الأهمال هوا سبب هذه التجربة المريرة !

[wael_dev]

سلام عليكم

حبيت اكتبلكم الموضوع ده بعد تجربة مريرة حصلت بسبب اهمالي للأسف الشديد في شيء ظننت انه بسيط عربيتي دايهاتسو ميرا موديل 94

الموضوع من حوالي شهر او شهرين كمان ان لمبة البطارية فجأة مبقتش تنور اول لما افتح العربية الطبيعي انها بتنور ولما بتدور بتطفي هيا مبقتش تنور خالص واهملت ! وتزامن معاها في نفس الوقت مؤشر الحرارة مبقاش يشتغل ظننت ان فيشته واقعة وكسلت اروح للميكانيكي مخصوص عشان حاجة زي كده خصوصآ اني متعود ان العربية مبتسخنش تقريبآ !!

انا بقطع بالعربية مسافات طويلة وعمرها ماقصرت معايا وعندي فيها ثقة زيادة يوم الجمعة كنت راجع من العين السخنة وفجأة لمبة البطارية نورت وانا سايق حسيت ان فيه حاجة غلط بس برضة قولت الموضوع مش هيتعدي ان فيه حاجة بسيطة في الكهرباء !! وفضلت ماشي فجأة العربية سخنت جامد والموتور صوته بقي عالي جدآ وعرفت انها سخنت من صوت العربية وليس من مؤشر الحرارة الذي لا يعمل المهم وقفت العربية علي جنب ولمبه الزيت فجأة نورت كمان رحت راكن وفتخت اشوف فيه ايه بالظبط لقيت المياه نشفت حطيتلها ميه طبعآ نشفت استنيت لما بردت خالص وحاولت ادورها مدرتش خالص ! قعدت علي الوضع ده شوية وكذا سواق وقفلي صراحة وحاولوا يحلوا معايا اكتشفت ان سير الدينامو اتنحل خالص وبقي لين جدآ مش مشدود المهم عشان مطولش قطرت العربية من هناك لغاية الحرفيين عند محمود دايهاتسو لو تعرفوه وكانت الخسائر كالتالي

المشكلة الرئيسية نتجت من الدينامو البلي بتاع الدينامو حجر بقي يبذل مجهود اكبر عشان يحرك السير السير مع الشد اترخي واتنحل الدينامو ادائه بقي ضعيف البطارية بطلت تشحن كويس المروحة مبقتش تشتغل الموتور سخن جامد ونتج عن كده

وش السلندر

الدينامو طبعآ اتغير

جوان بالموتور

الريداتير اتسد خالص مش فاهم ليه !! ولا ايه العلاقة اصلآ

البوجيهات اتحرقت دي بسيطة

وبعد تظبيط الكلام ده كله علي مدي يومين فوجئت ان العربية مبتدورش بسهولة بتدور بأعجوبه يعني لازم افضل دايس علي الكونتاكت حبة محترمين لغاية تدور بالعافية بعد ماكانت بتدور باللمس ! وانا ماشي مؤشر الحرارة علي مشي الأولاني والتاني بيرتفع للنص واكتر سنة والمروحة بتدور بقت بتسخن اكتر من الأول لكن لما مشيت علي 80 و 90 وانت طالع المؤشر هبط عن النص شوية بقي في المنتصف مابين النص والبداية الوضع ده معرفش طبيعي علي اساس ان فيه هوا داخل وانا ماشي بسرعة ولا ايه

السحب بتاع العربية قل شوية طبعآ

الميكانيكي حتة الأن لم يستطع حل مشكلة الدوارة رحت للكهربائي محمد المنوفي بتاع الحرفيين غير الترموستات ولا فائدة عشان موضوع الحرارة وقالي ان التكيهات عاوزة تتظبط روح للميكانيكي تاني قالي عشان اظبط التيكهيات لازم العربية تمشي شوية كام يوم وتعالالي !! طب مقولتش كده ليه من البداية حاسس انه مش عارف يحل العيب وبيخرف في الكلام
وانا حكيت بالتفصيل عشان بجد اي عضو جديد في السواقة او قديم حتة ميهملش اي حاجة ويظن انها بسيطة لأني بسبب اهمالي ده تسببت في مشكلة كبيرة كان ممكن تتحل ببساطة من البداية ولكن قدر الله وماشاء فعل


افيدوني في مشكلة الدوارة والسخونة افادكم الله

وشكرآ

[عزيز محمد]

