الليجاسي كويسه و لكن ...

[Kazzaz]

علي فكره موضوع العزل في السوبارو عالي جدا و احسن من السيفيك و الجولف لاني مجرب الاتنين دول .. اعتقد موضوع الراحه بالذات لا تستطيع اي سياره منافسه المرسيدس حتي البي ام ..

بس انت لازم تجرب السوبارو يا احمد علي فكره بحسك متحامل عليها من غير ما تجرب ;)

[Ahmed Hassan]

هو انا هروح فين وسط ملاك السوبارو ههههههههههه
لا بص يا استاذ احمد..انا ركبتت ال c280 عربيه نزلت منها مبلم...السيفيك بالنسبالها صفر على الشمال فى الراحه والعزل والعفشهبجد رهيبه...عشان كده سعرها عالى...فأنا فى اعتقادى ان السوبارو مش هتبقى بنفس الكفأئه والله اعلم..لان المرسيدس حاسس انها سيستم تانى خالص...انا عمرى ماركبت سوبارو للاسف...بس المرسيدس حاجه روعه...وشكراااااااا

انا مجبتش سيرة العزل و لا الراحة و بردو نزلت من الـ 320 و السي 280 مبلم. استمتعت بالبي ام اكتر من المرسيدس كتير مع ان عزل المرسيدس احسن و طبعا الاتنين احسن من السوبارو في العزل و الراحه.

انا بتكلم في حاجه تانيه خاااالص

[ahmad--ezzat]

لا مهو حضرتك انا اقصد فى الراحه حته الثبات وعدم الشعور بالعالم الخارجى...انا حاسس انى كنت فى الاوضه عندى :)

[Kazzaz]

انا فاهم ..مانا بقولك عزل السوبارو جتمد في حته انك مش بتحس بالدنيا بره بس اكيد مش هايكون زي المرسيدس بس بتكلم انه احسن من السيفيك و الجولف علي سبيل المثال

[ahmad--ezzat]

السبارو من وجه نظرى انا...ناقصها 3 حجات....
1-ابو غالى يتحسن شويه
2-الدعايه بتاعت العربيه تبقى افضل بالاضافه ان اسعار قطع الغيار متوفره وتبقى سهله مش هقول تبقى رخيصه لان زيها زى عربيات كتير
3-ينزلوها 1600 125 حصان مثلا زى العربيات التانيه اللى فى فئتها ويبعدو عن ال 1500 دة خالص

اعتقد كده تبقى عربيه كامله والكمال لله وحده

[Mohamed.Ramah]

السوبارو عربية محترمة جدا وبالنسبة للسعر فدة تقديريا من الشركة الام ومبتغشش عملائها لانها ماركة محترمة ولاتقل عن الاوروبى فى شىء سواء ميجان vw bmw مرسيدس كل شركة من دول ليها مواصفاتها وامكانيتها وسوقها وعملائها اللى بيتميز بشىء عن الشركة الاخر ى

[Fadi Ezzat]

اقرب مرسيديس ليها ب ٣٢٠ الف (رسمي) و ٣٤٥ في المعارض و ١٦٠٠ سي سي

عموما محدش من اللي بيركبو سوبارو بيحسبها كده ابدا

اوك اقرب مرسيدس ليها 1600
بس مش اى 1600
دى كمبورسور

[Youssef.Awad]

علي فكره موضوع العزل في السوبارو عالي جدا و احسن من السيفيك و الجولف لاني مجرب الاتنين دول .. اعتقد موضوع الراحه بالذات لا تستطيع اي سياره منافسه المرسيدس حتي البي ام ..

