تغيير صرة عجل سريون وشكرا مهندس سيد الفراش

[Karim_Monir]

السلام عليكم ورحمه الله
كنت في التوكيل كشفو علي العربية وانا بغير طقم الدبرياج قالي في صوت ونه وطلعت صرة خلفية
عرفت ان تمنها الفين وشوية الصرة الواحدة بدون ضريبة ومصنعية
الفلوس مكنتش مظبطة وطلعت علي الخبير م.سيد الفراش
قولتله علي الموضوع لقيت الصرة جاهزة علي الاستاند مستنية التركيب :-)
تمن الصرة الف جنيه استيراد وكانت حالتها ممتازة
بصراحة لفيت لفة برة لقيتها في مكان تاني ب 1200 :-)
ومهندس سيد بص علي العربية بصة سريعها وكان في رجه خفيفة عشان ودني حساسة قالي دي بدايات قواعد موتور سيبها شوية موتور ال 3 سلندر صغير وخفيف مش هاتعمل حاجة خاصة ان المدام لسه رجلها تقيلة علي العربية فنبقي نغيرها قدام شوية
ظبطو الصرة وغيرو البوجيهات الايريدوم الجديدة وعملو الخصم الواجب :-)
مهندس سيد متابع جيد جدا لنايل موتورز
واللي يروحله يطلب الخصم :-)
هو مش هايعملكم خصم بس تبقي حاولت :-)
نيههههه

خالص تحياتي للاحترافية في التعامل

[Gelgel2004]

مبروك يا كريم باشا
بس الصره ليه غاليه فى الدايهاتسو كدة ؟

الف مبروك تانى و ربنا يكفيك شر طريقها

[mohamed_rhem]

المهندس سيد رجل زوق جدا وقمة الادب والاحترام

وبيعمل الواجب مع اي حد من نايل موتورز

[Karim_Monir]

اه غالية جدا مكنتش متوقعها عاملة الرقم ده اطلاقا

[AbO MosTaFa]

ممكن رقمة ومواعيدة ومكانة يا أ/ كريم

مكانة بالنسبة للورشة عندك؟

[Karim_Monir]

مكانة وانت داخل الحرفيين لو ورشتي علي شمالك تحت كل علي طول في جامع في وشك هو ورا الجامع علي طول اسمه مركز الفيروز للاسف معرفش مواعيدة ولا تليفونة لما بعوزه بروحلة علي طول والمركز فاتح علي طول ومليان اسطوات

[AbO MosTaFa]

تمام هو شغال في الديهاتسو بشكل خاص

عشان انا عايز انضف الحساسات واغير زيت الفتيس و سير المجموعة واربط العفشة

[bmya]

معلش يا دكتور انت حاسس بلخبطه في العربيه ؟
نصيحه لو العربيه مفهاش لخبطه متلعبش في حاجه غير زيت الفتيس وبس ولو عاوز يعني نضافه يبقى نضف البوابه باسبراي وشكرا

[AbO MosTaFa]

معلش يا دكتور انت حاسس بلخبطه في العربيه ؟
نصيحه لو العربيه مفهاش لخبطه متلعبش في حاجه غير زيت الفتيس وبس ولو عاوز يعني نضافه يبقى نضف البوابه باسبراي وشكرا

استهلاك البنزين عندي خرافي ياعني ال 5 ليتر لو كملوا 30 كيلو يبقي فلة اوي

والعربية بدات تترج جامد والتابلوة يتهز وانا علي ال d ودايس فرامل

والصراحة حاسس اني لو رحت التوكيل مش هايعملوا حاجة ومش هاعرف اتكلم معاهم كتير في النقطة دي لان العربية مش فيها اي حاجة علي الكومبيوتر

[bmya]

طيب الرجرجه دي ممكن تكون قواعد موتور خفيفه لو هي رجرجه جامده لان اصلا على D مهع فرامل لازم يكون في هزه خفيفه
لكن على ال N في رجرجره ولا لاءه ؟ وال rpm ثابت وانت واقف على N ولا بيتهز او بيطلع وينزل ؟ ده المهم ومع التكييف الrpm بيعلى ولا لاءه
لو في حاجه من دول مش مظبوطين يبقى غير فلتر الهواء لو مكنتش غيرته ونضف البوابه لو ماظبطتش تنضف حساس الايدل فقط وان شاء الله هتظبظ انا كل فتره بنظف البوابه هي حوار بسيط جدا ممكن تعمله بنفسك والايدل برده ممكن تفوكه وتنضفه بنفسك مش حوار كبير لكن لو مش هتعرف يبقى اي ميكانيكي يعملك الحوار ده شوف وعرفنا عملت ايه

[AbO MosTaFa]

طيب الرجرجه دي ممكن تكون قواعد موتور خفيفه لو هي رجرجه جامده لان اصلا على d مهع فرامل لازم يكون في هزه خفيفه
لكن على ال n في رجرجره ولا لاءه ؟ وال rpm ثابت وانت واقف على n ولا بيتهز او بيطلع وينزل ؟ ده المهم ومع التكييف الrpm بيعلى ولا لاءه
لو في حاجه من دول مش مظبوطين يبقى غير فلتر الهواء لو مكنتش غيرته ونضف البوابه لو ماظبطتش تنضف حساس الايدل فقط وان شاء الله هتظبظ انا كل فتره بنظف البوابه هي حوار بسيط جدا ممكن تعمله بنفسك والايدل برده ممكن تفوكه وتنضفه بنفسك مش حوار كبير لكن لو مش هتعرف يبقى اي ميكانيكي يعملك الحوار ده شوف وعرفنا عملت ايه

هو انا معتقدش انها قواعد موتور لان الموضوع بدأ بقالة اسبوع بعد استعمال منظف رشاشات

علي ال n العربية عادية ودة بيقول اكتر انها مش قواعد

الار بي ام بينزل اوي مع التكييف ومع الفرامل علي وضع ال d

[Karim_Monir]

انت استعملت منظف رشاشات ايه واستعملتة ازاي
الطريقة بالتفصيل ؟؟

[AbO MosTaFa]

انت استعملت منظف رشاشات ايه واستعملتة ازاي
الطريقة بالتفصيل ؟؟

انا استعملت سوناكس وحطيته وانابفول العربية في نص التفويلة

ومشيت مسافة طويلة وكنت بحاول احرق علي الغيار

[bmya]

طالما الار بي ام بينزل مع التكييف يبقى كده حساس ايدل غالبا عاوز يتنضف عموما بسيطه ان شاء الله
بص يا دكتور نضف البوابه وحساس الايدل بس لو الميكانيكي هيفوك حساس الاديل فوك كابل البطاريه خالص عشان كومبيوتر العربيه ممكن يقرأ عطل فاصل البطاريه