طلب مسااااعدة شاريد هاتشباك 1300سى سى

[m.fathy]

بسم الله الرحمن الرحيم ..السلام عليكم
دى اول مشاركة ليا فى المنتدى واتمنى مساعدتكم .. انا بصراحة بقالى فترة كبيرة عاوز اجيب عربية فى حدود معقولة فى نفس الوقت تكون اوتوماتيك ومكيفة بس المبلغ اللى معايا كان صعب الاقى حاجة تكون فول اوبشن زى كده .. لحد ماشفت العربيات الشاريد والصراحة شكلها عاجبنى جدا خاصة الهاتشباك والمشاركات اللى فى المنتدى هنا خلتنى اتمسك بيها اكتر بس المشكلة ان المتخصصين فى العربيات دى اجمعوا ان الاوتوماتيك فى الـ 1000سى سى مش كويس وعزم العربية بيضعف وانا مشوارى فى المقطم وما ادراك ما مطلع المقطم !!!
وفى نفس الوقت لما دورت على عربية تكون 1300سى سى تستحمل الاوتوماتيك والتكييف وعزم الموتور يكون اكبر لقيت ان معظم العربيات دى بتكون سيدان .. وبالتالى شكلها مش مقبول بالنسبة لى عكس الهاتشباك وكمان صالونها من الداخل اضيق .
عشان كده انا محتار مابين الشكل والعزم والاوتوماتيك والمانيوال خاصة انى كان معايا من 5 سنوات عربية نيسان مارش 84 هاتشباك وكانت عربية رائعة الصراحة قعدت معايا 3 سنين ماروحتش فيهم لمكانيكى غير مرتين غيرت فيهم طقم سيرفيس بس لانها كانت 1000سى سى وماتورها كان خفيف شوية لما نقلت المقطم لما بيكون راكب معايا ناس كنت بحس انها هاتقف على المطلع وكل شويه اجيب الغيار الاول عشان تجمع وتقدر تطلع .
عشان كده خايف اجيب الـ 1000سى سى فى الشاريد حتى لومانيوال .. فانامحتار جدا بصراحة ومش عارف اعمل ايه !!!

فياريت لوحد يعرف مكان عربية شاريد تكون 1300سى سى وهاتشباك فى نفس الوقت وتكون حالتها كويسة
وكمان ياريت اعرف متوسط السعر بيكون كام .. لانى لما بدور فى المواقع بلاقى نفس الموديل بنفس الامكانيات وفرق السعر بينهم ممكن يوصل لـ 5 او 6 الاف والاتنين بيقولوا شعر فى عربياتهم .
اسف جدا على الإطالة وياريت ماتبخلوش عليه بنصايحكوا .. اخوكوا مزنوق ياجدعان (:

[shiko85]

وعليكم السلام ورحمة الله وبركاته
فكر فعربيات تانيه كبديل لو معرفتش توصل للبرايد المطلوبه و مش لازم هاتش بالك
نيسان صنى 84 - هوندا اكورد 84 - بيجو 205 84 - تيوتا كرسيدا
و لازم تحدد السعر المتاح لان البرايد من 22 - 32 الف تقريبا و فيه عربيات بالسعر ده او اكتر شويه بس هتكون افضل او على الأقل متوفره اكتر

[mo7a_mo7a]

انا ارشحلك تزود شوية وتجيب تريوس 99-2001 فيها كل اللي انت طالبه

[m.fathy]

وعليكم السلام ورحمة الله وبركاته
فكر فعربيات تانيه كبديل لو معرفتش توصل للبرايد المطلوبه و مش لازم هاتش بالك :copy of m-s5:
نيسان صنى 84 - هوندا اكورد 84 - بيجو 205 84 - تيوتا كرسيدا
و لازم تحدد السعر المتاح لان البرايد من 22 - 32 الف تقريبا و فيه عربيات بالسعر ده او اكتر شويه بس هتكون افضل او على الأقل متوفره اكتر

اشكرك على النصيحة .. انا المبلغ اللى معايا 30 الف بس المشكلة انى لودفعته كله فى عربية مش هاعرف اركب فيها اى حاجة لفترة .. عشان كده كنتبدور على حاجة من 25 الى 28 بحيث لوجبت العربية وكانت محتاجة شوية تظبيط اقدر اعمله

[m.fathy]

