هو الكلام دا عادي في التريوس ؟

[mohammedfat80]

بقالي فتره ملاحظ إن العربيه مفككه وأي حفره بتسمع في العربيه كلها رغم إني لسه مربط العفشة وأي حصواية في الأرض بحس بيها في الدركسيون و لو مشيت علي طريق مش مسفلت الاقي إيدي نملت من كتر الرجرجة اللي في الطارة (تريوس 2009)

بيقولولي دا عادي في العربيات العالية بس دي حاجة غير مريحة إطلاقاً

عموماً أنا حجزت يوم السبت الجاي إن شاء الله بس ياريت حد يقولي مركز العبور أروحلو منين لأني دايماً بروح أبو رواش
ورمضان كريم

[Alios]

بقالي فتره ملاحظ إن العربيه مفككه وأي حفره بتسمع في العربيه كلها رغم إني لسه مربط العفشة وأي حصواية في الأرض بحس بيها في الدركسيون و لو مشيت علي طريق مش مسفلت الاقي إيدي نملت من كتر الرجرجة اللي في الطارة (تريوس 2009)

بيقولولي دا عادي في العربيات العالية بس دي حاجة غير مريحة إطلاقاً

عموماً أنا حجزت يوم السبت الجاي إن شاء الله بس ياريت حد يقولي مركز العبور أروحلو منين لأني دايماً بروح أبو رواش
ورمضان كريم

دا فعلاً عادي في العربيات العالية ....

لأنها ببساطة عالية عن الأرض ......

بس الموضوع مش مقلق و لا حاجة ........ لان العربية بالرغم من كدا ثابتة جداً جداً ....

انا برده قلقت أول ما جبتها ..... بس لقيت ان الموضوع عادي جداً و مفيش حاجة حصلت للعربية الحمد لله برغم اني اكلت حفر بيها للصبح و على 120 ... :)

الموضوع دا مش في التريوس بس ..... في الجيب كمان و التويوتا اللاند كروزر ... سقتهم قبل كدا و حسيت بيهم نفس احساس التريوس ...... :)

اما موضوع ان الطريق مش مسفلت و الرجرجة ... فدا في اي عربية ........ العيب من الطريق مش من العربية ..... :)

ربنا يكفيك شرها و يبارك لك فيها :)

[Imhotep]

حتة الاحساس بالطوب و اى حفر فى الطريق ده بسبب العفشة الناشفة اللى بتميز النوع ده من العربيات..... لكن رغم كده قدرة العربية على التعامل مع الطرق المكسرة بكفاءة تعطيك احساس ممتع بقوة العربية بيخليك مطمن..... انا برضة بتعامل احيانا مع الطرق المكسرة فى 6 اكتوبر بس زى ما قت الاحساس بقوة العربية بيطمن جدا

[م. حاتم السباعي]

فعلا ارتفاع السيارة عن الارض بيعطي احساس بأن الرجرجة زائدة عن الحد ولكن مع طول الزمن تجد ان التريوس مثلا تعطي قدرة واتزان في المطبات والحفر عن السيارات المنخفضة واتوقع بأن غالبية ملاك التريوس جذبهم في هذه السيارة ارتفاعها عن الارض وانا كان معي في العمل سيارات فورد ( 4*4 ) وكذالك تويوتا ( 4*4 ) و بمجرد ان نزيد السرعة في اماكن بها مطبات او حفر كنا نحس بأننا راكبين جمال مش عربيات و عموما ممكن حضرتك وأنتا في التوكيل تشوف حد من العملاء وتناقش الامر معهم لتجميع الاراء حتي يرتاح بالك

م.حاتم السباعي

[mo7a_mo7a]

عادي جدا
واعتقد ان الزملاء اوفوا في الشرح

[mohammedfat80]

ياجماعة والله مش عارف اقولكم أد إبه أنا سعيدبردودكم وإهتمامكم
بس المشكلة إنها ماكنتش كده بالعكس أنا كنت فرحان بإنها عربية عالية وعفشتها قويه بس دلوقتى إختلفت خالص
المهم إدعولى بس بكرة إنشاء الله مالائيش خازوق فى التوكيل أدفعلى فيه مبلغ وقدره
بس محدش رد عليا يعنى وقالى مركز خدمة العبور ده الاقيه فين؟

[mohammedfat80]

الحمدلله عرفت أوصل للمركز وكالعاده طبعاً مافيش حاجة يافندم العربية زى الفل ومافيهاش أى حاجة

وبالتالى مضطر أتقل على حد من حضراتكو يجرب عربيتى عشان أنا واحد صاحبى معاه سيريون و كان عنده كل الحاجات دى وبعد ما تنح معاهم طلع فعلاً علبة الدركسيون فيها مشكلة وغيروها فى الضمان بس بعد ما سمعلوا الكلمتين بتوع العربية تمام يا فندم بتاع أربع خمس مرات

لو فى حد من حضراتكو فى 6 أكتوبر أو مصر الجديده أجيبله العربية لحد عنده ويقولى رأيه إيه و أكيد طبعاً يشرفنى إن أقبلكو كلكم

[أبو عبدالله]

بص من الأخر اولا مفيش مشكلة في علبة الدركسيون في التيريوس فلا تقلق من هذا
ولكن النهاية ومن الأخر
غير كاوتش العربيه الدانلوب الأصلي اللي بينزل في العربيه استاندر
غيره بنوع اخر ولو الموضوع مهم لك قوي يبقى هات نوع نظيف وعرضه شويه عن المقاس اللي عندك وبعدين حط نيتروجين وان شاء الله هتفرق جامد معاك ومتبقاش تنسى تدعيلي بالخير بإذن الله

[mohammedfat80]

ومتبقاش تنسى تدعيلي بالخير بإذن الله

ربنا يكرمك ويطمن قلبك دايماً يا أبو عبدالله

[Imhotep]

بمناسبة اضافة ابو عبد الله عن موضوع الكاوتش.... انا شخصيا مخطط ان شاء الله اغير الاربع فرد باربعة بريدجستون لما هو معروف عنه من نعومة ممكن تزود نعومة عفشة العربية..... بس مشكلة البريدجستون ان تمن الفردة حراق اوى تقريبا حوالى 600 جنيه..... يعنى الاربع فرد هيخشوا فى استيكين و نص