قدر الله وما شاء فعل
أنصحك تكتب الموضوع فى منتدى الورشة علشان عدد أكبر من الأعضاء يشوفه وبإذن الله تلاقى إجابة
بس مين محمود ديهاتسو ده؟؟

[Qmax]

نفسي اشوف حد بيشتغل في مهنه عشان بيحبها قبل قد مابيحب العائد المادي اللي بيجي من وراها

تروح للكهربائي تلاقيه مش فاهم غير انه يخليك تطلع فلوس من محفتظك بدون ما تحس بنقص في الوزن ولا خلل في المشي
كذلك الميكانيكي كذلك باقي المهنيين

ربنا يعينك وترجعلك عربيتك زي ماكانت

بالنسبه للسخونه
شوف الميه بتنقص في الراديتير

شوف مروحة التبريد بتشتغل ولا لاء وبتشتغل في اي وقت يعني لما بتبدأ تسخن ولا بعد ماالمؤشر يرفع زياده عن المعتاد
انا كان عندي العربيه بتسخن واكتشف ان مروحة التكييف هي اللي بتشتغل بس بعد مايرفع المؤشر للنص وده كان غير طبيعي ابدا
اكتشفت بعدها ان الفيشه بتاع مروحة تبريد الموتور فيها مشكله وعملتها ورجعت تمام

[gdwl]فهمت من الموضوع ده ان مروحة التكييف اللي بتاع السرابنتينا بتشتغل عندي لو العربيه سخنت زياده عن اللازم عشان تساعد مع مروحة التبريد اللي هي بتاع الراديتير اللي وقتها كانت لاتعمل اطلاقا معرفش اللي فهمته ده صح او غلط عموما ده استنتاج شخصي[/gdwl]ومفيش كهربائي ولا ميكانيكي وصل لحل لموضوع السخونيه ولا بتاع الردياتير
والموضوع تم اكتشافه بالصدفه

[madoo]

شكرا على النصيحه
وان شاء تصلح وتبقى احسن من الاول كمان

[medo_sirion]

انشاء الله تكون حاجة بسيطة وياريت تشوف الميكانيكى اللى بيتعامل معاه اعضاء دايو هاتسو فى المنتدى هوة مش فى الحرفين بس هحاول اجيبلك عنوانة

[wael_dev]

نفسي اشوف حد بيشتغل في مهنه عشان بيحبها قبل قد مابيحب العائد المادي اللي بيجي من وراها

تروح للكهربائي تلاقيه مش فاهم غير انه يخليك تطلع فلوس من محفتظك بدون ما تحس بنقص في الوزن ولا خلل في المشي
كذلك الميكانيكي كذلك باقي المهنيين

ربنا يعينك وترجعلك عربيتك زي ماكانت

بالنسبه للسخونه
شوف الميه بتنقص في الراديتير

شوف مروحة التبريد بتشتغل ولا لاء وبتشتغل في اي وقت يعني لما بتبدأ تسخن ولا بعد ماالمؤشر يرفع زياده عن المعتاد
انا كان عندي العربيه بتسخن واكتشف ان مروحة التكييف هي اللي بتشتغل بس بعد مايرفع المؤشر للنص وده كان غير طبيعي ابدا
اكتشفت بعدها ان الفيشه بتاع مروحة تبريد الموتور فيها مشكله وعملتها ورجعت تمام

[gdwl]فهمت من الموضوع ده ان مروحة التكييف اللي بتاع السرابنتينا بتشتغل عندي لو العربيه سخنت زياده عن اللازم عشان تساعد مع مروحة التبريد اللي هي بتاع الراديتير اللي وقتها كانت لاتعمل اطلاقا معرفش اللي فهمته ده صح او غلط عموما ده استنتاج شخصي[/gdwl]ومفيش كهربائي ولا ميكانيكي وصل لحل لموضوع السخونيه ولا بتاع الردياتير
والموضوع تم اكتشافه بالصدفه

كلامك مظبوط والمشكلة انهم حتة مش بيحترموا الزبون خالص في شغلهم يعني انا سبت العربية عنده يومين رحت لقيته فارد الكرسي علي الأخر كان نايم جواه ودخل العربية بجزمتة اللي مليانة طين وقرف ورملة بهدلي العربية وسايب كل الزجاج مفتوح كاملآ بتاع العربية كلها !! اتردمت تراب اخر قرف

