الحمد للة جبت تويوتا كورولا Mmt هاى لاين

[midnightman_74]

انا كنت معجب بالعربية جدا بس لما سمعت الهجوم الرهيب على العربية فى المنتدى قلت لنفسى بلاش وجع دماغ وهات الكورولا الخليجى خاصة انها عاملة شغل كبير فى السعودية لانها شبهة الكامرى وطبعا السعوديين بيعشقوا حاجة اسمها كامرى

وفى يوم دخلت على السيت بتاع كورولا مصر وبعت ايميل بسال فية على تست درايف للفتيس ودة بعد لما سمعت ان التست درايف مد تة خلصت

وفات اسبوعين ومحدش رد عليا فقررت انى اجيب الخليجى وابعد عن المشاكل

وبعد اسبوعين وانا بدور على الخليجى عند سمير الريان وجابر عبد الشهيد وانا كنت عايز العربية كاملة وخاصة مثبت السرعة لانى بسافر كتير

فوجئت بتليفون من تويوتا مصر بيقولولى اتفضل اعمل تست درايف فى العباسية

قولت فرصة اعمل تست درايف ورحت العباسية وركبت العربية مع مندوب المبيعات فى التوكيل وبدا يشرحلى الفتيس

طبعا الفضل يرجع للمنتدى لان قرأت التقيمات الكتيرة وشرح الفتيس فكان عنى خلفية كويسة عن الفتيس و الاوضاع E و ES و المنيوال

بدات اسوق العربية على ال E و طلعت بالعربية وحسيت فعلا بنقلة الفتيس من الاول للتانى ومن التانى للتالت

بس انا اتفاجئت ان الاحساس بالنقلة مكنش زى الصورة اللى اخوانا فى المنتدى بيقولوة

لانك لما تقرا المواضيع عن الفتيس الجديد فى المنتدى يجيلك احساس ان فى كارثة فى العربية

من خلال تجربتى للعربية فى المدة الصغيرة ممكن اقول الفرق بين الفتيس الاتماتيك العادى والMMT من وجهة نظرى:

الفتيس الاوتماتيك العادى:

فى الاوتماتيك العادى انت بتركب العربية وبتجيب الفتيس على الدرايف مود D و بعدين بدوس بنزين وتبدىء العربية تتحرك من الثبات لحد ما تاخد سرعة الاول وتنقل على التانى وتاخد سرعة التانى وتنقل على التالت والرابع

فى الاوتماتيك العادى ممكن تتحرك من الثبات وتدوس بنزين على الاخر والعربية تبدا تاخد النقلات من غير ماتحس

الفتيس ال MMT:

فى الفتيس ال MMT انت بتركب العربية وبتجيب الفتيس على ال E و تبدىء تدوس بنزين و تبدىء العربية تتحرك من الثبات وانت بتكمل تدوس على البنزين لحد لما توصل لنهاية الاول العربية بتنقل على التانى وبعدين انت يتكمل تدوس على البنزين لد لما توصل نهاية سرعة التانى وتبدأ العربية تنقل على التالت وهكدا ويكون دوستك للبنزين متناسبة مع السرعة

فى ال MMT لازم يكون عندك احساس بالعربية يعنى ما ينفعش تتحرك من الثبات ودس بنزين على الاخر مرة واحدة فى الحالة دى هيكون اساسك بالنقلة ملحوظ

بس لو بدات تتحرك بالعربية من الثبات وكانت دوستك على البنزين متناسبة مع سرعة العربية مش هتحس بحاجة

وانا جربت الموضوع دة وكان جنبى واحد صاحبى ما يعرفش حاجة عن الفيس ولا سمع عنة وبدات اتحرك بالعربية بحيث تكون دوسة البنزين متناسبة مع السرعة وسالتة حاسس بحاجة والراجل رد وقال انة مش حاسس باى حاجة

وفعلا يا جماعة العربية موفرة للبنزين لما تيجى تقارنها بالاتوماتيك العادى وانا لسا ماحسبتش بالظبط

الناس اللى معاها عربيات اتوماتيك 1600 زى لانسر ونيسان صنى واكتافيا بصراحة الواحد بيسمع كلام غريب على استهلاكهم للبزين

