سؤال عن دبرياش السريون ؟؟ ؟

[hitham_sh]

كنت يوم الاحد الي فات في التوكيل كنت بعمل صيانة 30000 كلم وانا بعمل الصيانه قولتلهم ان الدبرياش تقيل جدا وياريت لو يبصو عليه ولو ينفع انهم يخلوه اخف شويه ياريت .
المهم بعد استلام العربيه المهندس قالي انهم زبطولك الدبرياش
لقيتهم وطوى الدبرياش عن الاول بس محستش بفرق في التقل بالعكس ده كان اتقل من الاول المهندس قالي انو مش هيبقى احسن من كده علشان الدبرياش سلك مش على زيت
المهم مشيت ولاكن مع الزحام في الشوارع واستخدام الدبرياش كتير لقيتو بقى اتقل من الاول كتير وبقى يوجع رجلي جدا
وطبعا كنت مكسل ارجع التوكيل لاني ساكن في الهرم
فرحت فاتح الكبوت ودورت على سلك الدبرياش ولقيتو وبصيت عليه لقيت فيه بكره صغيره
اكتشفت مع تحريكها ان البكره دي هيا الي مسؤله عن انها تعلي الدبرياش وتوطيه (( يعني تزود المشوار بتاع دواسة الدبرياش ووتقللو )))
المهم لفيت البكره وخليت الدبرياش عالي عن الاول بشويه حلوين
النتيجه ان الدبرياش بقى اخف كتييييييييير عن الاول والعربيه بقة انعم كتير وكان فيها ناتشه كده وانا ماشي على التاني لما اجي اسيب دواسة البنزين الناتشه دي راحة تماما وكان سعات لما اجي اجيب الاول الفتيس يعض مبقاش يعض خالص يعني الموضوع بقى الطف كتير
بس خايف ان يكون موضوع تعلية الدبرياش ده ليه اثار جانبيه اخرى
مش عارف ايه رايكم اسيبو عالي ولا ارجعو زي الاول ؟؟؟؟؟
وشكرا لحسن استماعكم :)

[MoToRiZeR]

معنديش فكرة الصراحة يا هيثم باشا بس عايز اسألك هي عضة الأولاني دي عاملة إزاي؟ ساعات تيجي تعشقه ميرضاش ييجي ولا بعد ما تعشقه بينطر ؟

[hitham_sh]

لا سعات تيجي تعشقه ميرضاش يجي بقوم جايب تاني وارجع اجيب اولاني يجي عادي
انت عند الدبرياش حاسس انو تقيل ولا عادي

[MoToRiZeR]

دي بتحصل عندي انا برضه و بتعكنن منها خصوصاَ لو حصلت في الزحمة لأن إنت عارف لو إتأخرت جزء من الثانية في التحرك و الشارع واقف الناس كلها مستعدة تسيب أشغالها و تنزل ترنك علقة ، كلكسات و دوشة و تقليب نور غير إنها بتضايقني .

لو كدة و طلع ملهاش أثار جانبية ممكن أعمل انا كمان كدة .. شكراَ علي ردك السريع و مستنيين الإجابة من الخبراء

انا الدبرياج عندي عادي مقارنة بالعربيات التانية اللي سوقتها و مبيعمليش مشاكل في السواقة هي العضة بتاعة الفتيس دي بس .

[hitham_sh]

مقولتليش طيب الدبرياش عندك حاسس انو تقيل ولا عادي

[MoToRiZeR]

إنت رديت و انا بعدل الرد :) هههه انا كتبت الإجابة في تعديل الرد اللي فات
هو يعتبر أخف من عربيات كتير سقتها و اما بسوق الكليو بحس إن هو هو .

[hitham_sh]

اه انا شوفت التعديل بس الظاهر ان احنا اسرع من الازم ههههههههههههههه
ربنا يخليك يا باشا والف شكر ويارب يطلع الموضع ملوش اثار جانبيه لاني امبارح بجد ومن غير اي مبالغة كنت مبسوط جدا من العربيه لدرجة اني كنت حاسس انها عربيه تانيه

[MoToRiZeR]

هيثم باشا انا سألت في الموضوع و عرفت إن اما بتعلي الدبرياج جامد ده بيحمل علي الإسطوانة و بيخليها تتأكل بسرعة لأنك بتبعد الإسطوانة عن الديسك و نقطة فصل الدبرياج بتبقي عالية فا بيفصل بعد وقت عكس ما لو كان واطي و كل ده إنت محمل عالدبرياج .. و إن و هو عالي التجميع بتاع العربية بيقل لأن الدبرياج بيفصل متأخر .. و برضه مستنيين أراء خبراء الدايهاتسو

[أبو عبدالله]

بالظبط كده يا محمود
ده اللي انا كت لسه هرد علي الكلام علشان كده

التعلية دي بالذات انك بتقول انهم خفت النتشه اللي كانت موجوده ده معناه ان الأسطوانة متحمله على الدبرياج يعني بتتاكل طول ما العربيه ماشيه

وده غلط طبعا

النتشة دي بيبقى سببها ان الأسطوانة اول ما ترجع مكانها هيا اللي بتعمل كده
ولما بتنزل الدبرياج براحه بيخلي الحركه دي متجيش بالشكل ده او بالنتشة دي

يعني من الأخر النتشة دي بيبقى معناه ان الاسطوانة مرفوعه من مكانها ولما بتنزل بتعمل كده وده الصح

[hitham_sh]

طيب شكرا ليكو يا جماعه انا على العموم ممشتش بيه كتير انا هرجعو زي ما كان
الف شكر لاهتمامكم وربنا يخليكو لينا :)