طلب تسعير تويوتا كورولا 2006 اتوماتيك

[ah409]

ممكن اعرف سعر تويوتا كورولا 2006 اتوماتيك 1300 فابريكة بره وجوه عاملة 70 الف كيلو
وايهما أفضل هى أم لانسر بنفس السعر

[amrelsaqqa]

اعتقد سعرها هيعدى جامد جدا بحكم السوق المجنون بتاع اليومين دول لو العربية حالتها نضيفة فعلا ( اللى هو لو بتقول لانسر بنفس السعر هتجيب اللانسر زيرو ! )


الكورولا افضل في اعتمادية وفي نعمومة العفشة والارتفاع عن الارض واستهلاك البنزين (مناسبة لجوة البلد جدا )
اللانسر افضل في السحب لانها غالبا هتبقى 1600 وفي الثبات (وفي السفر بشكل عام )


اللانسر لو الاوتوماتيك هتبقى cvt وده ميزته انه بيوفر في البنزين لو رجلك حنينة ع الدواسة بس لازم تجربه الاول لان ممكن ما يعجبكش


العزل تقريبا متقارب مع افضلية للكورولا
الوسع تقريبا واحد برضه بس اللانسر ممكن اوسع شوية من قدام
الراحة في القعدة عامة افضل في الكورولا بس مش بكتير
الفرامل اداءهم هيبقى متقارب خصوصا لو الاتنين abs
التكييف في اللانسر هيبقى اقوى لو 1600 ولو ان الكورولا في الشكل ده تكييفها جامد حتى مع الـ 1300
متانة الصاج تقريبا واحدة مع ملاحظة ان الكورولا رفارفها الامامية ضعيفة شوية


لو مش بتسافر كتير وكل مشاوريك جوة البلد هتبقى الكورولا افضل في رأيي بس تكون مقتنع بيها فعلا وبسعرها اللى بقى مبالغ فيه

[houba85]

بالحالة اللي حضرتك بتقول ليها اقدر اقوللك وعلى حسب الاسعار الي شوفتها في عربيات من نفس سنة الموديل والحالة .. 110 اقل اقل حاجة ممكن حضرتك تتكلم فيها

[svneleven]

و الله ما أدفع فيها 90 حتي.

[kokowasfy]

مع احترامى للكورلا و تقديرى للعربية دى انا شخصيا كنت هشترى واحدة بس هبل الاسعار بتعها مش هينفع دا انا بشوف ناس طلبة 130 الف هههههههه هية كانت زيرو بكام اصلا انا افلك لانسر سوبر اكشن فتحة سقف و حركات و عربية كسر زيرو ب 100 الف مثلا هتعجبك اوى اوى و سيبك من الكورلا

[houba85]

سبب غلو الكورولا خصوصا الموديل 2006 و 2007 هو انهم احدث افضل اصدارات ياباني التصنيع والتقفيل نزلت مصر .. موديلات 2007 اخر عهد للكورولا واللي بعدها اللي بينزل مصر بقى تقفيل جنوب افريقيا وظهرت فيه مشاكل ( بصرف النظر عن فتيس الام ام تي اللي الناس ماعرفتش تستخدمه صح ) .. اعلى رقم سمعته في ال 2007 كان 140 بلا مبالغات في الوقت اللي سمعت فيه رقم اتباعت بيه كورولا 2010 جنوب وكان حاجة و 80 الف !! .. وموديل 2013 خليجي زيرو 205 سعر خزعبلي مقارب لسعر ال 2014 هاي لاين ..

ال 2002 اللي معايا جابتلي 90 وهي بتتغسل في البنزينة واحد شافها معايا و عرض عليا المبلغ دة وكان عاوز يخلص حالا طبعا معنديش نية ابيع .. 90 حتى من غير مايعرف اي تفاصيل وحتى من غير مايتكلم معايا عن الخدوش اللي الاكصدامات والباب اليمين .. لما عرف مني انها خليجي وفابريكة جوة وبرة وعداد 70 الف ساعتها لقيته بيتكلم معايا في 95 !! .. الموديلات دي فيها حاجة الناس موهومة بيها في اي حتة .. وتبقى المقولة الخالدة .. محدش فاهم حاجة

[M.FOUAD]

العربية تسوى 107-110 الف لو فعلا مش راشة برة

[S O P H O S]

حوالي 95 الف كسعر واقع
الي هتسمعه بقي ده شئ تاني

[أحمد طلبه]

هتعمل 120 الف
انا معايه 2003 بره وجوه خليجى كامله اتوماتيك
كنت شريها من شهرين تقريبا 105 الف

[mhoreya]

العربية دى تعمل 120 مستريح لو بالحالة المذكورة
اعرف واحد معاه 2006 1300 اوتو عداد 110 و راشة جانبين و جالو فيها 114
الكورولا سعرها خزعبلى بسبب التجار و الناس مقبلة عليها فماسكة سعر جامد
انا كنت شارى عربيتى 2001 ب 72500 زيرو دلوقتى بيجيلى فيها 77 و مش راضى ابيع

[ALYSALIM]

ولا ادفع فيها 70 الف حتي دي بقالها 9 سنين - مع احترامي لصاحب الموضوع - خليك من اسم تويوتا القديم - وخليك في حاجات اجدد من كده حتي لو مش تويوتا

[tarekmaher]

سيدي الفاضل انا امتلكت الكورولا واللانسر البومة
كل حاجة فيها ميزة وعيب
استهلاك البنزين كورولا افضل
العزل كورولا افضل
التكييف كورولا افضل بفرق بسيط
الثبات في السفر لانسر افضل بكتيرررررررررر خاصة بعد 120
الواسع تقريبا واحد
الشكل الداخلي لانسر افضل ( ودي اذواق )
من الاخر لو استخدامك داخل البلد كورولا تكسب بلا منازع لانها مريحة جدا داخل البلد
لو في سفر دائم لانسر افضل
لو بتحب تجري لانسر افضل
وبسعر الكورولا تجيب لانسر نظيفة
وممكن تفكر في حاجة زيرو زي البيجو 301 والستروين الاليزيه
وبصراحة الزيرو لو انت بتحافظ علي العربية هيكون افضل بكتيررررر