سؤال في صيانة السيريون

[OlaOsman]

هو انا عندي سؤال: العربية دلوقتي عاملة 15 ألف كيلو تقريبا، آخر صيانة عملناها كانت ال5 ألاف، بس غيرنا زيت في ال10 آلاف بره التوكيل.

دلوقتي سؤالي هو: هل فيه صيانة ال15 ألف؟ و لو مافيش، يبقى إيه اللي لازم يتعمل في صيانة التوكيل دلوقتي؟ يعني لازم تغيير فلتر الزيت و كده و لا ممكن نغير زيت تاني بره التوكيل نمشي بيه 5 ألاف كيلو تانيين و بعدين نعمل صيانة ال20 ألف؟

[Youssef.Awad]

الافضل الحفاظ على الصيانة الدورية فى التوكيل وتغيير الزيت والفلتر كل 10 الاف كم حتى انتهاء الضمان
وهنا حضرتك بتغيرى الزيت كل 10 الاف يعنى المرة القادمة هاتكون عند 20 الف كم ومعها تغيرى الفلتر واى مستجدات من بوجيهات وفلتر هواء فى التوكيل
اما صيانات ال5000 ففيها يتم شد الفرامل وتربيط العفشة ومراجعه السوائل من زيت فرامل وباور وراديتير وغيرها مش اكتر من كده

[OlaOsman]

شكرا جزيلا :)

طيب انا كده بقيت بره الضمان عشان عدى 3 سنين على الشراء. هل كده فيه إختلاف؟

[أبو عبدالله]

استاذة علا منورانا والله
هيا المشكلة عندك دلوقتي مش الكيلوهات اللي العربيه قطعتها
المشكلة في الزمن اللي مر على العربيه
يعني لو مسألة انك تمشي 5 الاف كم متر لحد 20 الف وتعملي صيانة مفيش مشكلة عادي
ولكن عندك زيوت لازم تتغير وسوائل بعد 3 سنوات
1- زيت الفرامل لازم يتغير
2- زيت الفتيس لازم يتغير
3- مية التبريد بتاعت الرادياتير لازم تنزل وتتغير
4- سير الكاتينة لازم يتكشف عليه

نصيحة لازم الحاجات دي تخديها بمحمل الجد واي كلام اخر صدقيني مش هيبقى لمصلحة العربيه
يعني ممكن يشتغلوا معاكي ولكن انا اقصد دلوقتي انك لازم تعرفي وتحطي امامك ان الحاجت دي خرجت دلوقتي من عمرها الأفتراضي ودخلت في مرحلة عدم الأمان

ثانيا : مسألة زيت الماتور
طبعا حضرتك مغيرة الزيت ده اخر مره اكيد اكيد اكتر من سنة ودي مشكلة
الزيت عمره الأفتراضي حته لو العربيه واقفة مكانها ولم تتحرك يعني مفيش اي كيلوهات اتعملت المفروض الصح ان الزيت ينزل ويتغير لأن الزيت بيفقد خواصه بعد مرور 6 شهور عليه حته لو مشتغلشي خالص

فطبعا لما تغيري لازم تعملي في حسابك ان انك لو معملتيش المسافة اللي هيا 10 الاف كم في الوقت اللي هو 6 شهور فالمفورض ان الزيت برضه ينزل وده لعمر العربيه وعمر محركها
واي استفسارات احنا موجودين وتحت امرك طبعا

[Youssef.Awad]

ياخبر انا ما اخدتش بالى ان العربية بقالها 3 سنين مع حضرتك ما شاء الله ربنا يباركلك فيها
اصل انا استهلاكى 40 الف كم فى السنة فأول ما سمعت 15 الف كم قولت يعنى فى سنة او سنتين
كده الحسابات هاتختلف خالص زى ما الاستاذ ابو عبدالله قال لحضرتك
اولا: بالنسبة لزيت الموتور اقصى مدة يقعد فيها زيت ال5000 كم هو 6 شهور وال10000 كم هو سنة ايهم اقرب يعنى حتى لو ما قطعتيش المسافة دى تغيرى الزيت والفلتر
ثانيا: مراجعة شاملة على الزيوت وسوائل الفرامل والباور ومياه الراديتير وتغييرها وكمان زيت الفتيس يتكشف عليه
ثالثا: الكشف على كافة سيور العربية والخراطيم واى اجزاء مطاطية مع الاخذ فى الاعتبار تدوير الكاوتشات ورا بدل الامام والعكس كل 10 الاف كم
نصيحة حضرتك روحى صيانة ال15 الف كم فى التوكيل وبالمرة تعملى كشف كامل ع العربية وتطمنى وافتكر ان توكيل دايهاتسو محترم يعنى مش هايقولك تغيرى حاجة لمجرد انك تدفعى فلوس وخلاص

[OlaOsman]

شكرا جزيلا يا جماعة :))

هاحجز للصيانة في أقرب فرصة إن شاء الله :))