تم بحمد الله تغيير علبة الدركسيون ... سريون 1.5 مو 2008

[معاذ الشرباصى]

بقولك يا معاذ طيب
انت فاكر قبل التعديل الموضوع ده كان موجود ولا لأ
يعني القديم كان موجود في الموضوع ده ولا لأ

أصل لو كان موجود يبقى كده ده طبيعي
ولو مكنشي موجود يبقى احتمال انه تم تعديل قطر الدوران بتاع العربيه
يعني بمعنى ان العربيه زي ما انتم عارفين لها ميزه كانوا دائما بيعلنو عنها عالطول وده شئ مميز فيها
ان اقل قطر دوران للعربيه كان 9.4 متر
يعني كسرة العجل بتبقى واخده زاويه جامده
وده بيساعد فيه طول البارات اللي في علبة الدركسيون

ولما تفتكر كلام المهندس احمد لما كنا بنتكلم عن موضوع انهم بعتوا لليابان على الصوت
وكانت اليابان بترد ان العربيه مظبوطة وشوارع مصر هيا اللي فيها المشكلة
أظن وده راي شخصي ليا
ان الموضوع ده كان بسبب طول البارات انها كان لها مدى اكبر من دلوقتي
ولما حصل التعديل قلل الطول ده او بمعنى اصح ممكن يكون قللوا خروج البارات من علبة الدركسيون في الجانب اللي كان دائما بيعمل الصوت غالبا وهو اليمين
وده طبعا هيخلي قطر الدوران غير الاول

لأن علبة الدركسيون مكانها بيبقى تحت الدركسيون فالبتالي هيبقى الذراع الأكبر طول او خروجا هيبقى في الناحية اليمين لأن الدركسيون ناحية الشمال

ده ظني للموضوع يعني احتمالات والله اعلم

لأ طبعا يا ابوعبدالله مكنش موجود

العربية طول عمرها بتلف فى الاتجاهين قد بعض ... و لو كانت موجودة من الاول يبقى عيب (ده لو )

لكن هى كانت مظبوطة جدا و بتلف مرة و نص فى كل اتجاه زى بعض بالظبط ... دلوقت بتلف فى ناحية اكتر من التانية ... و اللفة الزيادة فى العجل كمان , يعنى مش الطارة بس هى اللى بتلف زيادة, لأ ده العجل كمان.

التعديل كان اضافة O-ring فقط, لكن المفروض كل حاجة زى ما هيا, محصلش اى تغيير غير ده.

[hitham_sh]

انا عندي نفس المشكله برضو العربيه مبتلفش في نفس التجاهين بالزبط في فرق بسيط لاكن انا عندي التاره بتلف لفتين الا ربع في التجاهين مش لفه ونص

[معاذ الشرباصى]

انا عندي نفس المشكله برضو العربيه مبتلفش في نفس التجاهين بالزبط في فرق بسيط لاكن انا عندي التاره بتلف لفتين الا ربع في التجاهين مش لفه ونص

شكرا على اهتمامك يا هيثم.

كده ناقص ابوعبدالله, لغاية دلوقت 3 من اصل 4 عربيات اتغير لهم العلبة فيهم العيب ده.

يا ريت يا ابوعبدالله تشوف الدركسيون عندك نظامه ايه و ترد علينا

و هل عندك بيلف فى ناحية اكتر من التانية زى هيثم كده بعد التعديل و لا ايه النظام؟

[MoToRiZeR]

انا معملتش التعديل لسة و جربت موضوع لفة الدركسيون ده و لقيت بيلف في الناحيتين قد بعض بالضبط، يبقي الموضوع نتيجة التعديل .

[ara]

السلام عليكم يا شباب ... أنا ياسر محسن و عندي تعليق علي الموضوع بس في البداية أحب أشكر معاذ باشا علي اليوم الجميل في مركز الصيانة بصراحة هوه ده اللي خفف عن الواحد الإنتظار من تسعة و نص صباحا حتي الرابعة و النصف عصرا !!! ....

