الكويت

[tota1]

سف على التأخير بس كنت مشغول اعذروني يا أحلى منتدى
زي ما وعدتكم :
اوﻻ انا حجزت كورولتي 2014 يوم اﻷحد واستلمت الخميس 2/20 من وكيل تويوتا في الكويت وهو الساير افضل وكيل تويوتا في الشرق الأوسط
تﻻحظوا سيادتكم ان مفيش تاخير في الاستﻻم كلها 4 ايام وتستلم مش زي مصر بالشهرين تﻻتة
مع اني كنت بحسب اني حتأخر فى الاستﻻم عشان كنت طالب تظليل v cool من التوكيل بس الحمد لله خلصوا تجهيز العروسة بدري
نيجي بقى في موضوع الاوبشن انا عارف ان فيه اختﻻفات بين الخليجي والمصري بس فيه حاجات على حساب حاجات تانية
وكل واحد عارف ايه اللي يناسبه اكتر والصراحة في أوبشن مش مهم اوي
نيجي بقى لصور كورولتي [/IMG][
url=http://www.gulfup.com/?q58dpr][/url]

[yassermahmmoud]

أخي العزيز tota1 ألف مبروك على العروسة .. الله يطعمك من خيرها ويكفيك شرها .. والسيارة ما شاء الله تبارك الله، وفعلاً هناك مواصفات زيادة في الكورولا المصري ليس الحاجة إليها كبيرة، وإن شاء الله ناوي على واحدة من السعودية توكيل عبداللطيف جميل.
وياريت تقول لنا عن إنطباعك عن السيارة من حيث العزم والثبات والعزل وارتفاع السيارة

[esam_ayad]

أولا ألف مبروك علي العربيه الجميله
ثانيا: عندي بعض الأسئله ياريت حضرتك تجاوبلي عليها ودول اللي ماخلونيش أقرب من الكورولا أصلا وإشتريت مكانها كيا سيراتو 2014 فل أوبشن:
1- هل حضرتك ماقلقتش من موضوع ان الفتيس في الكويت مختلف عن اللي بينزل مصر (في الكويت أربع سرعات وفي مصر نوع cvt ) ؟؟؟؟
2- هل في تصفيح أسفل العربيه زي اللي في مصر؟؟؟
3- هل الخامات الداخليه التايوانيه زي التقفيل التركي الرائع في العربيه اللي بتنزل في مصر؟؟؟
4- هل العربيه فيها مثبت سرعه زي اللي بتنزل مصر؟؟؟؟
5- هل العربيه فيها نظام الثبات الالكترون زي اللي بتنزل في مصر؟؟؟؟؟؟
وده مش هجوم والله علي الكورولا ولا حاجه
لأن أكيد كل واحد مقتنع بشيء وعندي زمايلي كتيير جدا هاجموني لما اشتريت السيراتو
بس حضرتك لو حسبت سعر الكورولا في الكويت زائد الجمارك هاتلاقيها نفس سعر الكورولا جميلة الجميلات اللي بتنزل في مصر وأد بعض في الفلوس بالظبط أو تقريبا فرق بسيط جدا.
يبقي ايه اللي يخليني أشتري عربيه فاضيه لمجرد اسمها؟؟؟
وأسف مره تانيه وياريت ماتعتبرهوش هجوم علي شخص حضرتك.
وربنا يديك خير عربيتك ويكفيك شرها

[tota1]

