ملحق تقييم الكورولا وزيارة التوكيل (هام) :)

[dr.amr]

اهلا بيكم مره تانيه اعزائي المشاهدين مع العربيه المثيره للجدل الكوكو التركي

هحاول اعيد التقييم بسرعه وبعد كده احكي عن زيارتي للتوكيل في النهايه عشان الناس تقرا الموضوع كله

1- الشكل :

مش هنتكلم فيه دي اذواق وان كنت شايفه شياكه اوي والداي لايت كل مشوار لازم 2 او 3 يشاورولي نورك مفتوح

2-المساحه :

العربيه واسعه وسع التنيييييييييييييين ممكن يركب فيها 5 ميقلوش عن 190 سم حاجه عنب بصراحه وده كان سبب اني اشتريها ومجيبش الاسترا ومساحات التخزين الداخليه عاديه الشنطه كبيره بس طبعا محدش يفتكر انها زي الاوكتافيا يعني زي الالنترا او السيراتو يعني كويسه جدا وتحمل براحتك

3-الخامات المستخدمه كويسه والتابلوه مكسو جلد والمسند بتاع الابواب قماش والبا من فوق مكان ماتسند ايدك مكسو جلد والبلاستيك اللي فيها طري وناعم والملمس كويس

4- التقفيل كويس جدا متسمعش اصوات ومفيش حاجه مفارقه بس تقفيل باب السائق كان محتاج يكون انضف شويه في الفئه ده يعني هي حاجات مش هتاخد بالك منها الا لو ركزت هتلاقي فروق بسيطه جدا في الجزء اللي بيتقابل فيه مسند الايد مع الجزء بتاع زراير الازاز مع المقبض الداخلي بس مبتعملش اي اصوات شيء بسيط جدا بس لازم اقوله للامانه

5-العزل:

مع الوسع الداخلي اروح حاجات في العربيه ممكن اديلهم 10 من 10 شيء ممتع تقفل الازاز تبقي معزول عن العالم الخارجي تماما وحتي معزول عن موتور عربيتك تبدا تسمع صوته لما تعلي فوق ال 4 او تعمل كيك داون تبدء تحس ان في موتور شغال في العربيه

6-الموتور :

سحبه كويس جدا واول مره احس ان تويوتا عامله موتور عصبي لان اخر تجربه ليا كان مع كورولا 2006 وياريس 2008 الموتور لما تقفل الشباك متحسش انه داير وسحبه كويس اوي وحتي مع التكييف بيقل حاجه بسيطه وده طبيعي جدا لكن لما تحتاجه هتلاقيه مستعد استهلاك البنزين محسبتوش لكن تقريبا انا مشيت 220 كيلو بالتكييف وعلامة البنزين في النص

7-الفتيس:

هو cvt متحسش بالنقل خالص وده الطبيعي مبيهدرش من عزم الموتور
لما بقلبه علي الوضع الستيبترونك بلاقيه 7 نقلات ومعرفش ازاي لان ال cvt مفيهوش عدد نقلات علي حسب فهمي

8- التكييف :

علي 1 و 2 متسمعش صوت تحس بسقعه بس
وفتحات التكييف واسعه جدا ممكن ادخل راس عيل صغير جواها
التكييف كويس معلتهوش عن 3 انا من النوع اللي مبجيبهوش علي وشي او جسمي بخليه بعيد بس بيخلي العربيه ساقعه


9-الفرامل بتاعتها محتاجه تعود لانها قويه قوي وبتمسك بسرعه وتقدر توقف العربيه في اي ظروف لكن في الزحمه بتقططم جامد لو مش متعود عليها ممكن تلبسك في اللي وراك

10-الثبات بقي ممتاز ماشاء الله حدث ولا حرج انا بركب فنتازيا كتير وعارف معني الثبات
انا وصلت بيها 150 ومعرفتش ازود الطريق قفل عليا 150 كانت ثابته تماما ومفيش اي نوع من القلق او الاهتزاز بالعكس كنت باخد غرز ضيقه

11-العفشه:

العفشه طريه ومتحسش بيها الا في عين القطه او في المدقات والارض المكسره هنا بتلاقيها بقيت انشف يعني نشوفيتها مش جامده متوسطه والمفروض انها بتتحسن مع الوقت واتحسنت مع التربيط

12-العربيه متقفله من تحت كويس جدا التقفيل ممتاز


ملحوظه:


العربيه نازل فيها فانوس شبوره خلفيه ستاندرد

وفيها 5 مستويات للنور الامامي تتحكم فيهم من البكره تحت الدركسيون

العداد لحد 240

ونازل فيها TRC و VSC ستاندرد حاولت وانا ماشي علي 120 اشغلهم واخد غرز ع العاصي قوي بس مرضيوش برضو لان العربيه معومتش مني والزرار بتاع الستابيليتي موجود جنب زراير المرايات تشغله او تقفله

