حاجه تكسف .. ممكن واسطه من ثقات المنتدى ...

[م. تيمور]

السلام عليكم ورحمة الله وبركاااااااته
اولا انا محرج طبعا .. بس احكيلكم .. انا جه معاد صيانة الخمس آلاف كيلو وكلمت الصيانه على الرقم 16168 وحددولي المعاد يوم الثلاثاء 23 سبتمبر يعني بعد شهر من دلوقتي :(
طبعا انا موسوس جدا وبخاف العربيه يحصلها حاجه لو ماراحتش الصيانه خصوصا انها عامله 5300 كيلو تقريبا عشان كنت في الساحل الشمالي هاريها مشاوير ..
ارجو مساعدتي ان امكن والتوسط لي عند التوكيل عشان يدوني معاد اقرب شويه انا والله العربيه تقريبا خايف اتحرك بيها ومحبوس ..
اعتذر عن اي ازعااااااج ومكسوف جدا .. لكن عشمي بقى فيك كبير ...

[أبو عبدالله]

متقلقشي عادي يعني مش هتأثر ان شاء الله

بس انت بتعمل اد ايه في الشهر مثلا مع الحفاظ شويه ؟؟؟؟؟

[م. تيمور]

متقلقشي عادي يعني مش هتأثر ان شاء الله

بس انت بتعمل اد ايه في الشهر مثلا مع الحفاظ شويه ؟؟؟؟؟

استاذي ابو عبد الله كل سنه وحضرتك بخير ورمضان كريم قبل كل الناااس مايقولوهالك :)
انا استلمتها من 3 شهور وعملت 5000 كيلو قول المعدل تقريبا 1500 كيلو في الشهر ..
هما ليه بيدوا مواعيد بعد شهر .. كثير اوي :)
كمان عاوز اسأل عن كماليات تيريوس 7 راكب عاجباني اوي اوي واقصد الغطاء الاستبن المعدني والاستيكر الجانبي هل موجودين عندهم ..
معلش بزعجك لكن ده العشم محمد بك ...
تحيتي لشخصكم الكريم ..

[أبو عبدالله]

هيا المواعيد تقريبا علشان ميحصلشي زحام والعربيه تدخل في ميعادها بالظبط وتخلص بسرعه فمريحين المواعيد يعني
واكيد في ضغط والمكان مش مساعد لأنه مش كبير


اما بخصوص التيريوس اللونج دي
فمش عارف ممكن تسال
بس انا مش عارف هو الغطاء ده بتاع الخليجي ولا بتاعت الوكيل هنا
انا شوفته وهو فعلا جامد
ولكن مش عارف بتاع الخليجي ولا بتاعت مصر

[MoToRiZeR]

علي فكرة اللي بيحصل ده تهريج بجد .. يعني إيه الحجز كمان شهر و كمان حظر للصيانة برة !!

[م. تيمور]

تسلم لي استاذ ابو عبد الله وجزاك الله عنا كل الخير
انا حسأل بكره عن الكماليات بتاعت اللونج هل موجوده هنا والاسعار وحرد عليكم هنا ان شاااء الله
تحيتي للجميع ..

[osama_alam]

لو عاوز تعملها في اسكندرية انا تحت امرك :-)

[م. تيمور]

لو عاوز تعملها في اسكندرية انا تحت امرك :-)

كلك زوق والله وجزاك الله كل الخير ..
وانا لو حفوت على اسكندريه حبلغ حضرتك قبلها بوقت كافي ان شاااء الله
اشكرك .. وتقبل مني كل حب واحتراااام ..

[م. تيمور]

تسلم لي استاذ ابو عبد الله وجزاك الله عنا كل الخير
انا حسأل بكره عن الكماليات بتاعت اللونج هل موجوده هنا والاسعار وحرد عليكم هنا ان شاااء الله
تحيتي للجميع ..

انا سالت عن الغطاء الاستبن الفيبر قالولي موجود وتمنه 840 جنيه و10 % ضريبة يعني قولوا 925 تقريبا
الاستيكر مش موجود
انا اشك ان الغطا اللي عندهم هو نفسه الغطا الجميل بتاع اللونج
دي لازملها زياره .. وحرد عليكم ان شاااء الله ..
تحيتي للجميع ...

[AhmedElsayed]

هى حاجة مستفزة جدا
انا حجزت برده قبليها بشهر والجميل انى كنت قاعد وسامع واحد بيكلم صاحبه من موظفين الاستقبال وبيقولوا " ايه يا عم العربية مدخلتش ليه" قاله " معلش حتدخل دلوقتى"
قاله " فى عربيات دخلت قبلى"

قاله " مهما دول حاجزين"

بجد الحكاية دى مش حيتسكت عليها ولو حصل مرة تانية واتصلت وقالولى شهر حعمل شكوى فى حماية المستهلك وحبعت لديهاتسو بره

انا مالى انهم عمالين يبيعوا فى عربيات وعاملين مركز صيانة واحدة
وياريت محدش يقولى هما بيخلصوا مركز صيانة القطامية ولا فى اسيوط حتى

[hazem_khidr]

ممكن التوكيل يبقي عليه زحمه
الاضمن ليك انك تحجز قبلها بفتره
و ما تقلقش من الميعاد
انا عامل صيانه ال 5000 في الياريس لما عملت 7500 كيلو

[Sharky]

الحل لتوكيل دايهاتسو للتغلب على طول مده حجز الصيانة هى التعاقد مع عدد من مراكز الصيانة لتكون معتمدة لهم كما فعل العديد من التوكيلات فى مصر وذلك للتغلب على حل هذه المشكلة حتى يتم إفتتاح مركز صيانة أبورواش

[osama_alam]

الحل لتوكيل دايهاتسو للتغلب على طول مده حجز الصيانة هى التعاقد مع عدد من مراكز الصيانة لتكون معتمدة لهم كما فعل العديد من التوكيلات فى مصر وذلك للتغلب على حل هذه المشكلة حتى يتم إفتتاح مركز صيانة أبورواش

مهو هما عاملين كده في الاسكندرية :) رزق اصلا تويوتا

[Sharky]

طب هل عاملين كده فى القاهرة ؟؟

[MoToRiZeR]

هما مش كانوا قالوا ابو رواش هيفتح في سبتمبر ؟