تويوتا العبور-شكرا

[Karim_Monir]

http://www.nilemotors.net/Forum/viewtopic.php?t=6281&postdays=0&postorder=asc&start=0

بالنسبة للينك الموضوع اللي كنت عملتة عن تعنت توكيل تويوتا وعدم وجود حجز الا قبل 3سبتمبر وابو رواش كمان ومبلغ ال 600 جنية في صيانة ال 5000 اللي كان طالبهم تويوتا القطامية

بعد ما حجز صيانة ال 5 في تويوتا العبور
روحت الساعة 2 بالظبط حسب الميعاد وبناء على تاكيد حجز في نفس اليوم تم من تويوتا نفسها
استقبلني مهندس احمد سعيد مهندس استقبال استلم مني العربية الساعة 2:30 من الزحام على المركز
الساعة 2:45 دخلت العربية الورشة وقعدت في قاعة الاستقبال مع ناس كتير قاعة مريحة بس التكييف مش قادر يظبط الجو والمشاريب فري والمياة ساقعة

هو بلغني ان العربية مش هاتخرج قبل 4:30 عشان النهاردة زحمة
استلم من جركن زيت شيل الترا وقاللي براحتك
الساعة 3:30 بقيت مش طايق نفسي خاصة اني مش شايف العربية اتجننت قولتلة لازم ادخل الورشة اشوف اللي بيحصل فيها خاصة ان زوج اختي استاذ ايمن الخولي زميلنا في المنتدي عربيتة العامل خبطهالة في ابو رواش ومخدش بالة الا بعد ما روح

مهندس احمد طمني وقاللي تقدر تتابعها من البنوراما فوق
دي الخدعة بقي
باب خلفي دهليز جوة دهليز تطلع تشوف عربيتك قدام وشايف الورشة كلها مفيهاش ولا حتة مدارية
والقاعة تكييفها تلج وكافتيرا وكراسي احسن
عشان 90% من الناس ما تعرفش بوجودها
شوفت العربية وتابعتهم كويس والناس ماخلونيش اقول على اي ملحوظة بس السخافة انهم زودا العجل هوا وانا مخدتش باللي الا في اخر عجلة عشان كان معايا موبايل وكدة هاضطر اروح افضية واملاة نيتورجين تاني
راجعو على العفشة كلها تربيط والفرامل والانوار وشحن البطارية وكل حاجة فعلا

ناس زي الفل وعمال امنا جدا
وفي الاخر كانت هاتتغسل لولا اني كنت مستعجل قولتلهم مش مهم

تكاليف الصيانة
45 جنية فلتر زيت
60 جنية مصنعيات تغيير الزيت والفتر وبقية التربيطات
10.5 ضريبة مبيعات

ولا الباشا اللي كان عايز يدفعني 600 جنية بالزيت
العربية خرجت 4:20 بالظبط
ملحوظة لامانة النقل
رغم اقتناعي التام بزيت شل الترا واقتناع مهندس التوكيل به وكلامة انه لزوجتة احسن واطول عمرا وبيخلي صوت الموتور اهدي عشان في مادة مش فاكر اسمها
ورغم ان زيت موبيل بيعلي صوت الموتور وفي الحر والتراب المفروض ما يقعدش اكتر من 8 الالاف
الا انه بيقولي ان تويوتا تاني اكبر صانع سيارات في العالم بتنصح بيه في مواتيرها يبقي مقدرش انا اقول ان شل احسن
وقاللي كمان انه عند حدوث مشكلة في الموتور هايخرج برة الضمان لانك بتغير زيت بمعرفتك وقاللي دي نصيحة لله
وكنا واقفين برة وقاللي عمري ماهقولك الكلام ده جوة
قاللي حط موبيل وان وبعد الضمان حط اللي انت عايزة
انتم ايه رايكم رغم اقتناعي واقتناعة بجودة زيوت شل خصة انها تعبئة ماليزيا مش مصر

اخوكم في الله
كريم منير

[hazem_khidr]

مممممم و الله حاجه تحير بجد مش عارف اقول ايه .
اوك ماشي تويوتا تاني شركه في العالم مقتنعه بيه بس اللي بيتعمل بره مش اللي بيتعمل في مصر هنا بس حنرجع نقول ان اكيد في خبراء من موبيل موجودين و بياخدو عينات و مستحيل يضيعوا سمعه شركه بسبب اهمال او لاي سبب تاني خصوصا ان الناس في مصر بقت واعيه و من الصعب ينضحك عليها .
غير كده مش معني ان تويوتا معتمداه انه يبقي الاحسن لاء هو طالما اعتدمته يبقي كويس بس مش احسن حاجه و ما تنساش ان دا بتبقي عباره عن دعايا لشركات الزيت و بيدفعو مبالغ خرافيه للشركات علشان تعتمد الزيت بتاعهم.كفايه انك تفتح كبود عربيه و تلاقي لازقه موجوده بتنصح بزيت موبيل 1 !!!!!
ولو تويوتا بتنصح بيه ف فيراري بقي بتنصح ب شل و ما ادراك ما فيراري يا باشمهندس...
انا متهيالي اللي يريحك اعمله وعمر ما في عربيه بتبوظ او موتورها بيحل ليه حاجه من الزيت الا لو الزيت نقص او لزوجته قلت خليك في اللي انت مقتنع بيه و تابعه باستمرار

