حادثة بالياريس

[محمد يوسف]

النهارده كان يوم سىء قوى عليا مع الياريس...بس الحمدلله على كل حال

الصبح باركن العربية جنب رصيف..أتارى فيه حجر عبارة عن بلوك أسمنت جنب الرصيف..و أنا من عادتى أحضن قوى جنب الرصيف عند الركن..وفجأة سمعت صوت حكة جامدة..من الرتباكى رحت طالع لقدام بسرعة صوت الحكة زاد..أتارينى خدت البلوك رايح جاى....والنتيجة "تطبيقة " فى العتب تحت الباب اليمن الورانى مع كحتة جامدة فى الدهان خلت الكحلى بقى أبيض...بس الباب نفسه مش فيه أى مشكلة والحمدلله

العصر بقى و أنا راجع من الشغل..واقفين كلنا فوق 15 مايو حوالى الساعة 4 والدنيا زحمة موت..وفجأة أسمع صوت فرملة جامدة من ورايا و أنا واقف ..و دشششششششششش....بصيت فى المراية لقيت دايو دهبى مخيشة فيا من ورا....نزلت لقيت الاكصدام الورانى من ناحية الشمال منطور من تحت الفانوس و فيه عجنة (بس مش كبيرة) فى الاكصدام من تحت عاملة كراك لجوه..بس الفانوس والشنطة سليمة والحمدلله....طبعا الشاب قعد يتأسف و أنا طبعا ماكنش عندى استعداد أعمل مشكلة ساعة الفطار و أهو كلنا بنغلط..شبطت الاكصدام فى الفانوس لأنه عامل زى مايكون بكليبسات وروحت بالعربية

سؤالى لأصحاب الخبرة :
1- هل حكة العتب و خبطة الاكصدام الورانى ممكن استعدالهم؟ وهل ينفع ع البارد ولا لازم لحام بالذات للاكصدام؟

2- حد عنده فكرة عن التكلفة بتاعة السمكرة والدهان دول فى التوكيل؟ وهل ممكن أعملهم بره بنفس الجودة بالذات للدهان وبسعر أقل؟

3- هل الاكصدام ممكن ينطلر تانى من الفانوس ولا كده خلاص؟

خالص الشكر مقدما وكل سنة وانتم طيبين

[Mohamed_Ibiza]

اولا حمد الله على سلامتك ياباشا والحمد لله على اد كده

مصر بقت فزيعة والله زي النهاردة واقف راكن على جنب عادي جدا ومرة واحدة لاقيت واحد دخل فيها بجنب العربية كسرلي فانوس الاشارة اللي ادام وشالي شوية دهان

يلا الحمد لله

متهيالي ياباشا ان الاكصدام مش محتاج سمكري ده محتاج حد بتاع فيبر هو هيظبطه

ولو فيه حاجة مكسورة هو هيلحمه

اما العتب بقى ده محتاج طبعا سمكري وان شاء الله كل حاجة ترجع زي الاول عادي دي بسيطة

بالنسبة للتوكيل فانا مش عارف الحقيقة

في انتظار احد الخبراء يفيدك

[Abdo_Eldesokey]

الحمد لله يا باشا الخبطات عندك في أماكن سهلة

الاكصدام عادي أي حد بتاع فبر هيظبطه ومش هيضر كتير في سعر العربية لو اترش

والعتب أي سمكري كويس يفكه ويستعدله وإن شاء الله ترجع أحسن من الأول

[hazem_khidr]

قدر الله و ما شاء فعل
خبطه الاكصدام بتاعتك دي اخت خبطه عربيتي اتخبططها بالضبط
بس انا سيبتها للبوهيجي بتاعي اخدها عملها
اعتقد عملها عند سمكري او بتاع فيبر
هيا طالما مافيش اي شروخ بيترد عادي
بيجيب ميه سخنه و بيسخن فيه بالميه لحد ما يلين و يستعدله.
بالنسبه للعتب ف دا مشكله كبيره ما اكدبش عليك:)
انصحك تسيبها كده تاخد العين
لانها ممكن تحتاج تفور العتبه او علي الاقل نص العتبه علشان تضبط الخبطه

[Yarisawy]

قدر الله وما شاء فعل

[kehso]

الحمد لله ... شوف يا باشا نفس الموقف حصلى بالظبط بس كان العتب اللى تحت الباب بتاعى روحت التوكيل لانى موسوس ومش بحب اى حد يلعب فى العربية ... عملوها و زى الفل و الموضوع كلفنى 300 حنيه بالضريبة والخبطة كان طولها تقريبا 40سم خلى بالك انصحك وديها للتوكيل احسن لانة بيسحب العتب على جهاز عنده ومش بيستسهل ويقطعة من بره زى السمكرى العادى كمان الدهان مختلف لان دهان العتب اسمه انتركوت وهتلاحظ لو شوفته فى الجانب السليم انه خشن ومحبب مش زى بقيت دهان العربية وده الفابريكة بتاعها

[محمد يوسف]

العضو kehso
ألف شكر يا باشا..بس ياترى خدتها معاك فى نفس اليوم ولا قعدت فى التوكيل كذا يوم..أصل الحقيقة حتة انى أسيبها دى بتضايقنى..ولو كانت قعدت ياترى بتسيب لهم نسخة مفتاح؟
وكل سنة وانت طيب

[محمد يوسف]

قدر الله و ما شاء فعل
خبطه الاكصدام بتاعتك دي اخت خبطه عربيتي اتخبططها بالضبط
بس انا سيبتها للبوهيجي بتاعي اخدها عملها
اعتقد عملها عند سمكري او بتاع فيبر
هيا طالما مافيش اي شروخ بيترد عادي
بيجيب ميه سخنه و بيسخن فيه بالميه لحد ما يلين و يستعدله.
بالنسبه للعتب ف دا مشكله كبيره ما اكدبش عليك:)
انصحك تسيبها كده تاخد العين
لانها ممكن تحتاج تفور العتبه او علي الاقل نص العتبه علشان تضبط الخبطه

لأ ياباشا..الاكصدام الورانى فيه شرخ بسيط من تحت ( تحت الفانوس الشمال من ورا)...وأنا ماعرفش بتوع الفيبر دول بيبقوا فين....وماجاوبتنيش الجزء بتاع الاكصدام الورانى اللى رابطة فى الفانوس الشمال الورانى كانت نطرت من الجنب بس أنا كبسنها بايدى ودخلت ومشيت بيها يومين بعد الحادثة ما خرجتش تانى بس أنا خايف فى مطب ولا حاجة تنطر منى.

وموضوع العتب ده جامد بجد كده؟ علما ان الخبطة مش مأثرة ع الباب خالص

[tnasr1]

قدر الله وماشاء فعل

المهم انت بخير

[kehso]

اولا كل سنة و انت طيب و عيد سعيد عليك ان شاء الله العربية قعدت يومين عندهم وده كان فى رمضان علشان نصف يوم بس ده طبيعى علشان الدهان يلحق ينشف واى خدمة ياباشا...

[kehso]

طبعا لازم تسيب نسخة من المفتاح ماتخفش ياعم ده التوكيل بنفسه عندهم مفاتيح كتير مش هيطمعوا يعنى.. يا باشا