العربيه فيها ايموبيلايزر وفيها مفتاح تفتح وتقفل الايرباج التاني

وفيها شيء رخم صوت انذار للحزام تقريبا بيقعد اول 4 دقايق يصفر و كل شويه بيقعد يفتكر ويصفر تاني لما تحط الحزام بيسكت وبيحس لما يكون في حد قاعد جنبك ولازم يحط حزامه
يعني بيقعد يصفر اول 4 ددقايق ويسكت لو حطيت الحزام او لو مش هتحطه هيقعد كل مثلا ربع ساعه يرنلك يفكرك ولو حد جنبك بيحس بيه

باختصار العربيه كويسه اوي وهتعمل مبيعات قويه جدا الموديل ده ممتاز شكلا وموضوعا
واول موديل يكون تويوتا وشكله حلو


زيارة التوكيل :
--------------

انا طبعا كنت متضايق من العفشه وكنت مستغرب انها خشنه
مكدبتش خبر وروحت التوكيل انهارده كنت قدام الباب 7 ونص وخدت دوري ودخلت اشتكيت من العفشه
طلبوا مهندس في المايك يطلع معايا نجرب العربيه
ربطنا العفشه
كان شخص محترم جدا اسمه مهندس اسامه ركبنا وسمينا وانطلقنا
اول حاجه قالهالي العربيه ده عفشتها سبور يعني طبيعي تلاقيها خشنه شويه خصوصا في الاول مقابل ستابيليتي جامده
قولتله بس انا كان معايا 2006 كانت ناعمه جدا قالي مينفعش تقارن والا كمان هنقارن الستابيليتي بين 2006 في الضياع وده
هو قالي انه كان معاه 2007 ولما عربيه نقل تعدي منه كان بيحس انه هيطير
المهم مشينا وسمع الصوت وروحنا في مدقات قالي مفيش حاجه العربيه طبيعيه جدا طبعا الصوت قل كتير يمكن 80 في الميه مع التربيط وقالي متحطش في دماغك انت معانا 3 سنين اي حاجه علينا
وبعد كده سالته عن ارتفاع العربيه عن الارض قولتله العربيه ده واطيه
قالي هي حكت معاك قولتله اه بس كان مطب عالي قوي
قالي فعلا هي نفس علو السيفيك 2007
قولتله طيب وده ملوش حل انها تعلي شويه قالي لا للاسف
قولتله بس دي هتعمل مشكله لناس كتير قالي عادي السيفيك زيها وانتشرت بس مقابل كده الثبات بتاعها عالي قوي
ممكن تاخد المطب العالي قوي علي 3 عجلات مش هتحك
المهم رجعنا وقالي نصحيه متقرصش عليها لان اول الف كيلو بيبقي حرج شويه متعليش عن ار بي ام 4
بس والعربيه فيها ايموبيلايزر
وكتبلي تصريح الخروج وخرجت واتكلت علي الله
انا موضوع العلو ده مش بيفرق معايا شخصيا لاني نادرا لما بيركب معايا اكتر من 1 لكن لازم اقوله من باب الامانه
اي اسئله انا في الخدمه

اه وبالنسبه للحجز قالي انا معرفش الناس بتدفع اوفر برايس كتير ليه قالي احنا عندنا بالسعر المعلن وتستلم في خلال شهر 1 بس

[S O P H O S]

ما شاء الله رائع
والموديل ده اتوقع يعمل طفرة للكورولا من تانـــي .. ّ

[abofandy]

انت جبت الفئه انهى .. واللون الى حضرتك اختره كان اية ؟
وربنا يباركلك فيها طبعا ويعيطك خيرها ويبعد عنك شرها
ولو صورة للعربية اكون شاكر افضالك

[dr.amr]

ما شاء الله رائع
والموديل ده اتوقع يعمل طفرة للكورولا من تانـــي .. ّ

اعتقد كده هيرجع مبيعاته تاني بعد مالكوري اكله

انت جبت الفئه انهى .. واللون الى حضرتك اختره كان اية ؟
وربنا يباركلك فيها طبعا ويعيطك خيرها ويبعد عنك شرها
ولو صورة للعربية اكون شاكر افضالك

انا جبت بيز اوتو
لونها شامبين غامق
الصور ماوعدكش بس هحاول لان موضوع التصوير محتاج وقت وانا باتواجد قليل شويه فلو مقدرتش سامحني

[تامر.محمد]

قالي فعلا هي نفس علو السيفيك 2007

واطية اوي كده ؟؟؟؟؟؟؟؟؟؟؟؟؟؟

[saddam]

صديقي المواطن
مبروك وبالتوفيق ودمتم للنضال

[dr.amr]

واطية اوي كده ؟؟؟؟؟؟؟؟؟؟؟؟؟؟

علمي علمك انا مبحسش عشان غالبا ببقي لوحدي بس ده كلامه

صديقي المواطن
مبروك وبالتوفيق ودمتم للنضال

[Silent~Dream]

من وجهه نظر حضرتك هل تستحق 185 تانى فئه او 215 للهاى لاين ؟
وربنا يباركلك و يبعد عنك شر عيون الحاقدين

[dr.amr]

من وجهه نظر حضرتك هل تستحق 185 تانى فئه او 215 للهاى لاين ؟
وربنا يباركلك و يبعد عنك شر عيون الحاقدين

