ياريس 2008 اتوماتيك ومشكلة غريبة

[profshady]

ياريت يا خبراء الياريس والياريساوية بطلب منهم حل لمشكلتي والتي تتضمن في :
من وقت دخول الشتاء العربية بتغيب معايا في الدوارة الصبح او عموما لما تكون مركونة فترة وتبرد واجي ادور الاقيها زي اللي نفسها تدور بس ما بتدورش ... وبعد مرتين او ساعات تلاتة بتدور عادي بعد كده ...
مع العلم ساعات انا وماشي سلانسيه الاقيها بتقطع بمعني انها كأنك بتدوس بنزين وتسيب وتدوس بنزين وتسيب يعني هوة هوة نفس الاحساس ده كده مع العلم ان رجلي ثابتة علي الاكسراتير ...
مع العلم بردو اني عملت سكان بالكمبيوتر ومفيش اي ايرور ظهرلي
اتمني لو حد عنده معلومات ما يبخلش عليا ويقولي ده ممكن يكون عيب ايه او اشيك علي ايه بالظبط

[swimmer25]

متهيألى إما يكون بنزين وحش مخلوط بالمياه أو فلتر بنزين مسدود أو حاجة في البوجيهات

[Mecha]

عامله كام كم
وايه الشغل اللي اتعمل فيها

[morad_1a1_2010]

طرومبة بنزين
متلفش كتير
انا كان معايا نفس المشكلة وكان زياده عليها انها وهي ماشية العربية بتفصل وتيجي تشغلها بتشتغل

[Yones]

طلمبة بنزين وحصلت معايا رغم ان العربية 76000 كيلو على العداد بس

[profshady]

بس يا جماعة انا مغير قلب الطرنبة مفيش بقالي بتاع شهر او شهر ونص كده
مشتريها بحوالي 150 جنيه
والعربية عاملة 210 الف كيلو

[Mecha]

بس يا جماعة انا مغير قلب الطرنبة مفيش بقالي بتاع شهر او شهر ونص كده
مشتريها بحوالي 150 جنيه
والعربية عاملة 210 الف كيلو

تمام ، يبا تروح سكة الشراره
الموبينه وخلافو

[Yones]

بس يا جماعة انا مغير قلب الطرنبة مفيش بقالي بتاع شهر او شهر ونص كده
مشتريها بحوالي 150 جنيه
والعربية عاملة 210 الف كيلو

حضرتك كده اشتريت الطلمبة الصينى ب 150 جنيه ودى بتبوظ بسرعة و مشاكلها كتير قوى....انا اشتريت الأصلية ب 1750 جنيه

[morad_1a1_2010]

حضرتك متاكد من السعر ده ؟
1750 ج
طب من امته تقريبا؟
انا سالت عليها قريبا كانت ب650 من موزع معتمد

[morad_1a1_2010]

حضرتك كده اشتريت الطلمبة الصينى ب 150 جنيه ودى بتبوظ بسرعة و مشاكلها كتير قوى....انا اشتريت الأصلية ب 1750 جنيه

وفعلا كلام حضرتك صح الطرومبة الصيني ولا بتنفع خالص انا لفيت حوليين نفسي بسبب الطرومبة
لازم تجيب الاصلية والاصلية بتنزل كاملة بالفلتر بتعها

[Yones]

حضرتك متاكد من السعر ده ؟
1750 ج
طب من امته تقريبا؟
انا سالت عليها قريبا كانت ب650 من موزع معتمد

اه متأكد اشتيرتها من حوالى شهر وركبهالى فنى بيشتغل فى توكيل تويوتا وقالى ان سعرها فى التوكيل اغلى من كده كمان ممكن يوصل ل 2500 و اكتر ....

[Yones]

وفعلا كلام حضرتك صح الطرومبة الصيني ولا بتنفع خالص انا لفيت حوليين نفسي بسبب الطرومبة
لازم تجيب الاصلية والاصلية بتنزل كاملة بالفلتر بتعها

لا الفلتر بيبقى جزء منفصل لوحده وسعره غالى برضه مش رخيص .....التويوتا مشكلتها قطع غيارها غالية بس محترمة طبعا

[profshady]

يعني يا جماعة كده اغير الطرومبة خلاص بواحدة اصلي ... ولا اشوف سكة الشرارة علي رأي الاستاذ mecha

[Mecha]

يعني يا جماعة كده اغير الطرومبة خلاص بواحدة اصلي ... ولا اشوف سكة الشرارة علي رأي الاستاذ mecha

الطرمبه التعبانه بتخسع في السحب ولما تقرص
علي 4 ,5 الاف rpm
ولو حليت خرطوم البنزين وشوف الكبس ضعيف
خصوصا وهي بارده
لكن فلتر البنزين متغير في ميعاده؟؟؟

[profshady]

دلوقتي يا جماعة فيه حاجة جديدة اكتشفتها في العربية انهاردة وانا متهيألي انها مرتبطة بمشكلتي ويمكن تحدد المشكلة فين بالضبط وهية :
انهاردة جيت شغلت التكيف علي واحد وقفلت الازاز علشان كنت داخل علي منطقة كلها غبار لاحظت بقي ان الار بي ام بيعلي ويوطي وانا واقف كمان مش وانا ماشي ... يعني شوية الاقيه علي واحد وكمان 10 ثواني الاقيه علي النص اللي هوة بين الصفر والواحدوتقعد الار بي ام تعلي وتوطي وهكذا طول ما انا واقف بالعربية
وعلي فكرة ده وانا واقف وجايب الفتيس علي ال n
يا تري كده المشكلة كده بانت فين بالضبط