لسه جايب كوورولا موديل2009 ومحتاج مساعده

[shark12345]

يا جماعه انا لسه جايب العربيه ومحتاج مساعده منكي في شويه مشاكل عندي :

اولا : المرايا تعتيم واصل فيها زي كابلين او سلكين من ورا في واحد فاكك منهم ده بيتلزق عادي ولا ليه طريقه معينه

ثانيا: الكاسيت البكر بتاع الصوت ناعم جدا تقريبا بيلف علي الفاضي ده اعمله فين علشان البكر بضبط

ثالثا : زيت الفتيس بتاع العربيه بيتغير امتي

العربيه كوورولا موديل 2009 وشكرا ليكم


تم تعديل العنوان
م.ع 7

[shark12345]

ولا رد واحد محدش عنده اي معلومه عن ولا نقطه من ال 3

[ahmedsl]

اولا الف مبروك على الكورولا وربنا يرزقك خيرها ويكفيك شرها
ثانيا هى اى فئة
عداد العربية كام
علشان اقدر ارد عليك

وعلى العموم

1. انت ممكن تغير زيت وفلتر طالما انت شاريها مستعملة علشان تبقى مأمن نفسك

2. ان امكن صور السلكين اللى ورا المراية علشان اعرف ارد عليك (من الواضح ان العربية جنوب افريقى فجرب تشغل الاوتو بتاع المراية وشوف اللمبة اللى جنب زرار الاوتو هينور والا لا وبالمناسبة هو لونه بعد الاضاءة اخضر)

3. بخصوص بكر الكاسيت هتعمله عند اى حد بتاع صيانة كاسيتات وفى الاغلب يا بيتنضف او ان كانت المقاومة سايبة بيلحمها

ارجو انى اكون افدتك
اخوك
م/ أحمد غريب

[ahmedsl]

انا اسف انى اختلط عليا موضوع الزيت
بخصوص زيت الفتيس ده بيتغير عند صيانة الفتيس بسس للاسف مش متذكر امتى او على كام الف
ويفضل يتغير فى التوكيل طالما الفتيس MMT والعربية طبعا جنوب افريقى
وهو بيتغير بزيت موبيل 75w والمفروض انه موجود فى التوكيل فقط ومش بيبيعوه هو بيتغير فقط فى ميعاد صيانة الفتيس
ممكن ان كانت العربية لسه مغيرتش الفتيس تروح تغيره فى التوكيل وهم هيغيروا الزيت كمان وهيقعد فترة محترمة قبل ما تفكر تقرب منه

عذرا للخطأ
م/ أحمد غريب

[shark12345]

شكرا لحضرتك علي الردود العربيه ماشيه 41000 والفئه قبل الاخيره جنوط واستارت

[shark12345]

بالنسبه للماريا هي في كابل واحد واصل والمرايا فعلا منوره اخضر

[mashaly]

اوعى المفتاح يضيع منك ولو معاك واحد بس حاول تعمل مفتاح تاني
انامفتاح عربيتي ضاع ومحتاس حوسة السنين وربنا يحلها من عنده

[ahmedsl]

شكرا لحضرتك علي الردود العربيه ماشيه 41000 والفئه قبل الاخيره جنوط واستارت

الجنوط اللى هو 10 اذرع والستارت فى الهاى لاين اللى هى 9 ايرباج وكاسيت تاتش وتكييف تاتش وطارة مالتى فنكشن

[ahmedsl]

بالنسبه للماريا هي في كابل واحد واصل والمرايا فعلا منوره اخضر

الصورة هنا هتوضح المطلوب من الكابل التانى
ممكن الكابل التانى يكون بتاع السنسورز خصوصا بتاع الامطار

[ahmedsl]

اوعى المفتاح يضيع منك ولو معاك واحد بس حاول تعمل مفتاح تاني
انامفتاح عربيتي ضاع ومحتاس حوسة السنين وربنا يحلها من عنده

ربنا يعينك
ممكن تروح التوكيل يعملوا لك مفتاح تانى
بس السؤال اللى ضاع منك المفتاح المعدن والا الريموت والا لا قدر الله الاتنين

[shark12345]

لا معايا المفتاحين واحد معايا والتاني شايله في البيت وربنا يعينك وتتحل علي خير

[ahmedsl]

اسف علي التأخير يا غالي بس علي الرغم من اني جوا العربية يوميا وممكن اكتر من مرة بس مكنتش مركز
بس يا غالي المرايا مفيش لها اسلاك
الكابل اللي قصدك عليه ده زي ما قلت لك كابل السنسور بتاع الامطار والنور وده واصل علي علبة صغيرة بتتثبت في مكان لها علي الزجاج جوا الحتة اللي هي عليها لون اسود
وطبعا بعد تثبيتها علي الزجاج هتحط ذراع النور علي الاوتو وهو اوتوماتيك هيشتغل مع ضعف النور وهيشغل النور العادي بتاعك
وكمان هتحط ذراع المساحات علي الاوتو وهتلاقي المساحات بتشتغل مع الامطار وطبعا علي حسب كثافة الامطار وسرعه العربية المساحات هتشتغل
ارجو اني اكون افدتك وان شاء الله هحاول اصورهالك عندي واعرض لك الصورة
اخوك
م/ أحمد غريب

[shark12345]

شكرا لحضرتك وربنا يباركلك علي المعلومات الحلوه ديه

[ahmedsl]

فى الخدمه
واى سؤال بخصوص العروسة عرفنا واصبر علينا شوية وربنا يسهل وتلاقى الرد اللى يخدمك