دعامات التريوس والمرور

[hezakaria]

أعزائي اعضاء المنتدى (وخاصة مالكي التريوس)...
انا عندي تريوس ، وقد قمت بتركيب طقم دعامات كامل بالتوكيل بحوالي 4 الآف جنيه من 6 شهور . ولكن مع كل لجنة مرور أو أمين عايز شوية فلوس يتم سحب رخصة السيارة، و لكي استردها أذهب للمرور وأدفع اللي فيه النصيب. فهل في حل للمشكلة دي؟ أرجو المساعدة من خبراء المنتدى. وشكرا

[أبو عبدالله]

اللي انا اعرفه انها مش مخالفه للعربيات الجيب
اي عربيه دفع رباعي ومن فئة الجيب اين كان حجمها لها الحق في تركيب هذه الدعامات
وأظن انه شوية استهبال من بتوع المرور مش اكتر

[hezakaria]

شكراً يا أبو عبدالله على مرورك الكريم وعلى الرد، ولكن هل في شئ يثبت الكلام ده. علشان الواحد للأسف ميعرفش ايه اللي ليه وايه اللي عليه في بلدنا :(

[hazem_khidr]

دي كلها زوائد
و فيها سحب رخص فعلا
الحاله الوحيده المسموح بيها الزوائد دي
انها تكون نازله من بلادها كده
يعني تكون من ضمن مواصفات السياره
زي الفاميه و فوانيس الشبوره

[Ahmed Selim]

حاول حضرتك تروح التوكيل وتجيب ما يفيد أن العربية نازلة كده لو ينفع
لو عرفت روح بعد كده أثبتها على الرخصة وتبقى مشكلتك أتحلت

[Karim_Monir]

اللي اعرفه ان الدعامات دي ليها مواصفات قياسية
لانه لو دخل في اي عربية تانية ملاكي عادية دخلة بسيطة على سرعة 40 كم مثى هايبهدلة
عشان كدة هيا غلط في المرور ولما تيجي نازل الصحرا ابقى ركبها
لكن في وسط المدينة لو دخل في عربية ملاكي عادية البهدلة كلها لصاحب الملاكي

[wawoo]

يا جماعة الماتركس مالية الشوارع و بشوقها مراكبة دفيندر و حاجات عجيبة و هى اساسا ملاكى
يبقى التريوس اللى هى جيب اساسا يبقى ممنوع , طيب و كل الماتريكس دى ماشية ازى

[hazem_khidr]

كل العربيات دي لو ضابط مرور رخم ممكن يسحب رخصه
و فيه ناس تتسحب رخصها و يشيلو الدعامات دي
و يروحوا المرور يفحصوا و بعدين يركبوها تاني
زيها زي الفاميه بالضبط

[Islam_galal]

ممنوعه من المرور
لازم تكون مثبته من توكيل العربية وورق الجمارك إن الدفندرات جزء منها و ليست زوائد

في ناس كتير و ماتريكس و خلافه . . . احنا في مصر يا جماعه

[hezakaria]

شكراً على ردودكم القيمة، ولكن عندي استفسار:
واضح من كلام الأخوة ان الدعامات ممنوعة، طيب ليه في التوكيل مسموح بتركيبها؟
و بما ان توكيل ديهاتسو توكيل محترم ، ليه لا يتم تحذيري من مخالفتها من التوكيل؟
وهل يرضي ربنا اني ارمي 4000 جنيه في الأرض {الدعامات متركبة من كام شهر بس} حسبنا الله ونعم الوكيل...

[hero]

انا سألت في التوكيل ايام ما كنت بافكر اشتري التريوس....وقالولي ترخص الاول وبعدين تيجي نركبها...سالتهم يعني هي ممنوعه قالو ايوة....بس الناس بتركبها...

وبعدين التوكيل مالوش دعوة...هو عايز يبيع ويركب ويكسب وخلاص....

[wawoo]

وبعدين التوكيل مالوش دعوة...هو عايز يبيع ويركب ويكسب وخلاص....

و التوكيل لية مزودش الدفيندر و الكماليات دى على الرخصة و اوراق الجمارك من الاول , و يريح الناس من البهدلة دى

[Dr_Smart]

فعلا 90 % من العربيات الماتريكس مركبة ديفندرات وحاجات عجيبة

معقوله كل ده مخالف ؟؟؟؟؟؟

[MoToRiZeR]

و التوكيل لية مزودش الدفيندر و الكماليات دى على الرخصة و اوراق الجمارك من الاول , و يريح الناس من البهدلة دى

علشان العربية تنزل بسعر قليل و يشد الناس ليها
و اللي عايز يزودهم بعد كدة و رخصته تتسحب هو حر

و يبقي كسب تركيب الديفيندر
و سوق أكبر بالسعر الأقل

مش بتكلم عالديفيندر بس و لكن معظن التوكيلات بتعمل كدة في كماليات كتير

[دموع الثلج]

شكراً على ردودكم القيمة، ولكن عندي استفسار:
واضح من كلام الأخوة ان الدعامات ممنوعة، طيب ليه في التوكيل مسموح بتركيبها؟
و بما ان توكيل ديهاتسو توكيل محترم ، ليه لا يتم تحذيري من مخالفتها من التوكيل؟
وهل يرضي ربنا اني ارمي 4000 جنيه في الأرض {الدعامات متركبة من كام شهر بس} حسبنا الله ونعم الوكيل...

لازم تكون مثبته على الرخصه زيها زى الفيميه
والتوكيل ملهوش دعوه بالمسموح والممنوع فى قانون المرو كانه منفذ بيع للكماليات دى وخلاص

انت كل مشكلتك الان انك تعرف تثبتها على الرخصه ودى قصه المرور لو عرفت تحلها بواسطه او بغيره تبقى مشكلتك انتهت