بس انت لازم تجرب السوبارو يا احمد علي فكره بحسك متحامل عليها من غير ما تجرب ;)

طب أنا بقى أعمل إيه؟!!!!
بأحس بيها وروحى بتتخطف بس لمجرد إن عربية سوبارو عدت من قدام عينيا من غير أما أجربها للأسف
السوبارو دى عربية رهيبة وأنا شايف إنه من الظلم مقارنتها بأى عربية تانية مع احترامى للجميع ...
وربنا يسهل كده وأركب فورستر أو ليجاسى فى يوم من الايام
بس يكون برة بلدنا المحروسة

[أبو عبدالله]

الفكرة كلها إن البي إم والمرسيدس بيتجمعو في مصر فجماركهم قليلة تقريبا 70%
أما الليجاسي عشان مستوردة فجماركها 235%
يعني مثلا في السعودية الليجاسي ب 70 ألف ريال والبي إم 320 ب 150 ألف ريال وده الفرق الحقيقي مابينهم

بالظبط كده
دي عربيات تجميع محلي يعني مصري فجماركها قليلة جدا مقارنة بعربية تانيه انتاج بلدها يعني انتاج خارجي خارج مصر وجماركها مضاعفة

يعني شوف البي ام والمرسيدس دول لو انتاج الماني هيبقوا بكام ؟؟؟؟؟
هتتصدم

معلش بس انا عايز اقول حاجه,
انا عن نفسي لو عايز اشتري عربيه,
بصراحه هشتري العربيه الي بحبها سواء هتكون بعامل نفسي او عملي,
ده طبعا ميمنعش ان يكون في منطق وانا بشتري يعني مثلا مش عشان بحب الفيرنا مجيبش بي ام !!!!
بس انا نفسي نبطل عقدة البي ام و المرسيدس و الياباني و الالماني بقه عشان نقدر نتقدم,
عن نفسي لو الصين عملت عربيه محترمه و كلفتها جامد ايه المانع اني اشتريها!!!
الفرق في ثمن المرسيدس و البي ام عن اي عربيه تانيه هما ,
1-ثمن العلامه الغنيه عن التعريف
2-تعمدهم زيادة الرفاهيه لانها فعلا سيارات رفاهيه,
يعني المواد الخام لازم تكون من اغلى الخامات حتى لو مش باينه او مش مستعمله لكن اهم حاجه ان العربيه كلها معموله و متكلفه و طبعا ده يديها فخامه و سعر,

انما في رأيي الشخصي لو معايا 350 هجيب امبريزا wrx,
انا عن نفسي بفضلها عن الفئه التالته,
يمكن عشان انا مش بستلطف الفئه التالته (رأي شخصي)
و هفضلها عن الc-class و الاودي a4 لان انا بحبها و عارف ادائها كويس قدام العربيات دي,
انما لو ما اتاحتليش الفرصه اجيبها هجيبهم ان شاء الله ( وعد مني ),

سؤال للاستاذ احمد نوبيرا : هل حضرتك سقت السي كلاس و الليجاسي قبل كده بحيث تقدر تحكم على الاستابيليتي بتاعهم؟

تنويه: كل الكلام الي فوق ده بيعبر عن رايي الشخصي و انا مسؤول عنه
(عشان محدش ييجي يقتلني و يقوللي انت بتقارن سوبارو ببي ام!!! دي الماااااااااني )

الله يفتح عليك
فعلا كتير منا مش بياخد باله ان عربيات مرسيدس وبي ام رفاهية جدا
يعني بيعتنوا بأي حاجه موضوعه في العربيه حتى لو ليس لها أهمية
ولكن لازم تبقى افضل واحسن خامة موجوده في وقتها
طبعا ده بيعمل تكلفة عالية جدا على ثمن العربيه

بص يا محمد,
الليجاسي من نفس الفئه باعة الكامري و الاكورد,
الكامري تقريبا بـ650 و الاكورد ب460 تقريبا,
واخد بالك ان في فرق 300 الف جنيه بينهم و بين الليجاسي؟!!!
المشكله ان هنا في مصر عندنا عقدة المرسيدس و البي ام,
تليها عقدة دي الماااااااااااااااااني,
تليها عقدة دي ياباااااااااااااااااااني,
السبب في ان المرسيدس و البي ام منتشرين هنا هو انهم تجميع محلي,
فده مديهم ميزة انهم يقللوا من الثمن جامد لانهم لا بيتحاسبوا بنفس الضريبه ولا الجمارك ولا سعر الايد العامله,
فده مخلي الكامري مثلا سعرها اغلى او قريب جدا من سعر الe-class !!!!!!
فطبعا طبعا طبعا محدش هيفكر فيها,
انما سعر 350 على الليجاسي انا مش شايفه غالي قوي الصراحه (في ظل هبل الجمارك )
الي يخلي عربيه passat 1,4 بـ 275 الف
او الرينو اللاجونا الـ1,6 بـ235 الف
مش عايز عريه 2,0 تبقى ـ350 !!!

