عندي مشكله في كورولا 2006

[boing]

مساء الخير
دي اول مشاركه ليا هنا في نايل موتورز

لو سمحتم يا شباب عندي مشكله في عربيتي_كورولا 2006 ماشيه 80000كم
مانيوال مش اوتو

والمشكله بسيطه مش كبيرة بس لفيت بيها على اكترمن مركز للصيانه وتتظبط العربيه يومين او 3 وبعد كده ترجع تاني
والمشكله ببساطه هيا
لما تكو العربيه واخده الغييار التاني 2 خلاص وماشيه فحالها
لما اجي بقا اشيل رجلي من على دواسة البنزبن وارجع المس الدواسه تاني
العربيه تنتش على مرتين وبعد كده تفوق وتمشي
وعلفكرة النتشه بسيطه اوي ما يحسش بيها غير اللي سايق او لو انا قاصد اوريها لحد راكب جنبي

بردو على الغيار التالت3 نفس الحكايه بس النتشه بتبقا اقل من لما بتكون على الغيار التاني
ببساطه وصف مشكلتي بحس ان البنزين بيضخ تحت رجلي على مرتين مش مرة واحده فالعربيه تقوم تنتش

طبعا ممكن تقولولي اعملها صيانه هقولكم والله عامل كل صياناتها
مغير فلتر الهوا والبنزين والبوجيهات وكلووووووووووووووو تمام اول باول

هقولكم بقا على اللي اتقلي في مراكز الخدمه
اول واحد قالي فلاتر غيرتها مفيش جديد
تاني واحد جابلي بخاخ وقعد يدوس بنزين ويحطو في مكان علبة الهوا اتظبطت يومين بصراحه وكانت تمام وبعد كده رجعت
التالت قالي بخاخات وعملولي تنظيف لوحدة اول مرة اسمع عنها اسمع وحدة الخنق(حد يعرفها دي)
الرابع قالي دي اسطوانه وهيا اللي ماثرة على المشي التمام

انا احترت ومش لاقيلها حل
ارجو من اللي فهم مشكلتي يوضحلي ايه اللي بيحصل ده ويقولي اعمل ايييييييييييه زهقت
انا باقيلي بس بعدكم مركز تويوتا الرئيسي بتاع العباسيه ولو ما اتحلتش
انا هبيع التويوتاااااااااااااااااااااااااااا للابد

[nobody]

العيب اللي حضرتك بتقول عليه من الرشاشات عايزة تنظيف
ممكن حضرتك تجرب منظف دورة الوقود ب 62 جنيه بيتحط مع تفويلة البنزين
شوف اللينك ده

http://www.stp.com/fuel_cfsc.html

[boing]

يا نو بودي

جربتو وحطيتو مع البنزين دي اول حاجه عملتها اساسا
وجربت السبراي التاتي بتاع الكربرتير ده

مفيش اي فايده
فيه واحد ميكانيكي قالي طقم بخاخااااااااااااااات

انا اترعبت لان العربيه محدش بيركبها غيري وبيتهيالي ما تلحقش تقول انا عاوزة طقم انجكشن
وبعدين صحيح يا شباب انا لسه العربيه في فترة الضمان
لو رحتوعملت شكل ووريتهم كتاب الصيانه مترشق اختام
وده عيب ميكانيكي محدش عرف يصلحوجتى مراكز الزفت اللي تابعه ليهم معرفتش لانو بقالو 8 شهور باالظبط
هل هيعملولي العربيه على اساس الضمان اللي بيتكلمووووووو عليه ده

حد يفكر معانا ياشباب رجااااااااااااااااااااااااااااااااااااااءا

[أبو عبدالله]

انا شايف ان النتشة دي طبيعية اصلا في اي عربية
خصوصا انك بتقول ان اللي بيحس بها السائق بس
يعني الموضوع مش مأثر على العربيه ككل

ودي حاجه طبيعية لما تترك دواسة البنزين فجأة

او يمكن انا مش فاهم حضرتك كويس

[nobody]

على فكرة في نوعين من المنظفات
في واحد بتاع الانجكشن ب 21 جنيه
واحد منظف دورة الوقود ب 62 جنيه و ده اللي أنا قصدي عليه

