ايه رايكوا فى التريوس ياجماعه

[helmy537]

عاوز اعرف رايكوا فى العربيه التريوس والجراند تريوس العربيه دى عمليه وقويه وتكيفها حلو ولا لا ونظامها فى السوق ايه وقطع غيارها وكفاءه موتورها فى السفر ارجو الرد وشكرا :b4_611::b4_611::b4_611:

[M.ABDEEN]

كعربية هي كويسة نسبيا لكن مش زي 4 باي 4 المحترميين شيروكي ولاند كروزر ولاند روفر وخلافه لكن موتورها 1500 سي سي فمش هيديك الشد والسحب اللي متخيله وخاصة ان الشكاوي كتبرة مع التكييف ....
العربية ممكن تكون اعتمادية لكن الثبات بتاعها مش قوي وقطع غيارها نار واعادة بيع وحشة في السوق مع العلم طبعا انها ياباني والتوكيل بتاعها مش قوي انا مش بشررك العربية بس هي دي الحقيقة ومن ناس جربتها وناس معرفة في دايهاتسو ...ونصيحة ممكن تشوف بدائل تانية وده يعتمد على امكانياتك ....اتمنى ان اكون افادتك وانا مش متحامل عليها بس هي الدي الحقيقة وحضرتك طلبت النصيحة

[Imhotep]

ياريت حضرتك تعمل جولة فى قسم الدايهاتسو هتلاقى العديد من المواضيع اللى فيها ملاك العربية بيتكلموا عن ملاحظاتهم على العربية من كثير من النواحى......

[helmy537]

شكر شكر ياحبايبى ربنا يخليكوا لي طب ايه رايكوا فى النيسان صنى 2009

[M.Mosaad]

انا ليا شوية اعتراضات علي كلام الاخ mohammedsamirabdeen و له مني كل الاحترام بالنسبة لاسعار قطع الغيار اعتقد لو قارنا بين اسعار قطع غيار التيريوس و اسعار قطع غيار مثيلاتها في السوق من حيث السعر هتلاقي ان قطع غيارها معقوله بالنسبة للياباني اللي في سعرها و الاوروبي و ممكن الاخ حلمي يسال علي قطع غيار كل نوع و يقارن و يسال كمان علي اسعار العماله هي اللي ممكن تبقي فعلا عاليه في توكيل ديهاتسوا انا معنديش فكرة عن اسعار العماله في توكيل تويوتا او منصور مثلا
بالنسبة للتوكيل التوكيل محترم جداااااااااااا و دي شهادة حق بالنسبة لباقي التوكيلات في مصر هما كلهم وحشين بس بصراحه توكيل ديهاتسوا من احسن الوحشين و خلي بالك انت بتجيب العربيه التوب بتاعتهم و كمان هما معاهم ديهاتسوا بس يعني متخصصين فيها مش معاهم مليون توكيل زي منصور مثلا اقصد مركزين في نوع واحد
بالنسبة للشد و السحب انا متفق مع الخ mohammedsamirabdeen في الموضوع دة انها مش بتاعه شد و سحب بس فيالنهايه هي عربيه عائليه و مينفعشي تتقارن ب الشيروكي او اللاندكروزر لان اساسا مفيش مقارنه دي سعر و دي سعر عايز ديهاتسوا في الشد و السحب عندك السيريون ال 1500 هتكسر بيها الدنيا
بالنسبة لاعادة البيع طالما هتقعد معاك خمس سنين او اكتر فمتقلقشي من اعادة البيع لان مش هتفرق اوي معاك ساعتها و هيبقي ليها سوقها و سعرها بس لو هتبيع خلال سنه مثلا و تغير يبقي بلاش خليك في المعروف اللي المصريين بيحبوة زي المتسوبيشي و التويوتا
العربيه الناس كلها بتشكر فيها اللي عندهم يعني و مجربنها -- التوكيل بيعمل عروض كتير فالعربيه في انتشار جاجد جدا و اعتقد دة باين في الشارع حاول تعد كام عربيه ديهاتسوا بتشوفها كل مشوار يمكن المظلومه جدا عي الماتيرا مع انا في رايي عربيه روعه و شكلها تحفه
علي فكرة انا معايا سيريون يعني مش متعصب للتيريوس و لا حاجة بس انا ركبتها مرة فعلا كانت مريحه جدا للاعصاب و علوها عن الارض جميل مناسب لشوارعنا الرائعه
بالنسبة للنيسان صني مفيش خلاف عليها عربيه حلوة و جامدة بس مشكلتي معاها الوحيدة ان الشركه مبتغيرشي نفس الشكل من زمان يعني مبتغيرشي عربيه نفس الموديل و السنه دي قال ايه غيروا شكل الفوانيس يافرحتي يعني كل الشركات نزلت اشكال جديدة تماما و هما زي ماهما مفيش جديد ممكن تبص علي التيدا لو حابب نيسان دة راي
و خد بالك كمان من ال SX4 السوزوكي السيدان عربيه تحفه و تكييفها بموتور منفصل عن موتور العربية و 1600 و الشنطة 520 لتر كبيرة جداااا و سعرها كويس مقارنه بمثيلاتها في السعر

