سمعة التيريوس

[Teefa2010]

السلام عليكم

يا جماعة انا من اشد المعجبين بالتيريوس من زماااااااااااااااان
بس لما فكرت اجيب تيريوس ولاد الحلال قالوا عنها كلام مش لطيف وهو ان ابعادها مش متوازنه وده بيسبب انقلابها على جنبها في الملفات حتى لو كانت السرعة مش كبيرة

يا ريت اعرف ايه رأي الناس اللي مجربينها بس يا ريت يكون الرأس عن عشرة
وعايز اعرف اي موديلات فيها كويسه ولو عايز اجيب تيريوس ي حدود 35000 ممكن الاقي موديل كام
وهل هي عربية مستهلكة للبنزين ولا لأ ويا ترى ال 1300 سي سي منها كفاءته عالية ولا مش كويس



متشكر ليكم جدا

[م. حاتم السباعي]

سأرد علي حضرتك مع اني لا املك الفئة اللي حضرتك ناوي تشتري منها فانا معي تريوس 2010 وهي بالطبع الشكل الجديد ولا اعلم عن الشكل القديم شئ سوي بالسمع زي حضرتك تمام وعموما من تجاربي مع سيارتي انها سيارة كويسة بالنسبة لي يعني ارتفاعها مناسب جدا لشوارع المحروسة واثناء سفري بها بكون عارف اني راكب سيارة عالية ومش بتاعة غرز ولا سرعات عالية وبمشي علي سرعة الطريق وهي بالمناسبة بطيئة في التحضير يعني لا تنفع ابدا في الشد في بداية التسارع وبصراحة لم احس بعدم اتزانها علما بأني واثق انها تقل كثيرا في معامل امانها مع السيارات المنخفضة اما عن موضوع السعر حاسس انه صغير اوي علي موديل كويس (( و ان كان فيه الخير ما كان رماه الطير )) مش كده ولا ايه وتحياتي لحضرتك واهلا وسهلا بيك وسط اخوانك بس لازم حد يرد علي حضرتك معاه نفس الفئة ثم تسأل اكثر من واحد وربنا يوفقك الي ما فيه الخير

م.حاتم السباعي

[Imhotep]

باشا.... ممكن تراجع موضوعات قديمة فى القسم هتلاقى فيها معلومات كتير عن التيريوس القديمة..... بس انا هنا هقولك الخلاصة:
1- التيريوس القديمة سيارة مدينة جيدة لكن ثباتها فعلا مش جامد لان جسمها عالى على قاعدة عجلات ضيقة..... يعنى لو مش هتسافر بيها كتير و لا هتمشى على سرعات عالية اوى هتبقى كويسة.
2- استهلاكها للبنزين كويس لان موتورها 1300
3- قطع الغيار متوفرة و الدليل استمرار وجودها لاكتر من 10 سنين
ارجو اكون افدتك و بالتوفيق

[Teefa2010]

مشكوووور أخي

[Teefa2010]

متشكر يا هندسة على الاهتمام

[أبو عبدالله]

جنوط وكاوتش عريض وعدم تهور في القيادة على السرعات العالية يبقى موضوعها اتحل غير كده مفيش مشكلة
وانصحك بكثرة الأستخارة لكي ترزق الخير ان شاء الرحمن

[Sharky]

هى الجنوط الل بتنزل بيها التريوس 99- 2001 بتبقى كام ؟
و متهيألى زيادة عرض الكاوتش حيضر بالعفشة يا ابوعبدالله و خصوصا ان عفشتا ناشفة اصلا

و هى سعرها فى حدود كام حاليا ؟

انا ركبنت العربية دى قبل كده فعلا بعد الـ 100 فى الملفات سيئة جدا و دا متهيألى طبيعى نظرا لإرتفاعها و مقاس جنطها بس متهيألى كويسة كسيارة مدينة مش بتاعة جرى و سفر على سرعات