تجربة تيريوس 2014

[ahmedbadran]

السلام عليكم
دا اول موضوع ليا عالمنتدى و حبيت احكي تجربتي النهاردة مع التيريوس 5 راكب ال2014 glx limited لان في ناس كتير سالت عليها..
انا ركبت العربية النهاردة مسافة 150 كيلو تقريبا على سعة متوسطها 90 تقريبا و بعدها مشوار جوة المنصورة ع سرعة 30 تقريبا او اقل .. المهم ..
نخش في المزايا و العيوب عطول..
اولا المزايا ..
1. طبعا العربية عالية و بالتالي مش كل مطب من مطباتنا المحترمة هنزل اقيسه قبل معدي عليه
2. العفشة مش بالنشوفية الجامدة ولكنها مش ناعمة برضه ..
3. التكييف كويس سواء مع سؤعة او لا ولا يؤثرعلى الاداء بقدر كبير..
4. التقفيل كويس الى حد كبير والخامات
5. استهلاك البنزين كويس
6. مساحات تخزين داخلية
7. العزل كويس و العربية سحبها كويس جدا. .
8. في زرار ف الفتيس بيفصل الموتور بحيث العربية تسقط غيارات سواء عند التسارع او التباطؤ لاستخدامه في الحالات الطارئة

.................
العيوب بقى .. انا شايف ان العربية متعبة الى حد ما في حاجات بتستخدم كتير..
1. المراية اللي في النص المفروص تترفع فوق شوية .. بحس ان في مسافة كبيرة بتكون فيها العربية اللي هتعدي من جمبي غير مرئية ليا !!
2. الفرامل بحس اني عايز افط عشان اجيبها من فوق و بعيدة عن دواسة البنزين !!
3. ازاز شباك السواق بينزل اوتوماتيك لكن مبيطلعش اوتوماتيك .. مع ان العكس كان المفروض عشان انا قاعد في العربية مش مهم انما وانا نازل لما افتح الشباك لازم افضل مستني سعادته..
4. اعتقد الراديو مبيلقطش الاشارة بالقوة المطلوبة حتى بعد تركيب الانتنة
5. المسافة بين الكرسيين ادام كبيرة كان ممكن تقل شوية في سبيل ان الكراسي تكون اريح ..
6. العربية ضيقة الى حد ما و دي حاجة معروفة عن الكروس اوفر عموما ..
7. بحس ان الوكيل عنده شوية نتانة لا مؤاخذة يعني .. لما كل سنة يفضل يفصص في الكماليات عشان يزود السعر و يقلل الكماليات.. و مستخسر يلزق الاستيكر اللي كان بينزل في الموديلات القديمة عشان اروح اجيبه ب 250 جنيه .. مش مستاهلة انه يحرم العربية من المنظر الشيك اللي بيضيفه عشان 250 جنيه !!
8 . الثبات بيقل بشكل ملحوظ بعد ال100 و اعتقد ان النعومة الزايدة في الباور بتاع الدركسيون ليه دور..
9. مفيش دواسات ..
ياريت حد من اللي معاهم موديل 2014 يقول رايه في الكلام اللي انا كاتبه وهل هو متفق معايا ولا ايه الوضع ؟؟

[Omar Mahmoud]

شكرا لنقل التجربة

[Hazeeeeem]

مشكوووور يا باشا
وربنا يباركلك فيها

[ahmedbadran]

شكرا ليكو و ربنا بارك فيكو

[amz2011]

متابع

[ahmedbadran]

ع فكرة انا ركبت الجراند و الصغيرة .. ال5 راكب اوسع في الكرسيين اللي قدام .. و اللي مكبر الجراند هو الكرسي التالت انما هي ضيقة من ادام

[mohamed_rhem]

المفروض الفيس ليفت تنزل قريب

[automea]

ماشاء الله لا قوة الا بالله ربنا يباركلك فيها

[J A G U A R]

شكرا لنقل التجربه
ربنا يباركلك فيها

[ahmedbadran]

النهاردة كنت مع واحد صاحبي معاه تيريوس 2009 ركب عربيتي .. و كانت ملاحظاته .. عنده ف ال2009 مكان للنضارة ف السقف انا معنديش .. عنده جهاز انذار .. عنده فوانيس عيون .. عنده الازاز قدام بينزل بتكه واحدة اوتوماتيك .. عدة كاملة مع العربية و منفاخ .. سي دي تويوتا
طبعا الكلام دا كله مش عندي .. و هذا و ان دل فانما يدل على تخلف واضح و جشع من الشركة .. يعني بدل متزودو كماليات و انتو اصلا معملتوش حاجة جديدة في العربية .. يقومو ينفضو العربية !!

[mo7a_mo7a]

شكرا لنقل التجربه

[ahmedbadran]

ماشاء الله الواحد كل يوم بيكتشف حاجات ظريفة اوي ف العربية ..
يعني بغض البصر :d عن مكان دخول المفتاح اللي بيحتاج واحد بيعرف ينشن عشان يجيبه .. امبارح بالصدفة ببص عالباب بتاعي لقيته مش مقفول كويس .. فاستغربت ان مفيش اي تنبيه ولا حاجة تقول ان الباب مفتوح !!
دا الكرولا ال 97 كان فيها الاوبشن دا اللي دايهاتسو بتعتبره رفاهيات زايدة !!!!!!!!!!!!!!!

[ahmedbadran]

من يومين نزلت اشيك عالزيت و زيت الفتيس و الميه .. انبهرت بصراحة من مكان السيخ اللي بيقيس الزيت و طريقة سحبه و تركيبه .. و كمان زيت الفتيس .. تحس ان اللي عاملهم واحد عربجي معندوش فكرة عن البطيخ :d
السيخ لما تشده بيخش بتنيه كدا جوة مكانه و يطلع بصعوبة برضه .. مع انه المفرض يكون مفرود و مفيهوش التنيه دي !!

[S O P H O S]

مشكوررر عالتقيم