[helmy537]

الف الف شكر يامحمد باشا وعلى تغطيتك الجميله للموضوع انا حاسس انى ضيعت من وقتك كتير على ماكتبت الكلام الجميل ده بشكرك كمان مره من قلبى

[madoo]

والتوكيل بتاعها مش قوي

يا راجل

انا نفسى اعرف انت قولت الكلام ده على اساس ايه على فكره وعن تجربه توكيل دايهاتسو محترم جدا

[M.ABDEEN]

يا باشا مش قوي لا تساوي انه مش محترم ان قصدي ملهوش فروع كتير وقطع الغيار فيه غالية انما من معارفي هو في خدمة مابعد الصيانة المتابعة كويسة جدا لكن انا مقصدش عدم الاحترام يا باشا

[madoo]

يا باشا مش قوي لا تساوي انه مش محترم ان قصدي ملهوش فروع كتير وقطع الغيار فيه غالية انما من معارفي هو في خدمة مابعد الصيانة المتابعة كويسة جدا لكن انا مقصدش عدم الاحترام يا باشا

هو موضوع الفروع ليه فروع كتير

المركز الرئيسى بيخدم جزء كبير من القاهرة وان شاء الله هانت هيتم افتتاح فرع ابو رواش هيبقى قريب للناس بتاعت اكتوبر وكده

الدلتا بيخدمها بفرع المحله

الاسكندريه مركز الرزق تقريبا



قطع الغيار انا معاك فعلا انها غاليه وانا كل لما يكلمونى او اروح بأكد على النقطه دى بس لو قارنها باخوانها اليابانى هتبقى معقوله اوى


على العموم محصلش حاجه ولا يهمك يا باشا انا اسف :b4_007:

[helmy537]

احترت الوقتى يعنى العربيه حلو ولا لا وتكيفها عامل ايه

[M.Mosaad]

حلمي باشا كلنا احتارنا نفس حيرتك دي و احنا بنشتري
احسن حاجة في رايي اقعد و هات ورقه و قلم و اكتب انت محتاج ايه من العربيه اكتب كل النقط اللي بتخطر علي بالك يعني شد وسحب و تكييف و ثبات و وسع و علو عن الارض و توكيل و اسعار عماله و قطع غيار و اعادة بيع شياكه ..... الخ و في الاخر هتكتشف ان مستحيل تلاقي عربيه فيها كل دة فتتوكل علي الله و تجيب عربيه فيها معظم الاختيارات دي يعني ممكن تتنازل عن حاجات فصاد حاجات تانيه
بالنسبة بقي للكتببف هو كويس جدااااا مفيهوش مشاكل
و ربنا يوفقك

[madoo]

يا باشا انا معايا ماتيريا مش تريوس وبالتالى انا مش هنحاز ليها لانها مش تهمنى

بص يا مان

التريوس عربيه محترمه جدا 4wd يابانى 100%
شكل شبابى ملوش حل اوبشن كتير حلوة توكيل محترم
شنطه واسعه مع امكانيه طى الكنبه كمان
عيوبها مش بتاعت شد جرى زى معظم الفور باى فور
الثبات مش قد كده فى الملفات الخطيره لانها عاليه وكمان ده هتلاقيه فى كل الفور باى فور
شوف انت عاوز ايه وحدد
وبوقلك بجد انزل واركب العربيه انا ركبتها بجد تحفه ان شاء الله هتعجبك

[م.محمد شافعي]

كعربية هي كويسة نسبيا لكن مش زي 4 باي 4 المحترميين شيروكي ولاند كروزر ولاند روفر وخلافه لكن موتورها 1500 سي سي فمش هيديك الشد والسحب اللي متخيله وخاصة ان الشكاوي كتبرة مع التكييف ....