انا عارف انى طولت عليكم بس يا جماعة اللى بيفكر فى العربية لازم يروح يعمل تست درايف ويشوف احساسة اية

بالنسبة للعربية بصراحة فيها اوبشنز جميلة جدا والعدادات الجديدة مع الكاسيت والتكييف التتش عامل شغل جامد مع اللون البرتقالى

الكاسيت والسماعات وعزل الصوت فى العربية اكثر من رائع

مروحة التكييف التاتش فيها سبعة مستويات للسرعة مش اربعة زى معظم العربيات

عندك 7 ايرباج طبعا دة معامل امان عالى مينفعش نتجاهلة

والثبات والفرامل بسم اللة ما شاء اللة حدث ولا حرج

والعربية على فكرة سوقها ماشى كان فى واحد بيستلم معايا وواحد تانى كان بيشترى

المندوب اللى عمل معايا تست درايف طلع معايا تانى لما اشتريت العربية عشان نجربها ويشرحلى الكماليات اللى فى العربية وفى الاخر بديلة فلوس عشان قعدت يومين مدوخة بس الراجل احرجنى وقالى عيب يا استاد احنا فى توكيل محترم وبيدولنا مرتبات كويسة

ا سف للاطالة

[faroukahafeez]

الف مبروك عليك يا midnightman

سبحان الله ليك نصيب تجيب MMT
انت فعلاً كنت بتسأل على معارض اللى بتبيع خليجى وانا رديت عليك قبل كدة

كلامك مظبوط الكلام على الفتيس مش للدرجة الموجودة فى المنتدى

من ناحية الفتيس مع الوقت والسوقة هتلاقى الفتيس بقى أحسن معاك واحساسك بيه هيزيد وهتتعود عليه وابقى قولى رأيك بصراحة كمان شهر كدة وهتحس بفرق جامد وله لا ؟

كماليات الهاى لاين مفيش كلام عليها والعدادات الاوبتروين جملية جداً والتكييف التتش والمالتى فنيكشن والجنوط ...... الخ
بس جبت لون اية ؟ يا ترى نبيتى ولا فضى ولا أسود ؟

فعلاً العربية انتشرت أوى ,اعرف كذا حد جبها اليومين اللى فاتوا

متنسش تدبح أو تتطلع حاجة لله

ربنا يبارك ليك فيها ويديك خيرها ويكفيك شرها

[ضيف]

مباركة عليك إن شاء الله
ربنا يعطيك خيرها و تستمتع بها في الخير و يكفيك شر طريقها و يبعد عنك الحسد

[midnightman_74]

بس جبت لون اية ؟ يا ترى نبيتى ولا فضى ولا أسود ؟

فعلاً العربية انتشرت أوى ,اعرف كذا حد جبها اليومين اللى فاتوا

متنسش تدبح أو تتطلع حاجة لله

ربنا يبارك ليك فيها ويديك خيرها ويكفيك شرها

شكرا يا استاد فاروق

انا جبتها فيرانى لانى بحب اللون دة جدا وان شاء الله حدبحلها

وهى فعلا بدات تنتشر وومكن اى حد يعرفها من الخليجى عن طريق الباركنج سنسور

الخليجى نازلة بباركنج سنسور تجهيز اساسى ودة عبارة عن 2 او 4 دوائر صغيرة فى الاكصدام الخافى

MMT مفيش فيها باركنج سنسور خالص ودى بصراحة فاتت عليهم يكون فيها كل الاوبشن دى ومفيش فيها باركنج سنسور

[faroukahafeez]

شكرا يا استاد فاروق

انا جبتها فيرانى لانى بحب اللون دة جدا وان شاء الله حدبحلها

وهى فعلا بدات تنتشر وومكن اى حد يعرفها من الخليجى عن طريق الباركنج سنسور

الخليجى نازلة بباركنج سنسور تجهيز اساسى ودة عبارة عن 2 او 4 دوائر صغيرة فى الاكصدام الخافى

MMT مفيش فيها باركنج سنسور خالص ودى بصراحة فاتت عليهم يكون فيها كل الاوبشن دى ومفيش فيها باركنج سنسور

