الكورولا اتقلبت ،،، ومحتاج مشورتكم

[superzok]

بعد التحيه ،،
تعرضت لحادث من اسبوعين وانا راجع اسكندريه على الزراعي قبل كفر الدوار
عربيه تريلا دخلت في من ورا وانا سايق على سرعه ٨٠كم/الساعه تقريبا طلعت من الطريق للزراعات واتقلبت قلبتين والتالته وقفت على ظهرها
العربيه كورولا اوتو ٢٠٠٥ ١٣٠٠ سي سي كنت جايبها كسر زيرو في ٢٠٠٧ ب ٩٣٠٠٠
الحمد لله كل اللي كانو في العربيه طلعوا من غير اي اصابات خطيره و منهم رضيع عنده شهر ونص

الحمد لله على اللطف و الحمد لله انه سخر الموديل ده علشان يحمي الارواح اللي فيها

محتاج المشوره في التصرف الاحسن في العربيه في حالتها دي
ابيعها بحالتها
اصلحها وابيعها
اصلحها واستعملها

** انا مش من النوع اللي ممكن يتشاءم من عربيه لانها اتقلبت بيه
صور العربيه في اللينك اتمنى انها تكون موضحه حالتها بعد الحادثه

https://www.dropbox.com/sh/lil32quke...MpG6qylKa?dl=0

[الاسد المهاجر]

الاهم
الحمد لله علي سلامتكم

[darkdefender]

تتصلح يا باشا عادي.. عايزة شنطة و سقف و فخدة شسيه شمال..
القطع بتعتها متوفرة بوفرة و صجها مرترت...
هتتكلف حوالي 20,000 و تتصلح علي نظافة جداااا...

شوف ورشة نايل موتورز لو عايز تريح دماغك من الصنيعية و تضمن الشغل هيتعمل نظيف جدا و في اسرع وقت....


و الحمد لله علي سلامتك يا باشا

[reyad_mohamed]

حمدلله على سلامتك وسلامة العائله
رأى تبيع على حالتها خسارة قريبه افضل من مكسب بعيد

[darkdefender]

العربية لو لوتو تعمل 100. قبل الحدثة. بعد التصليح تعمل 75-80
يعني بعد التصليح انت خسران بتاع 40 الف..
يعني قيمتها الفعلية بعز التصليح 60-65

لو اتباعت كدا مش هتجيب 45...


صلح و سوق يا باشا ..قعدها يا باشا تلات اربع سنين و بيع هتجيب نفس الرقم لو صلحت و بعت دلوقتي...

[mona_881]

الحمد لله علي سلامتكم أهم من أي شي بالدنيا واللي فيها
وربنا يعوض علي حضرتك بالأحسن منها ان شاء الله

[superzok]

الاسد المهاجر : الله يسلمك
Darkdefender : الله يسلمك ،،، وفعلا كلامك منطقي بس انا قلقان من حكايه الصنايعيه وخاصه اني مش حيكون عندي وقت للمتابعه و احتماليه ان بعد الوقت و الفلوس والمجهود اللي حيروح النتيجه تكون مش مرضيه ،،، ،،، و مش فاهم قصدك ايه بورشه نايل موتورز
Reyad : الله يسلمك واهه انا بحاول اوصل للقرار الصح
Mona : الله يسلمك و ربنا يستر علينا كلنا

[darkdefender]

حضرتك في ورشة تبع الادمن بتاع المنتدي كريم مونير فالحرفين شغلوهم عشرة علي عشرةة و قمة فالذوق و الادب و الاحترام ... تسبلهم العربية وانت مطمن ان هيشتغلوا فيها كنها عربيتهم بالظبط..

https://www.facebook.com/media/set/?set=a.757918060935611.1073741844.643401392387279&type=1

و دا احدث شغلهم...

[mo7a_mo7a]

السلام عليكم ورحمة الله وبركاته
اولا الف الف حمد لله علي سلامتكم

اما بالنسبة للسيارة طبعا صلحها واستعملها

العربية كل اللي فيها سهل باذن الله
ومدام حضرتك من الاسكندرية حوصفلك واحد كويس وشغله مظيف اسمه محمد فوزي في السيوف في اول شارع يمين وانت جي من فتح الله متجه الي ميدان الطافي في السيوف
وفي جنبه ورشة استعدال فيها طبلية حديثة جدا امريكي بتستعدل اي شاسيه خد الصور وروحله وشوف حيقولك ايه
وهو مشهور جدا

تحياتي

[mario_9111]

الف حمد الله على السلامة بس انا رائي انك تصلحها وتبيعها علشان متخسرش كتير وبعدين مستحيل العربية دي ترجع مظبوطة زي الاول

[EngAhmedSayed]

حضرتك في ورشة تبع الادمن بتاع المنتدي كريم مونير فالحرفين شغلوهم عشرة علي عشرةة و قمة فالذوق و الادب و الاحترام ... تسبلهم العربية وانت مطمن ان هيشتغلوا فيها كنها عربيتهم بالظبط..

https://www.facebook.com/media/set/?set=a.757918060935611.1073741844.643401392387279&type=1

و دا احدث شغلهم...

انا كنت هقولو كدة
عليك و على كريم منير
عربيات اصعب من عربيتك و كانت ضايعة ظابطوها وراجعوها زى ماكانت و شغلهم تمام ادخل على للينك الفيس بوك و تفرج على الصور مش هتخسر حاجة
ربنا يصبرك و يقويك
بس الحمد لله انا فرحان على البيبى انو كويس
و منهم لله بتوع النقل منهم لله

[superzok]

شكرا يابشمهندس على النصيحه انا بعت لكريم ومستني رد منه

[superzok]

Mo7a : شكرا على النصيحه ،، حعدي عليه الاسبوع ده ،،، ممكن يساعدني في اني اخد قرار في اللي حعمله ،،،

[غزلة]

عربيه تريلا دخلت في من ورا وانا سايق على سرعه ٨٠كم/الساعه تقريبا طلعت من الطريق للزراعات واتقلبت قلبتين والتالته وقفت على ظهرها

طيب هو كان ماشي على سرعة كام منهم لله سواقين النقل دول المهم حمدلة ع سلامة

[mr.moustafa]

قدر الله و ما شاء فعل