انا ارشحلك تزود شوية وتجيب تريوس 99-2001 فيها كل اللي انت طالبه

ياريت يا استاذ سامح (: بس للأسف الميزانية ماتسمحش .. واشكرك على الاهتمام والرد (:

[mohamed_rhem]

هات سيريون موديل 2000 ومش هتندم

تعملها في حدود الميزانية اللي انت عامل حسابك عليها

[m.fathy]

هات سيريون موديل 2000 ومش هتندم

تعملها في حدود الميزانية اللي انت عامل حسابك عليها

السلام عليكم يا استاذ محمد .. على فكرة لو فيه حد شبطنى فى الشاريد يبقى حضرتك واستاذ ابوعبدالله لان العربية كانت عجبانى بس اقتنعت بيها اكتر بعدما قرأت كل مشاركاتك ..

وبشكل عام ماشفتش حد اشتكى من العربية غير فى موضوع قطع الغيار انها مش منتشرة وموجودة عند ناس معينة وده بالنسبة لى موضوع انا متعود عليه الى حد ما لانى كان معايا نيسان مارش 84 وحاجتها كانت اقل كتير من الشاريد وبرغم كده تقريبا 3 سنين ما احتاجتش اغير فيها اى حاجة غير الزيت وبعض الحاجات الخاصة بطقم السرفيس
.. بصراحة اليابانى يابانى برضه .. وهو تقريبا نفس الكلام اللى سمعته من ملاك الشاريد ..

انا بصيت دلوقتى على السيريون بناء على نصيحة حضرتك بس لقيت انها برضه 1000سى سى وده من الحاجات اللى مخوفانى من الشاريد فى نفس الفئة لانى زى ماذكرت انا بطلع المقطم يوميا وانا وزنى مش خفيف وكمان بيروح معايا 3 افراد يعنى العربية بتبقى كومبليت

وده كان سبب انى ابيع النيسان لانها لما بتكون العربية محملة كانت بتطلع المطلع بتاع المقطم بالعافية .. بس بصراحة انا مش عارف هو ده بسبب انها كانت 1000سى سى ولا لأن موتورها كان خفيف !!! ياريت حضرتك تفيدنى فى الموضوع ده .

[geo_yacoub]

انا عن نفسي معايا ال 1000 سي سي مانيوال بصراحه عربيه جميله وجرايه ماشاء الله وحاجتها بالمقارنه بالياباني التاني فهي ارخص قطع غيار ياباني وموتورها ال3سلندر 1000 سي سي بس مانيوال تحفه جدا واكيد ال 1300 اجمل بس مجربتوش
علي العموم اتكل علي الله وشوف واحده يكون حالة موتورها حلوه وان شاء الله تطلع معاك انشلا تطلع بيك لحد باب البيت :d :d

[m.fathy]

انا كلمت شخص دلوقتى كان عارض عربية شاريد 1300سى سى مانيوال على 21 الف سعر نهائى من حوالى 3اسابيع ..

قالى العربية موجودة بس عملت فيها تعديلات وسقطت موتور شاريد استيراد 97
1600سى سى وسعر العربية حاليا 25 الف نهائى !!!

مش عارف اروح ابص عليها ولا موضوع تسقيط موتور موديل تانى وكمان 1600سى سى ده مش هايبقى كويس ومش عارف كمان اخبار قطع غياره ايه وهل هو يتناسب مع مع هيكل العربية ولا ايه ؟؟؟

فى انتظار افادتكم ..

[m.fathy]

ربنا يباركلك فى عربيتك ويرزقك بسكنه فى المقطم زى حالاتى وابقى ورينا هاتوصل لباب البيت إزاى .. ساعتها هاتركن فى السيدة عائشة وتكمل بالميكروباص (:

بس انا فعلا عاوز اعرف معلومة هو فعلا العربيات الـ 1000سى سى المستعملة ماتقدرش تطلع المقطم وهى محملة ولا انا كان بيحصل معايا كده بس عشان الموتور بتاع النسان اللى كانت معايا كان خفيف ؟؟؟

لأن لوالموضوع طلع انه كان بسبب الموتور الخفيف هايحل بالنسبة لى ازمة لان ساعتها مش هاكون مضطر ادور على موديلات معينة .

[active]

ممكن مازدا 323 لو حالتها نضيفة هاتتبسط منها أوى