صيانة 5000

[nonalaziza]

السلام عليكم ورحمة الله وبركاته ....,
انا رحت يوم الخميس 2/7 اعمل صيانه ال 5000 للعربيه علي حسب الميعاد
اولا استغربت جدا لما اتصلت يوم الاحد وداني ميعاد ليوم الاربع كنت متوقعه ولا قبل اسبوع
ميعادي كان 10:30 رحت طبعا قبل الميعاد
كان عندي كام شكوي من العربيه منها التكييف مش بحس بيه والصوت العالي بتاع الموتور وخصوصا لما اشغل التكييف و بسمع صوت تزييق لما بدوس فرامل والعربيه بتحدف يمين.
قابلت المهندس ايمن عزام قولتله علي كل الملاحظات دي وقالي هيعمل الازم
المرة دي كنت متابعه العربيه الصيانه كلها مخدتش اكتر من نص ساعه
وتم عمل الاتي
الكشف علي السوائل كلها وتم تزويد الميه المقطره الروز مش من الحنفيه ولا حاجه
تم تزويد سائل المساحات
الكشف علي البطاريه وتزويدها
توزيد العجل وربط العفشه
تنضيف فلتر الهوا
تغير الزيت ب موبيل وان
وخرجت العربيه علشان تتجرب ويشوف اذا كانت محتاجه ضبط زوايا ولا لا
ومش كانت محتاجه الضبط
و بالنسبه لصوت الفرامل دا علشان التيل مش فاكره بالضبط لسه جديد
اما بقي بالنسبه للفاتورة فهي كالاتي
75 صيانة ال 5000
201 زيت موبيل وان
48 فلتر زيت
10 اسبريهات وحاجات كده
الاجمالي 348
العربيه اداءها افضل بكتير وفلتر الهوا لما اتنضف حسيت بالتكييف شويه
الراي العام الخدمه جيده جداا

[hhhmmmzzzz]

حضرتك بتقولى العربية ادائها افضل بكتير هل ده معناه انك لسة مش راضية عن حاجات فيها
حضرتك لسة فى اول5000ك يعنى المفروض تبقى ميه ميه
وسؤال هل التكييف له تاثير علي سحب العربية عندك لان ده ممكن يتحس فى 1300سي سي وحضرتك عربيتك1500
ولو ممكن تقييمك للعربية بشكل عام من حيث الثبات والسرعات والارتفاع عن الارض يعنى رايك فيها كسيارة تنتمى لعائلة الجيب كويسة ولا لا وشكرا

[Imhotep]

انا برضه حسيت ان العربية فاقت بعد صيانة ال5 الاف...... السحب و تجميع السرعة اصبح افضل و هذا هو اهم الملحوظات........
سؤال بقى يا نونا....... انت كاتبة انهم زودوا العجل..... طب ظبطوه على كام ولا انت مسألتيش؟ انا قبل مروحلوهم كنت مظبطه على 32 لكن مشيكتش بعد الصيانة و هذا هو سبب سؤالى.....
و على فكرة معلومة من واحد صاحبى معاه العربية من 2007 و لسه عاملها صيانة ال 40 الف...... التيريوس اداءها بيتفتح بعد ال 10 الاف......

[م.محمد شافعي]

السلام عليكم و رحمة الله وبركاته
مبروك الصيانه و عقبال صيانة ال 500 الف و تكون العربيه ان شاء الله لسه بحالتها و ربنا يبارك فيها.
بالنسبه لموضوع العربيه الحقيقه انا محستش ولا مره بضعف في الماتور و التكييف شغال و لكن الملاحظ و بقوه ان العربيه بعد ال 10 الاف سحبها بقي كويس جدا و الشعور بوزن العربيه العالي بالنسبه لقدرة موتورها في بداية تجميع الفتيس الاوتو ماتيك راح و بقت بتسحب زي المانيوال(مش قوي يعني لان المانيوال سحبه اسرع بس زي اي عربيه اوتوماتيك).
عموما ربنا يباركلك في سيارتك و كل ما تكون رجلك حنينه عليها هتحسي بصوت الماتور اقل و اوطي و موضوع التزييقه اللي بتقولي عليها من الفرامل حصلت عندي لما بكون واقف و العربيه واخده نقله و انا دايس علي الفرامل و ياريت تحاولي تقللي من الموضوع ده و انت مش هتسمعي الصوت ده ابدا ان شاء الله.

