توكيل دايهاتسو العبور زعلان من نايل موتورز

[MITSUKERO]

السلام عليكم

انهرده رحت توكيل العبور مع واحد صاحبي معاه ماتريا بيعمل صيانة ال 45000 و في وسط الكلام بقول لمهندس هناك مفيش خصم لنايل موتورز فقالي "لما يبقوا يكتبوا اللي بيحصل بالظبط منغير زيادات نبقي نعمل خصم"

انا استغربت جدا ان التوكيل زعلان من الاعضاء هنا لان بصراحة المركز كويس و الناس هناك زوق بالمقارنة بتوكيلات كتير موجودة و الناس هنا بتعيط منها و صاحبي بيعمل معاهم صيانة من فترة و عمره ما اشتكي منهم خالص

انا مليش علاقة بدايهاتسو خالص بس الفكرة في المبدأ ان المنتدي هنا رمز للمصداقية و بيساعد ناس كتير حتي المنهدس بيقولي المنتدي مليان ناس كويسين كتير جدا و المشكلة في بعض الاعضاء اللي بيحبوا يلموا الناس علي مواضيع غلط من اجل الشهرة

عايزين نشارك بعض في وجهات النظر و نحاول نصلح الموضوع بين المنتدي و بين دايهاتسو لان في الاخر هو توكيل العربية و بيخدم الناس هنا و مش مستاهله زعل من موضوع او اتنين

اتمني اني الاقي استجابة و شكرا ليكم

[mahamede]

للأسف فى أعضاء كتير هنا فى المنتدى بيحبوا يكبروا فى المواضيع ,, وفيه اللى بيقولوا حاجات غلط ,, وفيه اللى بيحبوا يفتوا وخلاص ,, شكرا ليك ع محاولتك لتصليح الأمور بين التوكيل والأعضاء ,, تحياتى ليك ,,,,,

[medo_sirion]

للأسف فى أعضاء كتير هنا فى المنتدى بيحبوا يكبروا فى المواضيع ,, وفيه اللى بيقولوا حاجات غلط ,, وفيه اللى بيحبوا يفتوا وخلاص ,, شكرا ليك ع محاولتك لتصليح الأمور بين التوكيل والأعضاء ,, تحياتى ليك ,,,,,

اولا قبل ماحضرتك تتهم اى اعضاء قسم ديهاتسو
انت عند حضرتك سيارة ماركة ديهاتسو او اتعامل مع التوكيل قبل كدة او ظهرتلك مشكلة فى العربية وقام التوكيل بحلها دون مساعدة الاعضاء والشكاوى

اظن مينفعش احكم على حاجة وانا معرفش اساسها اصلا

[mahamede]

اولا قبل ماحضرتك تتهم اى اعضاء قسم ديهاتسو
انت عند حضرتك سيارة ماركة ديهاتسو او اتعامل مع التوكيل قبل كدة او ظهرتلك مشكلة فى العربية وقام التوكيل بحلها دون مساعدة الاعضاء والشكاوى

اظن مينفعش احكم على حاجة وانا معرفش اساسها اصلا

أولا : انا فعلا معنديش عربية نوعها دايهاتسوا ولما شاركت فى الموضوع متدخلتش واتكلمت عن حاجة فى التوكيل ولا اتكلمت عن اعضاء دايهاتسو ولا غلطت فى حد منهم ,,,

ثانيا : انا كل مشاركتى كانت بتتكلم عن فئة من الأعضاء اللى بيخشوا بيقول كلام مش مضبوط ,, واللى بيدلوا ع معلومات غير صحيحة ,,,ده كل اللى قلته ,,,,وبعدين انا لم اسىء لأحد ,,,

ثالثا : لو مشاركتى وحشة اوى كدا انا بعتذر عنها ,, وع فكرة انا مبحكمش ع حاجة انا معرفش فيها ,,, وفى مشاركتى متكلمتش سواء ع التوكيل ولا عن اى حد من اعضاء ماركة دايهاتسو,,, كل اللى اتكلمت عنه عن فئة من الاعضاء عامة اللى الاستاذ صاحب الموضوع ذكر عنهم فى الموضوع ,, بعتذر مرة تانية ,,,,

تحياتى,,,,

[medo_sirion]

