تويوتا ياريس 2015 سيدان 1500 سى سى

[El Prince]

الف مبروك ربنا يديك خيرها ويكفيك شرها

[mrashadnt]

ألف مبروك مقدما يا فندم وربنا بديك خيرها ويكفيك شرها ... الياريس 1500 فعلا اختيار موفق

[ابو هنا]

الموضوع مش فتح نفس الموضوع مشورة من الأخوة الأفاضل سواء ملاك للعربية أو غيرهم و اللى عندهم تعليقات مفيدة أو خبرة سابق ..
و أرجو من الاخوة اللى فى المنتدى مش بس قسم تويوتا .. ان الاراء و التعليقات على المواضيع تكون جوهرية و حقيقية ... بمعنى ان واحد لبس فى عربية غلط يبقى عايز غيره يقع فى نفس المطب
أو حد ليه عمولة أو بيتعمل معاه واجب من مركز معين فايعمله دعاية او حد بيشتغل فى التوكيل و عايز يعمل شغل ... كلكم أعضاء محترمين فى منتدى محترم و صدقونى لو قلت لحضراتكم
ان ارائكم بيكون ليها عامل كبير فى تحديد الاتجاه اللى هايمشى فيه اى حد ماعندوش خبرة و داخل
المنتدى واثق من ان الاعضاء هايفيدوه علشان الحيرة اللى بعضنا مجربها خاصة فى مواضيع الشراء او مراكز الصيانة ..
احنا فى مصر موضوع انك تشترى عربية عامل زى امتحان الثانوية العامة .. تحديد مستقبل هههههه
و الفلوس بتوجع أوى و أظن حضراتكم مقدرين انا بتكلم من منطلق ايه
و صدقونى عن تجربة شخصية انا لفيت فى معظم اقسام المنتدى لمدة طويلة علشان احدد عربية
و اراء الاعضاء كانت الفيصل فى اختيارى

شكرا ليكم على المساعدة و ارجو ان ماحدش يزعل من كلامى لأنه فى بعض الاحيان بيحصل !!!

الحمد لله النهاردة استلمت التويوتا ياريس 1500 موديل 2015 أوتو الفئة الاولى
و الصدمة لما سمعت عن تمن الفئة الهاى لاين بتاعتها
الاسطورة بتقول 175000 جنيه !!!!!!!!!!!!!!!!!!!! لاتعليق
و سعر الكورولا هايزيد !!!!!!!!!! ربنا يستر علينا من الجنان اللى ملوش حاكم

تانى مرة ألف شكر ليكم جميعا

الف مبروك على استلام السيارة ،
بس انا مش عارف اه لزمة الي حضرتك كتبه ده كلة ، واه لزمة النصيحة بعد الاستيلام !!!
انا شايف اني لما كتبت جملة ( ولازم نفتح نفس الراجل على السيارة الي حاجزها ) كانت في محلها ، لاني متاكد ان مفيش سيارة فيها كل حاجة مهما كان سعرها
انا كنت اعتقد ان تاييدي لشرائك اليارس 1500 cc كانت شهادة حق ، خاصة انها من طرف محايد من ملاك الساحة 301

[أيمن كور]

الاخ أبو هنا الف شكر على ذوقك
بالنسبة للى انا كتبته مش المقصود بيه حضرتك لكن الجملة بس فكرتنى ببعض الناس اللى لما تسأله على عربية معينة يفتى و يطلع فيها القطط الفطسانة و لما تغيب شوية و تسأله تانى عن نفس العربية
يقولك هايلة و يطلعها فى السما
و لو قلتله انا حجزت اى عربية من باب المجاملة علشان زى ما حضرتك قولت كده "يفتح نفسه"
ممكن يكتم النصيحة و يخليه يلبس فى عربية ضايعة و يضيع فلوس الراجل اللى وثق فى رأيه
اللى انا قصدته ان زى ماحضرتك قولت الحيادية يعنى بنقول المميزات و العيوب و الرأى الشخصى
بحكم الخبرة مش السمع ....