حتة وهما بيشتغلوا منتهي الأهمال يفتح الكابوت يفك ميت حاجة ويرميها حواليه وبعدين يقعد يدور عليها !!! الكهربائي جاي يفك الدينامو راح بمنتهي الأهمال قطع سلك الكلاكس بتاع العربية !!! والله العظيم انا اقسم ان اي ميكانيكي و كهربائي مبيشتغل بأمانة الا لما يكون صاحب العربية لازق جنبها وقاعدله طول النهار عشان يحترم نفسه ويشتغل بأمانة

انا مش عارف الدنيا جري فيها ايه انا بفكر اخد دورات تدريبية في الميكانيكا والكهربا بتاعة السيارات عشان متحوجش للأشكال دي تاني خصوصآ مع احساسي انهم مبيعرفوش يصلحوا شيء ويرجعوه لأصله هما اخرهم يغيروا حاجة والسلام !!!!


بالنسبة لموضوع التبريد هيا المروحة بتشتغل بعد النص بشرطة بسيطة قوي لما اكون ماشي علي الواقف اولاني وكده ولما العربية بتسرع المؤشر بيهبط مابين النص والأول بشكل ملحوظ قوي والعربية مبتسخنش اطلاقآ هيا بس بتسخن اول ما امشي اولاني حاجة بسيطة قوي والمؤشر يتعدي النص بشرطة والريادتير ميته موجودة عادي منقصتش

ولازالت العربية في الدوارة متعبة جدآ ولازم افضل دايس دبرياج وبنزين وانا واقف مثلآ انتظار او في اشارة لأني لو سبتها الموتور بيترجرج جامد وتفصل وتشتغل تاني بعد ما ادورها شوية !!!! حسبي الله ونعم الوكيل والميكانيكي يقولي مش عارف العيب فين عاجبك علي كده اوكي مش عاجبك سيبهالي احل الموتور !!!!! واشوف يمكن محتاج عمرة !!!!!!!!!

[wael_dev]

انشاء الله تكون حاجة بسيطة وياريت تشوف الميكانيكى اللى بيتعامل معاه اعضاء دايو هاتسو فى المنتدى هوة مش فى الحرفين بس هحاول اجيبلك عنوانة

ياريت والله انا هفضل ابص علي الموضوع كل شوية اذا تقدر تجيبلي عنوانه لأني عرفت محمود دايهاتسو ده من المنتدي هنا وكان احدي الأعضاء شكر فيه انه امين وكويس وهوا كويس اه لما يكون بيغير حاجة لكن اصلاح اعتقد هوا مش حريف خالص في النقطة دي !!

[medo_sirion]

ياريت والله انا هفضل ابص علي الموضوع كل شوية اذا تقدر تجيبلي عنوانه لأني عرفت محمود دايهاتسو ده من المنتدي هنا وكان احدي الأعضاء شكر فيه انه امين وكويس وهوا كويس اه لما يكون بيغير حاجة لكن اصلاح اعتقد هوا مش حريف خالص في النقطة دي !!

ده ايميل مهندس سيد الفراش اللى موجود فى الحرفيين:

sayedfarash@gmail.com


مركز الفيروز لاصلاح السيارات اليابانية

مهندس السيد الفراش

بلوك E محل 21, الحرفيين

ت: 26978080

موبايل: 0101003520

[shaltot]

في مكانيكي فوق الممتاز اسمه عادل في شارع احمد عصمت من جسر السويس ومحترم جدا تليفون 0121894422 وعرفته عن طريق د علاء وتليفونه 0122329489 وربنا معاك

[Mahmoud Saloum]

الف شكر على النصيحة ومتزعلش نفسك كلنا بنتعلم من اخطاءنا، مشكلة الدوارة انا اعرف انها من احدى الحاجات الاتية:
1- البطارية
2- طقم الكهرباء وضبط الاسبراتير مش التاكيهات
3- الموبينة
4-ترس الفالام

حاول تراجع الحاجات دى وان شاء الله تتحل

[mohamed_rhem]

شكرا علي النصيحه يا باشا

انا فعلا تقريبا عندي نفس المشكلة

لاني لسه مغير الموتور ولمبه البطاريه مبتنورش ولمبه الزيت مشعرة ومؤشر الحراره مبيقراش سعات يشتغل وسعات ميشتغلش

لكن انا حبقي اوديها للكهربائي بعد اما اظبط التاكيهات

الحاجه بجد اللي تغيظ معظم الصنايعيه بتفتي ومش عارفه المشكله فين وتخليك تصرف فلوس والاخر يطلع العيب من حاجه تانيه