الله يكرمك

وجهة نظري البيز لاين كفايه اوي ولو هتزود يبقي 185 مع اني مجبتوش لاني مش شايف اني هلاقي مكان استعمل فيه البارك اسيست في مصر احنا بنحشر العربيات وده محتاج نص متر زياد عشان يساعدك

لو هتوصل 215 يبقي 222 وهات a7 بدون نقاش

[2CODE]

الله يكرمك

وجهة نظري البيز لاين كفايه اوي ولو هتزود يبقي 185 مع اني مجبتوش لاني مش شايف اني هلاقي مكان استعمل فيه البارك اسيست في مصر احنا بنحشر العربيات وده محتاج نص متر زياد عشان يساعدك

لو هتوصل 215 يبقي 222 وهات a7 بدون نقاش

كلامك صحيح والله نفس الكلام على الـAuto Park قاله لي بتاع BMW قالي مفيش فايده منه ومتجيبوش لانك مش هتستعمله ثم ان احنا هنا في قمة الغباء اقول لك ازاي

وانا بركن ممكن واحد يكون عايز يطلع ويزنق عليك فلازم تفرمل ويعدي وتكمل انت يعني انا ممكن اركن في 5 دقائق بسبب الناس اللي عايزه تعدي وانا بركن

طيب تعالا وانت مشغل الـAuto Park العربية مكملة مشي مش هتقف طيب واللي مصممين يطلعوا وميعرفوش ان العربية هي اللي بتركن نفسها مش انت يعني انت مش متحكم ولا في سرعة ولا في فرامل ولا اي شئ

يبقى تاكسي معفن هيخبط لك العربية علشان الـAuto Park

يبقى فعلاً خسارة الفلوس

[dr.amr]

كلامك صحيح والله نفس الكلام على الـAuto Park قاله لي بتاع BMW قالي مفيش فايده منه ومتجيبوش لانك مش هتستعمله ثم ان احنا هنا في قمة الغباء اقول لك ازاي

وانا بركن ممكن واحد يكون عايز يطلع ويزنق عليك فلازم تفرمل ويعدي وتكمل انت يعني انا ممكن اركن في 5 دقائق بسبب الناس اللي عايزه تعدي وانا بركن

طيب تعالا وانت مشغل الـAuto Park العربية مكملة مشي مش هتقف طيب واللي مصممين يطلعوا وميعرفوش ان العربية هي اللي بتركن نفسها مش انت يعني انت مش متحكم ولا في سرعة ولا في فرامل ولا اي شئ

يبقى تاكسي معفن هيخبط لك العربية علشان الـAuto Park

يبقى فعلاً خسارة الفلوس

اه تصور ميكروباص يصدرلك ورا العربيه
والبارك اسيست يهنج يقولك ايه ده ههههههه ويروح شاتم
تنزل تقوله معلش ثواني هو كمان يشتم
يعني ادفع 10 الاف عشان اتشتم من البارك اسيست ومن السواق

[janagabr]

ربنا يبارك في العربية ويحفظهالك

[OilMan]

ربنا يديك خيرها ويكفيك شرها والف مبروك

وزى ما قلت لحضرتك انى فبها ايموبلايزر

ومش تقلق من الارتفاع واللى قلقان يوقف اى حد راكبها يساله او يرجع لموضوعى بتاع القياس

مبروك للجميع مقدما

[Silent~Dream]

اه تصور ميكروباص يصدرلك ورا العربيه
والبارك اسيست يهنج يقولك ايه ده ههههههه ويروح شاتم
تنزل تقوله معلش ثواني هو كمان يشتم
يعني ادفع 10 الاف عشان اتشتم من البارك اسيست ومن السواق

انزل قول لبتاع الميكروباص بوظت حساسات ال assist park والله ما هسيبك هيقولك و بتشم بالام كمان

[dr.amr]

هضيف شوية حاجات :d

الفرامل ورا وقدام زي بعض ديسكات

نظام ba بيخلي العربيه تقف حتي لو انت ملكش مزاج تفرمل كويس فرامل ممتازه ماشاء الله هتقف يعني هتقف

البنزين المطلوب 91 او اكتر حسب الكاتالوج ونوع المحرك 1zr- fe

ممكن توقف ال trc بضغطه واحده علي الزرار بتاعه ولكن لو عاوز توقف ال vsc كمان تطول الدوسه حوالي 3 ثواني الاتنين هيقفلوا وهيبان عندك في العدادات

العربيه علمتني الادب انا واي حد يركب معايا بقيت احط الحزام مجرد ماقعد تجنبا لصداع صوت الانذار بتاع الحزام لانه رخم جدا وسرعته وقوته بتزيد

نوع الكاوتش بريدجستون تورانزا

لو عاوز توقف صوت الكاسيت من غير ماتقفله تدوس علي زرار هولد لغاية مايصفر في الدركسيون والعكس لما تحب تشغله

زرار السبورت مود بيخلي الباور تقيل والنقلات تتاخر ويقفل نظام الايكونومي والفرامل بتكون اقوي