[nonalaziza]

حضرتك بتقولى العربية ادائها افضل بكتير هل ده معناه انك لسة مش راضية عن حاجات فيها
حضرتك لسة فى اول5000ك يعنى المفروض تبقى ميه ميه
وسؤال هل التكييف له تاثير علي سحب العربية عندك لان ده ممكن يتحس فى 1300سي سي وحضرتك عربيتك1500
ولو ممكن تقييمك للعربية بشكل عام من حيث الثبات والسرعات والارتفاع عن الارض يعنى رايك فيها كسيارة تنتمى لعائلة الجيب كويسة ولا لا وشكرا

العربيه الحمد لله تمام وانا راضيه عنها جدا قبل وبعد الصيانه هي بس تحس انها فاقت بعد الصيانه مش اكتر

التكييف مالوش اي تاثير علي سحب العربيه بس في بعض الاعضاء هنا في المنتدي قالوا انهم بيحسوا ان النور ضعف شويه وللامانه انا مش جربت اشوف الموضوع دا لكن بالنسبه للسحب انا بصراحه محستش انه بيتاثر بالعكس بحس العربيه زي ما تكون بقت شغاله بقوة اكتر وممكن حد غيري يفيد حضرتك اكتر مني او يكون ليه راي مخالف

العربيه الحمد لله ثابته جدا انا سافرت بيها العين السخنه ودا تقريبا افضل طريق في مصر علشان مش فيه مطبات العربيه كانت ناعمه جدا علي الطريق وعن نفسي العربيه بتجمع معايا سرعه بسرعه مش تقيله
اما بقي بالنسبه للارتفاع عن الارض هي ارتفاعها كويس بعيده عن اي مطبات في الطريق وبتحس اكتر بكده لما تشوف كل العربيات اللي قدامك بتلبس مطبات وانت مش بتلبس فيها بتعديها بسهوله
الميزة اللي كانت في نظري الاول عيب ان الموتور بتاعها السير بتاعه جنزير بتحس بصوت عالي شويه لو مشيت في مكان هادي بس مش صوت عالي هو بس ملحوظ للي بيركز معاه

[nonalaziza]

سؤال بقى يا نونا....... انت كاتبة انهم زودوا العجل..... طب ظبطوه على كام ولا انت مسألتيش؟ انا قبل مروحلوهم كنت مظبطه على 32 لكن مشيكتش بعد الصيانة و هذا هو سبب سؤالى.....

انا سالت اتضبط علي كام قالي 28 مع انه مكتوب في القايم وفي الكتالوج انه 32 بس المهندس قالي كده هتنبقي انعم علشان الثبات والمطبات
وكررت سؤالي اكتر من مرة ورد عليا كل مرة 28 صيف وشتا علشان ماتتعبيش؟؟؟؟؟؟؟؟؟؟؟؟؟
بصراحه مش فاهمه اشمعني 28 ليه مش 32 زي اللي مكتوب

[nonalaziza]

السلام عليكم و رحمة الله وبركاته

بالنسبه لموضوع العربيه الحقيقه انا محستش ولا مره بضعف في الماتور و التكييف شغال و كل ما تكون رجلك حنينه عليها هتحسي بصوت الماتور اقل و اوطي و موضوع التزييقه اللي بتقولي عليها من الفرامل حصلت عندي لما بكون واقف و العربيه واخده نقله و انا دايس علي الفرامل و ياريت تحاولي تقللي من الموضوع ده و انت مش هتسمعي الصوت ده ابدا ان شاء الله.

