jتويوتا القطاميه (الدائرى) - مزبله!!

[faroukahafeez]

بيشرب ليمونادة اعصابة محروقة

بيشرب ليمون من امبارح :b4_592:
ربنا يستر عليه وتكون حاجة بسيطة ان شاء الله

[Sharky]

فى انتظار معرفة حجم المشكلة لإنى رايح المفروض اعمل صيانة ال25 الف عندهم قريبا !!!

[KiNgMaX]

إن شاء الله الموضوع هيبان قبل ماتروح الصيانة يا استاذ شاركى بس انت حاول تاخر نفسك شوية

[Nile Heart]

بما ان الناس بدأت تتريق

ومافيش اى واحد بيحاول يلتمس عذر .. مثلآ اكون تعبان.. او اخدت بنتى للدكتور.. مثلآ يعنى.. فاكتب اللى حصل باختصار

اللى حصل ان وديت العربيه لصيانه ال 40 الف الساعه 9 صباحا حسب الميعاد واستلموها و ان مشيت ورحت شغلى بعد ما سبتلهم نمرة تليفونى (غلطتى انى ماسألتش بيقفلوا امتى)
لما جت الساعه 4 وماتصلوش بعتت مراتى تسأل وراحت قالولها العربيه جاهزه

وصلت انا هناك الساعه 5:50 بعد ميعاد العمل ب 20 ق ولحد هنا عادى وعرفت انى خلاص مش هاستلمها النهارده.. عادى..
لحد ما سألت ليه مااتصلتوش بيا؟ وكانت الردود الأتيه من اربعه اشخاص, رجلين وسيدتين:
- ممكن يكون اتصل بحضرتك وانت ماردتش! (طبعا ماهو الزبون دايما كداب)
-المدام جت وخدت العربيه بنفسها!! (اصل ايصال الأستلام اللى فى ايدى ده بيتوزع مع الشيبسى)
-حضرتك كان لازم تسأل احنا بنخلص امتى (واروح اطمن انهم وصلوا بيوتهم كمان)
-الباب والمدخل مكتوب عليهم مواعيد العمل! (ولا ده ولا ده عليهم اى حاجه, وصورتهم بالموبيل وبعتهم لتويوتا اليابان امبارح بالليل)
-احنا بناخد رقم التليفون عشان الطوارىء فقط!!!

الخلاصه.. موظفين معندهم ادنى فكره عن معاملة العميل.. والنهارده الصبح مديرهم سمع مالذ وطاب ومهندس الأستهبال اللى ادعى انه قال امراتى انهم بيمشوا الساعه 5 اتهزق زى اى طالب فاشل عندى فى الجامعه

[faroukahafeez]

الف حمد على السلامة

محدش بيتريق ولا حاجة لا سمح الله
انت بس فتحت الموضوع وقولت التفاصيل فى خلال ساعات
وفيه كذا حد كان عايز يروح تويوتا التجمع علشان يعمل صيانة ومستنى يعرف اية اللى حاصل معاك


اللى حصل معاك يضايق جداً وخاصة فى كذبهم وانهم بيقولوا اى كلام فى اى كلام وانا لومكانك هعمل اكثر من كدة

عامة انا عمرى ما سبت العربية فى اى توكيل ومشيت
بفضى وقت ليوم الصيانة وبفضل اقعد لحد ما استلم العربية وانا هناك

[kareemhisham]

مش تريقة ولا حاجة بس هى دعابة مش اكتر

طبعا الحضرتك عملته من تهزيىء فيهم دة الصح ,, و طبعا البرروا الموضوع دول مش فاهمين حاجة

و الف شكر ان حضرتك قولت عشان الناس تاخد بالها و هى بتعمل الصيانة ,,

[أبو عبدالله]

