرعة 120 كم غصب عنك علشان تسكته (ممكن ناس تشوفها ميزة امان)
-وضع الكاسيت فى التابلوه صعب جدا - علشان تفك او تغير الكاسيت شغلانة صعبة جدا ولازم تفور وتفك حاجات كتير اوى علشان تفك الكاسيت
-فيها مشكلة كبيرة من وجهة نظرى- المفتاح لا يخرج من الكونتاكت الا على وضع P فقط (زيها زى BMW) و هذا الوضع بيكلبش السيارة ولا تتحرك يعنى مش هتعرف تركن صف تانى وتقفل على حد عكس كل العربيات انك ممكن تخرج المفتاح وتسبها على وضع الموورN وبالتالى يمكن دفعها للامام والخلف بسهولة – يعنى ولو ركنت صف تانى وقفلت على عربية واتاخرت شوية تلاقى صاحب العربية ال قفلت عليه جاب ناس وعاملين يشدوا ويزقوا ويرفعوا فى عربيتك ويكسرولك الاكصدام و برضة عربيتك مش بتتحرك - ناس بتشوف ده ميزة امان بس لاسف مش فى مصر - انتم اكيد عارفين الركن هنا فى مصر صعب ازاى وما اكثر الصف التانى والتالت كمان
-تيل الفرامل بيتاكل بسرعة فى الاوتوماتيك بلاضافة الى ضعف معدل الفرملة عن المانيوال لان الفرامل بتكبلش العربية والموتور معها ايضا
-الصاج بتاعها خفيف وضعيف اوى (ورق يعنى) – وخصوصا الرفرف الامامى – لو واحد سند عليه جامد بيطبق بسهولة جدا ويبقى شكله وحش ومش بيرجع لوضعه بالسمكرة على البارد – تلاقيه شكله معضعض
-لعشاق الموسيقى - الكاسيت الاصلى صوته مش حلو اوى تلاقى Bass عالى اوى بس مفيش Treble خالص ولا يشغل اسطوانات MP3 – يقال ان الموديلات الجديدة تشغل MP3 ولم اتاكد من الخبر
-علو مؤخرة السيارة مع البومبيهات الخارجية ووجود مساند رأس فى الكنبة الخلفية يجعلك لاترى بوضوح وانت ترجع الى الخلف
-يمكن تغيير قراءة عداد الكيلو متر عكس السيارات الاوربية – شفت عربيات كتير لعبين فى العداد و مخليين القراءة 18 الف كيلو مع ان حالة العربية شقيانة وعاملة 100 الف كيلو على الاقل علشان كده قراءة العداد مش هى المقياس ال تحكم بيه على العربية
-سعر السيارة الزيرو يعتبر غالى ومبالغ فيه مقارنة بفئتها وامكنياتها (تيويتا ايجبت الوكيل هى ال بتحدد السعر لانها هى الوحيدة ال بتدخل الكورولا مصر – عكس الانسر فى ناس كتير بتستوردها وتدخلها مصر مع نفسها علشان كده سعرها مش غالى اوى)
-زحمة الصيانة فى التوكيل (العباسية وابو رواش) – لازم تاخد ميعاد قبلها بشهر – زى ماتكون هتعمل الصيانة فى اليابان – علشان تيويتا ايجبت هى المحتكرة كل حاجة

[hero]

الف الف شكر يا لؤي علي الايضاح وربنا يسهل ...

[ahmedsherif81]

يا جماعة الكورولا دية عربية المليون كيلو متر مش 250 الف احنا كان عندنا واحدة مو 1984 وبعد ما العداد قلب ب20 الف كيلو العربية احتاجة لشمبر بس مش عمرة ازاي تحسبو عمر المتور الحديث بعد التكنلوجيا دية ب250 الف اكيد العامل هو الاستخدام الحسن او لا

[محمد محمد]

وبعدين ممتوسط الاستهلاك من 15 ال 20 الف في السنة
عشان كدة في ناس بتعمل الضمان 3 سنين او 60 الف
وكرولا من الشركات القليلة اللي رافعاه الي 100 الف وعاهم حق

انا العربية بقالها معايا 15شهر وعاملة40الف كيلو متر يعنى تقريبا فى خلال 3سنوات هتعمل100الف كيلو متر وكمان تويوتا بتدرس تمد فترة الضمان ويبقى خمس سنوات بس مش عارف هيبقى كام كيلو