بخصوص موضوع علبة الدركسيون عندي الملاحظات الآتية علما بأني أقل فهما في السيارات منكم جميعا

- عدد لفات الدركسيون قبل التغيير عندي كان لفة و نص بالضبط يمينا و يسارا
- الصوت قبل تغيير العلبة كان عالي لدرجة إني كنت بهدى جدا في المطبات لما بيكون معايا حد من الكسوف ( العربية كانت كلها بتشخلل زي ما تكون جايبة عفشة)
-بعد التغيير الصوت إختفي بنسبة 95% و 5% دي بتحصل لما باخد ملفات حادة يمين و تكون الأرض مش مستوية (في الشمال الحاد مش بسمع حاجة)
- السيارة بقت ماسكة نفسها أحسن من أول يوم سوقتها فيه و حتي في ال cat eyes العالية و فواصل الكباري البايظة العربية صوتها بقي كويس أوي ( مع العلم إن عندي إعتقاد إن غفشة ال Sirion أصلا ناشفة شوية)
- لفات الدركسيون عندي طلعت بالضبط زي الفيديو بتاع معاذ ( لفة و نص و خمسة شمال و لفة و نص إلا خمسة يمين) و ده ممكن يرجح التفسير بتاع أبو عبد الله و لكنه لا يبرر وجود العيب لانه مش في الدركسيون بس ده منعكس علي زوايا ميل العجل نفسه.
- عموما الموضوغ مش مؤثر علي القيادة خالص بس مؤثر علي ركن السيارة في الأماكن الديقة بالنسبة للي كان متعود يكسر الدركسيون علي الآخر في كلا الإتجاهين.
- زوايا العربية مظبوطة لكن الدركسيون فيه عوجة بسيطة يمين (أعتقد إني هعملها في الصيانة القادمة علي جهاز الزوايا)
- هل هناك من يشاركني الرأي أن العلبة المعدلة جاءت علي حساب ال steering و دقة ضبطة الدركسيون علما بإن كفاءة ال Power عندي لا تزال ممتازة ؟

- أخر حاجة بقي عشان الملل ... إن شاء الله بعد ال Sirion كلنا نشتري نفس نوع السيارة و لتكن مثلا Terios Platinum علشان الجروب ده جميل جدا و مؤثر جدا و بيشكل لوبي ضغط مش سهل ... شكرا معاذ و شكرا أبو عبد الله علي إهتمامكم الدائم .

[معاذ الشرباصى]

بخصوص موضوع علبة الدركسيون عندي الملاحظات الآتية علما بأني أقل فهما في السيارات منكم جميعا

- عدد لفات الدركسيون قبل التغيير عندي كان لفة و نص بالضبط يمينا و يسارا
- الصوت قبل تغيير العلبة كان عالي لدرجة إني كنت بهدى جدا في المطبات لما بيكون معايا حد من الكسوف ( العربية كانت كلها بتشخلل زي ما تكون جايبة عفشة)
-بعد التغيير الصوت إختفي بنسبة 95% و 5% دي بتحصل لما باخد ملفات حادة يمين و تكون الأرض مش مستوية (في الشمال الحاد مش بسمع حاجة)
- السيارة بقت ماسكة نفسها أحسن من أول يوم سوقتها فيه و حتي في ال cat eyes العالية و فواصل الكباري البايظة العربية صوتها بقي كويس أوي ( مع العلم إن عندي إعتقاد إن غفشة ال Sirion أصلا ناشفة شوية)
- لفات الدركسيون عندي طلعت بالضبط زي الفيديو بتاع معاذ ( لفة و نص و خمسة شمال و لفة و نص إلا خمسة يمين) و ده ممكن يرجح التفسير بتاع أبو عبد الله و لكنه لا يبرر وجود العيب لانه مش في الدركسيون بس ده منعكس علي زوايا ميل العجل نفسه.
- عموما الموضوغ مش مؤثر علي القيادة خالص بس مؤثر علي ركن السيارة في الأماكن الديقة بالنسبة للي كان متعود يكسر الدركسيون علي الآخر في كلا الإتجاهين.
- زوايا العربية مظبوطة لكن الدركسيون فيه عوجة بسيطة يمين (أعتقد إني هعملها في الصيانة القادمة علي جهاز الزوايا)
- هل هناك من يشاركني الرأي أن العلبة المعدلة جاءت علي حساب ال steering و دقة ضبطة الدركسيون علما بإن كفاءة ال Power عندي لا تزال ممتازة ؟

و الله يا ياسر باشا اليوم من غيرك كان هيبقى سخيف جدا.