العربية ممكن تكون اعتمادية لكن الثبات بتاعها مش قوي وقطع غيارها نار واعادة بيع وحشة في السوق مع العلم طبعا انها ياباني والتوكيل بتاعها مش قوي انا مش بشررك!!!!!!!!!!!!!! العربية بس هي دي الحقيقة؟؟؟؟؟؟؟؟ ومن ناس جربتها وناس معرفة في دايهاتسو ...ونصيحة ممكن تشوف بدائل تانية وده يعتمد على امكانياتك ....اتمنى ان اكون افادتك وانا مش متحامل عليها بس هي الدي الحقيقة وحضرتك طلبت النصيحة

السلام عليكم و رحمة الله و بركاته
انا بصراحه بعد ما فتحت الموضوع و كنت لسه هتكلم عن عيوب العربيه ومميزاتها بس للاسف قريت الرد اللي مكتوب ده و قعدت اضحك نص ساعه و بعد كده قررت اني مش هشارك في الموضوع بعد الرد الهايل ده بس انا ارجو صاحب الموضوع انه يروح يشوف العربيه بنفسه اولا و يقرء الموضوعات اللي مكتوبه هنا في المنتدي عنها بعيوبها و مميزاتها و ياريت كمان تروح كام توكيل كده و تقارن الاسعار و المعامله و قطع الغيار وكده و روح كل التوكيلات سواء كويسه او وحشه حتي كيا ممكن تروحها مش مشكله.
وربنا يوفقك و تصل للقرار السليم و طبعا لازم يكون مبني علي احتياجك الفعلي و امكانياتك و كمان ظروف استخدامك للسياره.
سنكون سعداء عندما توفق في اختيار سيارتك و سنكون احسن اذا كنت من ملاك دايهاتسو تيريوس.
بالتوفيق ان شاء الله

[madoo]

السلام عليكم و رحمة الله و بركاته
انا بصراحه بعد ما فتحت الموضوع و كنت لسه هتكلم عن عيوب العربيه ومميزاتها بس للاسف قريت الرد اللي مكتوب ده و قعدت اضحك نص ساعه و بعد كده قررت اني مش هشارك في الموضوع بعد الرد الهايل ده بس انا ارجو صاحب الموضوع انه يروح يشوف العربيه بنفسه اولا و يقرء الموضوعات اللي مكتوبه هنا في المنتدي عنها بعيوبها و مميزاتها و ياريت كمان تروح كام توكيل كده و تقارن الاسعار و المعامله و قطع الغيار وكده و روح كل التوكيلات سواء كويسه او وحشه حتي كيا ممكن تروحها مش مشكله.
وربنا يوفقك و تصل للقرار السليم و طبعا لازم يكون مبني علي احتياجك الفعلي و امكانياتك و كمان ظروف استخدامك للسياره.
سنكون سعداء عندما توفق في اختيار سيارتك و سنكون احسن اذا كنت من ملاك دايهاتسو تيريوس.
بالتوفيق ان شاء الله

على فكره انا مش معاك فى النقطه دى انت كده سيبته المفروض انك اكتر واحد فيهم معرفه بالعربيه فمش معنى ان حد قال اى كلام فى اى كلام وهو لايعرف حاجه عن الوكيل او السياره فتتضايق ومش تفيد الراجل لو تقدر تساعده يا اخى ساعده

[م.محمد شافعي]