انا كنت هناك بركب الكاسيت لانى استلمتها من غير ميكون راكب فلقيت واحد بيعمل صيانة الالف لليارس فانا اول ماجيت كان هو خلاص خلص وماشى فوجئت بعد ساعة لقيته رجع تانى ومتنرفز جامد جدا قلهم مشيت 20 كيلو والاقى الموتور سخن اوى فتحت الكبوت ملقتشى غطاء الردياتير فى البيه اللى عمل صيانة للعربيه نسى يحط الغطاء اقعدو يهدوا خالص وبعدين استلموا العربيه منه وبعدين كانوا عاوزين يحاسبوا على صيانة + ماء اخضر بس الصراحة معرفشى المبلغ كان كام لان الراجل بعد كدة معرفتوش لانه اتحول تانى وهاج عليهم وبهدلهم وقالهم دة سبب الحمار اللى عندكم قالولو وانتا كمان مسئول انك المفروض تستلم مننا
قعدو فى خناقات لغاية مارسيت ان دفع تمن المياة فقط

بصراحه غلطان والله
انا لو منه والله لو كانوا وقفوا كلهم على راسهم ما كنت دافع حاجه
ده المفروض كان ولع في التوكيل اساس
مش كفاية كان ممكن يطير وش السلندر بتاع العربيه
بجد غلطان والله انه دفعلهم حاجه
حسبي الله ونعم الوكيل

[Nile Heart]

بجد الفارق خرافى بينهم وبين العباسيه فى موضوع المعامله والأعتناء بالتفاصيل

الواحد كان فرحان انهم فاضيين وممكن تحجز تانى يوم!

على فكره انا كنت باعمل صيانه ال 40 الدوريه للمره 4... العربيه عامله 160 الف ودى دايما باعملها فى التوكيل

مش عارف الصيانه الجايه عاهمل ايه.. بس دى لسه فيها سنه, يحلها الحلاْل

[alisleman]

بس حضرتك صدقنى انا روحت مرة قولت خلاص شكرا على كدة ومش هروحة تانى مشكلة حصلت معايا ومشكلة مع واحد كان بيعمل صيانة وفى واحدة مشيت بالعربيه ورجعت تانى بس مش عارف ليه التلات حاجات دى حصلت فى خلال ساعتين يبقى عاوز ايه بعد كدة وبقيت اروح ابو رواش فرق السماء مكنتش مصدق ان دة تويوتا من اللى شوفته من القطامية

[kareemhisham]

الغريبة ان توكيل العباسية لما دخلته كان عامل زاى المستشفى ,,

ناس فى كل حتة و ناس رايحة و جاية ,,

و بعدين اروح اسأل واحد فى المبيعات على حاجة ,, لأتوه بيتكام بالاطة اوى و بقوله على الكورولا مانيوال 2009 راح قايلى مفيش و مش هايجى منها تانى و لعب فى الكمبيوتر القدامه شوية و قالى مش موجودة فى اى فرع تانى و الحجز 50 الف فقط لا غير ,,

روحت توكيل القطامية ,, فبسأل على العربية جالى واحد بيتكلم بأدب و احترام و بيقولى العربية موجودة و استلام فى خلال شهر بالكتير و ودانى عشان اتفرج على الالوان ,,

طبعا الصيانة حاجة تانية بس انا بتكلم على المبيعات ,, استفزنى اوى موضوع انه هنا يقولى مش موجودة خالص و مش هتيجى و التانى يقولى موجودة و اتفضل احجز

[abo samra]

بجد الفارق خرافى بينهم وبين العباسيه فى موضوع المعامله والأعتناء بالتفاصيل

الواحد كان فرحان انهم فاضيين وممكن تحجز تانى يوم!