اقولك على حاجة برضه شوف كده سلك الاكسرايتير مشدود كويس ولا مرخي

[boing]

يا ابوعبدا لله لا النتشه اللي عندي مش الطبيعيه
النتشه الطبيعيه لما تهدي وتدوس بنزين جامد تحس بيها
لكن اللي عندي ياشباب
انا خلاص اوردي مدي العربيه الغيار التالت مثلا وهديت وشلت رجلي من على البنزين ومن على اي دواسه
ورجعت اشعر لها بنزين تنتش نتشه خفيفه اوي وبعد كده تحس انها فاقت
يعني البنزين بيتضخ تحت رجلك على مرتين مش مرة وااااحده

ولو عاوز الغي بقا النتشه دي نسيت اقولكم اعمل ايه

ادي سنه دبرياج بسيطه اوي تختفي النتشه
عشان كده مركز صيانة النصر اللي عندي في المنصورة قالولي دي اسطوانه
والقصراوي بتاع طنطا قالي وحدة خنق وفلاتر وهتشوف الفرق بعده ولا نيلو اي حاجه قعدت يومين تمام ورجعت تاني
علما باني بحط بنزين 92 علللللللللللللللللللللللطول من يوم مانزل السوق

[boing]

عاوزين التفاعل ياشبااااااااااااااااااااااااااب

[nobody]

شوف كده سلك الاكسرايتير مشدود كويس ولا مرخي

[Sharky]

ربنا يعينك و إن شاء الله تلاقى حل ليها

أنا رأى أطلع بيها على التوكيل طالما مافيش و لا مركزصيانة عارف مشكلتها إيه

و هل حضرتك مواظب على الصيانات بتاعتها عالطول ؟

[boing]

اه والله كل فترة بروح اعمل تشيك كامل
وكل 20000 كم بغير المطلوب تغيير ه حسب جدول الصيانه الدوري

[محمد ابراهيم 1]

المشكله دى حصلت معايا ورحت التوكيل وقالوا لى عايزين نفك التنك عشان هو أكيد مش نضيف
وفعلا فكوه ونضفوه وركبوه والعربيه زى ما هى
قالو طب حنجرب نغير الرشاشات
وبعدين الطرمبه
فقلت لهم هو مفيش جهاز يبين العيب منين
قالو لأ وإنما التجربه والخطأ هما اللى بيبينوا الحاجات دى لأن حاجات كتير ممكن تعمل نفس الأعراض
والعربيه غابت عندهم يومين يحاولوا ويجربوا ويقولوا لى احنا فاهمين شغلنا
الحاجات دى بتعدى علينا
المهم إنهم طلعوا أغبياء كما توقعت والعربيه متصلحتش فرحت أخدتها
وبعدين رحت على الميكانيكى بتاعى ووريهاله وحكيت له اللى حصل المهم كان عنده عربيه زيها واقفه كورولا 2007 بس مش فاكر كان فيها ايه المهم إنه أخد الموبينه بتاعتها وركبها عندى وجرب العربيه بقت زى الفل
فرجعها مكانها ورحت جبت واحده جديده ب 400 جنيه تقريبا على ما أذكر وركبتها


فياريت تشوف موضوع الموبينه ده لأنى متوقع إنه يكون هو العيب

[Sharky]

محمد باشا
إنت روحت توكيل تويوتا نفسه و لا مركز خدمة !!!
و العربية كانت عاملة كام كيلو ؟

[محمد ابراهيم 1]

أنا رحت توكيل تويوتا مصر نفسه بس فى اسكندريه بعد الموقف الجديد

بس العربيه كانت عامله حوالى 195 ألف كم تقريبا

[Sharky]

غريبة قوى إن التوكيل مش عارف مشاكل العربية

أمال حيعملوا إيه فى الكورلا الجديدة ؟؟؟

[محمد ابراهيم 1]

والله ده اللى حصل
لدرجة إنى جبت جدول الصيانه بتاعها وبعمله بره التوكيل وبتوفير جامد على إعتبار إنها خرجت من الضمان
وده اللى ناوى أعمله لما الياريس تخلص االضمان إن شاء الله