محتار ارجو المساعدة

[essawi]

قررت ان شاء الله اجيب عربية
محتار مابين الجولف 5 ام 150
ولا التويوتا الكورولا الكاملة عاملة 160
ايه الفرق فى الاوبشنز
ومين سعر البيع بتاعته احسن وقطع غياره متوفرة اكتر وكده

[delpo]

انا معايا كورلا لكن انا من عشاق الجولف وهقولك الخلاصة:
مميزات الجولف:
1- الجولف أقوى
2-وأثبت
3- وأمتن
4- وتسارع أعلى
5- وعمر ماكينه أطول
6- رفاهية أكبر

عيوب الجولف:
1-قطع غيار أغلى بكثير.
2- إستهلاك بنزين أعلى بفرق ملحوظ.
3- صعوبة شديدة في التصليح خارج التوكيل.
4- مساحات أقل سواء للركاب أو الشنطة.
5- سعر إعادة البيع أقل بكثير من الكورولا وده مش عشان عيب في الجولف ده حال الأوروبي كلو فمصر.
6- قطع الغيار غير متوفرة بالشك الكبير مثل الكورولا.
7- واطية عن الأرض وده بيخليها تحك في مطبات كتير.

مميزات الكورولا:
1- أعلى سيارة في إعادة البيع.
2- من أقل السيارات إستهلاكا في البنزين.
3- قطع غيار متوفرة بشكل كبير جدا.
4- قطع غيار أرخص من الجولف.
5- اي ميكاني يفهم فيها ويصلحهالك زي الوكالة بعكس الجولف.
6- التكييف الحقيقة نقطة مهمة جداً لانو أدائو أحسن بكتير من الجولف عن تجربة.
7- أوسع في المقاعد والشنطة.
8- عالية جدا عن الأرض وده بيخلي ان من الصعب جدا تلاقي مطب يلمسها بعكس السيفيك والمازدا والجولف واللانسر شارك.
9- عفشتها أنعم من الجولف.

ملاحظات على الكورولا: (لا عيوب حقيقية ملاحظات فقط)
1- الثبات بعد 180 أقل من الجولف وده عشان هيا أعلى على الأرض.
2- إذا لم تكن من محبي القيادة المانيوال مع الأوتوماتيك هات أوتوماتيك بس, مع ان ناس كتير بتشكر في التسارع بتاع الشفتات.
3- ممكن تاخد عين جامدة عشان الي معاه كورولا بيتحسد.

الخلاصة: لو مش فارق معاك تدفع أكتر مقابل الثبات والأمان والرفاهية هات الجولف, ولو عايز تبقى ضامن فلوسك وتريح دماغك في مسائل التصليح وتوفر في النزين هات كورولا.

نصيحتي الشخصية: مصر طرقها تخلي العربية تظهر أعطالها اسرع من اي دولة تانية وعشان كده الكورولا هتكون انسب.

[essawi]

اود بجد اشكرك على الكلام الرائع ده
فعلا موضوع الحسد ده مش ظريف
بس كله بيد الله طبعا
بس الجولف 5 رفاهية اكبر ازاى؟
ده حتى الطارة مافيهاش مالتى فانكشن زى الكورولا
وغير كده بسمع ال mmt ناس مش عاجبها ده غير صعوبة تصليحه بره التوكيل

[alisleman]

وغير كده بسمع ال mmt ناس مش عاجبها ده غير صعوبة تصليحه بره التوكيل[/QUOTE]


سيبك من ام ام تى وهات مانيوال او اتوماتيك عادى
على فكرة انا بموت فى حاجة اسمها جولف
بس لما تيجى تشترى تجيب اللى بتحبه البلد

[Ahmed Hassan]

وغير كده بسمع ال mmt ناس مش عاجبها ده غير صعوبة تصليحه بره التوكيل

سيبك من ام ام تى وهات مانيوال او اتوماتيك عادى
على فكرة انا بموت فى حاجة اسمها جولف
بس لما تيجى تشترى تجيب اللى بتحبه البلد[/QUOTE]

مبدأ غلط اني اشتري لنفسي اللي بتحبه البلد!! بجد حاجه غريبه فعلا!! اشتري العربيه على ذوق اللي هيشتريها مني