تقييمي لكورولا 2015

[scotlandyard]

انا يا بهوات اسمى احمد نصر عضو جديد في المنتدى ، ان شاء الله تكون معرفة خير
المهم، انا الحمد لله اشتريت كورولا 2015
تقييمي ليها بعد 3000 كيلو انها عربية كويسة من حيث السحب و الثبات و العزل
مشيت بيها لحد سرعة 170 الثبات هايل ماشاء الله ، و اقدر اقول اني مشيت على الملفات في الطريق السريع بسرعه 160 و ماشاء الله ثبات هايل
عيبها الكبير اللي لاحظته التقفيل سيئ جدا
التابلوه عندي بيزيق ، مرة من درج التابلوه و صلحوهالي في التوكيل ، و مرة تانية في الجلد اللي تحت الكاسيت ، صلحوها مرة و رجعت تاني !
المشكلة التانية اللي في العربية ان الكونسول اللي عند الفتيس بيسخن بعد ساعة من المشي تقريبا ، وخاصة لو مشغل وضع الاسبورت او زرار الباركينج سينسورز ، بيسخن وبتبان السخونة جدا عن قواعد الكرسيين الاماميين ناحية الفتيس ، ، وديتها التوكيل قالولي مفيهاش حاجة و العوازل تمام، بس هوديها تاني ان شاء الله فرع تاني
غير كده كمجمل ان العربية ممتازة
لكن اعتقد موضوع التقفيل ده ممكن يأثر عليها ، خاصة اني لاحظت كذا عضو في المنتدى اشتكى من تزييق التابلوه ، و ليا صديق بردو اشتكى من نفس المشكلة

[Sameh samy]

مبروك عليك العربية وربنا يديك خيرها
عاوز اسال حضرتك سوال انا معايا 2015 بس عاملة 600 كم فقط دانتيجة لاني معايا عربيها غيرها
العيوب بتاعة العربية وخصوصا صوت التابلوة بان معاك من اول يوم ولا بعد اول الف مثلا ؟

[ENG.MaRk]

العيوب كلها بسيطة واعتقد لا تؤثر علي كفاءة العربية ككل

[scotlandyard]

استاذ سامح الله يبارك فيك يا باشا و ربنا يباركلك

الحاجات دي ظهرت بعد 500 كيلو تقريبا
بس ان شاء الله عربيتك تبقى سليمة متشغلش بالك بحاجه و تترقب حدوثها
استمتع بعربيتك و ان شاء الله تبقى تمام
و فعلا كمجمل العربية الحمد لله كويسة

[bassem.naguib]

موضوع أن الكونصول بيسخن .. هو مش سخونة بمعنى كلمة سخونة .. ولكن تقدر تقول أنه بيبقى دافئ نسبياً .. وده موجود في كل العربيات الأوتو .. سواء تويوتا أو غيرها .. ممكن يكون تأثيره أقل في بعض الماركات الأخرى ولكنه يظل موجود في النهاية .

اللي عاوز أوضحه هنا أن ده مش سخونه من الفتيس .. لأن الفتيس مش موجود في المنطقة دي أساساً .. إنما اللي موجود في المنطقة دي هو الشكمان .. وممكن يكون العزل مش 100% في المنطقة دي أو نظراً لسخونه الجو الأيام دي الموضوع ده بيظهر .. إنما في الشتاء مبتظهرش تقريباً .

باقي الملاحظات اللي حضرتك ذكرتها يمكن مراجعة التوكيل فيها .. ولازم تصر على رأيك وتفضل وراهم لغاية ما تتعمل .

وألف مبروك على العربية .. وربنا يباركلك فيها ويكفيك شرها .

[Sameh samy]

استاذ سامح الله يبارك فيك يا باشا و ربنا يباركلك

الحاجات دي ظهرت بعد 500 كيلو تقريبا
بس ان شاء الله عربيتك تبقى سليمة متشغلش بالك بحاجه و تترقب حدوثها
استمتع بعربيتك و ان شاء الله تبقى تمام
و فعلا كمجمل العربية الحمد لله كويسة

انا اصلا هابتدي ماشغلش الكاسيت واركز مع التابلوة واشوف الصوت اللي بيقولو علية في التابلوة دة

[scotlandyard]

استاذ باسم : شكرا لردك و الله يبارك فيك
بالنسبة لموضوع السخونة : هو عندي واضح زيادة ، انا معايا عربية اوبترا 2006 السخونة دي بتظهر في الكونسول تحت الكاسيت لما اقرص على العربية مدة ، لكن في الكورولا واضحة بزيادة و بتظهر بعد نص ساعة لو سايق جوه البلد في الزحمة و بعد ساعة ع الطريق لو قارص على العربية..فده اعتقد مش طبيعي

[scotlandyard]

استاذ سامح انت كده هتتخنق من العريبة
سيب كل ظرف لوقته و متدورش على العيب
لو موجود عندك اكيد كنت اخدت بالك

[wael37]

انا العربية معايا عاملة 10000كم بدأت اسمع صوت تزييق في التابلوه في المطبات ، الصوت جاي من عند فتحات التكييف والجزء الكروم اللي تحته رحت التوكيل وكشفو عل العربية النتيجة ان الأجزاء دي كلها بلاستيك وراكبة على كليبسات مع الوقت بتحك في بعضها فبيطلع الصوت ده المهندس قاللي هتجيب لنا العربية يومين هنفك معظم التابلوه ونحط ماده عازلة بين الأجزاء دي والحقيقة انهم حددولي ميعاد بس بصراحة مش قادر اروح افك تابلوه العربية وهيا عاملة 10000كم نفسي مش مطاوعاني وفي نفس الوقت انا مش متخيل النتيجة هتبقى ايه المهندس قاللي ان كل التابلوه راكب على كليبسات حتى الجزء العلوي الجلد الخلاصة ان ده عيب في التقفيل او الخامات اللي معمول منها الأجزاء دي سيئة

[scotlandyard]

ياباشا انا لو قالولي موضوع فك التابلوه ده معنديش فيه اي مشكلة لان واضح ان دي مشكلة فى العربية و مستمرة ، فموضوع فك التابلوه ممكن يكون حل نهائي و الواحد ينسى بعد كده ، و لاقدر الله لو التابلوه جراله حاجه منهم هيغيروه، الموضوع بسيط ، فلو الصوت استمر معاك شايف انك تتوكل على الله وتعمله

[S O P H O S]

مبروك العربية
والعيوب دي بسيطة قدام مميزات العربية