خبطت العربية ف الرصيف وعايز رأيكم ضروري كورولا 2013

[الصيداح]

السلام عليكم ورحمة الله وبركاته

عايز إفادة حضراتكم يا رجالة الله يكرمكم

دلوقتي عربيتي كورولا 2013 خبطت مني ف الرصيف جامد من قدام عالشمال
يعني الخبطة جت في الإكصدام الأمامي من جهة السواق والخبطة جت جامد في الكاوتش الأمامي الشمال بتاع السواق فالكاوتش فرقع وغيرته
العربية بعد ما غيرت الكاوتش مشيت بيها كويسة مفيهاش حاجة الحمد لله غير كسر الإكصدام
بس فيه حاجة قلقتني وهي إن بعد الخبطة وأنا ماشي مستقيم الدركسيون مبقاش ع عدلته زي الأول يعني والعربية ماشية مستقيم بيبقا هو جاي يمين شوية

فإيه اللي حصل

دلوقتي عايز أزبط العربية زي ما كانت انا كل صياناتي ف التوكيل
عايز أغير الإكصدام وأشوف موضوع الدركسيون دة
فهل تنصحوني أروح للتوكيل ولا ايه
وهل الإكصدامات ف التوكيل بتبقا مرشوشة جاهزة ولا ظروفها ايه أنا سألت عليه قالولي 2000 ج

الموضوع هيكلفني كم ف التوكيل وبرة التوكيل وأنهي أحسن مكان أروحه برة

ولكم جزيل الشكر

[Mecha]

لازم تشوف بعينك الخبطه عملت ايه.لوحت مقص ولاركبه ولا اسكترا
وممكن علي قد الجنط

[shake]

متابع

[الصيداح]

أنا نزلت بصيت تاني بعد كلام حضرتك ملقيتش أثر لاي خبطة في أجهزة التعليق كل الي فيها الفيبر اللي تحت واللي حولين الرفرف من حوة والإكصدام اتكسروا لكن مفيش أثر لإعوجاج أو خبطة في المقص أو الإسكترا أو غيرها

[moha sasa]

من بره التوكيل اشترى الإكصدام

وانت بتظبط زوايا يتفك الدريكسيون وتحطه زى ما انت عايز

والحمد لله على كل حال

[wael30003]

انا حصلى الموضوع ده من ٣شهور
والدريكسيون اتعوج زى ما حصل عندك بالضبط
طلع المقص عندى معوج
وغير لى بلى
وجنط وطاسة
اظن انه نفس المشكلة ده عندك
وحاجات تانية لان هنا فى السعودية اسماء قطع الغيار بتختلف

[الصيداح]

انا لاحظت دلوقتي إن العجلة الشمال قريبة من الرفرف أكتر من العجلة اليمين
يعني المسافة بين الرفرف الشمال والعجلة الشمال أقل من المسافة بين العجلة اليمين والرفرف اليمين يعني العجلة الشمال رجعت لورا شوية

دةمعناه ايه

[دكتور خالد]

[quote=الصيداح;3876022133]انا لاحظت دلوقتي إن العجلة الشمال قريبة من الرفرف أكتر من العجلة اليمين
يعني المسافة بين الرفرف الشمال والعجلة الشمال أقل من المسافة بين العجلة اليمين والرفرف اليمين يعني العجلة الشمال رجعت لورا شوية

دةمعناه ايه
اقل الضرر ان يكون عوجه فى المقص او المساعد او الركبة - لا قدر الله يكون ترحيل من فردة الشاسيه - العربية لازم تروح لعفشجى يرفعها و يبص عليها كويس من تحت - او تروح الاول لواحد بتاع زوايا يشوفها و يقولك اللى فيها و بعدين يبعتك لعفشجى

[wael30003]

انا نسيت اقولك حاجة ..
.انا اول حاجة عملتها رحت لبتاع زوايا عشان يظبط الزايا وفعلا كانت مرحلة بشكل حاد جدا ..وفعلا الدركسيون اتضبط ..عشان كنت مسافر حوالى ١٠٠٠كيلو متر...وبعدين وديتها تتصلح

[sonaeg]

الزوايا يافندم ويمكن تكون عايزة زرجينة بسيطة تظبط العجلة اللي مرحلة والحمد لله علي كل شئ

[الصيداح]

طيب يا جماعة هي فعلا العحلة مرحلة بشكل ملحوظ للي يركز لكن السيارة مش باين عليها أي مشاكل ف السواقة يعني بس الدريكسيون عدلته يمين شوية غير كدة العربية زي الفل فهل ممكن فعلا ظبط زوايا وخلاص

أنا حجزت صيانة 50 الف كمان اسبوعين وهعمل معاها بقية الحاجات دي
لو فيه مكان كويس غير التوكيل أروح فين

[Mecha]

الموضوع مش بسيط ، لازم العربيه تترفع علي هويست
وتتقاس وتتفحص ويعرف فين الخلل.
احتمال مسامير حلت ضعيف. جلب المقص الكاوتش شديده
هتستحمل الخبط وترد لكن الحديد هيتني

[tata2011]

ماتفرحش وتقول العربية ماشية زى الفل . حصلت معايا وطنشت وفجأة لقيت العجلة سايبة بالطنبورة وربنا ستر وطلع ان الركبة كانت بايظة

[الصيداح]

تمام جزاكم الله كل الخير
بإذن الله هفحصها علطول

[الصيداح]

يا جماعة الله يكرمكم قولولي اوديها لمين برة التوكيل يكون حد مضمون