[vooooo]

وقاللي كمان انه عند حدوث مشكلة في الموتور هايخرج برة الضمان لانك بتغير زيت بمعرفتك وقاللي دي نصيحة لله
وكنا واقفين برة وقاللي عمري ماهقولك الكلام ده جوة
قاللي حط موبيل وان وبعد الضمان حط اللي انت عايزة
انتم ايه رايكم رغم اقتناعي واقتناعة بجودة زيوت شل خصة انها تعبئة ماليزيا مش مصر

حدوث مشكله فى الموتور من أى نوع؟؟ الموتور فيه حاجات كتير ممكن تبوظ بسبب الزيت و بسبب حاجات تانيه
يعنى لو طلمبه البنزين لا قدر الله باظت و كانت عيب صناعه مثلآ و دى أساسى مالهاش دعوه بالزيت هيقولك لأ علشان بتغير زيت بره لاتوكيل؟ لأ أعتقد

انا شايف انها تلاكيك لا اكتر ولا أقل. و حتى لو ماشى فى صيانه عربيتك زى مابيقول الكتاب برضه هيقولولك العيب ده سوء أستخدام

اللى اعرفه برضه ان توكيل تويوتا محترم جدآ
ليا صديق كان معاه كورولا و دايمآ بيروح التوكيل ( فى العباسيه ) مره رحت معاه ناس محترمه جدآ و ذوق
بس باظت طلمبه البنزين و السبب عيب صناعه و ماكنتش موجوده فى التوكيل فأخدت شهر لحد لما جابوها من اليابان
و طبعآ اتغيرت على حساب التوكيل

[Abdallah]

من رأى يا كريم انه مش هيقولك الكلام دة من فراغ والاحسن تخليك فى موبيل لحد ما يخلص الضمان لأن الكلمة الى قالها دى كبيرة اوى وممكن بعد كدة يحصلك مشاكل كتير انت فى غنى عنها وياما عربيات بتنزل وبيبقى فيها عيوب تصنيع وبالطريقة دى ممكن يلبسوهالك انت ومش طالبة يعنى, اتقل لما تخلص فترة الضمان واعمل الى انت عايزه.

[boody2]

استاذ كريم

مساء الخير

انا عندي كرولا هنا في دبي بس 1800 سي سي سيبك من موضوع ان موبيل 1 لازم في تويوتا و ان موبيل العالمية بتوصي بيه و الكلام الفاضي ده لان اساسا في الامارات كلها الي فيها احسن انواع السيارات في الوطن العربي مبيستخدموش زيت موبيل خالللللص و لكن بيستخدموا زيت الامارات عن طريق محطات الامارات و الزيت بيقعد 5000 كم وزي الفل و ما شيفناش موضع ان المصنع بيقول لازم موبيل 1 يا اما و كمان وكالة الفطيم هنا لما بروح في الصيانة بيحطوا زيت الامارات و اعتقد انهم في مصر فيه اتفاقية بين موبيل و تويوتا من زمان علي سبيل الدعاية .

بس بصراحة انا بحط في مصر موبيل 1 لعربيتي و انا مش متاكد خالص ان ممكن موبيل 1 يكون مغشوش لكن انا بصراحة مش عندي ثقة في موضوع شل لكن موبيل اكثر و اوسع انتشارا في مصر و لكن مش شرط يعني يستخدم في السبارة

و اسف للاطالة

[ahmed1981]

يبقى توكل على الله وحط موبيل وان وتابع لزوجته وأمرك لله ومش هتفرق كتير

[معاذ الشرباصى]

ه غير ان فى زيت اسمه زيت تويوتا

اظن دى حتة كده من عنده, لكن الشراكة هى بين موبيل مصر و تويوتا ايجيبت

وكيل رينو كان بيستعمل زيت موبيل و بعد كده قلب توتال

مفيش حاجة ثابتة او حاجة موصى بها عالميا, انا شايف ان الكلام ده مش صح

حسب كل دولة و العروض المتاحة اما الوكيل

[أبو عبدالله]