انا والله مبتكبمش على حضرتك ولا على اساءة لاحد فى القسم
بس والله حضرتك مش بتشوف المعاناه فى التوكيلات هنا فى مصر مش شرط ديهاتسو
متعتهم انهم يضحكوا عليك وخلاص لو مش انت عارف حق
اما لو لقوا حد فاهم وعارف حقة تعالا اتفرج ويقولك بيزودوا فى الكلام
انا مغير خمس علب دريكسيون عندهم فى الضمان سعر العلبة ممكن تدخل 5000 ج الواحدة لية لانى عارف حقى وباخدة علشان كدة لما كنت اروح صيانة واول مدخل من على الباب ويشفونى كانوا بيطلعوا بيجروا ههههههههههههههه اه والله مكنش فى مهندس بيرضى يستلم العربية وكان مدير الورشة كان بيجيلى

[aliabutaleb]

فقالي "لما يبقوا يكتبوا اللي بيحصل بالظبط منغير زيادات نبقي نعمل خصم"

بغض النظر عن اللي حصل
انا متحفظ جداً على الأسلوب السئ للتوكيل اللي فاهم إن الخصم اللي بيقدمه منة أو منحة لأعضاء نايل موتورز وناسي أو متناسي إن الخصم ده بيكسب مقابله الكثير من المنتدى
انا عن نفسي وأعرف أكتر من شخص أخذ قرار شراء السيريون - وهو للأمانة قرار لم أندم عليه - فقط من نايل موتورز وأعضاء نايل موتورز

[A.Saad]

لو التوكيل شاف انه بيكتب عنه حاجة غلط
ممكن يتصل بالادارة ويوضح موقفه
لكن كدة تصرفه سلبى

[MITSUKERO]

السلام عليكم

طبعا انا مبسوط ان الناس دخلت و شاركت حتي و لو بالنقد علي الرغم من ان الموضوع ده معمول لتصفية الاجواء بس مش مشكلة

بالنسبة للاخ اللي مغير خمس علب دركسيون !!!! انا والله العظيم المنهدس اللي هناك اول ما قالي كده قولتله انا قريت علي المنتدي ان السيريون فيها مشكله في علبة الدركسيون لاني فعلا كنت قريت موضوع كبير هنا عن الموضوع ده فقالي ما اصحاب العربيات بيجوا و بيغيروها قولتله مهي بتبوظ تاني فقالي بنغيرها تاني والله لو باظت

بالنسبة لموضوع خمس علب دركسيون فبصراحة انا اول مرة اسمع عن حاجة زي كده و لو العربية فيها عيب زي ده غير قابل للاصلاح المفروض تاخد فلوسك مش تغيرها مع كل صيانه !!! انا لو مكانك كنت عملت مصيبة اصلا انت بتجيب وقت منين !!

المهم ان حتي لو التوكيل كان عمل حاجات غلط قبل كده فأنا رأيي الشخصي ان لازم يبقي فيه محاوله لإعادة الثقه مرة تانيه لان الموضوع زي ما قلت قبل كده مش حرب لا دي علاقة مصلحة مشتركة الوكيل مصلحته ان سمعته متبوظشي و العميل مصلحته انه يعمل صيانه صح و يسلام لو اخد خصم علي الصيانه يبقي تمام جدا و الوكيل نقوله الف شكر


الاستاذ الفاضل علي ابو طالب : بص خلينا موضوعيين لو انت مسؤؤل عن التوكيل و فيه منتدي مهما تعمل بيقول عليك وحش و سيء و بتنصب هتعمل ايه بقي ؟

انا اقسم بالله مش بدافع عن التوكيل انا كل هدفي ان المواضيع الصغيرة تعدي و الدنيا تبقي كويسة و التوكيل لما حد يقوله نايل موتورز ميتصمشي زي ما المنهدي اتصدم اول ما قولتله هههههههه

الاستاذ احمد سعد : لو الهجوم معاه شوية وقائع بسيطة تم تضخيمها صعب الادارة تحكم لانها مش هتعرف مين الصح من الغلط بس كلامك مظبوط طبعا لو فيه احداث غلط تماما و فيه نقطه كمان ان كده المفروض مهندس من التوكيل يفضي نفسه للمنتدي و ده اظن انه صعب

نقطة اخيرة : ياريت بس حد ياخد بعضة و يروح توكيل ميتسوبيشي القديم اللي في قليوب بتاع الرواس و يقولي علي مهندسين الاستقبال هناك و علي المكان و علي النصب بجد لاني هتفقع

الاستاذ محمد e : متزعلشي كده العضو مفقوع مرارته ده مغير خمس علب دركسيون مش خمس لمبات يعني

[medo_sirion]

