صيانة ال 10 الاف للسريون

[معاذ الشرباصى]

السلام عليكم و رحمة الله و بركاته

يوم السبت 9 اغسطس, عملت صيانة ال 10 الاف للعربية

الصيانة تضمنت الاتى:

1- تربيط العفشة
2- رجلشة الفرامل الخلفية + تنظيف التيل الامامى و الديسكات
3- الكشف على السوائل و الزيوت
4- عمل ال rotation الخاص بالعجل

بالنسبة لى كان ملاحظاتى على العربية كالاتى:

1- مكنة الزجاج الامامى, ساعات قليلة تعمل صوت و الزجاج بينزل, و كعادة العربية معايا, رفضت تماما انها تعمل الصوت هناك

2- سألنا على موضوع الباور بتاعى و بتاع على, و مهندس احمد جرب العربيتين لكن مكنش فى فرق بالنسبة له. زيادة عندى لما سافرت, الباور عندى متقلش مع السرعة, قلت لهم على الملاحظة دى, و المفروض لما اجربه اشوف اتحل و لا لأ

3- التكييف كان اداءه اقل, تم الكشف على الفريون, و لم تحتاج الى اى زيادة و تم تنظيف فلتر التكييف و خلافه (خلافه دى لأنى مش فاكر ايه تانى نضفوه صراحة). الاداء احسن نوعا ما.

انا كنت موجود هناك على الساعة 9 و نص تقريبا, و العربية خلصت على الساعة 11 و نص زى الاتفاق

نيجى للتكلفة, كانت عبارة عن:

175 جنيه مصنعيات
10 جنيه شحومات و مستهلكات
18.5 شريبة مبيعات
الاجنالى = 203.5 جنيه

طبعا الرقم انا شايفه كتير جدا, خاصة ان قبل اما اروح كنت سألت حد هى عبارة عن ايه, قال لى انها تربيط عفشة بس.

علشان كده كنت كتبت فى الموضوع دهhttp://www.nilemotors.net/Nile/showthread.php?t=33164 انها حاجة بسيط و التكلفة حوالى 88 جنيه, فبعتذر عن المعلومة الغلط دى

حتى بالحاجات اللى معمولة فوق دى, شايفه رقم كبير

-------------------------------------------------

الملاحظات على مركز الصيانة:

1- مفيش زحمة خالص, يعنى بالرغم ان الناس بتتصل و يحجزوا شهر قدام, الا ان مفيش زحمة. ممكن هما يكونوا مقللين العدد, لكن فى المقابل العربية خلصت اسرع , و خرجت متنضفة من جوا و برة

2- اعداد الماتريا بقت مش قليلة و كانت اغلبية فى اليوم ده, منها اللى لسه مرخص و منها القديم

3- طبعا ما زال ميعاد ابو رواش مبهم, و م/محمد عبدالصمد مدير المركز بيتوقع انه يخلص على مارس 2009

-------------------------------------------------

طبعا موضوع الساعة بتاع الخبط اللى فى العربية

هكتب تفاصيله, و تفاصيل الحوار مع م/احمد عبدالوهاب و م/محمد عبدالصمد

طبعا م/احمد عبدالوهاب قام بالواجب و زيادة فعلا و الراجل فعلا بيكن للناس اللى من نايل موتورز كل احترام و تقدير و انا فعلا كسبت معرفة شخصية زيه

[معاذ الشرباصى]

نسيت اذكر اخبار العربية بعد الصيانة:

1- العفشة احسن بعد التربيط, و ان كانت عندى بتهبد شوية عن عربية على , و ده لاحظه م/احمد

2- التكييف اداءه احسن الى حد ما, و ان كان ممكن يبقى احسن لو مكانتش لونها اسود

3- الفارمل احسن كتيييييييير

4- الباور مقدرش احكم, غير لما اجرب على سرعات عالية, و طبعا مش اليومين دول علشان الرادارات اللى فى كل حتة

5- الزجاج عمل الصوت ده مرة واحدة, بس مش عارف عمل ايه معاه

[hazem_khidr]

عقبال صيانه المليون يا ميزو يا رب:)
بالنسبه للتكييف حتلاقيهم نضفوا الفلتر و السربنتينه .
اما الاسعار فبصراحه غاليه جدا
المصنعيه للشغل دا في الياريس مثلا بتبقي في حدود 70 جنيه من غير رجلشه الفرامل .
مستني موضوعك عن صوت الدركسيون و اتمني يكون لقيت حل للموضوع دا

[ahmedelhamf]

شكرا علي التقرير المفيد
في انتظار موضوع الساعة
ان شاء الله يتحل

[Sharky]

الحمد لله إن العربية إتحسنت على الاول يا معاذ
بالنسبة للمبلغ انا شايف فعلا إنه غالى شوية و خاصة إن فى الميجان صيانة الخمسات إللى مافيهلش تغيير زيوت بتبقى ببلااااش
يعنى 10 و 20 و 30 بفلوس و 5 و 15 و 25 ببلاااش و بيتعلم فيها الكلام دا

[أبو عبدالله]