كلام مظبوط هي تقريبا اتفاقيات للتوكيلات في البلد الواحده مش عالميا وان كان في اتفاقيات غالبه في العالم ومغروفة

وموضوع زيت تويوتا ده مظبوط بس اكيد هو زيت من شركة من الشركات دي بس بينزل تحت اسم المصنع للسيارات ويمكن يكون له مواصفات خاصة لمواتير تويوتا

[معاذ الشرباصى]

وموضوع زيت تويوتا ده مظبوط بس اكيد هو زيت من شركة من الشركات دي بس بينزل تحت اسم المصنع للسيارات ويمكن يكون له مواصفات خاصة لمواتير تويوتا

موضوع زيت تويوتا ده تكذيب لكلام المهندس ان شركة تويوتا بتوصى باستخدام موبيل 1 عالميا, و الدليل هو وجود بديل له فى بعض الدول

هما اكيد بيكسبوا فى الزيت علشان بيشتروا بكميات كبيرة, علشان كده مش عاوزين الزيت اللى عندهم يقف حاله وميتباعش

[Karim_Monir]

والله متشكر لكل ردودكم
تويوتا السعودية بتستعمل زيوت مصنع تويوتا اللي عندها
وبيتباع هنا عند واحد بتاع قطع غيار تويوتا غالي شوية
علبة صفيح مكتوب عليا تويوتا وصنع في السعودية
دي اكتر حاجة ماكدالي الموضوع ده
وكمان هيونداي لحد سنتين كانت بتتعامل مع موبيل ويادوب لسه عربيات 2006 و 2007 هيا اللي نازل بعلامة شل وتقدروا تتاكدو من العلامات اللي في عربياتكم

النهاردة وانا جاي ورغم اني قبل كدة كنت حاطط زيت شل بس اللي بيقعد 4 عشان اغيرة في صيانة ال 5
العربية القرص فيها بالشل الترا تحفة
انا جاية من مدينة نصر لبيتي في اخر جسر السويس في 12 دقيقة بالتمام
اداء الموتر غير عادي والصوت غير مسموع تماما في السلانسية
شل حاجة تانية فعلا في المواتير

كمان انا اعرف ان كل سبيكة موتور كثافة السبيكة نفسها بتتطلب قدر معين من المواد ومن اللزوجة في الزيت لضمان اقصى ظروف تشغيل
بس يا جماعة شل بتاع مواتير فيراري
شل بتاع فورميلا وان

انا بقول اتوكل على الله واخليني في اللي مريح الموتور والمعروف ان مواتير تويوتا معمرة ان شاء الله
ولو عملوا مشكلة هاسيحلهم هناك لو حصل حاجة لقدر الله وانا اعرف دكتور رافت مسروجه وهو راجل فاتح باب لكل الناس وانا كمان سلمت علية في العباسية عشان بحترم عقليتة قوي

ربنا يسهل وهاستخير برضه
شكرا لتجاوبكم

[معاذ الشرباصى]

وكمان هيونداي لحد سنتين كانت بتتعامل مع موبيل ويادوب لسه عربيات 2006 و 2007 هيا اللي نازل بعلامة شل وتقدروا تتاكدو من العلامات اللي في عربياتكم

هو ده الكلام اللى بنقوله يا كريم

انها اتفاقيات شركات محلية, مش من الشركة الام او حاجة زى كده

خليك فى الشل بما انه مريحك و بتشكر فيه, و سيبك من الكلام الفتى ده

ربنا يباركلك فى عربيتك و يحفظهالك من كل سوء

[وائل عطية]

والله يا كريم أنا رأيي تخليك في الموبيل وان
أصل بالمنطق كده دي ماركة عالمية ذائعة الصيت والانتشار، وبالمثل كمان شل وحتة إنه مضروض دي أنا شايف إنها إشاعة غير مبنية على أساس من الصحة .. إذا الاتنين بنفس الكفاءة تقريباً وإن مالت الكفة تجاه الموبيل وان وبيرجحها أكتر إن التوكيل بينصح بموبيل وان يبقى نخلينا في المضمون وبلاش نفتح على نفسنا نقطة قصور في شروط الضمان في حالة الاضطرار إلى استعماله لا قدر الله

[Karim_Monir]

شوف يا وائل ليا واحد قريبي فاتح مركز صيانة سيارات واحد راحلة بكرولا 2003 تقريبا لمبة الموتر منورة على طول بعد حوارات طويلة واكتشاف انه بيحط زيت موبيل بقالي 80 الف كيلو
بيفتح غطاء الموتور لقي جنزرة
نزل الزيت وفتح الكارتيرة لقي طبقات معجنة من الزيت المحروق
نزل الزيت وغسل الوتور مرة واتنين وبقي زي الفل واللمبة طفت
ايمن زوج اختي معانا في المنتدي معاه كرولا 2007 حاطط موبيل في التوكيل صوت عربيتة اعلى من صوت عربيتي وتاخد بالك منه فعلا
عموما شكرا لاقتراحك وربنا يسهل في ال 10 الالاف دول يمكن اغير رايي

