عن السيريون

[mnegypt]

السلام عليكم
أن معجب جدا بالدايهتسو سيريون
بس في نقطتين قالقيني
1- أرتفاع السيارة عن الأرض و المطبات في مصر (خصوصا لو السيارة فيها 4 أو 5 أفراد)
2-سعر أعادة البيع

أنا بقارن بينها و بين اللنسر الخليجي 1.3 مانيول و الماتريكس

أرجو الأفادة

[معاذ الشرباصى]

ربنا يوفق حضرتك فى اختيارك

اما بالنسبة للنقطتين اللى حضرتك ذكرتهم

1- الارتفاع بتاع العربية مثل باقى العربيات تقريبا, مش زى ما حضرتك متخيل

2- سعر اعادة البيع بالنسبة للموديل ده معرفش, بس الموديلات السابقة كانت ماسكة نفسها فى السعر, و ده متوقع للموديل ده

ابو عبدالله يفيدك اكتر فى النقطة اعادة البيع

[أبو عبدالله]

شكرا لك يا معاذ

وعالعموم هيا عامله في الأرتفاع زي الكورولا كده يعني والله انا من كام اسبوع كنت محملها لعينها وكانت المساعديم مفهمشي نفس خالص يعني على الأخر والحمد لله مكنش اي مطب يجبني يعني العربيه اعلى من العادي يعني لو بقارنها بينها وبين النوبيرا فهيا اعلى بكتير

اما اعادة البيع فأنا لا اعرف لأن مشفتش حد بيبيع
ولكن هيا مش هتبقى زي اللانسر في اعادة البيع وعموما الهاتشباك في مصر مش زي السيدان حيث ان الناس هنا لها نظرة تانيه بشأن ان العربيه لها طول وعرض حتى لو امكانياتها ايه ولكن هيا في الآخر هتفرق كام الف لو مش هتفرق معاك يبقى توكل على الله وعلى ضمنتي ولو هتفرق يبقى خليك في اللانسر طبعا أحسن

وربنا يوفقك وعرفنا انت عملت ايه

[mnegypt]

شكرا علي الرد

شكرا علي الرد
بس لو قارنا بين السيريون و اللنسر 1.3 خليجي مين فيهم هيكون أحسن؟

[معاذ الشرباصى]

لو انت متقبل فكرة الهاتشباك يبقى اكيد السيريون احسن

كفاية الضمان, ده اقل حاجة تخليك تفكر فيها

لانسر خليجى بتبقى من غير ضمان, او ضمان قليل . اما السريون, فالضمان 100 الف او 3 سنين

الوسع واحد, الكماليات فى السريون كتير

توكل على الله, و مش هتندم

[h_hezzah]

ضيف للكلام ده ان اللانسر 1300 الاوتوماتيك ممله ممله ممله!
انا جربت السيريون بتاعة ابوعبدالله. بصراحة ممتعة فى السواقة ومن افضل العربيات الاوتوماتيك اللى سوقتها فى الفئة دى. هى عيبها الوحيد صغر الشنطة لو بتحتاج شنطة كبيرة. بس ده حال الهاتشباك كله واللى مش محتاج شنطة كبيرة بيفضل الهاتشباك لقصرها فبتكون اسهل فى المناورات وايجاد اماكن ركن ....الخ.

وبعدين اللى بيشترى عربية جديدة لو من الاول بيفكر فى اعادة البيع ومركز عليها يبقى مش هايشترى غير لانسر او كورولا.
بس هى مش هاتفرق كتير وخاصة لو ناوى تقعد بالعربية كام سنة

[Ahmed Hassan]

ضيف للكلام ده ان اللانسر 1300 الاوتوماتيك ممله ممله ممله!

بلاش موضوع ان الـ 1300 سحبه ممل ده لحسن حد يقولك ان اللي انته بتقوله ده "فتاوي القهاوي"زي ما حصلي :lol:

[h_hezzah]

بلاش موضوع ان الـ 1300 سحبه ممل ده لحسن حد يقولك ان اللي انته بتقوله ده "فتاوي القهاوي"زي ما حصلي :lol:

انا ما جمعتش وحددت اللانسر خاصة.
ودى بالذات كل الناس اجمعت انها فى الاوتوماتيك مملة جدا واللى بيدافع عنها رأيه: لو انت مش مستعجل وسواقتك هادية مش هاتفرق معاك :roll:

[Ahmed Hassan]

المشكله اني كنت بتكلم على لانسر بردو :shock:

[Nile Heart]

المشكله اني كنت بتكلم على لانسر بردو :shock:

لآ معلش كنت بتتكلم عن الكورولا!