الي الاخ العزيز صاحب الموضوع و الاخ العزيز مادو
سوف اوجز لك تقيمي للسياره في نقاط:
1- طبعا هي سياره من فئه الدفع الرباعي المدمج و معني مدمج انها صغيرة الحجم بالنسبه لفئة الدفع الرباعي و ذلك لكي تتعامل بسهوله داخل المدن و الشوارع العاديه المزدحمه و طبعا الموتور صغير للتوفير في استهلاك الوقود.
2- بما انها سيارة دفع رباعي فامكانيتها في سباقات السيارات معدومه بمعني انها لم تصمم او تصنع لتشترك في جنون سباقات السرعه و لكن سحب السياره جيد جدا في رايي و في حدود المعقول بمعني ما لا يعرض قائد السياره للخطر (من الاخر مش بتاعة شد و حرق و الكلام الف-------غ ده.
3- السياره ارتفاعها عن الارض يقيها من كافة مشاكل الشارع المصري و الكثيره جدا و في كل المناطق حتي علي الطرق السريعه من مطبات و حفر و خلافه.
4- بما ان السياره دفع رباعي مستمر فذلك قد وفر لها ثبات جيد و ايضا قوه ستشعر بها و بقوه و خصوصا في بعض الحفر او المدقات الصعبه و التي تضطر كافة السيارات الملاكي العاديه الي تجنبها او تمشي كالسلحفاة و هي تعبرها وطبعا انسي العرز تماما في الرمال الا اذا طلبت من السياره اكثر من قدرتها و عاملتها علي انها لاند كروزر مثلا بدون النظر لاكثر من مليون جنيه فرق سعر.
5- ماكينة السياره 1500 سي سي و هي تعتبر في نظر الكثيرين ضعيفه نسبيا ولكن العبره ليست ب الرقم و لكن بالعزم و القوه الفعليه للموتور نظرا لاختلاف التكنولوجيا بين المحركات.
6- السياره من الدخل جيده جدا و مريحه وفي رايي لا يقارن بها سوي الكورولا الشكل القديم والتي تعد اوسع سياره في فئتها.
7- قطع الغيار غاليه نسبيا و لكن و عن تجربه معمره جدا لانها بالطبع ياباني و ليست كوري كما يعلم الجميع.
8- اسعار الصيانه مرتفعه و لكن انا شخصيا معظم الاوقات اكون راضي عما يجري في التوكيل من صيانه و من مستوي معامله او مستوي الصيانه نفسها.
9- لقد تعرضت لبعض المشاكل بخصوص عدم توفر بعض قطع الغيار نظرا لتأخر وصولها من الخارج كما يقولون في التوكيل و لكن الحقيقه ان طريقة المعامله الجيده جدا و كأنك و دائما زبونهم المفضل و طبعا ذلك مع كافة العملاء تجعلك تتقبل احيانا كل شئ.
10- هناك متابعه مستمره و تقييم من جانب التوكيل و يتصلو كثيرا لمتابعة عملائهم و الحقيقه ان مركز الصيانه يساعد كل من لديه مشكله و بصوره فوق الرائعه.
11- تكييف السياره جيد جدا و اعتقد ان التكييف الجديد التاتش افضل .
12- السياره شكلها مميز جدا و موجوده و بكثره و لكن توكيل يحافظ علي مستوي السياره و يقوم بالبيع بخطه منتظمه و ليس بمبدء بيع الخضروات مثل السيارات الصيني او بعض السيارات الكوري او حتي السيارات الياباني التي كرهها الناس من كثرة ما تم بيعها و تواجدها في الشارع.
انا شخصيا اري ان السياره جيده جدا بالنسبه لاحتياجاتي و بالنسبه لاسرتي و عملي و امكانياتي و توكيلها جيد و من يعملون في مركز الصيانه ممتازين جدا و اسعار قطع غيارها مرتفعه و لكن جودتها عاليه و اسعار صيانتها مرتفعه نسبيا اما اعادة بيعها فأعتقد انها ليست سريعه و لكن ليست سيئه لانها ليت سياره استهلاكيه او من السيارات التي توجد عند البقال كما يقال و طبعا كما يعلم الجميع ان سياسة البيع في مصر متخلفه و عقيمه و التقييم علي اسس جار عليها الزمن.
قبل ان انسي العيب الوحيد الذي رأيته في السياره و لكن امام كل ما ذكرت من مميزات قد تغاضيت عنه هو ان العفشه اذا ركب احد معك في الخلف تكون ناشفه قليلا و من يجلس في الخلف يشعر بالمطبات اكثر من الجالس في الامام و ذلك لانها عفشة سيارة دفع رباعي و لكن كان يمكن ان تكون افضل.
يارب اكون افدتك ان شاء الله