جميع ملاك تيريوس او جراند يتفضلو يخشو

[elenawy]

الى جميع ملاك تيريوس او جراند تيريوس ياريت تقولو رايكوا فى ثباتها لاننا تعبنا ناس تقول مش ثابته وناس تقول ثابته
ياريت يقولو رايهم بحياديه
لان فى كذا واحد هنا فى المنتدى عايز يشتريها و انا منهم

[a7med ezz 20]

بص يا باشا العربية فالثبات لحد 120 تمام بعد كدا ممكن تكون ثابتة بس علي الطرق المستقيمة ، انا شخصيا بجيب بيها 140 مستريح وحفظت العربية خلاص ، بس العربية دي كصاج وعفشة ومتانة متتقارنش باي عربية تانيه ففئتها ، متينه لاقصي درجة وعفشة بتستحمل الطرق المكسرة وواسعة جدا وقطع غيارها متوفره وسعرها مش غالي ، العيب الوحيد انها مش متطورة فموضوع الاوبشن والصالون والرفاهية . يارب اكون فيدتك واي سؤال انا تحت امرك

[elenawy]

شكرا يا باشا
ياريت بقية الاعضاء يقولو رايهم

[dodo1086]

معايا التريوس ال 5 راكب أفضل ثبات ليها الى 100 او 110 بعد كده لأ بس انا بجرى بيها على طريق معقول لحد 150 مفيش مشاكل مشكلتها اللى انا شايفها انك لازم بداً من سرعة 80 "تكلبش" فى الدركسيون لأن المطبات الطولية من تـاثير العربيات النقل بتخطفها يمين أو شمال .

[a7med ezz 20]

من الاخر كدا هي عربية مدينه عملية لاقصي درجة ومتينه اوي ومفهاش عيوب ، بس لو بتحب الجري متركبهاش

[Osama_Kheir]

السلام عليكم يا شباب التريوس

حد يقدر يفدني فين اعمل فحص لعربية تريوس موديل 99 قبل ما اشتريها؟

البنزينة فحصها اي كلام و بتقلب و التوكيل غالي بيتكلف 850 جنيه


حد يعرف مركز صيانة كويس و سعره معقول؟

[ebnhalal]

محتار اشتری يارس 2015___ 1500 cc ولا تيريوس الفئة الاولی من غير وسائل امان abs ولا وسائد هوائية ولاضد السرقة لان الفئات الاعلی غالية عليا
ممكن رأيكم مع المقارنة لانی عارف انی يارس فيها كل الكماليات بس حابب اوی شكل ومتانة التيريوس مع العلم انی مش بسافر كتير

[a7med ezz 20]

باشا مينفعش تقارن التيريوس باليارس دي فئة ودي فئة . فالمجمل التيروس عربية حمالة اسية ومتينة وشكلها مقبول

[أبو عبدالله]

هو عموما
العربيات الجيب كلها كده يعني ده شئ طبيعي

[mohamed_rhem]

العربيات العالية كلها كده

مع السرعة العالية والملفات ثبات مش قد كده

مش مشكلة تريوس ولا جراند تريوس

[mido elsakkar]

بص حضرتك
الثبات بعد ال120 مش اد كده بس الحل كاوتش 235/60 جنط 16 بيديها ثبات اعلي شوية
عربية متينة جدا جدا وقطع غيرها معمرة جدا بس غالية شويه وحاجتها بقت متوفرة استيراد او جديد
مش بتاعت شد خالص
ميزتها عالية عن الارض تعدي من اي مطب ولا اي مشكلة خالص
لما تحمل فيها من ورا المساعدين بتبقي خفيفة جدا وده تقريبا في كل العربيات الهاتش باك
الموتور طول ما انتا محافظ علي مواعيد تغيير الزيوت والفلاتر يبقي موتور هيعيش معاك طول العمر
التكييف بتاعها مش اد كده وده للاسف عيب في الدايهاتسو عموما وانتا واقف مثلا مافيش تكييف تمشي شويه التكييف بيشتغل كويس وعرفت ان السبب في كده ان الكباس بتاع التكييف علي نظام ريش مش بساتم فكل ما تزود في الار بي ام بيزيد التبريد ده غير ان لازم تركبلها فلتر للتكييف لانه بتنزل من غير فلتر
اكتر حاجة بتتغير فيها شداد المقص الخلفي وده تمنه تقريبا 700 جنيه

[رامي مصطفى]

السلام عليكم يا شباب التريوس

حد يقدر يفدني فين اعمل فحص لعربية تريوس موديل 99 قبل ما اشتريها؟

البنزينة فحصها اي كلام و بتقلب و التوكيل غالي بيتكلف 850 جنيه


حد يعرف مركز صيانة كويس و سعره معقول؟

لو قريب من الحرفيين فيه مركز الفيروز فاهميين كويس جدا فيها
هناك محمد عبدالجليل شاطر ومحترم
ربنا يوفقك لعربيه حلوه

[dr_haitham79]

تيريوس ولا جراند تيريوس:
حسب افراد الاسرة
لو محتاج 7 راكب يبقي الجراند
غير كده التيريوس اولى لأنها يابانى فى حين الجراند تيريوس تقفيلها اندونيسي

[NADER ISMAIL ELALAILY]

انا معايا تيريوس 2008 مانيوال ماشاء الله سيارة جيدة جدا و لكن عيوبها هى الاكصدام الامامى ضعيف من الجانبين بالنسبة الى الكلبسات بتتكسر بسرعة و ضعيفة
و لكن هى سيارة عالية نسبيا كسيارة suv و ايضا انا مشيت لسرعة 150 كيلو متر و لكن عيوبها صوت الموتور عالى و ده طبيعى و سهلة التحكم فيها و هى صورة طبق الاصل من تويوتا rav4 , نفس الشاسية بنظام التعليق و انا عن نفسى من هواة اقتناء التيريوس