جدول صيانة الياريس

[mbaddar2]

السلام عليكم يا جماعة
انا لسة شارى تويوتا ياريس 2009 مستعملة 100 الف كم بحالة كويسة و لسة جديد فى العربيات التويوتا , و عايز احافظ عليها ان شاء الله و اعمل صيانتها فى التوكيل و عندى كام سؤال بسيط

1) ايه جدول الصيانة الدورية ليها , كل قد ايه , اروح اعمل صيانه كل قد ايه فى التوكيل و كده
2)هل العربية فعلا فيها مصفحة من تحت , اصل اول ماجبتها كنت محمل 5 انفار و خدت مطب كده فى 6 اكتوبر و سمعت صوت حكة , فهل ده ياثر و لازم اروح اكشف ولا المصفحة اللى فيها لو موجودة تطمن الواحد
3) ايه افضل نوع زيت لمحرك سيارتى بالحالة ده (ياريس 1300 قاطعة 100 الف) لانى اعرف ان كل نوع موتور له افضل نوع زيت , و انا باسافر من القاهرة لاسكندرية مرتين فى الشهر
4)ايه افضل نقل لل ار بى ام بين الغيارات عشان احافظ عالموتور و فى نفس الوقت اخد سحب كويس من العربية , لانى باحس ساعات بسحب ضعيف فباغير غلى 3.5 او 4, لانى متعود على سحب الفيرنا 1600 القديمة اللى كانت معايا

و شكرا مقدما

[hopeless20]

اول حاجه مبروك .. ربنا يرزقك خيرها ويكفيك شرها .. انا كنت شاري 2008 الكامله الاوتوماتيك من 7 شهور تقريبا

1- جدول الصيانه كل 10 الاف كيلو .. وكان في موضوع هنا عن الحاجات اللي يتتغير .. اول حاجه هتكون فلتر الهوا والبوجيهات .. سير المجموعه اكشف عليه .. مفيش فلتر تكييف للياريس بس لو عاوز ممكن تركبه .. اكشف ع العفشه وربطها .. فلتر البنزين بيتغير كل 80 الف كيلو وده سعره 650 جنيه .. زيت الفتيس بيتغير كل 80 الف برضه .. والموضوع ده فيه اراء كتيره .. لو العربيه مش بيتحس بالغيارات متغيروش .. واكشف علي التيل الامامي بالمره .. ورصص واظبط زوايا .

2-في مصفحه من تحت وياما شالت بلاوي

3- انا بحط شيل ألترا ال 10 الاف .. بس مش عارف بعد ال 100 الف المفروض نوع الزيت يتغير ولا لا

4-واضح ان العربيه مانيوال .. انا معرفش بس انا اوتوماتيك وبنقل علي 2.5 بالكتير

اخر نصيحه الياريس عربيه جميله جدا مريحه وناعمه ..بنزين قليل جدا ... وتكييف جميل .. بس مش مستقره علي الطريق .. يعني مش بتاعت جري وعن تجربه .. والحمد لله محصليش حاجه .

[mbaddar2]

الف شكر يا استاذ hopeless و ربنا يباركلك فى عربيتك

1) انا عربيتى مانيول , انا سمعت ان ال100 الف فى التويوتا عامة و لا حاجة خضوصا ان معظمهم سفر و صاحب العربية كان مهتم جدا بالصيانة الدورية فى التوكيل , لكن برضه ياريت لو حد يفيدنا ايه افضل نوع زيت لعربيتى و الجميع يستفيد
2) لو حد خبير فى موضوع امتى الواحد ينقل عالغيار عشان يحافظ عالموتور و الزيت و كده , لانى سمعت انه موضوع يبان بسيط بس بياثر على عمر الموتور و خصوصا انها 1300 فساعات باحس لازم انقل على ار بى ام عالى عشان تسحب خصوصا فى المطالع او لو محملها

و شكرا مقدما للجميع