برجاء المساعدة اخوانى فى المنتدى

[waelabdualla]

سلام عليكم اخوانى
انا الان بصدد شراء سيارة انشاء الله
انا كنت ناوى اجيب سيريون اوتوماتيك 1300 و ادفع 70000 و اقسط ال15 الف الباقيين وكنت مقتنع جدا بس واحد صاحبى اقنعنى ان العربية دى صغيرة و الاحسن اجيب عربية بشنطة كمان مع العلم انى جديد خالص فى السواقة ولسه متعلم فقالى انت هتبهدل العربية الجديدة
هات عربية مستعملة كام شهر لما تبقى كويس غيرها
انا بصراحة قلت مش مشكلة اجيب عربية مستعملة تكون مش رخيصة علشان متتعبنييش بقى وتطلع عينى وكده
فقررت اجيب عربية اوبل استرا موديل 2005 ا واوبل كورسا 2005 لانها عجبانى وفى حدود الستينات بس قريت على المنتدى هنا الناس بتشتكى منها
انا مش عارف بقى
رسونى على حال وساعدونى
اجيب جديد و انا لسه متعلم سواقة و لا هتتبهدل معايا ولو اجيب اجيب ايه فى حدود اللى معايا
و لو مستعمل اجيب ايه يكون كويس و محترم وموديل ميقلش عن 2004
استرا ولا كورسا ولا ايه و لا سريون 2007 مثلا

[rockana]

تعالالي يا وائل
انت بتحكيلي قصه حياتى بقالى سنه فيها
مع فرق بسيط انى كان معايا 131 قعدت معايا حوالى 3 شهور
اولا لا استرا ولا كورسا
قطع غيار مش رخيصه + انهم مش تقفيل بلادهم + وكيل مش كويس لو هاتكمل صياناتك هناك
ثانيا بال 70000 لو عاوز تجيب حاجه محترمه مستعمله ماتفكرش فى غير كورولا 2002- 2003 - 2004
بس ممكن تحتاج تزود 4000 على ال 70000
اما بالنسبه للسيريون - اختياري انا النهائي ... لاني حجزتها و لله الحمد و كنت المفروض استلمها امبارح لولا عدم وجود اللون الفضي
العربيه اوسع من اليارس و الاكسنت من جوه العربيه - قطع غيارها ارخص حاجه فى الياباني و معمر (دا كلام الاعضاء لانى لسه مجربتش) - لو انت مش محتاج الشنطه لمدة 6 سنين مثلا - يعنى زي حالاتي - متجوز جديد و معندكش اولاد لسه - يبقى روح معرض دايهاتسو و اركب العربيه و بعدها قول اللى نفسك فيه
على فكره الوكيل عامل تقسيط مباشر ب 8% فى السنه لو عاوز تحسبها
85000 - 70000 = 15000
15000 × 0.08 × عدد السنين للقسط = ××
(××+15000) ÷ عدد الشهور = القسط الشهري


15000 × 0.08 × 3 = 3600
18600 ÷ 36 = 517 جنيه شهريا لمدة 3 سنين

[bmya]

بص يا استاذ وليد هي فعلا مشكله انك تكون لسه مش متمكن وتجيب عربيه جديده تتعلم فيها خساره بصراحه
بس برده حرام انك تجيب عربيه ب 70000 عشان تتعلم
قدامك حل من اتنين
اما انك تجيب عربيه صغيره جداا تبهدلها معاك وتتعلم فيها وتطحن معاك(ماروتي مثلا مستعمله 127 128 كده يعني) بحيث انك لما تبعها مش تخسرش فيها كتير وكمان عشان لو لا قدر الله اتخبطت او حصلها اي حاجه وانت لسه بتتعلم تبقي سهل تتصلح ورخيصه
او انك تتعلم كويس اوي في مدرسه او حد من اصحابك يعلمك وبعدين تجيب عربيه نضيفه وجديده تحافظه عليها
لكن حتي لو حضرتك جبت كورولا 2001 2002 وهتتعلم عليها برده حساره في البهدله
بالنسبه لحيرتك في السيريون ملكش دعوه بكلام الناس العربيه فعلا شكلها من بره زي(المطب الصناعي) لكن اركبها من جوه وشوف وسعها وقعدتها المريحه واحكم عليها انت لان انت اللي هتركب
اصحابي بيقعدوا يتريقوا ويقولولي عربيه من غير شنطه ولا كابوت واول ما ركبوها مبقوش عارفين هي دي نفس العربيه ولا عربيه تانيه
ولما كنت ماشي 170 علي التالت وكنا 3 في العربيه مبقوش مصدقين
امبارح كان معايا واحد صحبي معاه لانسر كريستاله (كانت معايا قبل السيريون) وعمال يتفشخر انه جايب علي التالت 135 هههههههههه روحت رزعه 170 علي التالت ومبقاش مصدق للاسف الناس هنا في مصر بتقيس جوده العربيه (بالمتر) كل ما العربيه كبرت تبقي عربيه كفاااااااائه

