استكمالا لموضوع تركيب فلتر هواء اسبور للسيريون (للمهتمين يعني )

[bmya]

السلام عليكم ورحمه الله وبركاته
بصوا يا جماعه دلوقتي انا ان شاء الله فاضلي 100 كيلو على صيانه ال 20 الف
طبعا صيانه ال20 دي فيها بند تغيير فلتر الهواء
وبما اني مستخسر في هذا الفلتر 160 ده غير الضريبه ومصنعيه التركيب يعني 200 جنيه مثلا
فقلت اجيب فلتر اسبور احسن لعده اسباب

اولا الفلتر الاسبور مش بيحتاج يتغير غير على فترات طوييييييييله
ثانيا سهل التنضيف وبيتغسل ويبقى زي الجديد تاني مش زي الخيشه اللي حاطينها دي
ثالثا طبعا الاداء الافضل والصوت الرياضي الجامد قوي (الكلام ده بناءا على كلام واحد معانا هنا مركب فلتر اسبور في الخباثه )

ولهذه الاسباب الموضوع شعشع من جديد في دماغي وناوي عليه ان شاء الله وعشان كده سخنت وروحت نازل من شويه وجايب العده وفاتح الكابوت وواخد نفس عميييق وروحت شايل الفلتر الاصلي بغطاءه وسميت الله وروتح فاكك المسامير بتاعت العلبه وهوووووووووووب لقيت الشكل بقه كده بعد ما شيلت علبه الفلتر كلهااا بحالها بمالها







دي صوره البوابه اللي راكب عليها علبه الفلتر واللي بتسحب الهواء وتدخله للموتور
واللي ان شاء الله هنركب عليها الفلتر الاسبور عن طريق ماسوره استانلس او كاوتش (افضل انها كاوتش وهقول السبب قدام )طرف منها راكب على البوابه وطرف تاني في اخره الفلتر الاسبوووورر
وكده نبقى عدينا اول مشكله (بالنسبه ليه انا) وهي الخوف والرهبه من المجهول
قصدي من فك العلبه بتاعت الفلتر

نيجي لتاني مشكله كنت هتجنن منها وهي حساس الهوااء اللي بيقيس كميه الهواء الداخل للموتور عشان يظبط كميه البنزين والاحتراق وكده وده انا مكونتش عارف هو فين بس انا سميت الله وقلت يا انا يا هو وفوجئت انه موجود وقاعد في جمب وغلبان خاالص بس انا اللي مكونتش مركز زماان فماشوفتوش
ودي صوره الحساس الاموووووور بعد ما طلعته من جحره




طيب الحساس الامورده فين جحره بققققه ؟؟

ادي صوره لجحر الحساس الفتحه اللي عليها السهم دي طبعا الصوره دي للفتحه من جوه والحساس زي ما شوفناه في الصوره التانيه له بوزر او سن وهوراكب في العلبه من بره وبوزو ده داخل لجوه العلبه عن طريق الفتحه دي
ادي الصوره




طيب هنركبه ازاي الامور ده مهو لازم يركب قبل البوابه عشان يقيس كميه الهواء الدالخه للموتور
طبع هنركبه في الماسوره اللي هنركبها اللي انا قلت انها تبقى كاوتش ليه بقه اولا عشان العربيه اصلا بتبقه نازله كاوتش والكاوتش مش بيسخن زي الاستانلس فمش هتسخن الهواء اللي داخل للموتور فيكون الاداء افضل
ثانيا عشن الحساس لما نيجي نركبه يبقى سهل علينا نفتح له فتحه على مقاسه في الكاوتش عكس الاستانلس هتبقى القطع فيها صعب ده غير انها كمان مكلفه وغاليه الا اذا بقه جبت ماسوره استانلس جاهزه وفيها مكان للحساس على طول (زي ما صاحبنا ما عمل كده في الخباثه برده )


طيب ايه تاني هنلاقيه معانا واحنا بنشيل علبه الفلتر
هنلاقي فيشتين راكبين على حرف العلبه فقط يعني مش متوصلين بالعلبه وملهومش لازمه معانا غير انهم متثبتين فقط على العلبه دي
دي صوره الفيشه الاولى




ودي متثبته كبس او ضغط على علبه الفلتر بس سبحان الله لما فكيتها من العلبه لقيت انهم عاملين فيها مكان لمسامير زي ميكونوا عارفين ان الناس هتركب فلتر هوا اسبور فبيسهلوا عليهم الموضوع وعاملين حسابهم في اماكن المسامير


ودي صوره الفيشه التانيه




ودي زي ما شايفين متثبته بمسماريين على حرف العلبه برده

طيب هنعمل فيهم ايه الفيشتين دول ونقبتهم فييييين

هنعمل زي الراجل الامور ده اللي في الصوره دي




السهم رقم 1 ده الحساس بتاع الهواء وهو راكب
السهم 2 بيشاور على الحديده اللي حطينها عشان نثبت الفيشتين
السهم 3 بيشاو على الفيشه الاولى اللي كانت متثبته كبس وفيها مكان للمسامير
السهم 4 بيشاور على الفيشه التانيه


وهتبقى دي الصةره النهائيه ان شاء الله زي اللي في الصوره اللي فوق
حاجه بسيطه ايه رأيكم بقه
اي تعليق او استفسار معاكم عشان ننقاش بس التركيب قبل ما اتوكل على الله واركبه

[medo_sirion]

معلش ياشريف لما افوق بس من عربيتى اللى مرمية تحت البيت دية
هقولك كدة على كذا حاجة هتفيدك وربنا يوفئق وبلاش تجيب فلتر من التوكيل