بالظبط كلام جميل

انا واحد من الناس اللي بيعتبر ان السوبارو عربيات فرصه في بلدنا لمعجبيها لأن ثمنها رخيص مقارنة بالخارج ومقارنة بالعربيات المثيلة في نفس الفئة في بلدنا وفي نفس الفئة السعرية ايضا في بلدنا

ليجاسي بــ 350 الف انا شايفها فرصه كويسة جدا لأن العربيه أمكانيات أكتر من انها رفاهية وفي نفس الوقت ماتور 2000 سي سي

[حماده المصري]

هوه في حقيقه الاسعار

320 مثلا في الامارات

سعرها اغلى من اليجاسي اعلى فئه سته سلندر حوالي 20 الف

يعني دي ب 100 او 110 والتانيه اقل من 130

بس طبعا الي بيفكر في بي ام برا بيجيب من 325 وانت طالع وبتوصل وبتعدي 200 الف كمان على حسب الاوبشن والمحرك والكوبيه والكابورليه

الكامري اعلى فئه برا ب 100 برضو بس للاسف هما لغوا ال v6 وبينزلوه في عربيه تانيه برضو اسمها اوريون وفي النهايه هي كامري بس اختلاف مسميات

والاكورد برضو في نفس رينج ال 100 الف 110 اعلى فئه

والخليج مفيهوش جمارك نهائي او لو فيه نسبه بسيطه جدا جدا مش هتعدي 5 او 10 %

يعني لو من غير جمارك تماما في مصر هتبقى اعلى فئه ليجاسي h6 ب 170 الف وال 320 200 الف والليجاسي مليون مره افضل اساسا دي كاتيجري اعلى بس مدام في جمارك والاسعار متقاربه

ليجاسي + a4 + سي كلاس +320 سعره فئه جمركيه وحده

ليجاسي سعرها كويس لانهم فئه وحده بس هي محتاجه فعلا تبقى ارخص شويه عشان تتسوق احسن

بس سر علو مرسيدس وبي ام واودي هو ان تركيزهم منصب على كل حاجه ازاي تعمل جوده وديزين داخليين مفيش زييهم فعلا بمعنى ان الجوده تكون اعلى جوده في العالم وخد عندك العفشه ازاي تعمل عفشه مريحه وثابته في نفس الوقت وتطلع احسن عفشه في العالم

وزود على كده ازاي تبقى كل حته في العربيه محرك عفشه اجزاء السياره تبقى معمره عن اي حاجه في العالم
في موقع تقييم سيارات بيتكم عن السي الجديده بيقولك عشان تنزل للبيع جربوها كااااااااام مليووون كلييييووو والرقم خرافي وانا مش هذكره بس لو اعتبرنا انهم جربوها 2 او 3 مليوون كيلو بدون اي مشاكل تذكر ف هي كده عربيه مفيش زيها 2 في الدنيا انك هتشتري عربيه ليك ولعيالك وعيال عيالك ومش هتجيب موتور :)

وعموما الدفع الرباعي افضل من الامامي او الخلفي عشان كل العجل بيوصله دفع علطوول وحتى لو عجله هتعووم بيتم تعديل الدفع بحيث ان العربيه تكمل مسيرتها المرعبه

بس برضو بي ام ومرسيدس عملت حساب الناس الي بتحبهم وبتحب الرباعي في نفس الوقت

4motion في مرسيدس والعربيات الرباعي الي في بي ام بيتكتب عليها xi بدل i يعني 320xi

عموما انا من الناس الي مش بتقتنع اقتناع كلي بهواجس البي ام والمرسيدس لا انا لو معايا فلوس الليجاسي هجيبها وهنفض لكل الماركات