[waelabdualla]

بجد انا متشكر ليكم جدا يعنى انت رايكم اتعلم كويس و اجيب جديد و اتوكل على الله سيريون وبلا خالص الاسترا و الكورسا طيب انا شوفت على كار 100% عربيات سيريون معروضه موديل 2008 ب70 الف و كمان شفت عربيه بيجو 307 موديل 2007 ب77 ايه رايكم و لا جديد وخلاص

[waelabdualla]

ته نسيت اقولكم انا متجوز ومعايا الحمد لله ولد وبنت صغيرين

[bmya]

بص يا استاذ وائل مينفعش تقارن السيريون ب 307 ولا استرا
عشان كده بتظم السيريون
انا لماا اشتريت عربيتي كنت جايبها تقريبا ب 82000 اتوماتيك وكانت دماغي ساعتها بتلعب اني اجيب اوبل فيكترا او بي ام او اوكتافيا وحاجات تانيه كتير مستعمله بالسعر ده بس انا مبحبش اركب عربيه مستعمله نظرا لاني ليه طريقه سواقه معينه وحاجات كده احب اعملها في عربيتي وعشان كده سيلت من دماغي خااالص اني اجيب مستعمل
وعلي النقيض تلاقي ناس متحبش تركب زيرو عشان متخسرش فيه !!
حضرتك بقه شوف نظرتك الاول مش فارق معاك جديد او مستعمل ولا فارق
تاني حاجه حضرتك ماشاء الله عندك بنت و ولد (ربنا يباركلك فيهم)
شوف احتياجاتك السيريون هتقضيها ولا لاء ؟
وبعدين قرر
يعني لو هتقارن 307 ب سيريون يبقي اكيييييييييد 307(السيريون هتبقي ميزه انها زيرو وقطع غيارها اعتقد متوفره اكتر وارخص من 307) لكن اي حاجه تانيه هتبقي 307 ونفس الكلام مع الاسترا (عربيه الماني جمده وتقيله وكمان سيدان بس قطع غيار ومشاكل الالماني اللي عايز صيانه توكيل علي طول واللي بيتعب مع الشعب المصري بسبب الميكانيكي اللي بيحب يفتي
عموما ربنا يوفققك في العربيه اللي فيها خير ان شاء الله
وممكن تدخل قسم الاوبل والبيجو وتشوف عيوب الاسترا و ال307

[rockana]

بص يا وائل
فكره جامده موضوع مدرسه تعليم سواقه
فى واحد فى المهندسين 6 مرات عملى ب 120 جنيه - بيلف بيك 45 دقيقه فى المره الواحده و تطلع كباري و الكلام الحلو ده
ممكن تعمل الكورس ده مرتين تكون اتعلمت حلو
و بعدها سيبك من السيريون لانك اكيد هاتحتاج الشنطه كتير فى السنين اللى جايه ان شاء الله
و فكر فى الكورولا الاوتوماتيك 2003 او 02 او 04
قطع غيار متوفره - مش غاليه اوي - كتير بيفهمو فيها
و فوق ده كله اوتوماتيك يعني مش هاتشغل بالك بالغيارات و الدبرياج و الكلام الفاضي ده كله
و كمان مش معنى انك جديد فى السواقه انك هاتهلك العربيه
و اولا و اخيرا استخير ربنا

نصيحه غريبه شويه
طول مانت فى مصر ابعد عن الاوروبى المستعمل و غنيله

[waelabdualla]

بجد انتم ناس هايلةوالله وانا مش عارف اشكركم ازاىعل ىسرعة الاستجابة و صدق النصيحة
بالنسبة للاستر 2005 بصراحة شكلها عجبنى قوى و امكانيتها كما نسعرها مش غالى يعنى بنتكلم فى 60 الف وبصراحة كمان انا بحب قوى الهاتش باك الجديدة بتاعها ونفسى فيها بس دخلت فى المنتدى هنا الناس خوفونى منها ولقيتهم بيقولو انها برزيلى وتقفيل مصرى و بيجيلها برومة و بتجيب وش سلندر وحجات عجيبة
بالنسبة للبيجو 307 انا بصراحة بحب شكلها وامكانتها
ولا حظو يا جماعة انا معنديش خبرة خالص
ومتفرقش معايا قوى موضوع الشنطة بالعكس انا بحب الهاتش باك
انا فعلا خدت درس فى مدرسة سواقة بس ناوى اعمل بنصيحتكم واخد درس ده ب120 جنيه زى ما حضرتك تفضلتم وقولتولى اخده مرتين كده وانشاء الله يضبط معايا
بعدها بقى اجيب ايه مستعمل نظيف زى الاسترا و لا دى وحشة و لا 307 و لا سيريون موديل مثلا 2008
ول ااتوكل على الله واحط 70 الف واجيب جديد
ان امش عايز اركب عربية موديل قبل 2005 فايه رايكم
انا معاكم ومع نصيحتكم انا بصراحة معنديش خبرة خالص و عايز اجيب عربية احط المفتاح تدور وخلاص