وقلت بالحرف "الكورولا ال 1300 سحبها ضعيف عليها" !!

يعنى ياريتك قلت سحبها ضعيف بالمقارنه بكذا أو كذا !! لآ حددت انه ضعيف عليها

الصراحه انا نفسى اشوف سحب عربيتك شكله ايه ولما تيجى تبيعها هاتجبلك كام فى الميه من تمنها ألأصلى

ياعم الحاج ده موتور الباسات ال 1600 بيطلع 10 حصان بس اعلى من الكورولا على كل حجمها ده! وادى بعض الأمثله التانيه

جيتا: 1600 و 102 حصان (نفس موتور الباسات)
فولفو S40 برضه 1600 و 101 حصان
فيكترا 1600 و 106 حصان
اوكتافيا 1600 و 110 حصان

وكل دول اوزانهم ييجى مرتين الكورولا ال 1300 اللى موتورها بيطلع 92 حصان

اما اذا كنت مقتنع ان الالنترا (الهيونداى) دى فعلآ 121 حصان , يبقى الف مبروك عليك وأحلام سعيده مع غبور اللى بيبيع شركته اليومين دول :)

[h_hezzah]

احب اوضح معلومة برضه لأنى شايف ان ناس كتير بتاخد موضوع الارقام بسطحية قوى. وده اللى الشركات بتلعب عليه فى الاعلانات!

السحب بتاع العربية اللى بيحدده العزم (نيوتن.متر) وليس القدرة (حصان).
وبرضه بيفرق اقصى عزم للموتور عند كام ر بى ام.
يعنى لو موتور اقصى عزم ليه 100 عند 2500 لفة تلاقى العربية سحبها ممكن يكون احسن من موتور تانى عزمه 120 عند 4000 لفة مثلا.
المشكلة بقى ان كل الاعلانات بتتكلم عن القدرة ومابتجبش سيرة العزم .
القدرة اللى بالحصان تفرق بقى فى اقصى سرعة العربية تجيبها. ودى برضه بتتحدد باقصى قدرة عند كام لفة/دقيقة
يعنى ممكن موتور 100 حصان عند 5000 لفة يكون اسرع من 120 حصان عند 6500 مثلا.
طبعا كل اللى انا بقوله ده لو هى نفس العربية ونفس الوزن انما الواقع انا فيه عوامل كتير بيتوقف عليها موضوع السحب واقصى سرعة دى. بس انا حبيت اوضح للى بيبص للقدرة وبس.
دى اخر حاجة تبصلها فى موضوع السحب ده.
واللى مهتم ممكن يتطلع على موضوع سبعاوى اللى كان شرح فيه الحاجات دى

http://www.nilemotors.net/Forum/viewtopic.php?t=744

[Ahmed Hassan]

شكرا على التوضيح يا حازم... وفرت عليا رد طويل.

عموما يا استاذ NILE HEART انا فعلا كنت فاكر اني كنت بتكلم عن الانسر و كمان مش فارقه لانسر او كورولا الاتنين 1300 خصوصا اوتوماتيك سحبهم ضعيف جدا و اعتقد ان ده اللي قلتو في الرساله الخاصه اللي ارسلتها لحضرتك.

بالنسبه للعربيه بتاعتي انا ميفرقش معايا هيه تجيب كام لما تيجي تتباع لأني بشتريها لنفسي.. يعني يهمني ارضي نفسي و بس. لما اخطط اشتري عربيه جديده (زيرو) بعمل بحث كويس علشان اشوف ايه العربيه اللي تلبي احتياجاتي (انا) مش (الناس) اللي هابيعهالهوم (بعد عمر طويل). لو انا هاعمل اعتبار لأعاده البيع فقط كنت اشتريت لانسر مثلا (وعلى فكره هي ارخص من عربيتي) و طبعا اسهل في اعاده البيع.

شكرا على اهتمامك .