[محمدايهاب]

يا كريم أنا شفت الموضوع ده مدة بس ما حبتش أعلق ممكن تكون تويوتا العبور كويسة في نقطة الصيانة ممكن يكون الناس محترمة ممكن يكون المركز مجهز و بيتوسع و حاليا هما بيغيروا مكان الإستقبال و بيوسعوا من قسم السمكرة
لكن لو عربية حضرتك ( بعد الشر ) حصل فيها أي حاجة بعيد عن الصيانة ( سمكرة - دهان - قطع غيار) انصحك بالإبتعاد عن المركز ده ( عن تجربة خمس مرات كل مرة أسوء من إلي قبلها ) بس أنا إلي كان بيخليني أكمل معاهم هو إني كنت متوقع أن الوضح يتحسن
المرة الأولى : انطباعي عنه أنه مركز كويس جدا في سرعة في السكرة و رد على التليفونات و متابعة مستمرة و المركز فاضي و لسة جديد يعني مفيش إعلانات و لا حتة الدليل يعرف رقمه
المرة التانية : ناس محترمة و سرعة معقولة في السمكرة ( مع تأخر في وصول قطع الغيار ) و خطوط تليفون غير مشغولة و المركز لم يعد جديد و في إعلانات في الصحف و على الطريق
المرة الثالثة : أنا في شرم الشيخ العربية بقالها أسبوعين من غير ما يطحط فيها مسمار و المهندس أحمد سالم موبايله مفتوح و بيرد عليا و بيعتذر و كل يوم يقول بكرة القطع هتوصل و خطوط التليفون مشغولة و لكن حقيقة مع وصول قطع الغيار بدأ الشغل و استلمت العربية بسرعة و مع ابتسامة شكر و لكن كان في العربية 7 شرايط قرآن اختفت و لم أجدها حتى الآن و الظريف أنهم حطولي في العربية شريط أغاني مسيحية ( مع احترامي للأخوة المسحيين )
المرة الرابعة : قلت خليني أعمل صيانة و أغير زيت و أصلح عتبة الباب (سمكرة ) عتبة البا أخذت 10 أيام !!!! رحتلهم 3 مرات و المرة الأخيرة رجعت بالعربية رغم أن المرة التانية كانت العربية خلصت و التأمين بعت الرد و لكن فاكس الشركة مش شغال حقيقة التأمين كان أخر احترام و التوكيل كان أقل احترام شركة التأمين قعدوا بعد الدوام لغاية أما الفاكس اتبعت مع متابعة و شكر و اعتذار مستمر أما التوكيل الناس مشيت قبل نهاية الدوام و كمان المسؤؤل عن الفاكسات راجع مش متربي و لا يعرف أي حاجة عن الأخلاق و كمان الفرش مخروم من أثر سجاير واضح
المرة الخامسة : كنت متخدر و ما لقتش نفسي إلا و أنا متجهه نحو التوكيل في العبور المهم العربية 25 من غير أما يطحط فيها مسمار و الله و العذر قطع الغيار مش موجودة اتصلت بالعباسية و الغبور القطع موجودة !!! لكن العبور ناس مش محترمة ......- التليفونات مشغولة دائما و المهندس موبايله مغلق دائما و الناس مش عافة بتشغل فين و في حالة من الهيستريا في المركز - مفيش متابعة ولا حتى اعتذار لأ في بجاحة و قلة أدب و بيحاسبوني علشان أنا متعصب و ألذ كلمة ( يا بيه أحنا أيه ذنبنا ) أمال ذنب مين العربية استلمتها بعد 33 يوم و دي كانت القشة إلي قسمت ظهر البعير

الإنطباع النهائي مركز مجهز لكن لا يكفي ولا يخطي العربيات المتزايدة - ناس مش محترمة و بتعملك البحر طحينة و تحس من كلامهم أنهم صح و أنهم معزورين و أن الغلط مش عليهم ده !!!( وأنت شفت بنفسك يا كريم من الردود السابقة على موضوع موبيل 1 )- تأخير دائم في قطع الغيار - قلة عدد الموظفين

[محمدايهاب]

بالمناسبة أنا أما سألت المهندس أحمد سالم عن الخروم في الفرش قالي مستحيل ده أحنا عندنا صرامة في التعامل مع المواقف دي قلتله ماشي
لا حول ولا قوة إلا بالله