حادث للعربيه و هى واقفه

[emadno1]

السلام عليكم.
كل سنه و انتم الاسره الكريمه طيبين و بخير .
عاوز اخد رايكم يا شباب اعمل ايه فى الموقف ده نزلت الصبح لقيت عربيه اختى مخبوطه الخبطه السخيفه دى و معرفش مين عملها.

العربيه تويوتا ياريس 2014 متامن عليها فى بيت التأمين المصرى السعودى لو حد اتعامل معاهم يقولى الصح اعمل ايه هل اطلع على التوكيل و لا اروح لشركه التامين و لا اخطرهم الاول هل حاحتاج محضر الاول انا متعملتش مع شركه تامين قبل كده

[OmarAdel98]

ردها على البارد في التوكيل

[kantofanto]

متابع

[HOSSAM99]

قدر الله و ما شاء فعل و الحمد لله علي كل حال
بلاش توكيلات في السمكرة و الدهان
حضرتك تشوف ورشة سمكرة و دهان تعملهالك و لو متعرفش حد تشوف ورشة نايل موتورز بيطلعو شغل كويس و الناس بتشكر فيهم
الأهم من ده كله لو الخبطه في الباب ده فقط يبقي هو بس اللي يتعمل و لو هايرش (أكيد هايرش) يرش الباب فقط مش الجنب كله و لا ورنيش و لا غيره و الحته اللي في العتب علي قدها أوي ميوسعش
بالتوفيق

ردها على البارد في التوكيل

هو فيه توكيل بيرد علي البارد ؟!!

[محمد يوسف]

ردها على البارد في التوكيل

مافيش توكيل بيرد ع البارد....وأصلا توكيل تويوتا بالذات بيغير مابيصلحش

[BLOODY_STONE]

١٠ جنيه و اعملك محضر زي الفل
و كلم شركة التأمين يجيوا يعاينوا
و روح التوكيل او لو عايز حد برة يصلح و يظبط و حيطلعلك شيك باللي دفعته

[elpasha1]

انا رايي المتواضع انك تروح التوكيل
السبب انهم بيغيروا مبيصلحوش وبالتالى بدل العربية ماهتكون رشة باب هما هيحطوا باب جديد نفس اللون

[HOSSAM99]

انا رايي المتواضع انك تروح التوكيل
السبب انهم بيغيروا مبيصلحوش وبالتالى بدل العربية ماهتكون رشة باب هما هيحطوا باب جديد نفس اللون

مفيش أجزاء في التوكيلات بنفس اللون نهائي
كل الأجزاء الصاج مجلفنة و بتترش و بتتجهز قبل الرش زي برة التوكيل عادي
و معظم التوكيلات بتستخدم في التأسيس و الرش خامات مصري ... ما عدا مرسيدس و بي أم بيستخدمو خامة مستوردة
فكده كده العربيه هاترش باب و الرش ميعبش العربيه طالما معمول صح و الباب يتقفل بعد السمكرة صح
الرش و ما رشش دي خدعة اخترعها معدومي الضمير من التجار ... لبخس عربيات ساعات و رفع قيمة عربيات ساعات تانيه

[Adnfalcon]

الحوار دا يخلص برا التوكيل أفضل

[saikoproff]

بسم الله الرحمن الرحيم

انت تعمل محضر شرطة و تودى العربية التوكيل تعمل مقايسة مبدئية بتكلفة الاصلاح (و هتسيب العربية هناك) و تطلع بالاتنين على شركة التامين و هناك تعمل حاجة اسمها اخطار حادث و تسلملهم المقايسة و المحضر و تقولهم على مكان العربية عشان يعملوا معاينة

تانى يوم او بعد يومين بالكتير هيروح واحد من شركة التامين يعاين العربية و ويتفق مع التوكيل على مقايسة جديدة خالص (و هى دى اللى التوكيل هيمشى عليها)

بعد ما تخلص العربية ان شاء الله على خير التوكيل هيتصل بيك عشان تيجى تستلمها هتروح تدفع و تاخد الفاتورة و العربية و الهالك و تطلع على شركة التامين (هيشوفوا العربية و ياخدوا الهالك) و ياخدوا الفاتورة و بعد 2-4 اسابيع يتصلوا بيك عشان تاخد شيك بالفلوس

ملحوظة: سيتم خصم 10% عشان اتعملت فى التوكيل (حتى لو انت تأمينك شامل بدون تحمل)

[Mido Casper]

اعمل محضر وكلم التأمين قبل ما تحرك العربيه واسالهم ع الخطوات

[hany63]

طالما العربيه متاءمن عليها مفيش الا كلمه واحده
توكييييييييييييييييل
و هترجع زي الاول و هتتحمل ١٠ في الميه فقط من الفاتوره

[A.Saad]

خد بالك ان ليك مدة لاخطار التامين
48 او 72 ساعة حسب وثيقتك
بعد كدة بيدلعوا
يعنى تظبط المحضر والاتصال بيهم على الاساس ده

[emadno1]

اشكركم يا شباب على المجهود ده انا فعلا اتصلت بالشركه النهارده و هما قالولى اعدى عليهم علشان يصورو العربيه بنفسهم.
و بعد كده حاطلع على التوكيل حد يعرف حد فى التوكيل فى العباسيه لانى بعمل الصيانه هناك و لا اروح فرع تاني احسن لان كمان عندى شكوتين
الشكوى الاولى: التكييف ضايع خالص بالنهار مش موجود و لا حتى باحس انى مشغل مروحه و دى غريبه على تويوتا المتميزه دايما فى موضوع التكييف
الشكوى التانيه استهلاك بشع للبنزين اعلى من الكورولا

[S O P H O S]

التامين يا باشا يغطي الموضوع مع التوكيل