هههههههههههههههههههههههههههههه والله ضحكتنى ومنور المنتدى
اولا موضوع الخمسة كنت كل ماروح اعمل صيانة يقولولى علبة دريكسيون وانا مكنتش بتكلم جم فى المرة الرابعة قالولى لا شركة ديهاتسو اليابان قالت منغيرلكش وهتنزلك علبة معدلة مخصوص لعربيتك هههههههههههههه وفعلا العلبة جت واتغيرت قاعدة شويتين وهوب الصوت رجع تانى بس اهم حاجة انى مكنتش بسيب حقى الحمدالله

اما على توكيل قليوب ابن خالتى معاه لانسر قلتلة لازم فى الصيانات الكبيرة تروح المركز الرئيسى وتعمل الصيانة هناك سالنا وروحنا هنا ومن سعتها وانا مش قادر ابطل ضحك على المكان ولا المنظر ولا المكان اللى بيتعمل فية صيانة للعربية برة فى الشارع ولا منظر الاستراحة والراجل جى يقولى الشاى ب 1.5 ههههههههههههههههه

المهم اخد ابن خالتى وطلعتة ابو رواش ووديتة توكيل ديهاتسو او مدخل التوكيل من جوة لقيتة بيدمع وبيقولى اية دة ؟؟؟؟؟؟؟؟
بجد فى فرق شاسع ورهيب بين التوكيلات فى مصر

[aliabutaleb]

الاستاذ الفاضل علي ابو طالب : بص خلينا موضوعيين لو انت مسؤؤل عن التوكيل و فيه منتدي مهما تعمل بيقول عليك وحش و سيء و بتنصب هتعمل ايه بقي ؟

خلينا موضوعيين. ليه لأ؟
لو أنا مسئول عن التوكيل كنت هابقى حريص بشكل دائم على رضا عملائي
ولو وصلت للدرجة اللي واضحة دي إني متخيل إني باعمل كل اللي عليا وعملائي حاسسين بالسخط يبقى مؤكد فيه حاجة غلط عندي
لأن الهدف الأول لأي مؤسسة هو تعظيم ربحها وده مش هايحصل إلا لو عملائي أحسوا بالرضا.

ومفيش داعي يصوروا الموضوع على إنهم عاملين كل اللي عليهم وأعضاء نايل موتورز هما اللي جاحدين. ميصحش يكون ده تفكيرهم
زي ما قلت قبل كدة دايهاتسو مكانتش بتقدم الخصم منحة لنايل موتورز. كل جنيه اتخصم للأعضاء كسبوا قصاده 100.
وده شئ طبيعي إن المصلحة والمنفعة يكونوا متبادلين
إنما ييجي طرف بعد كدة ويقول إنه بيتفضل على الطرف التاني فالصراحة ده شئ غير يحترم.
ومش هانضحك على بعض
كل مشاكل الأعضاء موجودة هنا واتسردت مليون مرة وكلها بلا استثناء التوكيل عارفها

وبالنسبة لعلبة الدركسيون كفاية إني أقوللك إني قررت مغيرهاش لأن معظم اللي غيرها بمجرد ما التوكيل مد إيده في العربية حال العربية اتشقلب.

انا عاذر حضرتك لأنك مش معانا من زمان، لكن ارجع لأرشيف القسم هاتلاقي سرد وافي لكل مواقفنا الجيدة قبل السيئة مع التوكيل في الـ 3 سنين الأخيرة أدعوك لقرائتها قبل أي دفاع عنهم.

أخيراً رجاءً بلاش نقول شوفوا التوكيلات التانية
أنا بادفع فلوس مقابل خدمة، وحقي آخد الخدمة دي على أكمل وجه
طريقة شوفوا التوكيلات التانية دي هي اللي جابت مصر ورا لما كان النظام السابق يقول لنا شوفوا الدول التانية.
إحنا ليه مبنقارنش غير بالسئ؟
طب ما فيه توكيلات تانية جيدة ليه منطمحش في إننا نبقى أحسن منهم؟

[M.Mosaad]

معظم الناس هنا موضوعيه جداااااااااااا في تقييمها للوكيل و لما بنشوف حاجة حلوة بنقول عليها و كل لما حد يسأل عن العربيه بنقول من مميزاتها ان وكيلها احسن الوحشين في مصر و دي حقيقه مفيش شك ان التوكيلات في مصر قدامها كتير علشان تتعلم مبدأ احترام العميل
لكن في ديهاتسوا الناس محترمين و معاملتهم كويسة و مشكلتنا الوحيدة موضوع علبة الدركسيون اللي انا شايف برضة انه تقصير شديد من ديهاتسوا اليابان و موضوع ان اللي بيحي يغيرها بنغيرهاله دة كوميدي جداااااااااااا لان من اسباب شرا العربيه دي انها عربيه عمليه يعني اللي بيشتريها بيجيبها علشان مشغول جدااااااااااااا و عايز يريح دماغه و يروح صيانته الدوريه و خلاص

