صيانه ال5000 - الخميس 5-6-2008 ومتابعه حية...

[m10_10]

ان شاء الله اروح بكرة لصيانه ال5000 ...

ان شاء الله احدد الحاجات اللي المفروض اسال عليها...

اولها الزجاج الامامي انا بجد زهقت جدا كل شوية يدوني في معاد ويخلفو واتصل ويدوني معاد ويخلفو...

اخر مرة قالولي قبل 20-6 هايكون موجود ,, (طبها انا سمعت كدة قولت نعم ؟؟؟ انا كدة ابقي بقالي شهرين وشوية )

بيقولو عشان جاي طيران... والمرة اللي فاتت مجاش عشان كان جاي فيه عيوب...وماينفعش نركبهولك...

مش عارف انا حاسس انهم بيثبتوني بالاسلوب الزوق والكلام الشيك..

تاني حاجه التكييف رجه تاني وضعف... المرة اللي فاتت قالي انه مكانش مشحون كويس وشحنهولي يادوب يومين ورجه خف تاني..

تالت حاجه الاصوات اللي مش عاجباني هاقول عليها (ياجماعه دي عربيه زيرو الواحد مابيطقش يسمع صوت اي حاجه حتى لو كانت حاجه عبيطة)...

ياللا ربنا يكرم ويتم المشوار دة علي خير...

ساواليكم بالاخبار اول باول لو حصل جديد...

بالنسبه لاستاذ احمد عبد الوهاب اروح قبل ما اقول اي حاجه اسال عليه ولا بعد ما اسلم العربيه واقول اللي فيها اسال عليه ؟؟؟

[معاذ الشرباصى]

محمد باشا

ممكن توصف الصوت او الاصوات اللى مضايقاك؟ لأن انا عندى صوت مجننى برده, و ناوى اروح اول اما اخلص امتحانات

بالنسبة لمهندس احمد عبدالوهاب, اول اما توصل هناك, اسأل عليه, و ان شاء الله يكون سبب انه يخلص لك الحاجات كلها

ان شاء الله المشوار يتم بخير, و تخلص الحاجت كلها

[MoToRiZeR]

طب ممكن توصفلنا الصوت برده يا معاذ
أصل انا عندي صوت مش عارف اذا كان عادي ولا لأ

[معاذ الشرباصى]

طب ممكن توصفلنا الصوت برده يا معاذ
أصل انا عندي صوت مش عارف اذا كان عادي ولا لأ

الصوت ده فى الناحية الشمال, تحسه جاى من عند السماعة, زى ما يكون حتة بلاستيكة مفكوكة و بتخبط

+ صوت خبط فى الدركسيون, لما بكون ماشى على ارض غير ممهدة, و ده مينفعش يحصل الا لو علبة الدركسيون بايظة

على حسب كلام واحد اعرفه, انهم عرفوا سبب الخبطة دى, بتاعة الدركسيون, و بتتغير فى الضمان طبعا

[MoToRiZeR]

علي فكرة انا كان عندي صوت الشمال ده و قعد مجنني بتاع اسبوع
بعد كدة اكتشفت انه صوت ازازة المية اللي بحطها في المكان اللي في الباب ! .. بتخبط فيه فا بتعمل صوت

اتأكد انها مش حاجة انت حاططها في اماكن التخزين في الباب

انا الصوت اللي عندي بقي مش عارف اوصفه .. بس هو بيبقي عالسرعات القليلة بس ( أول و تاني ) .. ببقي حاسس اكني سامع صوت السير و هو بيلف !او انه بيزيق .. مش عارف

[معاذ الشرباصى]

علي فكرة انا كان عندي صوت الشمال ده و قعد مجنني بتاع اسبوع
بعد كدة اكتشفت انه صوت ازازة المية اللي بحطها في المكان اللي في الباب ! .. بتخبط فيه فا بتعمل صوت

اتأكد انها مش حاجة انت حاططها في اماكن التخزين في الباب

انا الصوت اللي عندي بقي مش عارف اوصفه .. بس هو بيبقي عالسرعات القليلة بس ( أول و تاني ) .. ببقي حاسس اكني سامع صوت السير و هو بيلف !او انه بيزيق .. مش عارف

انا مفضى العربية من معظم الحاجات, خاصة لما بيكون فى صوت, مش عارف مصدره, بفضى العربية خالص

السريون السير بتاعها جنزير, فبيبقى له صوت مميز عن العربيات اللى السير بتاعها كاوتش, و بيبان الصوت قوى على السرعات القليلة او و انت ماشى و ممور العربية

[MoToRiZeR]

طمنتني .. يعني الحمد لله مفيش حاجة

[m10_10]

بص يا سيدي...

