استفسار عن طنابير السيريون

[akarem]

السلام عليكم ورحمة الله وبركاته
ازيكم يا أحبابى أخباركم ايه جميعا
كنت عاوز استفسر منكم عن حاجه
كنت في الصيانة والمهندس قالى العربية محتاجة يتغير لها طنابير وتيل امامى
العربية موديل 2009 منيوال وعاملة 65000 وشوية
تكلفتهم حوالى 3000 جنيه
بس حاسس ان المفروض لسه بدرى على الطنابير
التيل ماشى لكن الطنابير غريبة
يا ترى الكلام ده معقول و الا ايه
وهل يا ترى لازم تتغير على الطول والا فيه خطورة انى امشى بيها كده شوية
انا مش جاهز بالمبلغ طبعا
وهل فيه مكان تانى يكون كويس اجيبهم منه بدل التوكيل احنا عارفين اسعار التوكيل المبالغ فيه
ياريت لو حد يفيدنى في الموضوع ده
ولكم جزيل الشكر

[Mecha]

التيل متفقين يتغير تمام.
الطنابير لو سطحها خشن عالي وواطي هنا بتتخرط او تتغير . اللي بيحدد التغيير التخانه اللي هتفضل بعد الخرط تكون اعلي من المكتوب ع الطمبور عشان مينكسرش. لو مخرطتش وتيل جديد هتفرمل بردك علي مسافه اطول شويه وبرجه في الدركسيون.
فاللي هيحدد حالة الطنابير خرط او تغيير . وممكن تجيب طنابير افتر ماركت ارخص من الاصلي
تحياتي

[akarem]

الف شكر يا استاذ Mecha على اهتمامك
طيب لو عاوز اجيبهم من برة التوكيل الاقيهم فين واسعارهم ايه وايه احسن نوع تيل

[أبو عبدالله]

الطنابير لو انت بتستخدم تيل مش اصلي ممكن تكون فعلا باظت
الطنابير موجوده في العالمية لقطع الغيار في الحرفيين وشارع دمشق في روكسي وفي فرع جديد في مدينة نصر
وعندهم التيل
الطنابير بتعملها 1200 ده لو مفيش تغيير في الأسعار
والتيل بيعمله حوالي 400 الأصلي

[akarem]

الف شكر يا استاذ أبو عبد الله
حضرتك من ساعة ما جيبت العربية ماغيرتش لا تيل ولا طنابير العربية عاملة 65000 كيلو متر وموديل 2009 ومانيوال
حتى الان الفرامل بتمسك وبيبقى فيه تصفير بسيط لما اكبس جامد على الفرامل انا متفق ان التيل يتغير انا بس مندهش ازاى الطنابير عاوزه تتغير مع انى معملتش لها تنظيف بره قبل كده ولا خرط ولا حاجه كله في صيانة التوكيل

[mohamed_rhem]

الطنابير تتخرط عند خراط طنابير قوله عايز اخرط كل وش لوحده اكد علي النقطة ده

وهات التيل من العالمية ب 450 جنيه اصلي بتاع ديهاتسو هتلاقي في تيل تويوتا عندهم هاتي الاصلي

بيجي معاه سوست وطاقم بيركب ورا التيل

وبالتوفيق