تعديل السيارات الدركسيون يمين للشمال

[heshamhassen]

السلام عليكم ياجماعة
قدامي عربية تويوتا كورولا 2006 مستوردة بس هي دركسيون يمين والشركة هاتحولها شمال والسعر الصراحه مغري جدا
موضوع التعديل ده في مشكلة ولا ناس كتير بتعملة ومفيش منه مشاكل ولا لأ

[lamada]

شكلها كانت شغالة لشركة بترول و بتبيعها؟

[heshamhassen]

لأ
سيارات لنسب الإعاقة من المنطقة الحرة في مدينة نصر وشركه اسمها فوجي بتشتغل في المنطقة الحرة في التويوتا بس

[amr011111]

طيب ايه المشكله لو سوقتها بالوضع ده ولا بتتكلم من جهة الترخيص انها مش تترخص يمين

[hugan]

اظن هاتتكلف جامد
مش هاتطلع صح

[gamal_sharaf]

شوف يا سيدى

موضوع التحويل من يمين إلى شمال بيفكوا تقريبا العربية كلها
وبيحصل تعديل في صدر العربية عشان فتحة الدكسيون وبيتغير السكاترا ، والتغيير ده لوحدة بيعمل مشكلة بعد كده فى عفشة العربية
وبيحصل تعديل في الضفيرة عشان مكان الكونتكت وفيش الإشارات
وكمان بيتغير الطابلون من يمين إلى شمال
وفرش البابين الاماميين بيتغيروا عشان يجيب باب شمال فيه وحده الكنترول بتاع الزجاج وباب يمين للزجاج اليمين فقط
وفتحة الكبوت والشنطة والتانك من يمين إلى شمال
يعنى من الاخر العربية بيتعمل فيها تعديلات كتيير قوى

ولما تيجى تبيعها التجار مبيردوش ياخدوها عشان بيتعرف انها متغيرة من يمين إلى شمال

بيعرفوا ازاى:
الشركة لما بتعدل بتسيب حاجات من غير تعديل ايه هيه
عصاية الفتيس الاتوماتيك الزرار بيكون ناحية اليمين مش ناحية الشمال
فرامل اليد بتكون ناحية الكرسى اليمين مش الكرسى الشمال
طفاية السجاير بابها بيكون ناحية اليمين مش ناحية الشمال
دواسة الأرضية الخاصة بكرسى السائق اللى بجانب الفرامل بتكون ثابته امام الجانب اليمين ولا يتم نقلها إلى الجانب الشمال عشان دى فى ارضية الشاسية
الإشارات بتكون يمين الدركسيون ولا يتم نقلها إلى شمال الدكسيون
دراع المساحات بتكون شمال الدكسيون ولم يتم نقلها إلأى يمين الدرسيون
والكونتكت بيكون شمال الدكسيون مش يمين الدكسيون
المساحات بتتحرك في اتجاه اليمين وليس في اتجاه الشمال
كل حاجة من دول ممكن تغيرها من الاتجاه اليمين إلى الاتجاه الشمال ، بس بيطلب منك فلوس عشان تغير كل حاجة لوحدها
وفى الاخر مبينفعش ينقل دواسة الارضية من الجانب اليمين إلى الجانب الشمال عشان صعب
وبرده العربية بتتعرف انها منقولة من اليمين إلى الشمال

لكن العربية بتكون حالتها كويسة جداً على أساس انها يمين بس لما بتتنقل شمال بيبقى صعب بيعها في السوق المصرى
ومع ذلك فيه ناس كتيير بتاخدها ، وهو كمان بيقول كده انك لو عايز تبيعها في اى وقت انا اجيب لك مشترى

انا كنت حشترى واحدة ، بس لما حسبتها رجعت فى كلامى ، وبعدين سعرها عالى جداً ، لكن ارخص من سعر فى السوق ، ومتنساش ان فرق السعر ده بيكون مخصص ليك انت هو سعر التخفيض الجمركى
رأيى الشخصى انك تحاول تستوردها من الخارج شمال على ابوها من غير اى تعديل

لو عايز اى مساعدة انا ممكن اساعدك
انا استورت عربية هيونداى النترا 2004 من كوريا الجنوبية
وربنا يوفقك

[tasaka]

انا استورت عربية هيونداى النترا 2004 من كوريا الجنوبية
وربنا يوفقك

معلوماتى انها لازم تكون موديل السنه او سنه قبلها .. و انى اكون اول مالك .. هل حدث تعديل فى القوانين

ممكن توضيح لو سمحت ازاى استوردت سياره 2004 ؟

هل ممكن استيراد سياره مستعمله لست اول مالك لها من امريكا .. سواء لمصرى مقيم فى مصر .. او امريكى الجنسيه مقيم فى امريكا

شكرا

[heshamhassen]

شكرا ليكم كلكم يا جماعه
فعلا .. ردودكم افادتني كتير

[mif]

معلوماتى انها لازم تكون موديل السنه او سنه قبلها .. و انى اكون اول مالك .. هل حدث تعديل فى القوانين

ممكن توضيح لو سمحت ازاى استوردت سياره 2004 ؟

هل ممكن استيراد سياره مستعمله لست اول مالك لها من امريكا .. سواء لمصرى مقيم فى مصر .. او امريكى الجنسيه مقيم فى امريكا

شكرا

سيارة معاقين
الموضوع كله عن سيارات المعاقين و دى بيسمح باستراد 10 سنين ورا و انت نازل تقريبا مش متاكد