الصوت انا حاسس ان صوت الموتور عالي شوية...

بس مستني لما اغير الزيت واشوف ايه الاخبار.. المتوقع انه يقل جامد...

اما بالنسبه للزجاج الامامي...
علي حسب كلام المحترم احمد عبدالوهاب فدي مشكله بالنسبالهم مع الجمارك او حاجه زي كدة عشان مرة واحدة وجت طلبيات كتيره عليه...

[m10_10]

عموما اديني مستني...

انا سالتهم عالاصوات اللي قلتو عليها يا رجاله بس هما قالولي لازم العربيات دي تروحلوهم عشان يحكمو بنفسهم لاني مهما وصفتلهم مش هايكون زي مايسمعو بودنهم ...

واديني مستني ...

--- من داخل دايهاتسو مصر
--- بجوار سوق العبور
--- مراسلكم محمد لطفي....

[m10_10]

العربيه دلوقتي مرفوعه - بعد الشر عن السامعين- وبيتفضالها الزيت وبيتغير هو والفلتر...
بس ملاحظ بقالها كتير مرفوعه ومحدش جنبها ...
فتح الطبق وسايب الزيت يفضي براحته - اعتقد جي نقطه ايجابيه لضمان ان الزيت القديم يفضي خالص...

علي حسب كلام المحترم احمد عبد الوهاب ان بعد الصيانه العاديه هايشوفو يكشفو علي الحاجات اللي قلت ملاحظاتي عليها...

[m10_10]

مش عارف مسموح من ادارة المنتدي اني ابعت كذا مرة ورا بعض ولا لأ ؟؟؟

بس عموما دة وصف تفصيلي للي بيحصل ...

واحد بدا يشتغل فيها كان من اول مالعربيه بدا يفضالها زيت وهو جاب كذا جركن زيت من الصغيرين دول طبعا انا مش شايف مكتوب عليهم ايه؟؟؟

عكس البنزبنه لما غيرنا زيت البيكانتو جاب جركن كبير وفضاه ( الزيت موبيل وان اللي هو 10000 التخليقي دة )

مش عارف ايه الحكمه او ايه الفرق بين لو حط زيت من جركن واحد او زيت من 4 عبوات صغيرة ؟؟؟ الله اعلم ... يمكن لغرض في نفسهم ...

[أبو عبدالله]

ربنا يباركلك فيها ان شاء الله

الصوت ده يا محمود بتاع سير الكاتينة اللي هو جنزير

اما صوت معاذ فبيظهر في حالات فريده من نوعها
لأني طلعت اجرب معاه العربيه وان الصوت يظهر مفيش ابدا
واكيد لما راح الصيانه برضه العربيه خافت ومرضتشي تطلع الصوت نهائي

[m10_10]

تقريبا كل العربيات بتخاف من التوكيل والحاجات كلها بتختفي...

انا ملاحظ محدش جه عند العفشه يربطها... العربيه راحت عند الغسيل وماحدش بص عالتكيف ...

كلمت الاستاذة استفسر منها يمكن يكون ربطولها العفشة ومخدش بالي...

بس اللي متاكد منه محدش بص عالتكييف...اديني مستني...

من داخل دايهاتو مصر
محمد لطفي
خاص لنايل موتورز
وادينا قاعدين...

[Karim_Monir]

كمل يا محمد طالما بث حي مش مشكلة
على الله نخلص على خير

[Migo123]

ما تشوف كده في حد معاه ماتيرا في التوكيل
تعرفلنا منه اخبارها ايه معاه