يعني انا بروح اعمل الصيانه بالعافيه كل 10000 كم لاني مفيش وقت و لا اجازات اساسا و برضة نايل موتورز اعتقد في ناس كتير جدااااااااااااا اشترت العربيه بناء علي نصيحه من الناس هنا و انا اولهم و الحمد لله مندمناش و بنقول كل خير في العربيه ما عدا قصة علبه الدركسيون

[MITSUKERO]

خلينا موضوعيين. ليه لأ؟
لو أنا مسئول عن التوكيل كنت هابقى حريص بشكل دائم على رضا عملائي
ولو وصلت للدرجة اللي واضحة دي إني متخيل إني باعمل كل اللي عليا وعملائي حاسسين بالسخط يبقى مؤكد فيه حاجة غلط عندي
لأن الهدف الأول لأي مؤسسة هو تعظيم ربحها وده مش هايحصل إلا لو عملائي أحسوا بالرضا.

ومفيش داعي يصوروا الموضوع على إنهم عاملين كل اللي عليهم وأعضاء نايل موتورز هما اللي جاحدين. ميصحش يكون ده تفكيرهم
زي ما قلت قبل كدة دايهاتسو مكانتش بتقدم الخصم منحة لنايل موتورز. كل جنيه اتخصم للأعضاء كسبوا قصاده 100.
وده شئ طبيعي إن المصلحة والمنفعة يكونوا متبادلين
إنما ييجي طرف بعد كدة ويقول إنه بيتفضل على الطرف التاني فالصراحة ده شئ غير يحترم.
ومش هانضحك على بعض
كل مشاكل الأعضاء موجودة هنا واتسردت مليون مرة وكلها بلا استثناء التوكيل عارفها

وبالنسبة لعلبة الدركسيون كفاية إني أقوللك إني قررت مغيرهاش لأن معظم اللي غيرها بمجرد ما التوكيل مد إيده في العربية حال العربية اتشقلب.

انا عاذر حضرتك لأنك مش معانا من زمان، لكن ارجع لأرشيف القسم هاتلاقي سرد وافي لكل مواقفنا الجيدة قبل السيئة مع التوكيل في الـ 3 سنين الأخيرة أدعوك لقرائتها قبل أي دفاع عنهم.

أخيراً رجاءً بلاش نقول شوفوا التوكيلات التانية
أنا بادفع فلوس مقابل خدمة، وحقي آخد الخدمة دي على أكمل وجه
طريقة شوفوا التوكيلات التانية دي هي اللي جابت مصر ورا لما كان النظام السابق يقول لنا شوفوا الدول التانية.
إحنا ليه مبنقارنش غير بالسئ؟
طب ما فيه توكيلات تانية جيدة ليه منطمحش في إننا نبقى أحسن منهم؟

فيه بس سوء تفاهم صغير : انا مش بدافع عنهم خالص لاني مليش اي مصلحة كل الموضوع اني لقيت الجو متوتر فقولت احاول اظبط الامور لان زي ما قولت في الاخر العلاقة مصلحة متبادله فقط بين الوكيل و العملاء

بالنسبة لكلام حضرتك ان احنا منبصس علي الوكلاء التانيين فده فعلا صح بس انا قولت اخفف عن الاعضاء هنا مش اكتر والله لكن كلام حضرتك مظبوط ان العميل بيدفع فلوس مقابل الخدمة و من حقة ياخد خدمة كاملة مميزة

بالنسبة لموضوع الخصم : انا شايف ان زي ما المنتدي خلي التوكيل يكسب في وقت من الاوقات اكيد خلي التوكيل يخسر دلوقتي و الوكيل من حقه لما يلاقي حاجة بتضره يواجهها الاول بمحاولة ارضاء العميل و لو العميل فضل يقول عليه كلام غلط اكيد هيتنرفز و هيقول مفيش خصم


الاخ محمد مسعد : انا زيك بالظبط انا عشان اعمل اي حاجة في العربية بيبقي بالعافية و لو طلعتلي مشكلة متكررة ممكن ابيع العربية اساسا و ده اللي مخليني مستغرب من الاخ ميدو اللي غير علبة الدركسيون خمس مرات بجد ربنا يصبره والله و المشكلة الاكبر ان فيه ناس كتير هتلاقيهم راكبين العربية و هم مش عارفين ان فيها مشكلة و مبياخدوش حقهم و ده اللي يزعل


ياريت بس نوصل لنتيجة من الحوار ده و نحاول نحل الموضوع براحة من غير تعصب

[Sharky]

ما اظنش ان الأعضاء هنا بيبالغوا فى كلامهم السئ عن الوكيل !!