انا متفق معاك فى كل النقاط:

الصوت مبيختفيش بنسبة 100% .... بيظهر فى بعض الاماكن الشديدة, و ده اكده ليا برضه هيثم و ميدو.

العفشة الامامية فعلا بقت ماسكة نفسها احسن ... بس مش عارف دى حاجة نفسية و لا ليها تفسير ميكانيكى؟ ... و عفشة السريون فعلا ناشفة.

لكن موضوع العلبة ... اظن ان النتيجة كانت ممكن تبقى احسن لو هما كانوا خدوا بالهم من موضوع اللفات بتاع الدركسيون, و مين عارف مش ممكن بعد تظبيط الموضوع ده الصوت يختفى تماما!!

[tmedhat]

انا خفت من السريون بعد الكلام اللى بيتقال دة
ازاى عربية زيرو يتغير لها علبة دركسيوون

[hhhmmmzzzz]

انا خفت من السريون بعد الكلام اللى بيتقال دة
ازاى عربية زيرو يتغير لها علبة دركسيوون

ماتخفش ولا حاجة افتكر كل موديل عربية بينزل فيه عيب ممكن يبان مع مرور الوقت ودى عن تجارب اصدقاء لي بسيارات موديلات مختلفة اهم حاجة استجابة الناس فى التوكيل للمشكلة والاعتراف بيها وحلها(عدم الطناش)انا عندى سيريون2009 والحمد لله لسة مافيش حاجة ظهرت وافتكر انهم تداركو الامر فى موديلات السنوات السابقة
وفتكر هيا دى ضريبة التميز انك تكون راكب عربية مش كل الناس ركباها

[MoToRiZeR]

انا خفت من السريون بعد الكلام اللى بيتقال دة
ازاى عربية زيرو يتغير لها علبة دركسيوون

يا باشا بالعكس انا شايف إن دي نقطة إيجابية في صالح السيارة
هي مجابتش علبة دركسيون و لكن العلبة فيها عيب يجعلها غير متوافقة مع الشوارع المصرية في فيه تعديل بيتعمل فيها يستلزم تغييرها عشان متظهرش الأصوات اللي كان بيسببها العيب ده .

و إن التوكيل بيغيرها دي نقطة في صالحه لأن الشركات اللي بتغير و بتسحب المنتجات اللي بها عيوب شركات محترمة، حفاظاَ علي مصداقيتها لدي عميلها اللي بيتولد لديه ثقة ساعتها إنه في أمان مهما طلع في العربية .

[أبو عبدالله]

و الله يا ياسر باشا اليوم من غيرك كان هيبقى سخيف جدا.

انا متفق معاك فى كل النقاط:

الصوت مبيختفيش بنسبة 100% .... بيظهر فى بعض الاماكن الشديدة, و ده اكده ليا برضه هيثم و ميدو.

العفشة الامامية فعلا بقت ماسكة نفسها احسن ... بس مش عارف دى حاجة نفسية و لا ليها تفسير ميكانيكى؟ ... و عفشة السريون فعلا ناشفة.

لكن موضوع العلبة ... اظن ان النتيجة كانت ممكن تبقى احسن لو هما كانوا خدوا بالهم من موضوع اللفات بتاع الدركسيون, و مين عارف مش ممكن بعد تظبيط الموضوع ده الصوت يختفى تماما!!

يا معاذ انا شايف ان الموضوع واضح
طول البارات ده تقريبا كان هو من ضمن اسباب وضوح الصوت
وعلشان كده تم تقصيره زي ما انت شايف في لفة الدركسيون كده

وبرضه الفرق مش كبير لدرجة ان الواحد يلاحظه في لفة العربيه على الارض والحمد لله برضه مالوش تأثير على حاجه
وانما هو في الأصل كان يعتبر اقل قطر دوران في العربيات غالبا