صدقنى و الله يا أبو هنا فى ناس كانت بتدخل علشان توقع عربيات محترمة أو ترفع عربيات ضايعة لمصلحة شخصية و هنا المشكلة اللى انا بتكلم عنها

تقبل تحياتى على ذوقك و اسلوبك المحترم فى الاعتراض

[ابو هنا]

الاخ أبو هنا الف شكر على ذوقك
بالنسبة للى انا كتبته مش المقصود بيه حضرتك لكن الجملة بس فكرتنى ببعض الناس اللى لما تسأله على عربية معينة يفتى و يطلع فيها القطط الفطسانة و لما تغيب شوية و تسأله تانى عن نفس العربية
يقولك هايلة و يطلعها فى السما
و لو قلتله انا حجزت اى عربية من باب المجاملة علشان زى ما حضرتك قولت كده "يفتح نفسه"
ممكن يكتم النصيحة و يخليه يلبس فى عربية ضايعة و يضيع فلوس الراجل اللى وثق فى رأيه
اللى انا قصدته ان زى ماحضرتك قولت الحيادية يعنى بنقول المميزات و العيوب و الرأى الشخصى
بحكم الخبرة مش السمع ....

صدقنى و الله يا أبو هنا فى ناس كانت بتدخل علشان توقع عربيات محترمة أو ترفع عربيات ضايعة لمصلحة شخصية و هنا المشكلة اللى انا بتكلم عنها

تقبل تحياتى على ذوقك و اسلوبك المحترم فى الاعتراض

هههههههههههههههههههههه
الف مليون مبروك على استلامك للسيارة ، وربنا يأتيك خيرها ويكفيك شرها ،
نصيحة اخيرة خليك سعيد بعربيتك واستمتع بيها

[S O P H O S]

اعتقد الياريس هتكون افضل من الصني

[محمد عادل غريب]

يا جماعة انا احترت و مش فاهم حاجه
الياريس ٢٠١٤ كام cc ؟؟ و سعرها بقا كام

و الياريس ٢٠١٥ كام cc ؟؟ و سعرها بقا بكام

ارجو من حضارتكم الرد سريعا لاني رايح بكره اتفرج علي عربيه موديل ٢٠١٤ ماشيه ٨٠٠ كيلومتر جميع الكماليات

[أيمن كور]

أستاذ محمد الياريس 2014 1300 سى سى
و 2015 .. 1500 سى سى
الياريس 2015 ال 1500 أوتو عاملة 145 الاف جنيه
و الوقت اللى سألت فيه كانت ال2014 ال 1300 هاى لاين عليها خصم 10 الاف جنيه عاملة 155 الف جنيه
و الفئة الاقل اوتو نفس سعر اللى هوة 145 الف
علشان كانوا عايزين يخلصوا من الموديل ال1300 و ماقالوش انه هاينزل ال 1500
شوف الموتور لو مكتوب عليه nz -1 يبقى ال 1500
و لو nz - 2 يبقى ال1300
و رأى شخصى .. لو الفرق مش كبير بين الجديد و اللى حضرتك هاتشوفها جيب الجديد
لأنى متوقع ان اللى حضرتك رايح تشوف عربيته اشترى ال1300 قبل ما يعرف ان الموتور ال1500 نزل و عايز يخلص منها و طبيعى مش هايخسر فيها كتير
و ارجو ان حضرتك ما تستخسرش كام الف زيادة حتى لو هاتسقطهم و اشترى ال1500 سى سى
و تبقى من الزيرو

- ملحوظة اخيرة الاسعار دى للسيدان مش للهاتش باك

و ربنا يوفقك و الاخوة الاعضاء لو ليهم اراء ممكن ما يبخلوش على حضرتك بيها

[egyptiandiver]

الف مبروك ربنا يديك خيرها و يكفيك شرها

[drmoaty86]

الف مبروك ياباشا وربنا يكفيك شرها باذن الله ..
ياريت ياباشا حضرتك او اي حد من الاخوة اللي جربوا العربية يقلنا اخبار العربية ايه في السرعات العالية فوق 140 وعاملة ايه ع الطريق هل ثابتة ولا ايه خصوصا ان وزن العربية يعتبر خفيف نسبيا تقريبا 1060 كيلو ؟

[mhkhedr]

ياريت اي حد اشتري اليارس 2015 يعمل عنها تقرير عشان نستفيد
خصوصا انى بفكر اشتريها

[hhussein]

انا ناوى ان شاء الله اشترى الياريس 2015 ال 1500 كنت عايز اعرف التجربه الشخصيه للاعضاء المحترمين الى اشتروا من حيث الثبات و الصيانه و اسعارها و التكييف و السرعات

ارجوا الرد لاهميه و شكرا

[دكتور عصام]

أود شراء سيارة تويوتا ياريس الجديده 2015 وأرجو إفادتى بعنوان توكيل التويوتا اللى ممكن أشتريها منه وياريت تعرفونى ايه الكماليات اللى اتشالت مقابل زيادة سعة الموتور ولكم جزيل الشكر مقدما