مستر عصام اوﻻ احنا طلعنا بلديات انا من شبين الكوم .
نتكلم جد شوية . مش هكدب عليك كنت بفكر زيك في السيراتو لأ نها بجد تستاهل الواحد يفكر فيها. بس العين متعﻻش على الحاجب.حقولك ليه دلوقتي.
محدش ينكر ان الكوري تقريبا زي الياباني بس عن تجربة انا جربت الكوري اول سيارة اشتريتها كانت نيسان صني 2008 من البابطين وكيل نيسان في الكويت اللي هيا رينو سكاﻻ في مصر بعتها في آخر السنة وخسرت كتير والله واشتريت ميتسوبيشي أوتﻻندر 2008 كاملة المواصفات من المﻻ وكيل ميتسوبيشي في الكويت وده تمهيد لأجوبتي على أسئلة حضرتك
بالنسبة لاختﻻف الفتيس مش قلقان خالص ﻷن اللي نازل في الكوروﻻ هنا فتيس مش جديد نازل من زمان في الكوروﻻ بالكويت ومصر يعني مفيش خوف من الصيانة ا و قطع الغيار. اما في اﻷداء صدقني ميفرقوش عن بعض كتير غير أجزاء من الثانية محدش يحس بيهم وعندي فى الاوتﻻندر جير cvt وانا عارف أنا بقولك ايه كويس.
نيجي لموضوع التصفيح هيا يا جماعة نفس العربية واﻷرتفاع هنا 5'14 يعني العربية متعدلة جاهزة مش لسه حيعدلوا ارتفاعها زي اللي في مصر.
نتكلم بأه على التقفيل التايواني: انتا شفت الصور اللي منزلها والصور التانية لكوروﻻ مصر موجودة في المنتدى وانت شوف وقارن بنفسك. ﻷ وحزيدك من الشعر بيت : السيارة الخليجي الدهان بتاعها أفضل وسيادتك عارف السبب طبعاً عشان يستحمل الحرارة اللي بتوصل 50 ويمكن اكتر من كده. وكمان الكومبريسور بتاع التكييف أفضل . والرادياتير حجمه أكبر عشان تبريد الموتور .
جوابي على موضوع مثبت السرعة بيني وبينك فين الطريق اللي حتثبت السرعة وتجري بيه في مصر؟ انا عندي مثبــت السرعة في الاوتﻻندر من 2008 يمكن استخدمته 3 مرات وانا مسافر بيها أعمل عمرة وانت
شفت الطرق هنا وعارف طرق مصر صدقني والله حرام تدفع فلوس فيه.
لكن موضوع ليه تشتري عربية فاضية !!!!!!!!!!!!!!!!!
مين قال الكوروﻻ الخليجي فاضية. اقل فئة 1.6 xli ايوة فاضية لكن ليه تشتريها؟
اللي انا اشتريتها اعلى مواصفات في 1600 1.6 gli من الساير وكيل تويوتا في الكويت
ميزتها انها واخدة احسن ميزة من كل فئة من الفئات اللي نازله في مصر حشرحلك النقطة دي :
طبعا هي كاملة أوتوماتيك . سينسور خلفي . سي دي . اف ام . اى ام . بلوتوث . دريكسيون مالتي فانكشن . تشفيل بصمة . دخول ذكي . مرايات ضم مع الريموت ومفتاح داخلى موضح في الصور. انوار ليد في الفوج ﻻيت مدي شياكة رهيبة للعربية. انوار ليد زرقاء في عتب الابواب الامامية والخلفية. كروم بشعار تويوتا اسفل الابواب الامامية والخلفية. كروم على اوكر الابواب . مقاعد من القماش الفاخر . الكنبة الخلفية قابلة للطي بنسبة 40 : 60 . ايه فاضل تاني مش فاكر .
الحاجة الوحيدة اللي ناقصة واللي ناوي اشتريها واركبها اول ما تيجي هي شاشة تويوتا الأصلية بكاميرا خلفية وعل حسب كﻻم مدير معرض تويوتا الاكسسوارات حتوصل الكويت في نص شهر مارس وهما اللي حيركبوها . يا ترى كﻻمي مقنع يا مستر عصام . بس في الاول والاخير دي وجهة نظر

[esam_ayad]

أولا : أهلا بيك ياجاري أنا من الباجور.حشرتك ساكن فين في الكويت؟؟؟؟؟
ثانيا: وقبل ماأتكلم أكيد كل واحد له وجهة نظر طبعا:
ياباشا قصة الدهان والكومبريسر والكلام ده كل كدبه كبيره والناس مصدقاها وعموما لما تنزل مصر أبقي شوف اذا كان في فرق ولا لأ ودي أنا مجربها بنفسي وكلام ليس له صحه تماما.
الكورولا عربيه جميله جدا وانا كنت مستني نزولها بفارغ الصبر علشان احجزها وسعرها كمان يعتبر كويس 5500 دينار(تقريبا 134 ألف جنيه + تقريبا 75 ألف جنيه جمارك= 209 ألف جنيه)
يبقي بالتمن ده ايه اللي يخليني اشتري عربيه نص كماليات بالنسبه للي في مصر؟؟؟؟؟؟
في شيء اسمه سلعه مقابل مال يعني انا هادفع 5500 دينار في عربيه ايه امكانياتها بغض النظر عن اذا كنت هاستخدم الأوبشنز اللي فيها ولا لأ يعني مثلا انا عندي فتحة سقف ومااستخدمتهاش الا يمكن مرتين تلاته بس ,لكن ده شيء انا واخده مقابل الفلوس اللي دفعتها.
وعموما أنا لو ماكنتش ناوي أني اجمرك السيراتو بعد كام سنه كنت هاشتري الكورولا بدون ولا كلمه لأنها فعلا مابتخسرش كتير هنا في الكويت لو حالتها كويسه.