اما بخصوص الأصوات
ففاكر لما انت قولت على موضوع الصوت قولتلك العفشة من الأمام في اكتر من بيضه
وده تقريبا علشان الثبات
لأن العفشة من تحت ممسوكة ببار واخد من العجلة اليمين لحد الشمال وماسك في الشاسيه من الأمام
ولكن هو ماسك كل عجله ببيضه بتتحرك من الناحيتين وفي كل الأتجاهات
واظن دي في اي مطب هتحس بها
يعني مش هتبقى زي الكورولا مثلا

واحنا قولنا فعلا ان العربيه تعتبر عفشتها من الأمام ناشفه شويه
ولكن من الخلف جميله
والعربيه بصراحه بحب احملها لأن لما بحملها العربيه بتاخد وتدي كويس قوي مع المطبات

اما احساسك بالأصوات حاسس انه داخل فيه حاجه نفسية شويه
يعني حاول تنسى شويه

لأن بصراحه في كلام لما بيزيد عن حد معين
القارئ بيحس بضخامة للكلام
ممكن احنا منكنشي حاسين بها واحنا بنتكلم
يعني ممن واحد يحس ان احنا ماشيين بنهربد بالعربيه وسامعين مولد في العربيه من تحت
يعني انا شايف ان الأصوات دي شئ طبيعي غالبا في بلدنا لأن فعلا غالب الشوارع مقرفه
فالواحد بيحس انه ماشي بيتهربد كتير في المشوار الواحد

بس عني انا
انا معنديش مشكلة في العربيه والحمد لله لحد الأن
والأصوات تعتبر اختفت تماما
اما اللي شايف اصوات في العفشة فممكن يروح يربط كويس العفشة ويجرب بعدها وان شاء الله يكون خير وتربيط بس

[معاذ الشرباصى]

انا خفت من السريون بعد الكلام اللى بيتقال دة
ازاى عربية زيرو يتغير لها علبة دركسيوون

يا باشا بالعكس انا شايف إن دي نقطة إيجابية في صالح السيارة
هي مجابتش علبة دركسيون و لكن العلبة فيها عيب يجعلها غير متوافقة مع الشوارع المصرية في فيه تعديل بيتعمل فيها يستلزم تغييرها عشان متظهرش الأصوات اللي كان بيسببها العيب ده .

و إن التوكيل بيغيرها دي نقطة في صالحه لأن الشركات اللي بتغير و بتسحب المنتجات اللي بها عيوب شركات محترمة، حفاظاَ علي مصداقيتها لدي عميلها اللي بيتولد لديه ثقة ساعتها إنه في أمان مهما طلع في العربية .

بص حضرك زى ما محمود كتب بالظبط.

العلبة مش بايظة, لكن تصميمها مش متوائم مع الشوارع الغير ممهدة هنا فى مصر, و اللى عمله التوكيل هو تركيب علبة متعدلة و الصوت ده بيظهر نادرا مع الجديدة, ده غير ان العربيات اللى نازلة جديد نازلة بالعلبة المتعدلة.

ده غير ان الباور الكهرباء اصلا مش مناسب اوى لشوارعنا هنا, يعنى فى عربيات ماركات تانية بتضطر تغير فيها علبة دركسيون بسبب الشوارع و ليس عيب فى العربية, زى رينو و كيا و هيونداى و غيرهم ...

و التوكيل اينعم خد وقت شوية فى تعديل الموضوع ده, لكن الحمد لله حاليا الموضوع خلص و اى حد عنده شكوى من الصوت بيغير العلبة القديمة بالعلبة المتعدلة.

[معاذ الشرباصى]

يا معاذ انا شايف ان الموضوع واضح
طول البارات ده تقريبا كان هو من ضمن اسباب وضوح الصوت
وعلشان كده تم تقصيره زي ما انت شايف في لفة الدركسيون كده

وبرضه الفرق مش كبير لدرجة ان الواحد يلاحظه في لفة العربيه على الارض والحمد لله برضه مالوش تأثير على حاجه
وانما هو في الأصل كان يعتبر اقل قطر دوران في العربيات غالبا

ابوعبدالله ... بعد اذنك هنمسك الموضوع حتة حتة.