بس سر ارتفاع مرسيدس وبي ام هو اعلى جوده في العالم وعمرنا ما هنشوف وحده فيهم رخيصه عشان عمرهم ما هيتنازلوا عن المعايير الي بنوا عليها عربياتهم

[حماده المصري]

بالنسبه للناس الي مش بتقتنع بالسوبارو وروعتها ينطبق عليهم مثل

الي ما يعرف الصقر ...يشويه

[Youssef.Awad]

ياجماعة خلاصة الكلام ده كله فى كلمتين وبس !!!
العربية دى منتج أو سلعة Product
وأسباب فشل تسويق أى سلعة أو منتج حاجة من ثلاثة كما يقول دارسى علم التسويق فى العالم كله:
1. المنتج نفسه يكون وحش يعنى من الآخر عربية فاشلة وزبالة
I.E:Product=IMPREZA,LEGACY,FORESTER
2. الشركة اللى بتعمل المنتج ده تكون فاشلة وتعبانة ومش عارفة تصنع حاجة عدلة
I.E:Company=SUBARU
3. المسؤول عن تسويق هذا المنتج فى السوق هو اللى فاشل ولا يعرف جيدا كيف يسوقه ولا يبيعه
I.E:Distributer or Agant in market=ABOGHALI IN EGYPT

من رأيى بقى لو اختل أى عنصر من العناصر الثلاثة السابقة فسوف تقل المبيعات أو تتأثر بشكل أو بآخر
فمن الممكن أن يتسبب الوكيل فى موت طراز بعينه أو اسم الشركة كليا والدليل عندما ينتقل التوكيل من شخص إلى شخص آخر نجد أن هناك اختلاف فى السياسة والإدارة ... وهذا ما أقصده فى حالة سوبارو فى مصر .... المشكلة فى أبو غالى نفسه !!!!
ومن الجائز أن يتسبب الوكيل فى زيادة مبيعات شركة فاشلة عالميا ومهددة بالافلاس فى احد الطرازات
وأيضا لكل جواد كبوة .. فممكن أن تنتج شركة ضخمة ورائدة فى السوق طراز فاشل لا يلقى نجاح ولا يحصد مبيعات تذكر

الخلاصة أن السوق له معايير ويجب دراسته بعناية وتحديد هدف بعينه يجب تحقيقه فى زمن بعينه
وإلا فيجب على أى لاعب أن يترك الملعب لغيره طالما لا يستطيع أن يهز الشباك فيكفيه ذلك ويزيد
وشكرا ...

[Ahmed Hassan]

بس برضو بي ام ومرسيدس عملت حساب الناس الي بتحبهم وبتحب الرباعي في نفس الوقت

4motion في مرسيدس والعربيات الرباعي الي في بي ام بيتكتب عليها xi بدل i يعني 320xi

متهيألي الدفع الرباعي بتاع مرسيدس اسمه 4matic لكن الـ 4 motion بتاع ماركه تانيه بس مش فاكر ايه

عموما حتى انظمة مرسيدس و بي ام و تقريبا معظم انظمة الدفع الرباعي ما عدا سوبارو هي انظمة دفع رباعي (غير مستمر). يعني في مرسيدس العربيه بتفضل دفع خلفي لغايه ما يظهر احتمال فقدان للسيطره او فقدان تماسك فبيشتغل الدفع الرباعي.

سوبارو الوحيده اللي فعلا دفع رباعي مستمر و يا سلام لو مانيوال. نظام السوبارو المانيوال للدفع الرباعي بيسموه "bullet proof system" و ده بسبب جودته و طول عمره

اما موضوع الصقر عندك حق فيه

[Youssef.Awad]

الـ 4 motion بتاع ماركه تانيه بس مش فاكر ايه

بتاع مجموعة فولكس فاجن
وموجود فى الباسات أو سكودا سوبيرب
وفايتون وجولف كمان

[egytamer]

السوبارو عربية جميلة للي يقدرها واعتقد ان العربيات الي بتقارنوها مع بعض مفيش تشابة بينها غير في السعر ودة غلط لان في عوامل مبوظاة الي هيا الجمارك