دورة تبريد التريوس

[خالد على]

ارجوكم الرد وحل مشكلتى عندى تريوس موديل 99 1300سي سي مانيول كانت بتستهلك مياه القربة كلها فى المسافات الطويلة وصوت غليان فى القربة ومؤشر الحرارة دائما فى النص لا بيطلع ولا بينزل
رحت للميكانيكى قالى تيرموستات الكوع مصدى وقافل الدايرة وشاله وقال ان مالوش لازمة لانه للمناطق الباردة فقط المهم مؤشر الحرارة بقى تحت ومش بيعلى اكتر من شرطة ومش بتاخد مياه خالص والردياتير بقت المياه فيه نقصة شوىه مش عند الزور ولو زوت المياه بترجع للقربة المهم والاهم انى لاحظت حاجة مهمة ان مروحة الردياتير بتشتغل مع تشغيل الموتور وتوقف مع تبطيل الموتور وانا مش عارف هو ده الطبيعى ولا بندور لما توصل الحرارة عند مستوى معين المهم رحت لكهربائى قالى ان المروحة بتشتغل بالزىت مش كهربا وان فى حاجة اسمها اسكلتش هو اللى بيتحكم فى تشغيل المروحة وتوقفها وان الاسكلتش ده محتاج ترموستات الكوع تانى عاشان يتحكم فى المروحة تانى الميكانيكى قالى العربيه سليمة ومش محتاجة حاجة خالص .. ياريت حد يفهمنى الصح ايه ...دلونى ارجوكم

[ramyhekal]

يعنى هو قالك الثرموستات مصدى ومالوش لازمه وانت صدقته وسيبته يشيله روح ياباشا اشترى ثرموستات زى اللى شيلته وركبه والعربيه هاتبقى زى الفل العربيه اساسا مش هاتلاقيها سخنه ولا فيها اى كفائه للجرى او المشى لان الماكنه بارده على طول

[خالد على]

المهم المروحة كده سليمة ولا بتشتغل امتى؟ ارجو الرد

[ramyhekal]

المروحه سليمه العيب فى الثرموستات اللى شاله ده لو ركبت واحد جديد المروحه هاتشتغل وتبطل فى معادها العادى فقط مش على طول

[mo7a_mo7a]

المروحة فعلا لا تحتاج الثرموستات المروحة دي فيها نظام مختلف تماما عن السيارات الاخري ساحاول شرحه ببساطة قدر الامكان
1- المروحة راكبة مباشرة علي اكس الموتور بواسطة سير ادارة يعي عدد لفات اكس المروحة متناسب طردي مع لفات الموتور بشتغلو سوا ويقفوا سوا وبالتالي طبيعي جدا ان المروحة تقف فور تبطيل العربية حتي لو العربية سخنة مولعة لا قدر الله

2- الريش بتاعة المروحة مستقلة علي الاكس وراكبة علي كلتش فيه تروس وزيت لما العربية تبقي باردة التروس تبقي بعيدة فيدور اكس المروحة بسرعة مع الموتور لكن المروحة تدور بسرعة اقل (تفوت يعين) وكل اما العربية تسخن تمسك شوية بشوية لحد اما تبقي سرعتها = سرعة الموتور علشان كده الحرارة مبتعلاش عندك ابدا لان كل اما تمشي اسرع كل اما المروحة تشتغل اسرع

3- ترموستات الكوع فعلا ملوش لزمة بس لدورة التبريد لكن له لازمة مهمة علشان حضرتك تعرف درجة الحرارة صح

الخلاصة:
1- ابشر عربيتك سليمة 100% ولا يوجد مشكلة
2- ركب ترموستات الكوع تاني
3- نقص المياه نتيجة تسريب في دور المياه اكيد اكيد اكيد اكشف علي الخراطيم والطبات حتلاقي حاجة بتسرب وده اللي بيدخل الهواء للدورة وينطر المية الي القربة او يكون غطاء الردياتير غير محكم


تقبل تحياتي

[خالد على]

شكرا

بجد بجد شكرا على الرد الواضح والرائع ده رغم انه متاخر كتير ولكن شكرا بجد وتقبل تحياتى