وعليكم السلام و رحمة الله وبركاته
لا مش ضعف بالعكس دا قوة اكتر من الازم بس صوتها بيعلي شويه



بس احاول مش اشد عليها جامد


بس موضوع التزييقه دا بيواجهني لما بكون في منزل او مطلع زي مطلع كوبري بس الطريق واقف بس مش اكتر
وقالي المهندس ان بس التيل لسه مطبعش

[hsemary]

شكرا على الافادة وربنا يطمنك ويديكى خيرها ويكفيكى شرها

[Imhotep]

انا سالت اتضبط علي كام قالي 28 مع انه مكتوب في القايم وفي الكتالوج انه 32 بس المهندس قالي كده هتنبقي انعم علشان الثبات والمطبات
وكررت سؤالي اكتر من مرة ورد عليا كل مرة 28 صيف وشتا علشان ماتتعبيش؟؟؟؟؟؟؟؟؟؟؟؟؟
بصراحه مش فاهمه اشمعني 28 ليه مش 32 زي اللي مكتوب

الخلاصة عن تجربة فى ضبط هواء عجل التيريوس:
- السيارة كانت جاية من بلدها وهى مظبوطة على 33 وده كان مخليها ناشفة اوى و بتهبد فى المطبات......
- على 28 السيارة فعلا بتبقى انعم كتير بس تحس انها بتبقى انعم اكتر من اللازم ان جاز التعبير يعنى اعتقد نظرا لارتفاع العربية بتاخد و تدى مع المطبات جامد....... خاصة فواصل و فروقات مستوى الاسفلت على الدائرى مثلا للى يعرفها
- على 32- الموصى به فى الكتالوج- العربية بقت فى حالة وسط بين نشوفية ال 33 الاولانية و بين نعومة ال 28 الزائدة، وبالتالى انا استقريت على 32...... حتى على الاقل ان كسلت اشيك على ضغط العجل لفترة ما مش هبقى قلقان اوى ما هى فيها ضغط بزيادة عن ال 28 بكتير :)

[MoToRiZeR]

التيريوس اداءها بيتفتح بعد ال 10 الاف......

و السيريون كمان علي فكرة .
حتي الفتيس مطبعش .. و نعومته مثبتتش غير بعد 10 ألاف .

بمناسبة ضغط الهواء برضه كانت حاجة زي كدة في السيريون بس انا بعملها زي ما مكتوب عالقايم .

[nonalaziza]

الخلاصة عن تجربة فى ضبط هواء عجل التيريوس:
- السيارة كانت جاية من بلدها وهى مظبوطة على 33 وده كان مخليها ناشفة اوى و بتهبد فى المطبات......
- على 28 السيارة فعلا بتبقى انعم كتير بس تحس انها بتبقى انعم اكتر من اللازم ان جاز التعبير يعنى اعتقد نظرا لارتفاع العربية بتاخد و تدى مع المطبات جامد....... خاصة فواصل و فروقات مستوى الاسفلت على الدائرى مثلا للى يعرفها
- على 32- الموصى به فى الكتالوج- العربية بقت فى حالة وسط بين نشوفية ال 33 الاولانية و بين نعومة ال 28 الزائدة، وبالتالى انا استقريت على 32...... حتى على الاقل ان كسلت اشيك على ضغط العجل لفترة ما مش هبقى قلقان اوى ما هى فيها ضغط بزيادة عن ال 28 بكتير :)

انا عموما هجرب اضبطها علي 32 بس كده مش هتبقي ناشفه اوي في المطبات ولا ايه راي حضرتك؟؟؟؟

[Imhotep]

لا مش ناشفة ولا حاجة..... انا بالنسبة لى مريحة ووسط زى ما قلت بين النعومة الزيادة و النشوفية الزيادة.......