[rockana]

مش بقولك يا وائل
ان بتحكي قصة حياتي
اولا انت لازم تفكر فى موضوع الشنطه لان عندك اولاد و احتياجاتهم مش هاتبقى قليله السنين اللى جايه
و على فكره انا حابب شكل ال 307 جدا -تحس انها بترضى غرور اللى يركبها - اما عن قطع غيار و صيانه - فا دور بنفسك عليهم على المنتدي لانى مفكرتش اجبها قبل كدا
اخيرا موضوع تحط المفتاح فى العربيه تدور و خلاص
فا دا للاسف - يا اما عربيه جديده ( و دا الحل اللى انا استقريت عليه ) لانى عاوز نفس الشيئ
يا اما تشوف حاجه مستعمله نضيف اوي و متكونش عامله اكتر من 50000 كيلو علشان تقعد معاك سنتين تلاته قبل ماتبدأ تروح لميكانيكي .
و ادخل على كونتكت كارز و شوف المستعمل عليه بس هاتقلل 3000 على الاقل من الثمن المعروض

[GMakram]

ولما كنت ماشي 170 علي التالت وكنا 3 في العربيه مبقوش مصدقين
امبارح كان معايا واحد صحبي معاه لانسر كريستاله (كانت معايا قبل السيريون) وعمال يتفشخر انه جايب علي التالت 135 هههههههههه روحت رزعه 170 علي التالت ومبقاش مصدق للاسف الناس هنا في مصر بتقيس جوده العربيه (بالمتر) كل ما العربيه كبرت تبقي عربيه كفاااااااائه

اموووووووووووووووت واعرف انت ازاى عربيتك كدا؟؟؟؟؟؟؟؟؟؟؟؟؟؟ ده انا على طريق العين السخنه كنت جايب 160 على الاوفر درايف وجايب اخر الدواسه,لما بقرأ تعليقاتك دى بحس انى راكب عربيه غير اللى معاك عقدتنى يا عم

[rockana]

اموووووووووووووووت واعرف انت ازاى عربيتك كدا؟؟؟؟؟؟؟؟؟؟؟؟؟؟ ده انا على طريق العين السخنه كنت جايب 160 على الاوفر درايف وجايب اخر الدواسه,لما بقرأ تعليقاتك دى بحس انى راكب عربيه غير اللى معاك عقدتنى يا عم

يبدو اننا هانعتقل شريف لمدين ساعتين فى السيريون بتاعته نعرف هو بيعمل ايه
اوع ياشريف تكون بتلعب نييد فور سبيد و مسمي عربيتك سيريون و بتشتغلنا

[MoToRiZeR]

انا السيريون كانت سيارتي الأولي برضه .. بص موضوع إن هتجيب عربية تخبطها الأول دي مش بقتنع بيه بصراحة لأن محدش بيجيب عربية عشان يخبطها! و ده سبب وجود الناس الإنتحاريين اللي بنشوفهم في الشارع "يا سيدي تتخبط .. منا جايبها عشان تتخبط براحتها!" .

تعلم السواقة بحذر و إن شاء الله مش هيحصل حاجة .. و الفلوس اللي هتصرفها في تصليح عربية مستعملة و الفلوس اللي هتخسرها في البيع و الشراء أدفعهم تأمين في شركة محترمة زي كونتاكت مثلاَ و إركب عربية زيرو .

[waelabdualla]

اقنعتتنى بارك الله فيك

[waelabdualla]

فعلا الجديد افضل و انا ونصيبى بس انتم رايكم السريون 1300 تكون كويسة صح يعنى مافيش حاجة افضل ممكن اعملها
واشكركم من كل قلبى وربنا يبارك فيكم وانشاء الله فاضل بس اعمل استخارة و ربنا يكرم و اشكرم مرة تانية على ذوقكم

[M.Mosaad]

اموووووووووووووووت واعرف انت ازاى عربيتك كدا؟؟؟؟؟؟؟؟؟؟؟؟؟؟ ده انا على طريق العين السخنه كنت جايب 160 على الاوفر درايف وجايب اخر الدواسه,لما بقرأ تعليقاتك دى بحس انى راكب عربيه غير اللى معاك عقدتنى يا عم:_alshmokh08[1]:

بص هو كدة كدة المانيوال بيجيب سرعه اعلي من الاتوماتيك
بس برضة انا جبت بيها حوالي 170 علي طريق العين السخنه و عربيتي اوتوماتيك ممكن يكون انت كنت في مطلع عالي