فات عليا اللون الفيرانى ده بس ما شاء الله لون الفيرانى تحفة عليها و جميل جداً

فعلاً موضوع الباركينج سيسنور كان مفروض فعلاً يكون تجهيز أساسى

أعتقد فيه فرق كمان MMT جنوط 16 و ان الكورولا الخليجى فيها جنوط 15 (مش متأكد من معلومة جنوط الخليجى )

[hossam_elwani]

بس اعتقد ان احساسك بالعربية عند كل نقلة هيرهقك خصوصا داخل المدينة عشان حتكون مركز دايما انك تضغط فى اوقات مناسبة عشان متحسش بالنقلة وده مش موجود فى عربيات اوتو قديمة

[midnightman_74]

بس اعتقد ان احساسك بالعربية عند كل نقلة هيرهقك خصوصا داخل المدينة عشان حتكون مركز دايما انك تضغط فى اوقات مناسبة عشان متحسش بالنقلة وده مش موجود فى عربيات اوتو قديمة

العملية بتيجى بالتعود ومش بالدرجة اللى انتها متخيلها

يعنى الواحد اقول لما اتعلم السواقة فى المانيوال فى البداية خالص كل مرة بتنقل فيها كنت لازم ابص على عصاية الفتيس

وبعد كدة بتنقل من غير ما تبص على عصاية الفتيس

[faroukahafeez]

العملية بتيجى بالتعود ومش بالدرجة اللى انتها متخيلها

يعنى الواحد اقول لما اتعلم السواقة فى المانيوال فى البداية خالص كل مرة بتنقل فيها كنت لازم ابص على عصاية الفتيس

وبعد كدة بتنقل من غير ما تبص على عصاية الفتيس

كلام مضبوط فعلاً فى الاول هيكون كدة وبعدين مش هتبص اصلاً ورجلك هتشتغل لوحدها

بص يا midnightman ركب الفرش على طول جلد او قماش
و
فيه حاجتين لازم يتعملوا فى العربية وانا معتمد على الله وعليك انك تظبطهم علشان انا عايز اعملهم ومعنديش وقت :-
1- لازم تزود فردة فى الكلاكس ، الكلاكس صوته واطى وضعيف على عربية بالشكل ده لانه فردة وحدة
التوكيل علشان تركب فردتين غالى اوى حوالى 650 جنيه سمعت بره انه بيكون 150 جنيه بس الاكصطدام لازم يتفك

2- الطارة الجلد بتخلى الايد تعرق طول الوقت عايزين cover يكون شكله محترم وشيك نركبة على طارة الدركسيون

[Ahmed Samy]

الف الف مبروك

ربنا يباركلك فيها و يطعمك خيرها

[Hosam_Optrawy]

الف مبروك ربنا يباركلك فيها

[wahba87]

مبروك يا باشا انضمامك للعائلة

و مبروك على تويوتا العميل الجديد المحترم

[KHALED AYMAN]

الف مبروك يا باشا ..
معلش سؤال صغير ..
مش حضرتك الى كنت بتسأل على اليبرتى ؟؟
ولا انا غلطان ؟
المهم
فعلا زى ما انت قلت ..
الشعب بيحب يهول اى موضوع و يزود فى الكلام
الواحد بعد كده بقى بيجرب بنفسه كل حاجه ...
انا ان شاء الله هحصلك ..
هجيب قرين ال Mmt الايزى ترونيك و بكره رايح منصور عشان والدى يجربه ..
ربنا يباركلك فيها ..

[Fadi Ezzat]

الف الف مبروك ياباشا عقبال الكامرى

[Amr_Moh]

الف مبروك عليك
شكراً على تفاصيل تجربة القيادة

[faroukahafeez]

الف مبروك يا باشا ..
معلش سؤال صغير ..
مش حضرتك الى كنت بتسأل على اليبرتى ؟؟
ولا انا غلطان ؟
المهم
فعلا زى ما انت قلت ..
الشعب بيحب يهول اى موضوع و يزود فى الكلام
الواحد بعد كده بقى بيجرب بنفسه كل حاجه ...
انا ان شاء الله هحصلك ..
هجيب قرين ال Mmt الايزى ترونيك و بكره رايح منصور عشان والدى يجربه ..
ربنا يباركلك فيها ..

مبروك يا خالد