[i3abdallah]

استاذ tota1 والله انا كنت متردد اشتري الكرولا الخليجى وبعد تقريرك ده باذن الله هحجز السيارة اول الشهر من السياره
بس ياريت تقولى انت اشتريتها كاش ولا قسط ولو قسط جبتها على اي شركة ..

[abofandy]

جميلة ماشاء الله
ربنا يحميها ليك .. بس ليا تعليق بسيط وهو الاطار الى ع الطارة او الدركسيون ضييييع جماله .. لو عايز تركب ركب جلد ويكون اسود وهيبقى حجمة اصغر يعطى شياكه اكتر ...


بالنسبة للضوء الازرق الى ف العتب شكلة تحفة فنية بجد هو والنيكل الى ع الابواب جميل جدا
ربى يبارك

[tota1]

مستر عصام ايه فايدة الاوبشن لو ماستخدمتوش؟ العبرة بالاوبشن اللي يفيد وفعﻻ ماتستغناش عنه، وفيه اوبشن مش حيفرق كتير لو مكانش موجود.
نسيت أوبشن مقولتوش في كورولتي :
هوا عبارة عن عداد سرعة بيظهر سرعتك على الزجاج الامامي عشان متضطرش تنزل عينك على عداد السرعة الاصلي وانت ماشي وهوا على فكرة عداد ديجيتال
لما تيجي تحسبها تﻻقي الكوروﻻ الخليجي فيها مميزات يمكن مش موجودة في الهاي ﻻين في مصر

[tota1]

أستاذi3abdallah

شكرا لك على مرورك
انا جايب السيارة أقساط على بيت التمويل الكويتي

[tota1]

دكتورabofandy

بعد التحية سيادتك لو جربت يوم واحد في الكويت في الصيف حتعرف انا ليه جبت الطارة فرو عشان الجلد و انا طالع من الدوام ودورت العربية وحطيت ايدي على الدريكسيون اكني ماسك جمر
سيادتك فهمت قصدي

[abofandy]

بعد التحية سيادتك لو جربت يوم واحد في الكويت في الصيف حتعرف انا ليه جبت الطارة فرو عشان الجلد و انا طالع من الدوام ودورت العربية وحطيت ايدي على الدريكسيون اكني ماسك جمر
سيادتك فهمت قصدي

فهمت عليك مثل ما بتقولها فى الكويت
بس حجمها ضخم كبير حسيت ان الدركسيون شكله بقى ضخم جدا جدا وادى منظر فظيع
بس اقدر اقولك لازم تجيب ستاره داخليه للزجاج الامامى او حتى الورق الى زى الفويل دة وبيتشد على الزجاج من الداخل لحماية التابلو والجلد وغيره من الحرارة دى نقطة
النقطة التانية تعكس اشعة الشمس فبالتالى لا تحتاج حتى الا فرو او جلد ويبقى الحال زى المصنع ما هى جايه
وبردة مليون مبروك عليك ياررب
وبجد نفسى الاقى فى مصر النيكل الى موجود على الابواب دة بس للاسف دورت عليك كتير ومش لقيته
الف مبروك ويارب تتمتع بيها

[Mohamed.Hany]

مستر عصام ايه فايدة الاوبشن لو ماستخدمتوش؟ العبرة بالاوبشن اللي يفيد وفعﻻ ماتستغناش عنه، وفيه اوبشن مش حيفرق كتير لو مكانش موجود.
نسيت أوبشن مقولتوش في كورولتي :
هوا عبارة عن عداد سرعة بيظهر سرعتك على الزجاج الامامي عشان متضطرش تنزل عينك على عداد السرعة الاصلي وانت ماشي وهوا على فكرة عداد ديجيتال
لما تيجي تحسبها تﻻقي الكوروﻻ الخليجي فيها مميزات يمكن مش موجودة في الهاي ﻻين في مصر

ماشاء الله
العتب و النيكل و الليد تحفة فنية.
ممكن تصورلنا السرعة اللي بتظهر علي الزجاج الامامي

[hossam_elwani]

جميلة ماشاء الله
ربنا يحميها ليك .. بس ليا تعليق بسيط وهو الاطار الى ع الطارة او الدركسيون ضييييع جماله .. لو عايز تركب ركب جلد ويكون اسود وهيبقى حجمة اصغر يعطى شياكه اكتر ...


بالنسبة للضوء الازرق الى ف العتب شكلة تحفة فنية بجد هو والنيكل الى ع الابواب جميل جدا
ربى يبارك

هو الحاات دى مش موجوده حتى فى الهاى لاين فى مصر ؟؟

[ma7oo]

قصة الدهان والتكييف والردياتير في الخليجي ده كله كدب وكلام تجار العربيه اللي بتنزل هي هي

[tota1]

url=http://www.gulfup.com/?Fm5BOb][/url]بتلكم صور تانية