سؤال لاصحاب السيريون ضرورى

[mido elsakkar]

بسم الله الرحمن الرحيم
ياجماعه انا بعت السيراتو اللى كانت معايا وجبت سيريون
موديل 2010 ماشية 87000 كم
العربية كويسة الحمد لله
بس فى حاجة فى العربية انا مش فاهمها وكمان لاقيتها فى كذا عربية سيريون بتاعت ناس اصحابى معاهم العربية دى
المشكلة بقى انى بلاقى العربية وهيا على سرعة 80 وانتا طالع لغاية ال100 او ال110
بلاقى رجة فى العربية وبعد كده بتروح
انا قولت ترصيص ورصرصت العربية مع العلم ان الرجة مش فى الدريكسيون بتبقى فى العربية نفسها
انا لاقيتها موجودة برده فى عربيات اصحابى واستغربت الحقيقة
ياريت اى حد معاه سيريون يقولى هل ده طبيعى فى العربيات دى بالنسبة اللى حاسسها فى عربيته
واللى ميعرفش ياريت يجرب عربيته ويشوف

[kantofanto]

متابع

[mido elsakkar]

انا بصراحة شكيت فى كذا حاجة
طنابير بس معنديش هزة مع دوسة الفرامل
الجنوط كويسة
الكاوتش جديد
انا شاكك فى الاكس بتاع الكوبلن بس برده مش عارف
قواعد فتيس برده مش عارف
ياريت اى حد يقولى المشكلة دى فين ولا دى حاجة عادية فى العربية دى

[bmya]

اول مره اسمع الشكوى دي العربيه قعدت معايا من 2008 ل 2014 بعتها ماشيه 91500 ومكنش فيها الاعراض دي راجع اي عفشجي وشوف هيقولك ايه

[أبو عبدالله]

الرجة دي في العفشة ولا في الماتور

[mido elsakkar]

الحمد لله تم حل المشكلة وكانت تغيير الجنوط بجنوط سبور مقاس 14 وترصيص
بس ترصيص عند واحد كويس لانه بعد ما رصرص ركب الفردة فى العربية ورفع العربية على كوريك وجربها عملى وعمل كمان شوية تعديلات فى الترصيص على الرغم من ان الجهاز عنده ظبط الفردة وكمان عمل الترصيص الناحية اللى بره عملها ترصيص لزج والترصيص اللى جوا عملها ترصيص دق اللى هوا بيتحط فى الاطار من بره
والرجل ده موجود فى ميدان المطرية واسمه صقر

[mohamed_rhem]

الحمد لله انها اتحلت

ممكن تقارن لينا السيريون بالسيراتو

يعني حاسس بفارق

[mido elsakkar]

والله انا شايف ان السيريون عربية جميلة ومحترمة وميزتها ان محدش عارف قيمتها الحقيقية يعنى مافيهاش الطمع
المقارنة بين السيراتو والسيريون
1- من حيث الموتور انا شايف ان مافيش فرق بينهم
2- العفشة الاتنين واحد ناشفين شوية ماعدا ان العيب الوحيد اللى فى السيريون هيا علبة الدريكسيون علشان الباور بتاعها كهربة مش زيت زى السيراتو وللاسف الباور الكهربة مش معمر معانا فى بلدنا بفضل الطرق والدغدغة
3- الصالون السيريون اوسع من السيراتو وقعدة السيريون بستريح فيها عن السيراتو بكتير
4- الشنطة طبعا السيراتو اكبر
5- التكييف السيراتو اقوى شوية بس بردة السيريون مش وحشة
6-وسائل الامان الاتنين زى بعض بس ميزة السيريون ان اول فئة فيها ب2 ايرباج انما السيراتو زى اى عربية كورى وسائل الامان عندهم حاجة ترفيهية مش اساسية
7- الثبات السيراتو تكسب لكن برده السيريون ثباتها حلو جدا انا امبارح كنت على طريق السويس مشيت بيها 150 و160 ولا كلمة
ميزة السيريون انها فى الزحمة بتقدر تطلع من اى حتة بفضل حجمها الصغير
مشكلتى مع السيراتو انى كنت بخاف عليها جدا علشان كانت للاسف فيها الطمع من السرقات اللى كنت بسمعها