علي سبيل المثال

بعد اما غيرت الموتور طبعا كان من غير ادوات تغذية كنت عملت طاقم شنبر وخرطت الكرنك وكبرت البستم

المهم العربيه مش بتدور

قالو بطاريه

غيرت البطاريه وكمان امبير اعلي من 44 الي 55

المشكله متحلتش

المشكله في المارش عايز جلب طبعا اشتريت واحد جديد وبالمره جبته اسرع واكبر بتاع عربيه 1300 وطلع احسن من بتاعها

مع ان الكهربائي لو كلف خاطره مكنش خلاني اشتري بطارية جديدة

بس تقول ايه

يلا ربنا يسامحهم

[Qmax]

[QUOTE=wael_dev;962212]بالنسبة لموضوع التبريد هيا المروحة بتشتغل بعد النص بشرطة بسيطة قوي لما اكون ماشي علي الواقف اولاني وكده ولما العربية بتسرع المؤشر بيهبط مابين النص والأول بشكل ملحوظ قوي والعربية مبتسخنش اطلاقآ هيا بس بتسخن اول ما امشي اولاني حاجة بسيطة قوي والمؤشر يتعدي النص بشرطة والريادتير ميته موجودة عادي منقصتش

QUOTE]
اولا عربيتي شاريد 92

بعد صلاة عصر يوم الخميس - أمس حصل الاتي

مؤشر الحراره يرتفع قريب من النص ده غير طبيعي وأما امشي واشد بالعربيه المؤشر يرجع تاني للمكان الطبيعي بتاعه
طيب فين المشكله مش عارف مروحه وبتشتغل وكل حاجه تمام
قبل كده حصلت معايا كما ذكرت في الرد السابق لي ولكن المروحه هي السبب

المره دي بقى روحت فاكك الترموستات بتاع المروحه وفكيت المكان اللي راكب فيه الترموستات اللي الميكانيكيه بيقولوا عليه كوعه
وهي مربوطه ب 3 مسامير بعد مافكيتها لقيت ترموستات اخر فيها 2 سوسته زي اللي في غطاء الردياتير روحت مطلعه من مكانه لقيت شكله كده مش مطمني والجوانات بتاعته متأكله طبعا ده اللي نازل فيها متغيرش قبل كده
اتصلت على كذا محل قالوا مش موجود واللي قالي هاته اشوفه وكده
ركبت تاني الكوعه دي لكن من غير ترموستات الميه ده وروحت مركب ترموستات المروحه
طبعا كل ده العربيه لازم تكون بارده خالص عشان الميه اللي فيها هاتنزل عالارض

المهم حطيت ميه تاني وبعد التأكد ان مفيش تسريب من اي مكان
دورت العربيه وانتظرت لحد ماسخنت والمروحه اشتغلت ومشيت بالعربيه
والنتيجه كانت ان مؤشر الحراره والعربيه واقفه ولكن ينزل عن الطبيعي عند الجري

وبصراحه بقت تمام اوي كده لكن هااجيب ترموستات الميه تاني واركبه بس اما اشوف ها القاه فين ولا عند مين معرفش سألت واحد قالي عادي تشتغل من غيره

اسف على الاطاله لكن والله اما الموضوع ده حصل معايا افتكرتك وقولت اقولك انا عملت ايه

[wael_dev]

بجد انا متشكر جدآ ياجماعة لردودكم انا استفدت منها كتير جدآ وبشكر الأخ العضو اللي حطلي نمرة ميكانيكي في شارع احمد عصمت انا هروحله وامري لله لأني روحت لسيد الفراش وهحكي اللي حصل عنده في موضوع منفصل عشان بجد مش عاوزين نعمل دعاية لناس ممكن تكون متستاهلش الدعاية دي !

[shaltot]

بجد انا متشكر جدآ ياجماعة لردودكم انا استفدت منها كتير جدآ [gdwl]وبشكر الأخ العضو اللي حطلي نمرة ميكانيكي في شارع احمد عصمت انا هروحله وامري لله[/gdwl] لأني روحت لسيد الفراش وهحكي اللي حصل عنده في موضوع منفصل عشان بجد مش عاوزين نعمل دعاية لناس ممكن تكون متستاهلش الدعاية دي !

لاشكر على واجب وانشاء الله تلاقي عنده الحل وابقى طمني عملت ايه