على فكره انا كنت باعمل صيانه ال 40 الدوريه للمره 4... العربيه عامله 160 الف ودى دايما باعملها فى التوكيل

مش عارف الصيانه الجايه عاهمل ايه.. بس دى لسه فيها سنه, يحلها الحلاْل

اساسا معظم العاملين بفرع التجمع الخامس كانوا بيعملوا فى العباسيه -ان لم يكن كلهم-
اكيد فيه بعض الاخطاء منهم ولكن ده لا يمنع انهم افضل من العباسيه فى المعامله والالتزام بالمواعيد والنظام
تحياتى

[sadany18]

بصوا يجماعه اي توكيل فمصر فيه الكويس و الوحش ..بس انا شايف ان احنا اصحاب العربيه ال فل ضمان لما نعمل حاجه احنا مش راضين عنها نبقى 100*100 غلطانين .. المفروض اني بشتري الضمان عشان اريح نفسي وانا حتى لو بفهم فالعربيه و الميكانيكا انا مش مطالب اني اراجع على التوكيل (و الا عملها صيانه تحت البيت بقى)
انا ليا رجـــــــاء خاص من كل مالكي التويوتا ضمان الوكيل :-
1- اي مشكله تحصل مع اي مالك يسجلها في الشكاوى فى إدارة تويوتا 16550 .
2- يبعت المشكله على المنتدى علشان بقى الاعضاء تبقى عارفه المشكله و ايه الحصل .

اما بقى فى حالة عدم اهتمام الاداره فى مصر ف انا رايي ان احنا نبقى مجموعه واحده بعدد كبير نرفع الشكوى لتويوتا اليابان لان المفروض ان احنا ال على حق .
يمكن نقدر نحسن وضع وكيل احنا غير راضين عنه .

[KiNgMaX]

يا فندم مفيش تريقة ولا حاجة هو بجد هزار بس على اساس ان كلنا اخوة فى المنتدى واتمنى متكونش زعلان والحمد لله ان موضوع التوكيل جه على أد كده

[AhmedBayoumi]

انا معايا كورولا 2009 هاي لاين
لما إستلمتها كان في مشكلة في الطنابير الأمامية بتصفر مع نهاية الفرملة أو مع إستعمال الفرامل على السراعات البطيئة وفضلت موجودة لحد 3000 كم نعدين روحت فرع القطمية ،كشفوا عليها وغيرولي الطنابير الأمامية والتيل من غير مشاكل
هما توكيل محترم بتعامل معاهم من 1995

[ashraf229]

غير كل الأعضاء المحترمين انا مختلف معاهم في الراي و شايف ان الموقف ما يستحقش كل العصبية دي..........

اولا من الصبح لحد ما المدام راحت ما فكرتش تسأل عملوا ايه في عربيتك!!!
ومن الطبيعي لما الواحد بيكون ناوي يمشي و يسيب العربية عالأقل يسأل هيه قدامها أد ايه؟؟؟مش يسيبها لغاية الساعة 4الساع 5.50 طيب ما الطبيعي انها تكون خلصت!!! و يمكن يا سيدي يكونوا اتصلوا و كان غير متاح!! الله أعلم

غير كده لما المدام راحت وقالولها العربية جاهزة من المنطقي انكم تعرفوا أخر معاد للاستلام الساعة كام!!!ومن المنطقي انهم يقولكم و يحذروكم انهم بيقفولوا امتى!!!حتى لو انتم ما سألتوش

يعني الغلط مشترك من عدم احترافيتهم في التعامل و منكم في عدم الاهتمام ...........(دي وجهة نظر أخ وكل واحد حر في رأيه).......

غير كده اعتقد انك كان ممكن اضعف الايمان تأخد نمرة التوكيل و تطلبهم تسأل أو مهندس الصيانة اللي معاه العربية علشان لو غلط و ما كلمكش تكلمه انته طالما انك ناوي تمشي و تغيب!!!و ده اسهل بكتير من انك تبعت المدام تسأل!!!!

و من الواضح من كلام حضرتك انك بتدرس في الجامعة (((فمفيش داعي لاستخدام الوصف و اللفظ اللي في عنوان الموضوع..حضرتك قدوة لطلابك ولناس كتير)))..........

مع كل احترام و تقدير لك و لكل الأعضاء بس ده نقاش حر و كل واحد له رأيه........

((على فكرة انا عايش في السعودية أصلا يعني محدش يقعد يقول ده اصله شغال في تويوتا و الكلام ده لأني أصلا مش بأعفيهم من جزء من الخطأ))

و شكرا