أولا مبارك عليك يا معاذ
وربنا يباركلك في العربيه ان شاء الله

المهم شوف يا سيدي مسالة صوت الزجاج ده بيبقى سببه المجرى اللي بيمشي في الزجاج اللي هيا جلد
وده لما بتنشف شويه ويبقى بينها وبين الزجاج تراب او رزاز كده بيتعمل الصوت ده وده بيبقى من الغسيل لأن الميه بتخلي التراب يدخل جوده
كل ما هو عليه انك تنضفها بحاجه كويسه وتمشي عليها قطنه بأي نوع من انواع الملمعات بتاعت التابلوه مثلا او الأسبراي بتاع لتزييت

الحمد لله إن العربية إتحسنت على الاول يا معاذ
بالنسبة للمبلغ انا شايف فعلا إنه غالى شوية و خاصة إن فى الميجان صيانة الخمسات إللى مافيهلش تغيير زيوت بتبقى ببلااااش
يعنى 10 و 20 و 30 بفلوس و 5 و 15 و 25 ببلاااش و بيتعلم فيها الكلام دا

أحمد بك حبيبي خلي الميجان بعيد دلوقتي علشان هما في الصيانات اللي بياخدو فيها فلوس بياخدو فلوس تالت ومتلت كمان بحق كل اللي فات
والنتيجة بالاجمالي مش فرداني

[Sharky]

أولا مبارك عليك يا معاذ
وربنا يباركلك في العربيه ان شاء الله

المهم شوف يا سيدي مسالة صوت الزجاج ده بيبقى سببه المجرى اللي بيمشي في الزجاج اللي هيا جلد
وده لما بتنشف شويه ويبقى بينها وبين الزجاج تراب او رزاز كده بيتعمل الصوت ده وده بيبقى من الغسيل لأن الميه بتخلي التراب يدخل جوده
كل ما هو عليه انك تنضفها بحاجه كويسه وتمشي عليها قطنه بأي نوع من انواع الملمعات بتاعت التابلوه مثلا او الأسبراي بتاع لتزييت



أحمد بك حبيبي خلي الميجان بعيد دلوقتي علشان هما في الصيانات اللي بياخدو فيها فلوس بياخدو فلوس تالت ومتلت كمان بحق كل اللي فات
والنتيجة بالاجمالي مش فرداني

أبو عبدالله حبيبى أسعار صيانة الميجان مقاربة و يمكن كمان أقل فى صيانات لو حتقارنها بالسيفيك و الكرولا
يعنى أسعر الصيانة طبيعية للفئة دى و ما بيخدوش حق الصيانة مقدم

[معاذ الشرباصى]

شكرا ليكم يا جماعة

موضوع الصيانة المجانية ده متبع فى رينو و كيا و هيونداى, خاصة انها عبارة عن مصنعية بس, و مفيش اى قطع غيار بتتغير

فلازم يراجعوا نفسهم, لأن دايهاتسو مشهورة انها اقتصادية فى التشغيل, و صيانتها مش غالية.

ده حتى الصيانة ال 5 الاف, كانت فى اوبل ارخص منهم

انا عن نفسى هتصل ب 16168 و هبلغهم بالموضوع ده فى الشكاوى, و هقول لهم على سعر الصيانة فى التوكيلات التانية

---------------------------------------------------

بخصوص موضوع الساعة:

انا اتكامت فى الموضوع مع م/احمد عبدالوهاب و م/محمد عبدالصمد مدير مركز الصيانة

العيب ده موجود فى الماتيريا و السريون, من كام شهر فاتوا كان فى ناس من اليابان موجودين و جربوا العربيات, و سمعوا الصوت

المفروض ان فى وفد من المصنع هيجى فى شهر سبتمبر

هما اكدوا ان الموضوع هيتعمل هيتعمل, مش عاوزين يدوا ميعاد علشان لو حصلت ظروف, لكن لو الموضوع حصل فيه اى حاجة, هيعملوه على حسابهم بدون انتظار موافة من اليابان

م/احمد اكد لى ان لو اتعمل فى الضمان على حساب اليابان, هيبقى فيه ميزات اكتر, بس معنديش تفاصيل اكتر

اكدوا كذا مرة ان الموضوع مش مؤثر على علبة الدركسيون, او الامان بتاع العربية, و الدليل ان م/احمد بالرغم من علمه بالصوت ده, الا انه حاجز لنفسه عربية 1.5 مانوال سبيشال اوردر , و هيستلمها قريب, حتى قال لى جملة " مش لو من باب اولى لو الموضوع مؤثر على العربية, مكنتش جبتها لنفسى؟"

يبقى الخلاصة, هنستنى التفاصيل بعد شهر 9, و ان شاء الله الله الموضوع يتحل على خير

[ahmedelhamf]

9-2008
شكر جزيلا
انا ان شاء الله رايح صيانة الالف 18- 9 وهاسال برضه اخر الاخبار

[معاذ الشرباصى]

9-2008
شكر جزيلا
انا ان شاء الله رايح صيانة الالف 18- 9 وهاسال برضه اخر الاخبار

حضرتك بس ابقى قول لمهندس احمد عبدالوهاب انك من نايل موتورز