بخصوص موضوع البارات

لو سلمنا جدلا ان الكلام اللى حضرتك بتقوله صحيح ... ليه الدركسيون بيلف فى حتة اكتر من التانية , و مش بس كده الزيادة اللى فى الناحية اليمين, نفس الكمية دى قلتها من الناحية الشمال !!!

لو البارات قصروها كانت قلت من الناحيتين, لكن دى حاجة مترحلة لناحية اكتر من التانية.

ده غير ان ان مهندس احمد عبدالوهاب مشكورا فعلا, ورانى صور التعديل اللى حصل بالظبط ... فميش اى حاجة عن تقصير و تطويل بارات.

مش بس كده, ده مهندس احمد عبدالوهاب لما شافها و بعد اما عملنا موضوع الزوايا و منفعش أكد انه ده شىء مش طبيعى و المهندسين كمان هناك, و المفروض هيتظبط يوم الخميس... يعنى لو كان عادى زى ما حضرتك بتقول كان قالى كده (و ده اسهله و يريح دماغه) ... لكن ده اعتراف ضمنى منهم ان فى حاجة مش مظبوطة.

اما بقى انها تأثر او لأ ... ليه انا متبقاش العربية عندى مظبوطة حتى لو الموضوع مش مؤثر على اى حاجة؟!!! ...يعنى ليه اوديها معدولة, و ارجع بيها مش معدولة. انا تقبلت انى اروح يوم و الموضوع ميتعملش, و اروح مرة تانية, كل ده علشان اظبطه و علشان الحاجة تبقى زى ما هيا, و اظن ده حقى.

واحنا قولنا فعلا ان العربيه تعتبر عفشتها من الأمام ناشفه شويه
ولكن من الخلف جميله
والعربيه بصراحه بحب احملها لأن لما بحملها العربيه بتاخد وتدي كويس قوي مع المطبات

اما احساسك بالأصوات حاسس انه داخل فيه حاجه نفسية شويه
يعني حاول تنسى شويه

لأن بصراحه في كلام لما بيزيد عن حد معين
القارئ بيحس بضخامة للكلام
ممكن احنا منكنشي حاسين بها واحنا بنتكلم
يعني ممن واحد يحس ان احنا ماشيين بنهربد بالعربيه وسامعين مولد في العربيه من تحت
يعني انا شايف ان الأصوات دي شئ طبيعي غالبا في بلدنا لأن فعلا غالب الشوارع مقرفه
فالواحد بيحس انه ماشي بيتهربد كتير في المشوار الواحد

دلوقت حضرتك سبب التعديل و الهيصة دى كلها كان على صوت واحد بس, الا و هو "صوت التخبيط اللى كان بيحصل عند المرور على ارض معرجة"

ده اللى احنا لم نتقبله, و اظن حضرتك لم تتقبله برضه بدليل انك رحت و غيرت العلبة, يعنى لو مكنش مزعج لك, كنت مشيت بالعربية زى ما هيا.

العربية اصوات العفشة فيها زيادة عن المتوسط, ده باعتراف معظم مالكيها, و التوكيل نفسه, و عادى احنا بنتكلم على عربية فى فئة سعرية مش عالية, مش متوقع تكون مرسيدس او Bmw

بس فى ناس بيفرق جدا معاها الموضوع, و ناس تانية الموضوع مش مؤثر خالص لها, ده اختلاف ازواق و طباع.

الواجب علينا كملاك ننقل الصورة كاملة, مش الحلو بس منها, و القرار فى الاخر للقارىء, هل هو متقبل الموضوع ده او لأ.

انا طبعى انى محبش اسمع صوت و انا قافل العربية و الحمد لله فى اكتر من عضو معانا هنا فى الدايهاتسو نفس الصفات دى. و اى صوت كنت سابقا بعتبره خلل... لكن مع السريون تأقلمت مع اصوات التابلوه و التزييق و كده, لكن فى الصوت الرئيسى اللى اشتكينا منه مكنتش متأقلم معاه لأنه مزعج, و الحمد لله اختفى الى حد كبير.

بس عني انا
انا معنديش مشكلة في العربيه والحمد لله لحد الأن
والأصوات تعتبر اختفت تماما
اما اللي شايف اصوات في العفشة فممكن يروح يربط كويس العفشة ويجرب بعدها وان شاء الله يكون خير وتربيط بس

ربنا يبارك لحضرتك فى عربيتك و يسعدك بيها يوم بعد يوم.

