مصاريف الترخيص للسيريون 1300

[aliabutaleb]

السلام عليكم ورحمة الله وبركاته
انا رايح ان شاء الله بكرة أرخص السيريون 1300 لمدة سنة واحدة فقط
هل حد رخص قريب يقوللي ليلة الترخيص دي أول عن آخر هاتتكلف كام عشان الواحد يكون عنده فكرة بس
طبعاً المقصود كافة المصاريف زي الضريبة والتأمين وخلافه
وخللوا بالكم من خلافه دي :)

[معاذ الشرباصى]

بص يا على باشا

انا كنت مصمم لما رحت ارخص انى مدفعش اى خلافه دى

و فعلا, محدش منهم خد منى نكلة

--------------------------------------------------

اما بالنسبة للمصاريف

هى غليت, فمعنديش الرقم كام

[aliabutaleb]

تمام يا معاذ
انا عارف فعلاً إن كله زاد
بس كان نفسي يكون حد رخص 1300 سي سي قريب عشان يديني قكرة بس

[MoToRiZeR]

معنديش فكرة يا استاذ علي
بس نصيحة .. للأسف نصيحة سيئة يعني بس ابتسم انت في مصر
مشي حالك ب "و خلافه"

و الا هتاخد وقت و يقعدوا يلقفوك لبعض و الختم ده مش واضح .. الامضة دي مش عارف مالها .. و تاخد نمر طالعة من بق كلب مش بانلها ارقام .. و يبقي يوم مش لذيذ .. مشي حالك .. يعني خلي معاك خمسات و عشرات في جيبك فكة احتياطي

و اوعي تخليهم يكتبولك نمرة في الورق الا اما تغمز الراجل بحاجة و تخليه يوريلك اللوحة و تعجبك و تتأكد انها كويسة لأن ممكن فعلا تاخد لوح متدمرة .. دمار شامل !

[aliabutaleb]

و اوعي تخليهم يكتبولك نمرة في الورق الا اما تغمز الراجل بحاجة و تخليه يوريلك اللوحة و تعجبك و تتأكد انها كويسة لأن ممكن فعلا تاخد لوح متدمرة .. دمار شامل !

انا معنديش أي موانع في موضوع خلافه ده :)
اما بالنسبة لموضوع النمر اللي طالعة من بق بوبي :)
فأنا الصراحة من النوع اللي باقلق أددي فلوس على طول كدة
خصوصاً إن اللي ماسك النمر في المرور بتاعنا اتنين ستات وأنا باقلق أوي إني أددي لستات أحسن على حظي يطلعوا شرفاء :)

[ara]

ربنا معاك ... انا لما رحت المرور للأسف دفعت خلافة. ووقف ترخيص ال Glx 1500 برخصة 3 سنين حوالى 600!
والله المستعان :)

[aliabutaleb]

لسة جاي من لحظات قليلة
مشوار بدأ من الفجر ماهو يادوب عشان الرحلة هاتكون القاهرة - الإسكندرية - القاهرة
رحت التوكيل أخدت معايا المخلص بتاع المرور
بس واد عفرييييت بصراحة مخلانيش أعمل أي حاجة
وحافظ كل وحدة مرور ومين فيها بياخد إيه وكام
اول ما طلعنا صمم إننا ناخد بصمة الموتور وندفع التأمين الاجباري في مرور أبيس اللي في سموحة جنب جرين بلازا عشان الاخوة في مرور طوسون اللي انا تابع له مش بياخدوها كويس ده غير إن أبيس رايق خالص والتاني زحمة
وبعدين طلعنا على طوسون في أبو قير
بعد فاصل من الأحداث المتعبة والمملة قدرنا نخلص ونركب النمر ونستلم الرخصة
رخصتي اتحشرت في جهاز التغليف واتطبقت وباظت وبقى شكلها زفت
والحمد لله على كل حال
اكتشفت ان الفرق بين ترخيص سنة وترخيص 3 سنين مش كتير زي ما كنت فاكر
عشان كدة رخصت 3 سنين
الموضوع اتكلف بالظبط 185 تأمين إجباري + 531 ضريبة
بالإضافة إلى حوالي 200 جنيه خلافه (بما فيها إكرامية مخلص المرور ده)
يعني الليلة خلصت ب 900 جنيه تقريباً
ودلوقتي باكتب لكم من كمبيوتري العزيز في مدينة 6 أكتوبر العامرة
وكل ترخيص وانتم طيبين :)

[MoToRiZeR]

الف مبروك عالترخيص كدة بقي تجري بالعربية زي ما انت عايز
و عايزين تقرير حلو كدة

الف مبرووووووووك

[معاذ الشرباصى]

الف مبروك يا على باشا

كده اظن انك قربت او خلصت خلاص ال 1000 كم الاولى

صح و لا ايه؟

[aliabutaleb]

محمود بك:
ألف شكر يا ريس

معاذ
تمام يا دوك
بالظبط 920 كم
متابع كويس انت :)
انا رايح ان شاء الله الصيانة يوم 28 والنهاردة اتصلت أحاول اخليها 21 ملقيتش وقت فاضي :)

[OlaOsman]

مبروك الترخيص يا عليييييييييييي

إلا قولوا لي هو سهل كده ان حد ياخد معاه حد من التوكيل يساعده في إجراءات الترخيص؟ يعني ده في القاهرة كمان و لا في اسكندرية بس؟

[Hassan Khalil]

تماااام ..
كده ضمنت اني حاخد اللفة و انا مش مقلق .. لان العربية خلاص عليها لوحات... و مترخصة 3 سنين كماااان
الف مبررروووك علي اللوحات ..
و عقبال لوحات التيريوس

[aliabutaleb]

حسن
اللفة بتاعتك محفوظة يابو علي إطمئن ;)
والله يبارك فيك يارب
بس على فكرة أنا لسة سايق التريوس إمبارح ومش عارف ليه مرتحتش فيها :P

علا
الله يبارك فيكي يا علا.
بصي هو انا معرفش ده متاح ولا لأ في القاهرة
بس في اسكندرية هي خدمة بيقدمها التوكيل مجاناً للعميل بالرغم من ان مدير الفرع مأمنني أظبط الراجل :)

[ows212]

10000 مبروك الترخيص يا على ... كويس انك رخصت 3 سنين علشان تريح دماغك
ومستنيين تقريرك وربنا يباركلك

[Hassan Khalil]

حسن
اللفة بتاعتك محفوظة يابو علي إطمئن ;)
والله يبارك فيك يارب
بس على فكرة أنا لسة سايق التريوس إمبارح ومش عارف ليه مرتحتش فيها :

تسلم يا جميل ....
و انسي التريوس .. عقبال مانبارك لك علي البي اماية .. و بعيدين ناخد منك لفة برضه .....
مش عارف ايه الغلاسة اللي نازلة عليا دي !!!!

مبروك الترخيص يا عليييييييييييي

إلا قولوا لي هو سهل كده ان حد ياخد معاه حد من التوكيل يساعده في إجراءات الترخيص؟ يعني ده في القاهرة كمان و لا في اسكندرية بس؟

موجود في الفرع بتاع شارع النزهة .. مصر الجديدة ...
-----
و اذا كان الشراء بالتقسيط من مكان غير الوكيل .. بعض المعارض ايضا بتبعت مندوب مع العميل لانجاز اوراق الترخيص .. ( مش حبا في العميل ) و لكن لتخليص الاوراق علشان الشيك بتاع المعرض بيطلع من البنك بناء علي رخصة العربية ..
-------
و في جميع الاحوال لازم المندوب يتظبططططط