[bmya]

ميدو اما مضايقك عشان بجد بس يبني ان شاء الله بسيطه بس ابقه عرفنا ايه اللي حصل معاك

[bmya]

محدش يعرف الكيت ده يتباع فين هنا في مصر
دي صوره الكيت الكامل لفتر الاسبور k & n
للسيريون

http://www.knfilters.com/images/l/57-0669.jpg

[bmya]

يااااااااه
الواحد مش ملاحق على الردود الكتير دي كالعاده يعني
مش عارف اقول ....... ما علينا
يظهر ان انا اللي غلطان
عموما يا جماعه خلاص انا نويت باذن الله تعالى هركب الفلتر
بس من غير ما اقول اي تفاصيل طالما ه مش هتفيد اي حد
وعلى فكره انا هخلع من القسم ده خالص
خليني هناك في ميتسوبيشي ونيسان والاجتماعي على الاقل في ناس بترود
سلام عليكم

[medo_sirion]

يااااااااه
الواحد مش ملاحق على الردود الكتير دي كالعاده يعني
مش عارف اقول ....... ما علينا
يظهر ان انا اللي غلطان
عموما يا جماعه خلاص انا نويت باذن الله تعالى هركب الفلتر
بس من غير ما اقول اي تفاصيل طالما ه مش هتفيد اي حد
وعلى فكره انا هخلع من القسم ده خالص
خليني هناك في ميتسوبيشي ونيسان والاجتماعي على الاقل في ناس بترود
سلام عليكم

متزعلش نفسك ياشريف لان الموضوع دة مش اول مرة
دة بيحصل معانا كلنا
غير كدة تعالى نحسبها كام واحد فينا مهتم بموضوع الفلتر
او بمعنى كام واحد هيغير فلتر العربية ويركب فلتر اسبور
انت قلتها فى الاول للمهتمين فقط
ودية النتيجة ولا اى حد غيرنا خالص
لان انا شايف الموضوع دة موضوع شبابى مش اكتر
مع العلم انة مفيد جدا فى اداءالعربية
متزعلش نفسك تانى ومنقدرش على بعدك

[bmya]

با ميدو الناس هنا مكبره دماغها قوي
على فكره مش شرط موضوعي
بص على اي موضوع كده شوف كام رد ولا شوف اصلا كام موضوع له لازمه او مفيد او جديد مفيش
فأنا قررت اكبر دماغي زي كل الناس هدخل ابص وامشي وكل واحد ينفع نفسه بقه وخلاص على كده المهم اخبار عربيتك ايه يا ميدو

[beggo]

مين دول اللى مش مهتمين؟!! بلعكس ده موضوع فى منتهى الأهميه و أحييك على مجهودك دا انا كنت لسه عايز أسألك عملتو فين و إتكلف كام ؟!

[medo_sirion]

مين دول اللى مش مهتمين؟!! بلعكس ده موضوع فى منتهى الأهميه و أحييك على مجهودك دا انا كنت لسه عايز أسألك عملتو فين و إتكلف كام ؟!

يااااااااااااااااااااااااااااااااااااااااااااااااا ااااااااااااااه حضرتك رجعت تانى
كنت فين الغيبة دية الطويلة
على العموم حمدالله على السلامة

وقولنا اخر اخبار العربية مع حضرتك اية
وهل فى جديد بالنسبة للتعديلات

[Ahmed.Ali]

انا معييش السيريون بس مهتم يالا شد حيلك و ركب الفلتر الجديد و بالصور طبعا

انا مفهتش هو حساس الاكسوجين متوصل بايييه ؟؟

[slim_shika]

أنا أول مرة آخد بالي من الموضوع ده.

يا قلبك يا شريف.. إنت كنت لسه من كام شهر مقلق تركب انذار دلوقتي بتفك العمه وشكلك هتركب فلتر بنفسك, لأ من الآخر يعني..

متضايقش نفسك يا عم شريف, أكيد في حد هايتسفاد جدا من الموضوع ده لما ييجي يركب فلتر وهاييجي يسأل ساعتها هيشوف موضوعك, أنا واحد من الناس اللي كبرت دماغي من الفلتر عشان محدش فاهم حاجة في العربية ولا حد عارف سنسور الهوا بتاعها فين, بس بعد موضوعك أنا ناوي ان شاء الله أعمل زيك.

شريف باشا صاحب الحاصريات..

[slim_shika]

آه صحيح إنت ناوي تركب فلتر نوعه إيه؟؟ وهتركب فلتر لتزويد الأداء ولا للصوت؟؟

[توفيق طة]

با ميدو الناس هنا مكبره دماغها قوي
على فكره مش شرط موضوعي
بص على اي موضوع كده شوف كام رد ولا شوف اصلا كام موضوع له لازمه او مفيد او جديد مفيش
فأنا قررت اكبر دماغي زي كل الناس هدخل ابص وامشي وكل واحد ينفع نفسه بقه وخلاص على كده المهم اخبار عربيتك ايه يا ميدو

أخى/شريف..

بدون تعليق؟؟؟؟؟؟؟؟؟؟؟؟؟؟؟؟؟؟

تحيـــــــــــاتى

[rockana]

ايه يا عم شريف بس
زعلان مننا ليه
طيب انا لسه كوتكوت ولسه ماكملتش ال 10000 و كمان مبحبش الصوت العالي للعربيه فاقولت اتفرج للاخر و بعدها اسألك

[askoda]

I said from a couple of monthes that we can get the Sporty filters from hamada Ghozy
and also the Strut Bars front
and no one seemed interested.