بس لى سؤال اخير ... هل حضرتك شفت فعلا الدركسيون بيلف فى حتة اكتر من التانية و لا لأ؟ ... لأنى طلبت من حضرتك تشوف الموضوع ده, بس ممكن حضرتك ملاحظتش الطلب ده فى الصفحة اللى فاتت ... يا ريت حضرتك تشوف و تقولنا.

[أبو عبدالله]

بص يا معاذ
أولا احب ان اوضح ان الكلام السابق ده انا قولت احتمال
يعني دي احتمالات بتيجي في دماغي من اللي انا فاهمه وشايفه يعني مش كلام مؤكد ميه في الميه
ممكن يكون صح وممكن يكون غلط
ولكن على المعلومات اللي بعرفها بحاول افسر الموضوع

أولا موضوع ان البارات اشمعنى واحد هيبقى مش زي التاني لسبب واحد
وهو ده اللي خلاني اقول الكلام السابق ده لما لقيت ان في لفة للدركسيون اكبر من الناحية الأخري له
ولاحظت ان اللي قصرت هيا اللي في الناحية اليمين
فلقيت الموضوع مناسب لسبب واحد الا وهو شكل علبة الدركسيون
علشان البار اليمين بعيد عن مكان ادارة الحركة اللي جاي من الدركسيون كما في الصورة



وده معناه ان البار اليمين في الأصل اطول من اليمين في الطول فقط
ولكن في اللفات طبعا كان مظبوط
ولكن ده تقريبا كان بيخلي البار اليمين واخد مسافة كبيره عن مكان أخذ الحركة اللي هو تحت الدركسيون بالظبط
وطبعا كلنا اكيد عارفين ان مع طول البار اكيد اي حركة للعجلة الى الأعلى او الى الأسفل هيبقى تاثيرها عالي على البار ده بما انه اطول من الشمال
يعني بمعنى انه هيبقى محتاج اكتر من مفصلة له بمعنى اصح
وده برجحه ايضا لأن الصوت كان دائما بيأتي من الناحية اليمين اكتر من الشمال فعلا
فتقريبا هما قللو خروج البار اليمين من علبة الدركسيون بحيث يكون المفصلة الوحيده اللي موجوده فيه قادرة على امتصاص الصدمات بقدر كافي
ولو تفتكر ان اول رد لليابان على المشكلة ان العربيه متصممه صح والمشكلة عندنا في المطبات
واظن انهم قللو الخروج ده الى حد معين علشان تفضل ميزة العربيه في مسألة قطر الدوران لسه موجوده وفي نفس الوقت تم تقليل الصوت او تقليل احتمالات صدوره لأن التحميل على المفصلة اللي موجوده تحت الجلد زي اللي موجود في الصورة كده
وده ممكن يكون السبب انكم حاسين ان فيه صوت بس على خفيف
لأن مع الحركة الجامده للعجل ممكن يحصل تحميل او قرص على المفصلات دي برضه فبتعمل صوت بس اخف من الأول لأن البار اليمين معدشي خروجه زي الأول وبالتالي تأثيره بالصدمات قل عن الأول
وده تخيلي للموقف مش اكتر ولا اقل


وعلى فكره انا شوفت عربيتي لقيت هناك فارق يكاد يكون طول عقلة صابع يعني حاجه بسيطة مش زي عندك كده يا معاذ

وعلى فكره يا معاذ انا تقريبا عندي اللفات زياده عنك حوالي ربع لفه يعني انت عندك لفه ونص تقريبا
انا عندي لفه وثلاثة ارباع لفه

[أبو عبدالله]

انا راجعت الفيديو بتاعك تاني يا معاذ
تقريبا الفارق هو هو زي اللي عندي

بس انا زي ما سبق وقولت
اللفات عندي ازيد من عندك
يعني انت الدركسيون بيقف عندك لما يبقى مقلوب
انا عندي بيقف لما يبقى عمودي وليس افقي

[hitham_sh]

وانا كمان عندي زي ابو عبدالله لفتين وثلاث ارباع الظاهر 2007 كده