واحد مثلا مغير 5 مرات علبة دريكسيون فى الضمان دا من غير ما يتعدل العيب يبقى اسمه ايه !!!

بصراحة انا شايف ان التوكيل مالوش حق يزعل و يلغى المنحة اللى يمن عليها بالأعضاء هنا لمجرد ان الأعضاء بتقول الحقيقة و دى مزعلاه قوى !

[aliabutaleb]

ما اظنش ان الأعضاء هنا بيبالغوا فى كلامهم السئ عن الوكيل !!

واحد مثلا مغير 5 مرات علبة دريكسيون فى الضمان دا من غير ما يتعدل العيب يبقى اسمه ايه !!!

بصراحة انا شايف ان التوكيل مالوش حق يزعل و يلغى المنحة اللى يمن عليها بالأعضاء هنا لمجرد ان الأعضاء بتقول الحقيقة و دى مزعلاه قوى !

باتفق معاك في كل حرف يا شاركي
حمداً لله على السلامة بعد الغيبة الطويلة :-)

[MITSUKERO]

ما اظنش ان الأعضاء هنا بيبالغوا فى كلامهم السئ عن الوكيل !!

واحد مثلا مغير 5 مرات علبة دريكسيون فى الضمان دا من غير ما يتعدل العيب يبقى اسمه ايه !!!

بصراحة انا شايف ان التوكيل مالوش حق يزعل و يلغى المنحة اللى يمن عليها بالأعضاء هنا لمجرد ان الأعضاء بتقول الحقيقة و دى مزعلاه قوى !

والله يا استاذ شاركي انا كل هدفي ان العلاقة تتحسن مش اكتر و لو الاعضاء هنا مش عايزين خلاص انا اساسا مليش اي مصلحة نهائي في ان العلاقة تتحسن او تفضل بايظه انا معنديش عربية دايهاتسو

كل فكرتي كانت ان بدل ما الاعضاء تمسك في رقبة التوكيل و تنزل فيه ضرب و خناق لا يبقي فيه وقفه واحده والله احنا اعضاء و مشاكلنا معاكم كانت كذا و كذا و كذا و بما ان التوكيل بيمثل الشركة اليابانية يبقي فيه رد قوي من التوكيل علي اي موضوع خلاف زي مثلا علبة الدركسيون بتاعة السيريون

و لو ساعتها التوكيل قصر خلاص يبقي هو عايز يخسر زبون و مش زبون واحد لا هيخسر كتير لان اي حد دلوقتي بيدخل علي النت و يدور كويس قبل ما يشتري عربية و اول حاجة بتطلع في السيرش هو نايل موتورز و اراء اعضاؤه

موضوع بقي اننا نمسك في عيب في موديل واحد لدايهاتسو و نزل التوكيل بيه ده انا مختلف مع اي حد هنا لان في الاخر التوكيل ده بيركب اللي بيجيله من اليابان و بيرد علي اليابان مرة اخري بنتيجة القطعة اللي بعتها و لو الشركة اليابانية ماخدتشي بالها و ظبطت القطعة اللي فيها عيب الصناعة ده مش ذنب التوكيل هو ممثل ليها هنا مش معمل بحوث و تطوير هو بينقل شكوي العميل لليابان و بيركب اللي بيتبعت ليه ساعتها بقي فيه جهاز حماية مستهلك يشتكي دايهاتسو اليابان زي ما حصل في تويوتا كده في الفتيس و التوكيل رفض رفض لحد ما جهاز حماية المستهلك تدخل

اي عربية ممكن يبقي فيها عيب صناعة لانها من صنع الإنسان كل مهندسين التطوير بيحاولوا يتفادوا العيوب لكن اكيد اكيد بيفلت منهم حاجة لانهم بشر و تويوتا مثال واضح علي الموضوع ده في عيب العربيات اللي في امريكا و عيب الفتيس اللي في مصر

في الاخر بس بكرر ان لو عايزين تظبطوا الموضوع ده انا ممكن اتدخل لله والله العظيم ولا ليا مصلحة و بكررها و بحلف بالله عشان محدش يقول التوكيل هو اللي قايله يتدخل مش عايزين و عايزين تعلنوا الحرب يبقي بره مني